Read Tzotzil San Marcos 6 Bible Online

San Marcos 6 - Tzotzil bible

San Marcos 6

¹Ti Jesuse loc' batel ti bu to ox oye. Bat ta slumal stuc xchi'uc ech'el ti yajchanc'optaque.

²C'alal c'ot ti sc'ac'alil cuxob o'ntonale, ti Jesuse lic chanubtasvanuc ta ch'ul na. C'alal ya'ibeic sc'op Jesús ti c'u yepal tsobolique, xch'ay no'ox yo'ntonic yu'un, xi ta sjac'be sbaique: —¿Bu laj xchan talel scotol ti vinic le'e? ¿Bu laj sta talel ti sbijile xchi'uc ti ch'ay no'ox o'ntonal yu'un ti c'usi ta spase?

³¿Mi mu ja'uc jcarpintero ti vinic le'e, squerem ol ti Mariae, xchi'il ta voq'uel ti Jacoboe, ti Josee, ti Judase, ti Simone? ¿Mi mu li'uc jchi'uctic ta naclej ti yixleltaque? Jech o xal mu'yuc xich'ic ta muc'.

⁴Ja'uc ti Jesuse xi laj yale: —Buyuc no'ox scotolic ta xich'ic ta muc' jun j'alc'op. Ja'uc ta slumal stuque, yuts' yalaltac no'ox, jmojic ta yut na no'ox mu x'ich'e ta muc' yu'unic.

⁵Mu'yuc bu laj yac' ta ilel ti c'usi ch'ayal ta xc'ot o'ntonal yu'un ti bu taje. Jun chib no'ox oy bu laj scajan sc'ob ta stojol ti jchameletic ti col yu'une.

⁶Labal laj ya'i ti mu x'ich'e ta muc' yu'un ti slumale. Ti Jesuse ech' chanubtasvanuc ta uni lumetic ti joyol ta spat xocon ti jteclum Nazarete.

⁷Ti Jesuse laj yic' talel ti lajcha'vo' (12) yajchanc'optaque. Laj stacan batel ta cha'cha'vo'. Laj yac'be yich' tsots yabtelic ta staquel loq'uel ti pucujetic ti mu stac' q'uelel ta j'ech'el ti c'usitic ta spasique.

⁸Laj yalbe ya'i ti mu'yucuc c'usi xich'ic batel ta sventa ti bee, ti ja'uc no'ox yich'ic batel ti snamte'ique. J'ech'el mu xich'ic batel ti sve'elique, ti smoralique, ti staq'uinique.

⁹Xu' slap batel ti xonobique. J'ech'el mu xu' xich'ic batel sjeltaobba c'u'ic.

¹⁰Xi laj yalbee: —Ti bu ta xa'ochic ta jun na ti vo'oxuque, comanic ja' to ta xaloq'uic mi oy bu ta xabatic ta yane.

¹¹Mi oy bu mu xayich'ic ta muq'ue, mi mu sc'an xa'iic ti c'usi ta xavalique, loc'anic batel. Lilino comel spucuquil ti avoquique, senyail ti laj xa stoy sbaique. Ta xcalboxuc ava'iic ta melel, c'alal ta sta sc'ac'alil ti chapanele, x'ech' to tsots ta xich'ic ti tsitsele, ja' mu sta ti buch'utic nacalic to ox ta Sodoma xchi'uc ta Gomorra jteclume.,

¹²Va'i un, ti yajchanc'optaque loq'uic batel ta yalbel ya'iic ti jnaclejetic ta banomile ti ya'iicuc sbaique xchi'uc ti suticuc talel ta stojol ti Diose.

¹³Yepal no'ox pucujetic laj staquic loq'uel xchi'uc yepal no'ox laj scolesic jchameleltic laj yac'beic aceite ta stojol.

¹⁴Ti ajvalil Herodese laj ya'ibe sc'oplal Jesús ti buyuc no'ox xpuquete. Oy ep buch'utic xi laj yalique: —Ti Juan j'ac'-ich'-vo'e cha'cuxi, jech o xal oy ta stojolal ti oy c'usi ch'ayal ta xc'ot o'ntonal ta xac' iluque.

¹⁵Xi ta xalic ti yane: —Ja' ti j'alc'op Eliase. Xi ta xalic ti yan xtoque: —Ja' jun j'alc'op jech c'u cha'al ta vo'nee.

¹⁶C'alal jech laj ya'i ti ajvalil Herodes taje, xi ta xale: —Sc'oplal ti Juan taje. Vu'un laj cal ti yich'uc c'ocbel ti sjole. Ja' xa cha'cuxi talel.

