Read Tzotzil San Marcos 14 Bible Online

San Marcos 14 - Tzotzil bible

San Marcos 14

¹Chib xa c'ac'al sc'an ta xlic ti q'uin Colel c'alal ja' o ta sve'ic ti pan mu'yuc yich'oj ti spajubtasobile. Jech ti banquilal paleetique xchi'uc ti jchanubtasvanejetic yu'un ti oy c'usi tsots albil sc'oplale, ta sa'beic smelol c'u s'elan ta slo'laic yo' ta xaq'uic ta milel ti Jesuse.

²—Ma'ucuc ti c'alal ja' o xyaquet ti q'uine yo' jech mu xlic sjol ti jnaclejetique —xi ta xalic ti jlome.

³Ti Jesuse oy ta Betania jteclum, bat ta sna ti Simón ti ta xalbeic jc'a'emal-chamele. C'alal chotol ta sts'el sti'il mexa ti Jesuse, ja' o ital jun ants yich'oj talel jun jarru ti meltsanbil ta saquil bax-ton, noj ta muil poxil capbil ta nardo nichim, ti toj toyol stojole. Ti antse laj sjambe sti' ti jarrue. Laj smalbe ta sjol Jesús ti muil poxile.

⁴Oy jlom ti buch'u tey oyique soc sjolic ti xi laj yalbe sbaique: —¿C'u cha'al laj yich' ixtolanel ti muil poxile?

⁵Ja' lec ti lajuc yich' chonel x'ech' ta oxib ciento (300) denario taq'uin yo' ta xich' coltael ti buch'utic abol sbaique. Xbic'tal c'opojic xa ta stojol ti antse.

⁶Ja'uc ti Jesuse xi laj yale: —Ch'an utic, ¿c'u cha'al ta xavaq'uic ta vul o'nton ti antse? Toj jun yutsil ti jech laj spas ta jtojole.

⁷Yu'un ti buch'u abol sbaique, li' ono'ox oy ta atojolique. Xu' xacoltaic ti c'usiuc ora xal avo'ntonique. Ja'uc ti vu'une mu li'uc no'ox oyun ta atojolique.

⁸Ti ants li'e laj xa spas ti c'usi xu' yu'une. Laj xa smuibtasbun ti jbec'tal sventa yo' ta xquich' muquel.

⁹Ta xcalboxuc ava'iic ta melel, buyuc no'ox ta xich' alel batel ti lequil ach' c'op ta sjoylej banomile, ta xvinajesbat sc'oplal c'usi laj spas ti ants li'e yo' mu xch'ay ta o'ntonal.

¹⁰Ti Judas Iscariote jun ta xlajcha'vo'al yajchanc'optaque, loc' batel, bat ta stojol ti banquilal paleetic ta yalel ta yaq'uel ta c'abal ti Jesuse.

¹¹Toj jun yutsil laj ya'iic. Laj sva'an sbaic ta yalel ti ta xac'beic taq'uin ti Judase. Lic sa'olanbe smelol c'usi ta xut yo' ta xac' ta c'abal ti Jesuse.

¹²Ti sba c'ac'al sliqueb q'uine c'alal ja' o ta sve'ic pan ch'abal yich'oj ti spajubtasobile, yorail xtoc ta xich' milel ti chij sventa ti q'uin Colele, ti yajchanc'optaque xi laj sjac'beic ti Jesuse: —¿Bu ta xac'an chba jpascutic ve'lil yo' jech ta xave' ta sventa ti q'uin Colele?

¹³Ti Jesuse laj stac batel chib yajchanc'op ti xi laj yalbee: —Batanic le' ta jteclume. Ti bu taje, ta xataic jun vinic ti xcuchoj batel jbej q'uib vo'e. Nablanic batel ta spat.

¹⁴Ti bu ta x'och ta nae, albeic ya'i ti yajval nae: ‘Xi laj yal ti Jchanubtasvaneje: ¿Bu oy ti jc'ol na ta xive' xchi'uc ti cajchanc'optac ta sventa ti q'uin Colele?’

¹⁵Ti yajval nae ta xac'boxuc avilic jc'ol yut muc' ta na ti oy ta xcha'cojal ti chapanbil xae. Meltsanic ti ve'lil bu taje.

¹⁶Ti cha'vo' yajchanc'ope loq'uic batel, c'otic ta jteclum. Jech laj staic jech c'u cha'al albatic yu'un ti Jesuse. Lic smeltsanic ti ve'lil ta sventa ti q'uin Colele.

