Read Tzotzil San Mateo 8 Bible Online

San Mateo 8 - Tzotzil bible

San Mateo 8

¹C'alal yal talel ta vits ti Jesuse, ep buch'u laj sts'acliic ech'el.

²Tal jun vinic ti tsacbil ta c'a'emal chamele. Vul squejan sba ta stojol ti xi laj yale: —Cajval, ti xac'anuc lae, xu' avu'un xatus xapoc ti jchamele.

³Ti Jesuse laj scajan sc'ob, xi laj yalbee: —Jechuc, pocbil tusbil ta xac'ot. Ta jech yepal un, pocbil tusbil c'ot ti jc'a'emal-chamele.

⁴Xi laj yal ti Jesuse: —Mu'yuc buch'u xavalbe ya'i. Batan, ba ac'o aba ta ilel ta stojol ti palee. Ba ac'o matanal jech c'u cha'al yaloj ti Moisese yo' jech ta sna'ic scotol ti lacol xa yu'un ti achamele.

⁵C'alal och batel ta jteclum Capernaum ti Jesuse, ja' o ital jun banquilal soldado romano, nopaj talel ta sc'anbel vocol

⁶ti xi laj yale: —Cajval, oy caj'abtel ta jna, aluneb ta j'ech'el. Mu albajuc ta xich' svocol yu'un xc'uxul ti xchamele.

⁷Xi laj stac' ti Jesuse: —Ta xbat jcoles.

⁸Ti banquilal soldadoe xi laj stac'bee: —Cajval, mu xic'ot o ma' ti ta xa'och batel ta jnae. Alo no'ox jbeluc ac'op, ta xcol ti caj'abtele.

⁹Ti vu'une pasbilun ta mantal yu'un ti banquilaletic cu'une. Jechun ec ta jpas ta mantal ti soldadoetique. C'alal ta xcalbe junuc, ‘batan le'e’, ta xbat. ‘La' li'e’, ta xtal. C'alal ta jpas ta mantal ti cajtunele, ‘paso li'e’, ta spas.

¹⁰Ch'ayal c'ot yo'nton ti Jesús ti jech laj yale. Xi laj yalbe ya'i ti nabalic talel ta stojole: —Ta xcalboxuc ava'iic ta melel, mi junuc jtaoj ta Israel ti yepal no'ox c'otem ta yo'nton jech c'u cha'al ti vinic li'e.

¹¹Ta xcalboxuc ava'iic, yepal ta jmec ta xliquic talel ta sloq'ueb c'ac'al, ta smaleb c'ac'al, ta x'ochic ta chotlej ta ve'el xchi'uc ti Abrahame, ti Isaaque, ti Jacobe, ti bu oy ti ventainel yu'un ti Dios ta vinajele.

¹²Ja'uc ti buch'u albil sc'oplalic ta x'ochic batel bu ti ventainele, ta xtenatic batel ta ic'al osil, ti bu ta x'oq'uique, ti bu xc'uxuxet ti yeique.

¹³Ti Jesuse xi laj yalbe ti banquilal soldadoe: —Batan ta ana, c'otuc ta pasel jech c'u cha'al ach'unoje. Ta jech yepal un, ti jtunele col lecub.

¹⁴Ti Jesuse bat ta sna ti Pedroe. Puch'ul ta stem laj sta ti ip ta xa'i c'oc' sme'ni' ti Pedroe.

¹⁵Va'i un, ti Jesuse laj yac' sc'ob ta stojol ti jchamele. Ta jech yepal yam ti sc'ac'ale. Va'i liquel, lic malq'uinvanuc ti antse.

¹⁶C'alal xyabet xa talel ti ac'ubale, laj yiq'uic tal ta stojol Jesús ti buch'u ta x'ilbajinatic yu'un ti pucuje. Ta jbel no'ox sc'op, laj stac loq'uel ti j'ilbajinvanej pucuje xchi'uc laj scoles ti jchameletique.

