Read Tzotzil San Mateo 26 Bible Online

San Mateo 26 - Tzotzil bible

San Mateo 26

¹C'alal laj yal ti Jesús ti va'i s'elan taje, xi laj yalbe ti yajchanc'optaque:

²—Ti vo'oxuque xana'ic chib xa c'ac'al sc'an ti q'uin Colele. Ti vu'un co'ol j'elantique ta xiyaq'uic ta c'abal yo' ta xisjipanic ta curus.

³Ti jech yorail taje, ti banquilal paleetique xchi'uc ti moletic yu'un ti Israele laj stsob sbaic ta yamaq'uil sna ti Caifás ti banquilal yu'un ti paleetique.

⁴C'alal tsobolic xae, lic scomonopic c'u s'elan ta mucul ta stsaquic ti Jesuse yo' ta xaq'uic ta milel.

⁵Xi laj yalbe sbaique: —Sc'an ti ma'uc ta yorail q'uin ta jtsactic yo' jech mu xlic c'op yu'un ti epal jnaclejetique.

⁶Ti Jesuse oy ta jteclum Betania ta sna Simón ti sbiinoj jc'a'emal-chamele.

⁷Ti bu taje, nopaj batel jun ants ti yich'oj batel jun jarru meltsanbil ta ic'al baxton ti noj ta jun muil poxil ti toyol stojole. Ti antse laj scocanbe muil poxil ta sjol c'alal chotol ta sti'il mexa ti Jesuse.

⁸C'alal jech laj yilic ti jchanc'opetique, chopol laj ya'iic ti xi laj yalique: —¿C'u cha'al jech laj yixlan ti muil poxile?

⁹Ti jechuque xu' ta xich' chonel ta toyol stojol yo' jech ta xich' coltael ti buch'u abol sbaique.

¹⁰Ti Jesuse laj ya'i, xi laj yale: —¿C'u cha'al ti chopol ta xavilic ti ants li'e? Yu'un ti c'usi laj spasbune, jun yutsil.

¹¹Ti buch'utic abol sbaique li' ono'ox oy ta atojolique. Ja'uc ti vu'une mu scotoluc c'ac'al li' oyun ta atojolique.

¹²Ti vi s'elan laj spas ti ants ti laj scocan ti muil poxil ta jbec'tal ta jtac'opale, ja' sventa jmucobbail.

¹³Ta xcalboxuc ava'iic ta melel, buyuc no'ox ta xich' alel ti lequil c'op ta sjoylej banomil sc'oplal ti colele, ta svinajesbat sc'oplal ti ants ti jech laj spas ta jtojole yo' jech mu xch'ay sc'oplal.

¹⁴Oy jun ta xlajcha'vo'al yajchanc'optac ti sbiinoj Judas Iscariotee, bat sc'opon sbaic xchi'uc ti banquilal paleetique,

¹⁵ti xi laj yalbee: —¿C'u yepal ta xavac'beicun yo' ta xcac' ta avoc ta ac'obic ti Jesuse? Ti stuquique laj yaq'uic lajuneb xcha'vinic (30) ta sep plata taq'uin.

¹⁶Va'i un, ta jech yepal ti Judase lic sa'ilanbe smelol c'usi ta xut yo' ta xac' ta cabal ti Jesuse.

¹⁷Sliquebal c'ac'al yu'un ti q'uin c'alal ja' o ta sve'ic pan ti mu'yuc yich'oj ti spajubtasobile, ti yajchanc'optaque nopajic batel ta stojol ti Jesús ti xi laj sjac'beique: —Albun ca'icutic, ¿bu ta xac'an chba jchapancutic ti ve'lil yo' ta xave' sventa ti q'uin Colele?

¹⁸Xi laj stac' ti Jesuse: —Batanic ta sna jun vinic ti le' ta jteclume. Albeic ya'i: ‘Xi ta xal ti Jchanubtasvaneje: Nopol xa corail. Li' ta ana ta xive'cutic sventa ti q'uin Colel xchi'uc ti cajchanc'optaque.’

¹⁹Ti jchanc'optaque jech laj spasic jech c'u cha'al albatic yu'un ti Jesuse. Laj xchapanic ti ve'lil sventa q'uin Colel ti bu taje.

²⁰C'alal och xa talel ti ac'ubale, ti Jesuse chotol xa ta sti'il mexa xchi'uc ti lajcha'vo' yajchanc'optaque.

²¹C'alal xyaquet ti ve'ele, xi laj yal ti Jesuse: —Ta xcalboxuc ava'iic ta melel, oy jun avu'unic ta xiyac'un ta c'abal.

