Read Tzotzil San Mateo 25 Bible Online

San Mateo 25 - Tzotzil bible

San Mateo 25

¹Ti Jesuse xi laj yal xtoque: —Ti ventainel yu'un ti Dios ti oy ta vinajele, co'ol s'elan jech c'u cha'al lajuneb tsebetic ti yich'ojic batel ti slamparaic ti chba snupic ta be ti jnupunel vinique.

²Oy vo'ob ti mu'yuc sbijilique. Oy vo'ob ti oy sbijilique.

³Ti vo'ob ti mu'yuc sbijilique, c'alal laj yich'ic batel ti slamparaique, mu xa bu laj yich'ic batel yan aceite yo' ta snojesic yan velta.

⁴Ja'uc ti vo'ob bijique, c'alal laj yich'ic batel ti slamparaique, laj to yich'ic batel yan aceite ta limite.

⁵Jalij ti jnupunel vinique. Jech o xal lic nicavicuc scotolic. Ta jech yepal un och svayelic.

⁶Nopol xa nan o'lol ac'ubal ti c'alal ja' o oy buch'u xi tsots avane: ‘Tal xa ti jnupunel vinique, loc'anic talel, la' nupic ta be.’

⁷Scotol ti tsebetique julavic, lic xchapanic ti slamparaique.

⁸Ja'uc ti vo'ob mu'yuc sbijilique xi laj yalbeic ti vo'ob bije: ‘Ac'buncutic jutebuc avaceiteic, yu'un ti jlamparacutique ta xa sc'an ta xtub ya'i.’

⁹Ja'uc ti vo'ob bijil tsebetique xi laj staq'uique: ‘Mu stac'. Mi ta xcac'cutique, mu xloc' o cu'uncutic, mi ja'uc xa la ta xloc' sventa avu'unic ec un. Ja' lec, batanic ti bu ta xchone. Manic ti ta xtun avu'unique.’

¹⁰C'alal ja' o batemic ta smanel yaceite ti tsebetic mu'yuc sbijilique, ja' o vul ta loq'uel ti jnupunel vinique. Ti bijil tsebetique ochic batel xchi'uc ti jnupunel vinique. Mac xi ti ti'nae.

¹¹Ts'acal sutic tal ti yan tsebetique, xi laj yalique: ‘Cajval, Cajval, jambuncutic ti ti'nae.’

¹²Ja'uc ti jnupunele xi laj staq'ue: ‘Ta melel mu xacojtiquinic.’

¹³Xi to laj sts'ac batel lo'il ti Jesuse: —Vic'luc asatic ti vo'oxuque, yu'un mu xana'ic c'usi ora, c'usi c'ac'alil ta xital ti vu'un co'ol j'elantique.

¹⁴Ti Jesuse xi laj yal xtoque: —Ti ventainel yu'un ti Dios ti oy ta vinajele, co'ol s'elan jech c'u cha'al jun vinic ti c'alal ta xloc' batel ta yan lume, laj sta ta iq'uel ti yaj'abteltac ta yac'bel comel sventain ti staq'uine.

¹⁵“Oy jun yaj'abtel, ac'bat comel vo'ob (5,000) mil taq'uin. Ti june, i'ac'bat comel cha'mil (2,000) ta sep taq'uin. Ti jun xtoque, i'ac'bat comel jmil (1,000). Jech laj spas ti j'abtele, ja' ti c'u s'elan xtojobic ta spiquele. Ti ajvalile loc' batel ta nom.

¹⁶Ti j'abtel ti buch'u laj yich' comel ti vo'ob mil (5,000) taq'uine, lic abtejuc xchi'uc, jolin yu'un vo'ob mil (5,000).

¹⁷Ja' ec ti jun j'abtel ti buch'u laj yich' comel ti cha'mil (2,000) taq'uine, lic abtejuc xchi'uc, jolin yu'un cha'mil (2,000).