¹⁷C'alal och ti ac'ubale, c'ot ti Jesús xchi'uc ti lajcha'vo' yajchanc'optaque.

¹⁸C'alal ta xa xve'ic ta mexae, ti Jesuse xi lic yale: —Ta xcalboxuc ava'iic ta melel, oy jun avu'unic li' jchi'inoj ta ve'ele ta smucul pay jc'oplal yo' ta xiyac' ta c'abal.

¹⁹C'alal jech laj ya'iique, ochic ta at o'nton, xi lic sjac'beic ta jujun tale: —¿Mi ja' li vu'une? ¿Mi vu'un xcal?

²⁰Xi laj stac' ti Jesuse: —Ja' jun ta alajchebalic ti ta sts'aj yuni-ot ta jsets'e.

²¹Ti vu'un co'ol j'elantique, jech ono'ox ta xc'ot ta jtojol jech c'u cha'al ts'ibabil ta ch'ul c'ope. Mu xa ono'ox cha'bel un ti buch'u ta smucul pay ti jc'oplale. Ja' xloc' venta ti manchucuc tal voc'uc ta banomile.

²²C'alal xyaquetic ta ve'ele, ti Jesuse laj stsac ti pane. C'opoj ti'in ta yalel vocol. Laj xet' ti pane, laj yac'be jelavel ti yajchanc'optac ti xi laj yale: —Lajesic li'e, yu'un ja' jbec'tal jtac'opal.

²³C'un to un ti Jesuse lic stsac sbisol ti vinoe. C'opoj ti'in ta yalbel vocol ti Diose. Laj yac'be jelavel ti yajchanc'optaque. Scotolic laj yuch'ic ti vinoe.

²⁴Xi laj yal ti Jesuse: —Ti vino laj avuch'ique, ja' c'ot ta pasel ti ach' trate ta sventa ta xmal ti jch'ich'el sventa slequilal ti epal jnaclejetic ta banomile.

²⁵Ta xcalboxuc ava'iic, slajeb laj cuch' ti ya'lel uvae ja' to jmoj ta xcuch'tic ti ach' vino ti bu ta xventainvan ti Diose.

²⁶C'alal laj yo'ntonic ta sq'uejintael jun q'uejoje, batic ta vits Olivos.

²⁷Xi laj yal ti Jesuse: —Ti vo'oxuque acotolic mu xa junuc avo'ntonic ta jtojol ti ac'ubal tana li'e. Yu'un xi ta xal ti ts'ibabil ta ch'ul c'ope: ‘Ta xcac' ta milel ti jq'uel-chije, jech ti chije tan puc ta xbatic.’

²⁸C'alal ta xicha'cuxie, ta xijelav batel ta Galilea banomil. Ts'acal to ta xac'otic ec un.

²⁹—Manchuc mi mu junuc yo'nton ti yane, ti vu'une staoj yav jun co'nton —xi laj yal ti Pedroe.

³⁰—Ta xcalbot ava'i, Pedro, c'alal mu'yuc to ta x'oc' xcha'cojal ti cots ti ac'ubal tana li'e, laj xa aval yoxcojal ti mu xavojtiquinune —xi laj stac' ti Jesuse.

³¹Ja'uc ti Pedroe xi xvulvun liquele: —¡Bu xata ti jech ta xcale! Manchuc mi jmoj ta xijlaj ta milel, mi ja'uc ta xcal ti mu xacojtiquine. Scotolic jech yalic xtoc.

³²Ts'acal to c'otic ta ts'unobaltic Getsemaní. Xi laj yalbe ti yajchanc'optaque: —Chotlanic li' ono'oxe, yu'un chba c'opoj ti'incun le' e.

³³Laj yic' batel ti Pedroe, ti Jacoboe, ti Juane. Ti Jesuse lic ya'i ta yo'nton ti mu xa jayloq'ueluc x'ech' ta xa'i ti vocole.

³⁴Xi laj yale: —Xicham o xa ta xca'i yu'un ti vul o'ntone. Comanic to li'e, mu xavayic.

³⁵Ta jech yepal xi snatil bat ti Jesuse. Snupilan xa banomil laj spatan sba ta lumtic ta sc'anbel ti Dios ti q'uejbatuc batel ti svocol ti xu'uque yo' mu xc'ot ta stojol.

³⁶Ti ta sc'opojel sti'inele, xi ta xale: —Tot, Cajval, xi s'elan c'otem ta aventa ti scotol xu' avu'une: pojun coltaun yu'un ti jvocole. Ma'ucuc jech c'u cha'al ta jc'an jtuc, ja'uc ti c'usi ta xac'an ti vo'ote.