²²C'alal jech laj ya'iique, ochic ta at o'nton. Xi lic yalic ta stojol ti Jesuse: —Cajval, ¿mi ja' van ti vu'une? —xiic ta jujun tal.

²³Xi laj stac' ti Jesuse: —Ti buch'u ta xiyac' ta c'abale, ja' jun ti buch'u ta sts'aj yuni pan ta jsets'e.

²⁴Ti vu'un co'ol j'elantique, jech ono'ox ta xc'ot ta jtojol jech c'u cha'al ts'ibabil ta ch'ul c'ope. Ti buch'u ta spay c'op ti ta x'ac'van ta c'abale, mu cha'bel un, ja' lec ti manchucuc voc' talele.

²⁵Va'i un, ti Judase, ti ja' jun ta smucul paybe ti sc'oplale, xi laj sjaq'ue: —Jchanubtasvanej, ti va'i s'elan laj avale, ¿mi vu'un van? —Laj avinajes aba atuc —x'ute ti Judas yu'un ti Jesuse.

²⁶Ti Jesuse laj stsac ti pan c'alal yacal ta xve'ique. Lic yalbe vocol ti Diose. Lic xet', laj yac'be jelavel ti yajchanc'optaque, ti xi laj yale: —Ve'anic ti pan li'e, yu'un ja' smelol ti jbec'tal jtacopale.

²⁷Laj taj une, lic stsac ti yavil ya'lel uvae. Laj yalbe vocol ti Diose. Laj yac'be jelavel ti yajchanc'optaque, ti xi laj yale: —Uch'an acotolic ti ya'lel uva ti oy ta yavil li'e,

²⁸yu'un ti ya'lel uva li'e, ja' c'ot xa ta pasel ti ach' trate ta sventa ti ta xmal ti jch'ich'ele, ti ja' ta sventa ti yepal ta staic ti ch'aybil ta xc'ot ti smulic ta jventae.

²⁹Ta xcalboxuc ava'iic ta melel, slajeb ta xcuch' ti ya'lel uva li'e ja' to mi sta sc'ac'alil ta xcuch'tic ach' vino ti bu ta xventainvan ti Jtote.

³⁰C'alal laj yo'ntonic ta sq'uejintael q'uejimoletique, batic ta vits Olivos.

³¹Ti Jesuse xi laj yalbe ti yajchanc'optaque: —Acotolic ti vo'oxuque ta xchibaj avo'ntonic ta jtojol ti ac'ubaltic tana li'e. Yu'un ti ts'ibabil ta ch'ul c'ope, xi ta xale: “Ta xlaj ta milel ti jq'uel-chije, tan puc ta xbat ti xchijtaque.”

³²C'alal mi licha'cuxie, ba'yel ta xijelav batel ta Galilea banomil. Ts'acal to ta xac'otic ti vo'oxuque.

³³—Manchuc mi ta xchibaj yo'ntonic ta atojol ti yane, ti vu'une mu xchibaj co'nton —xi laj yal ti Pedroe. Xi tac'bat yu'un ti Jesuse:

³⁴—Ta xcalbot ava'i ta melel, Pedro, ti ac'ubaltic li'e, c'alal mu'yuc to xlic oc'uc ti cotse, oxib xa velta laj xa aval ti mu xavojtiquinune.

³⁵Xi laj sva'an sba ta yalel ti Pedro ta stojol ti Jesuse: —Ta jamal ta xcalbot ava'i, manchuc mi jmoj ta xijlaj ta milel, mi ja'uc ta jmuc ti xcojtiquin jbatique. Scotolic jech laj yalic ec ti jchanc'opetique.

³⁶C'alal c'otic ta ts'unubaltic Getsemanie, ti Jesuse xi laj yalbe ti yajchanc'optaque: —Chotlanic to jliqueluc li'e, yu'un ti vu'une chba c'opojcun ti'incun le' toe.

³⁷Yic'oj batel ti Pedroe xchi'uc ti cha'vo' xnich'on ti Zebedeoe. Ti Jesuse lic ya'i ta yo'nton ti mu jayloq'ueluc x'ech' xjelav ta xa'i ti svocole.

³⁸—Ta xicham o yu'un ti at o'nton ta xca'ie. Comanic to li'e, mu xavayic. Jmojuc viq'uiluc jsatic —xi ti Jesús ta stojolique.

³⁹Ti Jesuse bat c'uc yuni natiluc, snupilan xa banomil laj spatan sba ta lumtic ti xi lic c'opoj ti'inuque: —Jch'ul Tot, ti xu'uc to la mu xquich' ti mu xa no'ox c'usi jech o ti jvocole, ja' no'ox ti ma'ucuc xc'ot ta pasel ti c'usi ta jc'an vu'une, ja'uc c'otuc ta pasel ti c'usi ta xac'an ti vo'ote.