¹⁸Ja'uc ti j'abtel ti buch'u laj yich' comel ti jmil (1,000) ta sep taq'uine, ja' no'ox bat sjots'be ch'enal ta banomil, laj snac'be staq'uin ti yajvale.

¹⁹“Ta sjalil to un, sut talel ti ajvalile, lic xchapan cuenta xchi'uc ti yaj'abteltaque.

²⁰Ja' ba'yel c'ot ta stojol ti buch'u laj yich' ti vo'ob (5,000) mil ta sep taq'uine, xi laj yale: ‘Cajval, li' oy ti ataq'uin laj avac'bun comel ti vo'ob (5,000) mil ta sepe, jolin cu'un vo'ob mil (5,000).’

²¹Ti ajvalile xi laj yale: ‘Lec oy. Lequil j'abtelot. Lec laj aventain ti juteb laj cac'bot comele. Jech o xal yepal to ta xcac'bot aventain. Muyubajan, ochan talel ta jtojol.’

²²Ts'acal to c'ot ta stojol ti buch'u laj yich' comel ti cha'mil (2,000) ta sep taq'uine, xi laj yale: ‘Cajval, li' oy ti cha'mil (2,000) ta sep taq'uin laj avac'bun comele, jolin cu'un cha'mil (2,000).’

²³Ti ajvalile xi laj yale: ‘Lec oy. Lequil j'abtelot. Lec laj aventain ti juteb laj cac'bot comele. Yepal to ta xcac'bot aventain. Muyubajan, ochan talel ta jtojol.’

²⁴C'alal c'ot ta stojol ti buch'u laj yich' jmil (1,000) ta sep taq'uine, xi laj yalbe ti yajvale: ‘Cajval, jna' lec ti tsots vinicote. Ta xatsob ti ts'unobal ti bu mo'cot laj ats'une. Jech xtoc ta xatsob ti ts'unobal ti bu mo'cot laj avije.

²⁵Lixi', jech o xal bat jnac' ta lum ti ataq'uine. Li' oy ti ja' avu'une.’

²⁶Ti ajvalile xi laj yale: ‘Ch'ajil j'abtel, chopol j'abtelot. Xana' xa ono'ox lec cac'tic ti ta jtsob ti bu mo'cun laj jts'une, ti ta jtsob ti bu mo'cun laj jvije.

²⁷Ti jechuque, laj avich' batel ta banco ti jtaq'uin yo' oy xa sjol ti jtaq'uin ta xquich' c'alal ta xivule.’

²⁸Jech o xal ti ajvalile xi laj yalbe ya'i ti buch'u tey ono'ox oyique: ‘Pojbeic tal ti jmil (1,000) taq'uin yich'oje. Ba ac'beic ti buch'u yich'oj lajunmile (10,000).

²⁹Ti buch'u oy ono'ox yu'une, ta x'ac'bat to yan yo' yepal no'ox oy yu'un. Ja'uc ti buch'u mu x'abtej xchi'uc ti juteb ac'bate, ta xpojbat sutel ti juteb ac'bile.

³⁰Ti chopol j'abtel li'e, jipic batel ta ic'al osil ti bu ta xoq'uita sbae, ti bu xc'uxuxet ti yee.’ ”,

³¹Ti Jesuse xi laj yale: —C'alal xtal ochcun ta Ajvalil ti vu'un co'ol j'elantique, xojobin no'ox ti cutsilal jlequil ti joyolic ta jxocontac ti caj'ánjeltac ta xichoti ta lequil chotlebal ti bu jun yutsile.

³²Ta stsob sbaic tal ta jtojol scotol ti jnaclejetic ti oyic ta jujun lume. Ta jch'ac ti jnaclejetic jech c'u cha'al ta spas ti jq'uel-chij ti ta xch'ac loq'uel ti xchij ti capal xchi'uc ti tentsune.