¹⁷Ti jech ta xal taje, yu'un ti Herodese ja' ono'ox laj yac' ta tsaquel ti Juane. Laj yal mantal ti yich'uc chuquel ta cadena taq'uin ta chuquinab ta scoj ti Herodiase ti laj xa yajnilan ti Herodese ac'o mi ja' yajnil to ox ti Felipee, yits'in ti Herodese. Yu'un ti ajvalil Herodese laj spojbe yajnil ti yits'ine.

¹⁸Yu'un ti Juan j'ac'-ich'-vo'e xi laj yalbe ya'i ti ajvalil Herodese: —Mu jechuc ta pasel ma' le' une ti ta xabis ta avajnil yajnil ti avits'ine.

¹⁹Ti jech taj une, xti'et sjol ti Herodías ta stojol ti Juane, j'ech'el ta smil ya'i. Ja'uc le'e, mu'yuc c'usi xut.

²⁰Ti ajvalil Herodese xi'taoj ti Juane yu'un sna'oj lec ja' lequil tuq'uil vinic, xchabioj yo' mu'yuc c'usi snuptan. Manchuc mi mu xa'ibe lec smelol ti c'usi ta xale, ti ajvalil Herodese sjunul yo'nton ts'etel lec xchiquin ta xa'ibe sc'op ti Juane.

²¹Oy bu laj sta sc'ac'alil, laj spas q'uin ti ajvalil Herodes ta sventa ts'aqui sjabilal, ti laj yac' ve'el ta stojol ti jpas-mantaletic yu'une, ti banquilaletic yu'un ti yajsoldadotaque, xchi'uc ti cajal yabtel yich'ojic ta Galileae. Lec xa snupoj c'ot ti ants Herodiase.

²²Yantsil ol ti Herodiase och batel ta ac'ot ti bu tsobolic ta q'uine, ti c'upil sba laj yil ti Herodes c'u s'elan ac'otaje. Jech laj yilic scotolic xtoc ti jmoj volol ta xve'ic xchi'uque. Ti ajvalile xi laj yalbe ti tsebe: —C'anbun ti c'usi ta xac'ane, ta xcac'bot.

²³Xil Dios, ta xcac'bot ti c'usi ta xac'ane. Ac'o mi o'lol jvoc' ti muc' ta lum jventainoje, ta xac'bot.

²⁴Loc' batel ti tsebe, xi bat sjac'be ti sme'e: —¿C'usi ta jc'anbe xana' ti ajvalile? —C'anbo sjol ti Juan j'ac'-ich'-vo'e —xi ti sme'e.

²⁵Ta anil och batel ti tseb bu oy ti ajvalil Herodes, ti xi laj yalbee: —Ac'bun no'ox xcha' talel ta ba platu sjol ti Juan j'ac'-ich'-vo'e.

²⁶At-o'nton xa liquel ti ajvalil Herodes c'alal jech laj ya'ie. Ti laj xa sva'an sba ta yalel ta sba ta sat ti c'u yepal ic'bil yu'une, mu xa xu' ta sutes ye ti jech laj yale.

²⁷Ta jech yepal un, laj yalbe mantal jun yajsoldado ti sc'ocbuc talel sjol ti Juane.

²⁸Bat ta chuquinab ti soldadoe, laj sc'ocbe sjol ti Juane, yich'oj talel ta jun platu. Laj yac'be ti tsebe, ti tsebe laj yac'be jelavel ti sme'e.

²⁹C'alal laj ya'iic yajchanc'optac ti Juane, bat yich'beic talel ti sbec'tal stacopale yo' chba smuquic.

³⁰Laj taj une, ti yajchanc'optaque laj stsob sbaic xchi'uc ti Jesuse, laj yalbeic ya'i scotol ti c'usi laj spasique xchi'uc ti c'u s'elan chanubtasvanique.

³¹Ti Jesuse xi laj yalbeique: —La'ic, ba jcux co'ntontic ca'tic jliqueluc ti bu sts'ijlajan ti banomile. Yu'un xtal xbat yepal ta j'ech'el ti jnaclejetic ta banomil ti mu'yuc c'usi xut x'aq'ue ve'icuque.

³²Ti Jesuse xchi'uc ti yajchanc'optaque batic ta jun barco ti bu sts'ijlajan ti banomile.

³³Yepal laj yilic ti bate, laj yojtiquinic xtoc ti ja'e. Va'i un, ep ti jteclum bu liquemic talele, batic ta anil ti bu taje, ba'yel c'ot ti stuquique.