³⁷Ti Jesuse sut batel bu comemic ti yajchanc'optaque, vayemic c'ot sta. Xi laj yalbe ti Pedroe: —Simón, ¿mi ta xavay? ¿Mi mu xu' avu'un julavemot junuc ora?

³⁸Vic'o asatic. C'opojan ti'inanic yo' jech mu xayu'ninic ti pucuje. Ta melel, tsots avo'ntonic, mu'yuc yip ti abec'talique.

³⁹Ti Jesuse cha'sut batel ti bu ono'ox c'opoj ti'ine. Mu yanuc ti c'u s'elan ta xale, co'ol jech c'u cha'al laj yal ta ba'yele.

⁴⁰C'alal sut talele, vayem vul sta xtoc ti yajchanc'optaque, yu'un mu xvic' satic yu'un ti vayele. Mu stac' a'yeluc ta xa'iic c'usi xu' ta stac'beic ti Jesuse.

⁴¹Xi laj yal c'alal sut talel ta yoxcojale: —¿Mi jun to no'ox la avo'ntonic ta xavayic, ta xacuxic? Ta'luc o xa ti vayele, julavanic xa, yu'un sta xa yorail ta xi'aq'ue ta c'abal yu'un jsa'muliletic ti vu'un co'ol j'elantique.

⁴²Licanic, batic, yu'un tal xa ti buch'u ta xiyac' ta c'abale.

⁴³Yacal to ta xc'opoj ti Jesús c'alal ja' o c'ot ti Judase, jun ta xlajcha'vo'al ti yajchanc'optaque. Ti Judase ja' c'ot xchi'uc epal jchucvanejetic xchi'uc yespadaic xchi'uc ste'ic, ti ja' tacbilic batel yu'un ti moletique, ti banquilal paleetique, xchi'uc ti jchanubtasvanejetic yu'un ti oy c'usi tsots albil sc'oplale.

⁴⁴Xi ono'ox laj scaj-vinajes ti j'ac'vanej ta c'abal Judase: —Ti buch'u ta xc'ot jbuts' ta xavilique, ja' me un. Tsaquic, chuquic.

⁴⁵Jech un, nopaj batel bu oy ti Jesuse, ti xi laj yalbee: —Jchanubtasvanej, Jchanubtasvanej. Ja' o lic sbuts'vanuc.

⁴⁶Ta jech yepal laj stsaquic ti Jesuse. Laj xchuquic batel.

⁴⁷Ti bu taje, oy jun laj sloq'ues ti yespadae, laj sbojbe xchiquin ti yaj'abtel ti banquilal palee.

⁴⁸Ti Jesuse xi laj yalbe ti jtsacvanejetique: —Latalic xchi'uc avespadaic xchi'uc ate'ic yo' ta xachuquicun batel ti co'ol s'elan jun j'elec'un yilele.

⁴⁹Mi ja'uc laj atsaquicun c'alal scotol c'ac'al oyun ta atojolic ti laj jchanubtasoxuc ti ta ch'ulnae. Ti jech ta xapasic avi tana li'e, ja' ta sventa yo' ta xc'ot ta pasel ti c'usi ts'ibabil ta ch'ul c'ope.

⁵⁰Scotol ti jchanc'opetique jatavic batel. Laj yictaic comel stuc ti Jesuse.

⁵¹Oy jun querem vinic spixoj sba ta saquil poq'uil ti nabal bat ta spat ti Jesuse. Tsacluj ec.

⁵²Ja'uc ti querem vinique laj sloc' comel ti saquil poc' spixoj sba xchi'uque. T'anal jatav bal ta anil.

⁵³Laj yiq'uic batel ti Jesús ta stojol ti banquilal palee. Ti bu taje, laj stsob sbaic talel scotol ti banquilal paleetique xchi'uc ti jchanubtasvanejetic yu'un ti oy c'usi tsots albil sc'oplale, xchi'uc ti moletique.

⁵⁴Ti Pedroe nomtic xtijet batel ta spat ti Jesuse, och batel c'alal to yamaq'uil sna ti banquilal palee. Chot xi c'otel ta ti' c'oc' ti bu ta xc'atin ti mayoletic yu'un ti jchabiej ch'ulnae.

⁵⁵Ti banquilal paleetique xchi'uc ti banquilal jchapanvanejetique lic sa'beic smul ti Jesuse yo' xu' ta xaq'uic ta milel. Mi ja'uc jutebuc laj stabeic ti smule.