⁴⁰Ti Jesuse sut batel bu comic ti yajchanc'ope. Vayemic xa c'ot sta. Xi laj yalbe ti Pedroe: —¿Mi mu xu' avu'unic jliqueluc jmoj viq'uil ti jsatique?

⁴¹Mu xavayic, vic'o asatic, c'opojan ti'inanic yo' mu xastsaloxuc ti pucuje. Ta melel, oy yip ti avo'ntonique, ja' mu'yuc yip ti abec'talique.

⁴²Sut batel xtoc ta c'opojel ti'inel ti Jesuse, ti xi laj yale: —Jch'ul Tot, Cajval, mi mu xac'an ta xavet'es ti jvocole, c'otuc ta pasel jech c'u cha'al ta sc'an ti avo'ntone.

⁴³C'alal sut talele, vayemic vul sta no'ox xtoc ti yajchanc'ope, mu cha'beluc stac' svic' satic yu'un ti vayele.

⁴⁴Laj yicta comel, ba c'opojuc ti'inuc ta yoxcojal ti Jesuse, ti ja' ono'ox jech laj yal ti sc'op c'u s'elan laj yal ta ba'yele.

⁴⁵Va'i un, sut batel bu comemic ti yajchanc'ope, ti xi laj yalbee: —¿Mi lec no'ox ta xava'iic vayal ta xacux avo'ntonic ti sta xa yorail ta xi'aq'ue ta yoc ta sc'ob jsa'muliletic ti vu'un co'ol j'elantique?

⁴⁶Licanic, batic, tal xa ti buch'u ta xiyac' ta c'abale.

⁴⁷Yacal to ta xc'opoj ti Jesuse c'alal ja' o c'ot ti Judase, ti jun ta xlajcha'vo'al yajchanc'optaque, xchi'uc talel epal jtsacvanejetic xchi'uc yespadaic xchi'uc ste'ic, ti ja' tacbilic talel yu'un ti banquilal paleetique xchi'uc ti moletic yu'un ti israeletique.

⁴⁸Ti Judas mucul jpayc'op j'ac'vanej ta c'abale, scaj'alojbe xa no'ox ya'iic ti xi s'elan senyail ta spase: —Ti buch'u ta jbuts' ta xavilique, ja' me, tsaquic batel.

⁴⁹C'alal c'ot ti Judas bu oy ti Jesuse, xi laj yalbee: —¿Mi li' oyote, Jchanubtasvanej? Ja' o lic buts'vanuc.

⁵⁰Xi tac'av ti Jesuse: —Chi'iltic, ti c'usi ta xapase, paso me xch'a. Va'i un, ti yantique nopajic batel, laj stsaquic, laj xchuquic ti Jesuse.

⁵¹Taj une, oy jun xchi'ilic ti Jesuse laj sloq'ues ti yespadae, nax to ti boj xutbe loq'uel xchiquin smosov ti banquilal palee.

⁵²Xi laj yal ti Jesuse: —Tic'o ochel ta sna ti avespadae. Ti buch'u ta xmilvanic ta espadae, ta espada ta xcham ec.

⁵³¿Mi mu xana' ti xu' ta jc'anbe vocol ti Jtote, ti xu' ta stacbun talel x'ech' to ta oxvinic ta mil (60,000) ti anjeletique?

⁵⁴Mi jech taj une, ¿c'u no'ox xi ta xc'ot ta pasel ti ts'ibabil ta ch'ul c'op ti tsots sc'oplal ta xalic ti jechuc c'otuc ta pasele?

⁵⁵Ta jech yepal ti Jesuse xi laj sjac'be ti jtsacvanejetique: —¿C'u cha'al latalic xchi'uc avespadaic xchi'uc ate'ic ta stsaquelun co'ol s'elan junuc j'elec'? Mi ja'uc laj atsaquicun c'alal scotol c'ac'al lichanubtasvan ta ch'ulnae.

⁵⁶Ti jech le'e, yo' ta xc'ot ta pasel ti c'u s'elan laj sts'ibaic comel ti j'alc'opetic ta ch'ul c'ope. Ti jech taj une, scotol ti jchanc'opetique laj yictaic comel stuc ti Jesuse, jatavic batel.

⁵⁷Ti jtsacvanejetique yic'ojic batel ti Jesús ta stojol ti Caifás ti ja' jun banquilal pale yu'un ti paleetique. Ta sna ti Caifase, stsoboj xa sbaic ti jchanubtasvanejetic yu'un ti oy c'usi tsots albil sc'oplale, xchi'uc ti moletic ti ich'bil ye sti'ique.