³⁴C'alal loc' ta barco ti Jesuse, laj yil volol xa ti epal jnaclejetic ta banomile, c'uxubaj yo'nton yu'un, co'ol s'elan junuc tanijemal chij ti ch'abal yajval ta xq'uelee. Ep ta tos c'u s'elan lic xchanubtas.

³⁵C'alal mal xa ti c'ac'ale, ti yajchanc'optaque xi laj yalbeic ti Jesuse: —Mal xa c'ac'al, li'e, ch'abal jnaclejetic.

³⁶Taco xa batel, baticuc ta jbic'tal jteclum li' nopol no'oxe yo' ta sman sve'elic, yu'un mu'yuc sve'elic li'e.

³⁷Xi laj stac' ti Jesuse: —Ac'beic sve'elic ti vo'oxuque. Xi laj stac'beique: —¿Bu ta jtacutic lajunvinic ta sep (200) denario taq'uin yo' ta jmanbecutic sve'elic?

³⁸Xi albatique: —Ba q'uelic jayib pan oy avu'unic. Xi laj yalbeic c'alal laj xa sna'ique: —C'ajomal no'ox vo'bej (5) pan xchi'uc cha'cot (2) choy.

³⁹Va'i un, ti Jesuse laj yal mantal ti choticuc ta jujutsop ta yaxaltique.

⁴⁰Vo'vinic (100) ta vo', lajuneb yoxvinic (50) ta vo' ti jujutsop chotiique.

⁴¹Ta jech yepal un ti Jesuse laj stsac ti vo'bej pane xchi'uc ti cha'cot choye. Laj stoy muyel sat ta vinajel ta yalbel vocol ti Diose. Lic xet' ti pane. Laj yac'be jelavel ti yajchanc'optaque yo' ta xch'acbeic ti c'u yepal tsobolique. Ja' jech xtoc laj xch'acan ti cha'cot choye yo' ta staic o lec scotolic.

⁴²Ve'ic scotolic ti bu xa c'alal xal ti yo'ntonique.

⁴³Noj to lajcheb (12) moch scomelal ti pane xchi'uc ti choy ti laj stsobbeic ti scomelale.

⁴⁴Ti c'u yepal ve'ic ta scotolique, ja' vo'ob mil (5000).

⁴⁵Laj taj une, ti Jesuse laj yalbe ya'i ti yajchanc'optaque ti ochicuc batel ta barco yo' ta xjelavic batel ta jteclum Betsaidae, ti ts'acal ta xc'ot ti stuque, yu'un ta to sc'opon comel ti jnaclejetique.

⁴⁶C'alal laj sc'oponan comele, muy batel ta vits ta c'opojel ti'inel.

⁴⁷C'alal och ti ac'ubale, o'lol xa nab xcajet batel ti barcoe. Ti jech stuc xa com ti Jesús ti bu oye,

⁴⁸laj yil ti vocol ta xanav batel ti barcoe yu'un ta xuje sutel ta tsots ic'. C'alal ta xa sacub talele, nopaj batel ta stojolic ta xanav batel ta ba vo', ti tuc' xa jelavel ta jelav ta spas sba yilele.

⁴⁹C'alal laj yilic ta xanav talel ta ba vo'e, avanic yu'un laj snopic ti ja' jun sbel-banomil,

⁵⁰yu'un laj yilic scotolic, xi'ic ta j'ech'el. Ta jech yepal xi avan talel ti Jesús ta stojolique: —Tsotsanic, Vu'unun. Mu xaxi'ic.

⁵¹Och ta barco ti Jesuse, ts'ij xi liquel ti iq'ue. Ch'ayal c'ot yo'ntonic yu'un.

⁵²Yu'un mu'yuc to ta xc'ot lec ta yo'ntonic, ti xch'ay no'ox o'ntonal yu'un laj sboles ti pane, yu'un xch'ayet ti snopbenal yu'unique.

⁵³Ech' xtuch'ic ti nabe. C'otic ta Genesaret banomil. Ti bu taje laj xchuquic comel ti barco ta ti' nabe.

⁵⁴C'alal yacal to ta xloq'uic ta barcoe, ti jnaclejetique ta jech yepal laj yojtiquinic ti Jesuse.

⁵⁵Ta sjunul ti banomil bu taje, batic ta anil ta spoyel talel ti jchamelic bu oy ti Jesuse.

⁵⁶Buyuc no'ox ta x'och batele, mi ta biq'uit jteclum, mi ta jteclum, mi ta naetic, mi be, ta xaq'uic ti yajchamelic ti xvocoletic ta stojol ti yac'uc ta piquel jutebuc ti sti'il sc'u'e. Scotolic ti buch'u ta stabe ta picbel ti sti'il sc'u'e, toj lecubel ta xc'ot.