¹⁷Ti jech taje, yo' c'ot ta pasel jech c'u cha'al xi laj scaj'al ti j'alc'op Isaiase: “Lamal c'ot ta sba ti mu cha'bel c'usi xcut jbatic yu'un ti jchamel jlajeltique.”

¹⁸Ti Jesuse laj yil ti joyobtabile. Laj yal mantal ti jelavicuc batel ta jot sti'il nabe.

¹⁹Ja' o nopaj talel jun jchanubtasvanej yu'un mantal ti xi laj yale: —Jchanubtasvanej, ta jchi'inot ti buyuc no'ox ta xabate.

²⁰Ti Jesuse xi laj stac'bee: —Ti vete oy snail ch'en. Ti mutetique oy stasic. Ti vu'un co'ol j'elantique, mi ja'uc jutebuc oy bu ta jcux ti co'ntone.

²¹Oy jun yajts'aclivanej ti xi laj yale: —Cajval, ac'o ave ati' ti ta jmuc comel ba'yuc ti jtote.

²²Ti Jesuse xi laj staq'ue: —Batic, ac'o smuc yanimaic ti buch'u chamemic ono'oxe.

²³Ti Jesuse och batel ta barco, chi'inbil yu'un ti yajchanc'optaque.

²⁴Tal tsots banomilal vo' xchi'uc yic'al ti ta nabe. Ti syuc'benal ti nabe ta x'och ta barco. Ti Jesuse vayem.

²⁵Va'i un, ti yajchanc'optaque bat stijic ti Jesús ti xi laj yalbeique: —Cajval, coltaotic, yu'un ta xa xijmut'ijotic.

²⁶Ti Jesuse xi laj staq'ue: —¿C'u cha'al ti xi'el ta j'ech'ele? Mu'yuc c'usi c'otem ta ch'unel avu'unic. Ti jech laj yal une, va'i liquel, laj yalbe mantal ti iq'ue xchi'uc ti nabe. Sts'ijlajan com scotol.

²⁷Ch'ayal c'ot yo'nton ti yajchanc'optaque, xi lic sjac'be sbaique: —¿Buch'u xa ono'ox xcal le'e ti ta xch'unbat smantal yu'un ti iq'ue, ti nabe?

²⁸C'alal c'ot ti Jesús ta jot sti'il nab ta yosilal Gadarae, loq'uic talel cha'vo' vinic ta muquinal ti ch'amunbil yu'un ti pucuje. Inopajic talel ta stojol. Mu'yuc buch'u x'ech' ta be ti bu oyique, yu'un xi'bal sba.

²⁹Xi lic avanicuque: —Jesús, Xnich'onot Dios, ¿c'u cha'al xtal atic' aba ta jtojolcutic? ¿Mi yu'un tal xa avac' jvocolcutic c'alal ma'uc to yoraile?

³⁰Ja' o nopol xlamet ta xve'ic epal chitom ti bu taje.

³¹Ti pucujetique xi laj sc'anbeic vocol ti Jesuse: —Mi ta xaloq'uesuncutique, ac'o ave ti ochcuncutic batel ta chitometic le'e.

³²Ti Jesuse xi laj staq'ue: —Ochanic batel. Ti pucujetique loq'uic batel ta stojol ti cha'vo' vinique. Bat stic' sbaic ta chitometic. Ta jech to yepal ti chitometique laj stambeic anil, laj sjipan sbaic yalel ta lican ch'entic. Ts'ajajtic c'ot ta nab, jic'avic ti bu taje.

³³Ti jq'uel-chitometique jatavic batel ta anil, c'otic ta jteclum ta yalel ti c'usi c'ot ta pasele xchi'uc ti c'usi c'ot ta stojol ti cha'vo' vinic ti ch'amunbilic yu'un ti pucujetique.

³⁴Va'i un, scotol ti oyic ta jteclume batic bu oy ti Jesuse. C'alal laj yilique, laj sc'anbeic vocol ti loc'uc batel ta slumalique.