⁵⁸Ti Pedroe nom xtijet batel. Och batel c'alal to yamaq'uil sna ti banquilal palee. Ti bu taje, c'ot chotluc xchi'uc ti mayoletic yu'un ti ch'ulnae yo' ta sq'uel scotol ti c'u s'elan ta xc'ot ta pasele.

⁵⁹Ti banquilal yu'un ti paleetique, ti moletique, ti banquilal jchapanvanejetique lic sa'ilanic c'u s'elan xu' ta stabeic smul ti Jesuse, manchuc mi jutbil yo' xu' ta xaq'uic ta milel.

⁶⁰Manchuc mi yepal ti jnaclejetic ti buch'utic laj sva'an sbaic ta rextico yo' ta sa'beic smul ti Jesuse, mi juteb oy bu laj stabeic ti smule. Ts'acal to tal cha'vo' jutc'op rexticoetic.

⁶¹Xi laj sva'an sbaic ta yalele: —Ti vinic li'e xi laj yal ca'icutique: ‘Xu' cu'un ta jlilinbe xch'ulna ti Diose. Ja' jech no'ox xtoc, xu' cu'un ta jcha'va'an ta ach' ti ch'ulna ta yoxibal c'ac'ale.’

⁶²Va'i un, ti banquilal palee va'i batel ti xi laj sjac'be ti Jesuse: —¿C'u cha'al mu xapac ac'oplal? ¿C'u cha'al ti va'i s'elan ta xa'albat ti amule?

⁶³Ti Jesuse ts'ijil com. Jech o xal ti banquilal palee xi laj yalbee: —Ta sba ta sat ti cuxul Diose, jamal albun ca'icutic, ¿mi vo'ot ti Cristo Xnich'onot ti Diose?

⁶⁴Xi laj stac' ti Jesuse: —Vu'un jech c'u cha'al ta xavale. Ta xcalboxuc ava'iic, ta xavilicun liquel ti co'ol j'elantique, ta xichoti ta sbats'i c'ob Dios ti scotol xu' yu'une. Ta xavilicun ta xital ta ba toc.

⁶⁵Va'i un, ti banquilal palee lic xch'i' ta jatel ti sc'u'e, svinajeb ti toj chopol laj ya'ie, xi laj yale: —Ti vinic li'e, laj xa xchopol-c'opta ti Diose. Mu xa tsotsuc sc'oplal ta jc'antic yan rextico. Laj xa ava'iic ti toj chopol ta xc'opoje.

⁶⁶¿C'u s'elan ta xc'ot ta avo'ntonic yu'un taj une? Xiic laj staq'uique: —Oy smul, tsots sc'oplal ac'o chamuc.

⁶⁷Va'i un, lic stubtaic, lic smajic ti Jesuse, ti jlom laj st'axbeic ta majel ti sate.

⁶⁸—Ti mi vo'ot ti Cristoe, na'o ca'itic buch'u laj smajot —xutic.

⁶⁹Ti jech taj une, ja' o chotol ti Pedro ta yamaq'uil na. Ja' o tal jun mosovil ants ti xi laj yalbee: —Ti vo'ote, ja' achi'il ta xanobal ti Jesús liquem talel ta Galileae.

⁷⁰Ti Pedroe mu jamaluc laj yal sba ta stojol scotolic ti xi laj yale: —Mu jna' buch'u ta xavalbun sc'oplal taje.

⁷¹Ta jech yepal bat sva'an sba ta ti'na ti bu ile yu'un yan mosovil ti xi laj yalbe ya'i ti buch'utic tey tsobolique: —Le'e, ja' xchi'il ta xanobal ti Jesús ti liquem talel ta Nazarete.

⁷²Ti Pedroe xi laj sva'an sba ta yalel no'ox xtoc ti mu jamaluc laj yale: —¡J'ech'el mu xcojtiquin buch'u ma' ti vinic le'e!

⁷³Lec xa ox jliquel yech'el, ti buch'utic tey stsoboj sbaique nopajic batel ta sts'el ti Pedro ti xi laj yalbeique: —Ti vo'ote, melel ja' achi'il ti Jesuse, yu'un xvinaj lec ta avuni c'opojel.

⁷⁴Ti Pedroe lic chopol c'opojuc, ti xi laj sva'an sba ta yalel ta j'ech'ele: —J'ech'el mu xcojtiquin buch'u ma' ti vinic le'e. C'alal jech laj yal ti Pedroe, ja' o oc' ti cotse.

⁷⁵Ti Pedroe vul ta yo'nton ti xi ono'ox albat yu'un ti Jesuse: “C'alal mu'yuc to ta x'oc' ti cotse, oxib xa ox velta laj aval ti mu xavojtiquinune.” Jech o xal ti Pedroe loc' batel, lic smil sba ta oq'uel.