³³Ti chije ta xcac' ta jbats'i c'ob, ja'uc ti tentsune ta xcac' ta jts'et c'ob.

³⁴Ti Ajvalilune xi ta xcalbe ya'i ti oyic ta jbats'i c'obe: ‘La'ic ta jtojol ti vo'oxuc la'ich'atic ta c'ux yu'un ti Jtote. Ochanic ti bu ta xventainvan ti Jtote, yu'un jech ono'ox chapanbil ac'oplalic c'alal mu'yuc to ox bu meltsajem ti banomile.

³⁵C'alal ta xivi'naje, laj amalq'uinicun. C'alal ta xca'i taqui ti'ile, laj avac'beicun vo' cuch'. C'alal jcotcovil laj avilicune, laj aviq'uicun ochel ta anaic.

³⁶C'alal ch'abal jc'u' laj avilicune, laj avac'beicun. C'alal jchamelun laj avilicune, ay avu'lanicun. C'alal tiq'uilun ta chuquele, ay aq'uelicun.’

³⁷Va'i un, ti buch'utic oy slequil stuq'uilique xi ta xalique: ‘Cajval, ¿bu laj jmalq'uinotcutic c'alal oyot ta vi'nale? ¿Bu laj cac'botcutic avuch' vo' c'alal oyot ta taqui ti'ile?

³⁸¿Bu laj quilotcutic ti jcotcovilote ti laj quic'otcutic ochel ta jnacutique? ¿Bu laj cac'botcutic ac'u' c'alal ch'abal ac'u'e?

³⁹¿Bu ay jvu'lanotcutic c'alal ip ta xava'ie? ¿Bu ay jq'uelotcutic c'alal tiq'uilot ta chuquele?’

⁴⁰Ti vu'un Ajvalilune xi ta jtac'beique: ‘Ta xcalboxuc ava'iic ta melel, ta sventa ti laj ac'uxubinic ti jun jchi'ile, ti peq'uel yuni c'oplale, vu'un laj ac'uxubinicun.’

⁴¹“Ti vu'un Ajvalilune xi ta jtac'beic ti buch'u oyic ta jts'et c'obe: ‘Ch'aco abaic loq'uel ta jtojol ti bisbiloxuc ta cotol chaval yu'un ti Diose. Sbatel osil, batanic ta c'oc' ti bu chapanbil ta sventa ti pucuje xchi'uc ti yaj'ánjeltaque.

⁴²Yu'un c'alal oyun ta vi'nale, mu'yuc bu laj amalq'uinicun. C'alal oyun ta taqui ti'ile, mu'yuc bu laj avac'beicun vo' cuch'.

⁴³C'alal laj avil jcotcovilune, mu'yuc bu laj aviq'uicun ochel ta anaic. C'alal ch'abal jc'u'e, mu'yuc bu laj avac'beicun. C'alal ipune, c'alal ja' o tiq'uilun ta chuquele, mu'yuc ay aq'uelicun avu'lanicun.’

⁴⁴Va'i un, xi ta sjaq'uique: ‘Cajval, ¿mi yu'un oy la bu laj quilotcutic ti c'alal oyot ta vi'nale, ti oyot ta taqui ti'ile, ti jcotcovilote, ti ch'abal ac'u'e, ti ip ta xava'ie, ti tiq'uilot ta chuquele, ti mu'yuc xajcoltacutic ta xavale?’

⁴⁵Ti vu'un Ajvalilune xi ta jtac'beique: ‘Ta xcalboxuc ava'iic ta melel, ta sventa ti mu'yuc laj ac'uxubinic ti achi'ilique, ti peq'uel yuni c'oplalique, vu'un mu'yuc laj ac'uxubinicun.’

⁴⁶Taj une, ta xbatic ta tojob mulil sbatel osil. Ja'uc ti buch'u oy slequil stuq'uilique ta xbatic ta cuxlejal sbatel osil.”