Read Tzotzil San Mateo 24 Bible Online

San Mateo 24 - Tzotzil bible

San Mateo 24

¹C'alal loc' batel ta ch'ulna ti Jesuse, ti ta xa xanav batele, nopaj talel ti yajchanc'optac ti xch'ay no'ox yo'ntonic ta sq'uelel ti ch'ulnae.

²—Ti jech ta xavilic scotol li'e, ta xcalboxuc ava'iic ta melel, ta sta yorail mu jbejuc ton cajal ta xcom ta sba ti yan tone, ta xlilij scotol —xi ti Jesuse.

³Ts'acal to batic ta vits Olivos, tey c'ot chotluc ti Jesuse. Nopajic talel ti yajchanc'optaque, ti xi slecoj sjac'beique: —Albun ca'icutic, ¿c'usi ora ta xc'ot ta pasel taje? ¿C'usi svinajeb ti ta xacha'sut talele? ¿C'u s'elan svinajeb ti slajebal c'ac'ale?

⁴Xi tac'av ti Jesuse: —Bijanic me, mu me buch'u xaslo'laoxuc.

⁵Yepal no'ox ta xtalic ti buch'u ta sbis sba jech c'u cha'alune, ti xi ta xalique: ‘Vu'unun ti Cristoe.’ Yepal ta slo'la ti jnaclejetique.

⁶Ti vo'oxuque ta xava'ibeic sc'oplal ti oy la leto le'e, oy la leto taj toe. Mu xaxi'ic un, yu'un jech ono'ox ta xc'ot ta pasel, ja'uc le'e, ma'uc to yorail ti slajebal c'ac'ale.

⁷Ti jun muc' ta lume ta xlic scontrain sbaic xchi'uc yan muc' ta lum. Ti jun ajvalile ta xlic scontra sbaic xchi'uc ti yan ajvalile. Ta xtal vi'nal. Ta xtal chamel. Buyuc no'ox oy ti niquele.

⁸Sliquebal to vocol ma' ti va'i s'elan taje.

⁹“Ti vo'oxuque ta xa'aq'ueic ta c'abal. Ta xavich'ic ilbajinel. Ta xavich'ic milel. Buch'uuc no'ox xti'et sjol ta atojolic ta jventa.

¹⁰Ti jech taj une, yepal ta xch'ay ta yo'ntonic ta yich'el ta muc' ti Diose. Ja' jech xtoc ta scontrain sbaic. Ta xac'an sbaic ta milel.

¹¹Yepal no'ox ta xvul ta loq'uel ti jlo'lavanej j'alc'opetique, mu albajuc ta slo'la ti jnaclejetique.

¹²Ta x'ayan ep ta tos mulil. Yepal no'ox ti buch'utic ta xch'ay ti syail xc'uxul yo'ntonique.

¹³Ja'uc ti buch'u staoj o yav jun yo'nton xcham xlaje, ja' ta xcol.

¹⁴Ti lequil ach' c'op sc'oplal ti ventainel yu'un ti Diose, ta xich' puquel ta sbejel banomil yo' jech ta sna'ic scotolic ti oy coltaele. Va'i un, ta xtal ti slajebal c'ac'ale.

¹⁵“Ti buch'u ta sq'uel ti c'u s'elan laj sts'iba comel ti j'alc'op Daniele, ta xa'ibe smelol c'u cha'al. Ja'uc le' une, c'alal ta xavilic ti ta xva'i ta ch'ulna ti muc'ul j'ac'vanej ta vocole,

¹⁶va'i un, ti buch'u nacalic ta Judeae, jatavicuc batel ta vitstic.

¹⁷Ja'uc xtoc ti buch'u oy ta xcha'cojal snae mu xyal talel ta sloq'uesel ti c'usi ta xtun yu'une.

¹⁸Ti buch'u oy ta yosile mu sut talel ta stamel ti sc'u'e.

¹⁹Ti jech c'ac'al taje, abol sba ti antsetic ti buch'utic xchi'uc ti yolique xchi'uc ti buch'utic ta to xchu'un ti yolique.

²⁰Ti vo'oxuque, c'anbeic ti Diose ti ma'ucuc ta yorail sictic ta xajatavic batele, ti ma'ucuc ta sc'ac'alil cuxob o'ntonale.

²¹Mu no'ox albajuc ti vocol ta xtale, ti sba to velta jech ta xich' svocol ti jnaclejetique, ja' mu sta ti ta sliquebal banomile. C'alal mi ech'e, mu xa sta jech.

²²Ti manchucuc ta sbic'tajes vocol ti Diose, mu'yuc buch'u junucal ta xcolic. Oy bu ta sbic'tajes ti vocole ta sventa xc'uxul yo'nton yu'un ti buch'utic ti t'ujbilique.

²³“Mi oy buch'u xi ta xalboxuque: ‘Q'uel avilic, li' xa oy ti Cristoe’, mi mo'oje: ‘Le' xa oye’, mi xayutique, mu xach'unic.

²⁴Yepal no'ox ta xvul loq'uel jlo'lavanejetic li' ta banomile, ta sbis sbaic ta Cristo, ta sbis sbaic ta j'alc'opetic. Yepal no'ox ta xaq'uic iluc senyailetic, xchi'uc oy c'usi ch'ayal ta xc'ot o'ntonal yu'un, yo' ta slo'laic ya'i ti buch'utic t'ujbilic yu'un ti Diose.

²⁵Laj xa jpoco'alboxuc ava'iic ti jech ta xc'ot ta pasele.

²⁶Jech o xal un, mi oy buch'u xi ta xalboxuque: ‘Q'uel avilic, le' xa oy ta xocol banomil’, mi xayutique, mu xabat ti bu taje. Mi xi ta xalboxuque: ‘Li' xa oy ta jun nae’, mi xayutique, mu xach'unic.