⁵⁶Ac'o mi yepal oy buch'u ta sva'an sba ta sa'bel smul ti Jesuse, mu jmojuc ti c'usi ta xalique.

⁵⁷Oy jlom ta jeche' laj sva'an sbaic ta rextico ti xi laj yalique:

⁵⁸—Laj ca'icutic ti xi ta xal ti vinic le'e: ‘Ta jlilin ti ch'ulna ti meltsanbil yu'un ti viniquetique. Ta oxib c'ac'al ta jva'an ta ach' ti ma'uc meltsanbil yu'un ti viniquetique.’

⁵⁹Manchuc mi jech laj yalic ti jutc'op rexticoetique, mu jmojuc ti c'usi ta xalique.

⁶⁰Va'i un, ti banquilal palee lic sva'an sba ta sba ta sat scotol ti c'u yepal oye, ti xi lic sjac'be ti Jesuse: —¿C'u cha'al mu xatac'av jbeluc? ¿Mi mu xava'i ti va'i s'elan ta xa'albat ti amule?

⁶¹Ja'uc ti Jesuse ts'ijil com, mu'yuc laj stac' jbeluc. Jech ti banquilal palee xi lic xcha'jac'be: —¿Mi vo'ot ti Cristoe, Xnich'onot ti ch'ul lequil Diose?

⁶²Ti Jesuse xi laj yale: —Melel, vu'unun. Ti vu'un co'ol j'elantique ta xavilic ta xichoti ta sbats'i c'ob Dios ti scotol xu' yu'une, xchi'uc ta xavilic ta xicha'sut talel ta ba toc ti ta vinajele.

⁶³Va'i un, ti banquilal palee lic xch'i' ta jatel ti sc'u'e, svinajeb ti ech'em chopol laj ya'i ti va'i s'elan laj yal ti Jesuse. Jech ti stuque xi lic yale: —Mu xa tsotsuc sc'oplal ta jc'antic yan rextico.

⁶⁴Ti vo'oxuque laj xa ava'iic ta xchopol-c'opta ti Diose. ¿C'u xachiic xana' un? Scotol laj yac' sjolic ti oy smule. Tsots ya'iic sc'oplal, ac'o chamuc.

⁶⁵Oy jlom lic stubtabeic sat. Oy jlom lic smacbeic sat yo' ta smajic ti xi lic yalbeique: —Na'o ca'icutic buch'u laj smajot. Ti mayoletic yu'un ti jchabiej ch'ulnae laj smajbeic sat ti Jesuse.

⁶⁶Ti Pedroe oy ta olon bu ti amaq'ue. Ja' o c'ot jun ants yaj'abtel ti banquilal palee.

⁶⁷Ti antse, c'alal laj yil ti Pedro chotol ta xc'atin ta ti' c'oq'ue, laj sq'uelbe lec sat ti xi laj yalbee: —Ti vo'ot eque, ja' achi'il ta xanobal ti Jesús liquem talel ta Nazarete.

⁶⁸Ti Pedroe mu'yuc xal ta jamal, c'ajomal xi lic yale: —Mu xcojtiquin. Mu jna' buch'u ti va'i s'elan ta xavale. Loc' batel ta spat ti' moc, ja' o lic oc'uc ti cotse.

⁶⁹Ti antse lic sq'uel batel no'ox xtoc ti Pedroe, ti xi lic yal ta stojol scotol ti buch'u chotol ta xc'atinique: —Ti vinic le'e, ja' jun xchi'il ti Jesuse.

⁷⁰Ja'uc ti Pedroe laj xcha'muc, mu jamaluc laj yal. C'alal naca to jech laj yal ti antse, ja' o xi laj yalic xtoc ti buch'utic chotolic ta xc'atinique: —Melel, ti vo'ote ja' achi'il abaic, yu'un liquemot tal ta Galilea, yu'un co'ol s'elan ac'opojelic.

⁷¹Ti Pedroe lic sbisvanuc ta cotol chaval ti xi laj yal xtoque: —J'ech'el mu xcojtiquin buch'u ti vinic ti ta xavalic taje.

⁷²C'alal jech taje, ja' o oc' xcha'oq'uelal ti cotse. Ti Pedroe vul ta yo'nton ti xi ono'ox albat yu'un ti Jesuse: “C'alal mu'yuc to ta x'oc' xcha'oq'uelal ti cotse, oxcoj xa ox laj aval ti mu xavojtiquinune.” Lic smil sba ta oq'uel ti Pedroe.