²⁷C'alal ta sta yorail ta xicha'sut talel ti vu'un co'ol j'elantique, scotol ta xilic co'ol s'elan sac tsel xvinaj xjaplajet xa ta vinajel ta sloq'ueb c'ac'al, ta smaleb c'ac'al.

²⁸Ti bu oy ti animae, tey chba stsob sba ti xulemetique.

²⁹“C'alal mi ech' no'ox yorail ti vocole, ta x'ic'ub sat ti c'ac'ale. Ti ue mu xa xac' ti xojobale. Ti c'analetique xlaj bajicuc yalel tal ta vinajel. Scotol ti c'usitic oy ta vinajele xlaj nicanuc.

³⁰Va'i un, oy yorail ta xvinaj ta vinajel ti ta xicha'sut talel ti vu'un co'ol j'elantique. Scotol ti jnaclejetic oyic ta sjoylej banomile, batem xch'ulelic ta xi'el xchi'uc ta x'oq'uic. Ta xiyilicun ta xital ta ba toc xchi'uc jmuc'ul jlequilal.

³¹Ja' ta jpas ta mantal ti caj'ánjeltac ti tsotsuc yoq'uisanic ti yoq'uesique yo' ta stsobic talel ti c'u yepal t'ujbil cu'un ti buyuc no'ox oyic ta xchanjotal ti banomile.

³²“Q'uelo avilic ti xi s'elan ta spas ti jpets icuxe: C'alal ta xavilic ta x'uninaj sc'obtac ti ta sjelta ti yanale, xana'ic lec ti ja' o xa yorail ta xyal talel ti vo'e.

³³C'alal ta xavilic ta xc'ot ta pasel scotol taje, na'ic lec ti vu'un co'ol j'elantique, nopolun xa talel ta ti' na.

³⁴Ta xcalboxuc ava'iic ta melel, scotol ta xc'ot ta pasel c'alal mu to ta xcham ti jnaclejetic li'e.

³⁵Ti vinajele, ti banomile ta xlaj ta x'ech' sc'oplal, ja'uc ti jc'ope, jbel sc'oplal xc'ot ta pasel ti c'usi ta xale.

³⁶“Ti sc'ac'alil yorail taje, mu'yuc buch'u sna'. Mi ja'uc sna' ec ti ánjeletic ti oyic ta vinajele. Mi ja'uc jna' ec ti Nich'onilune. Ja' no'ox sna' stuc ti Totile.

³⁷Ti c'u s'elan c'ot ta pasel c'alal yorail cuxul to ox ti Noee, ja' jech ta xc'ot ta pasel c'alal ta xicha'sut tal ti vu'un co'ol j'elantique.

³⁸C'alal mu'yuc to ox xtal ti nojel ta vo'e, ti jnaclejetic ta banomile, ja' no'ox batem ta yo'ntonic ti ve'el uch' vo'e xchi'uc ti nuplij tsaclijele. Ja' jech laj spasolanic o ja' to c'uxi och batel ta barco ti Noee.

³⁹C'alal sta ti yoraile, mu'yuc ono'ox xa'iic c'uxi tal ti nojel ta vo'e. Ja' to laj ya'iic ti ta xa xnojic ta vo' scotolique, tey laj scotolic. Ja' jech s'elan ta xc'ot ta pasel c'alal ta xicha'sut talel ti vu'un co'ol j'elantique.

⁴⁰Xi s'elan ta xc'ot ta pasel ma' ti yorail taje: Oy chib viniquetic jmoj ta x'abtejic ta yosilic. Jun ta x'iq'ue batel. Jun ta x'ictae comel.

⁴¹Xi s'elan oy chib antsetic jmoj ta xjuch'najique: Jun ta x'iq'ue batel. Jun ta x'ictae comel.

⁴²Ti vo'oxuc une, vic'luc me asatic, yu'un mu xana'ic ti c'usi ora ta xital ti Ajvalilun avu'unique.

⁴³A'yio ava'iic li'e, ti sna'uc ti jun yajval na c'usi ora ta x'och talel ti j'elec' ta ac'ubaltique, julavem o yo' mu x'och ti j'elec' ta snae.

⁴⁴Ja' jech ti vo'oxuc eque, chapalucoxuc me, yu'un mu xana'ic c'usi ora ta xicha'sut talel ti vu'un co'ol j'elantique, yic'al ja' o ta xivul c'alal ma'uc yorail ta xanopique.

⁴⁵“Ti buch'u lequil j'abtele, ta sts'etan xchiquin ta ya'yiel ti ta x'ac'bat sventain comel sna ti yajvale yo' jech ta xac'be sve'el ti xchi'iltac c'alal ta sta yorail ta xve'ique,

⁴⁶xmuyubaj no'ox ti j'abtel c'alal yacal ta spas ti c'u s'elan albil comel ta xvul taeuc yu'un ti yajvale.

⁴⁷Ta xcalboxuc ava'iic ta melel, yaj'abtel ti ajvalile ta xac'be sventain scotol ti c'usitic x'ayan yu'une.

⁴⁸Mi ja' jun chopol j'abtele, ta snop ti jal to sc'an xtal ti yajvale.

⁴⁹Ta xlic yilbajin ti xchi'iltac ta abtele. Ta stsob sbaic ta ve'el ta uch' vo' xchi'uc ti jyacubeletique.

⁵⁰Ch'ayal yo'nton ta xvul taeuc yu'un ti yajvale, ja' ti mu sna' c'usi ora ta xvule.

⁵¹Ta stsitse. Jech ta xc'ot ta stojol jech c'u cha'al ti jpac'taejbaetique. Va'i un, ta xlic oc'uc, xc'uxuxet no'ox liquel ti stanal yee.”