Read Tzotzil San Marcos 8 Bible Online

San Marcos 8 - Tzotzil bible

San Marcos 8

¹Oy bu jun c'ac'al, ep laj stsob sbaic batel jnaclejetic ta banomil. Mu'yuc xa c'usi stun slajesic. Laj yic' talel yajchanc'optac ti Jesuse, ti xi laj yalbe ya'iique:

²—Ta xc'uxubaj co'nton yu'un ti jnaclejetic ta banomile. Oy xa yoxibal c'ac'al li' oy ta jtojol ti mu'yuc xa c'usi ta stun ta slajesique.

³Mi mu'yuc ve'emic ta jtac sutel ta snaique, xu' slubtsajic ta be, yu'un oy jlom nom to talemic.

⁴Xi tac'bat yu'un ti yajchanc'optaque: —¿Mi oy la c'usi ta utel ta xcac'betic sve'el c'alal mi junuc oy buch'u nopol nacal li'e?

⁵—¿Jayib pan oy avu'unic? —xi laj sjac' ti Jesuse. —Vucbej (7) —xi laj stac'beique.

⁶Va'i un, ti Jesuse laj yal ti chotliicuc ta lumtic ti jnaclejetique. Laj stsac ti vucub (7) pane. Laj yalbe vocol ti Diose. Laj xet' ti pane. Laj yac'be jelavel ti yajchanc'optaque. Ti stuquique laj xch'acbeic ti jnaclejetique.

⁷Oy jaycot uni choy yu'unic xtoc. Laj yalbe vocol Dios ti Jesuse. Laj yal mantal xtoc ac'o xch'aquic batel.

⁸Scotolic ve'ic ti bu xa c'alal xal ti yo'ntonique. Noj vucub (7) moch scomelal ti ve'lil laj stsobique.

⁹Ti c'u yepal ve'ique, nopol chanmil (4000) jnaclejetic ta banomil. Ta jech yepal un, ti Jesuse laj sc'oponan comel.

¹⁰Och bal ta barco xchi'uc ti yajchanc'optaque, batic ta Dalmanuta banomil.

¹¹Talic fariseoetic, lic svul sbaic xchi'uc ti Jesuse. Yo' ta sbajesic ta c'oc', laj sc'anbeic ti yac'uc iluc ti c'usi ch'ayal ta xc'ot o'ntonal yu'une ti svinajesuc sba ti liquem talel ta stojol ti Diose.

¹²Sjic' xch'a liquel yo'nton ti Jesús ti xi laj yale: —¿C'u cha'al ta sc'an ta sq'uel ya'iic ti jnaclejetic ta banomil ti oy c'usi ch'ayal ta xc'ot ta o'ntonal yu'une? J'ech'el xcal ti mu'yuc c'usi xa'ac'bat yilique.

¹³Va'i un, laj yictaan comel, cha'och batel ta barco, bat ta jot sti'il nab.

¹⁴Ti yajchanc'optaque ch'ay yo'ntonic ta yich'el batel ti sve'elique. C'ajomal jbej pan yich'ojic batel c'alal ochic ta barcoe.

¹⁵Ti Jesuse xi laj yalbe ti yajchanc'optaque: —Ti vo'oxuque, bijanic yu'un spajubtasobil span ti fariseoetique xchi'uc spajubtasobil span ti Herodese.

¹⁶Ti yajchanc'optaque lic yalilanbe sbaic ti mu'yuc spanique.

¹⁷Ti Jesuse laj sna' ti jech ta xalbe sbaique. Xi laj yalbee: —¿C'u cha'al ta xavalbe abaic ch'abal ti apanique? ¿Mi yoquel to mu xava'ibeic smelol xchiquinal? ¿Mi mu no'ox xac' ti snopobil avu'unique?

¹⁸¿Mi mu'yuc asatic? ¿Mi mu xava'ibeic ti xchiquinale? ¿Mi ch'ay xa ta avo'ntonic?

¹⁹C'alal laj jxet' ti vo'bej (5) pan ta stojol ti vo'ob mil (5,000) jnaclejetic ta banomile, ¿jayib moch laj atsobic ti scomelale? —Lajcheb (12) —xi laj staq'uique.

²⁰—C'alal laj jxet' ti vucbej (7) pan ta stojol ti chanmil (400) jnaclejetic ta banomile, ¿jayib moch laj atsobic ti scomelale? —xi ti Jesuse. —Vucub (7) —xi laj staq'uique.

²¹Xi tac'batique: —¿C'u cha'al un cha'e yoquel to mu xava'ibeic ti smelole?

²²Ts'acal to c'otic ta jteclum Betsaida. Ti bu taje, ic'bil tal ta stojol Jesús jun ma'sat vinic. Laj sc'anbeic vocol ti scajanuc sc'ob ta stojole.

²³Ti Jesuse laj snitbe batel sc'ob ti ma'sate, yic'oj loq'uel ta sti'il jteclum. Laj xjaxbe tubil ta sat ti ma'sate. Laj scajan sc'ob ta stojol. Laj sjac'be mi xil xa jutuc ti saquilal osile.

²⁴Ti ma'sate lic stoy sat, xi laj yale: —Ta xquil oy buch'u xva'lajet ta xanav ti co'ol s'elan te'etique.

²⁵Ti Jesuse lic xcha'picbe sat ti ma'sate. Xbat xa xch'ulel xchi'uc ta sq'uelel ti c'u s'elan ta xile, lecub ti sate. Xil xa lec scotol.

²⁶Va'i un, ti Jesuse laj stac batel ta sna ti vinique, ti xi laj yalbee: —Mu xa'och batel ta jteclum. Mu'yuc buch'u xavalbe ya'i jam ti asate.

²⁷Laj taj une, ti Jesuse batic xchi'uc ti yajchanc'optac ta bic'tal lum ti oy ta Cesarea ta yosilal ti Filipo banomile. C'alal oyic ta bee, xi lic sjac'be ti yajchanc'optaque: —¿Buch'uun yalojic ti jnaclejetic ta banomile?

²⁸Ti yajchanc'optaque xi laj staq'uique: —Oy jlom ta xalic ti vo'ot la ti Juan j'ac'-ich'-vo'e. Oy jlom ta xalic ti vo'ot la ti Eliase. Oy jlom ta xalic ti ja' la jun j'alc'opote.

²⁹Xi laj sjac' ti Jesuse: —Ti vo'oxuc une, ¿buch'uun ta xanopic? Xi laj yal ti Pedroe: —Vo'ot ti Cristoe.

³⁰Ti Jesuse laj yalbe ya'i ti mu'yucuc buch'u xalbe ya'iique.

³¹Ti Jesuse xi laj yalbe ti yajchanc'optaque: —Ti vu'un co'ol j'elantique, mu no'ox albajuc ta xlic quich' jvocol yu'un ti moletique, yu'un ti banquilal paleetique, yu'un ti jchanubtasvanejetic yu'un ti oy c'usi tsots albil sc'oplale. Ta xisjip stenicun. Ta xiyaq'uic ta milel. Ta yoxibal (3) c'ac'al un, ta xicha'cuxi.

³²Jamal albatic lec ti chmilate. Va'i un, ti Pedroe jech snatil laj yic' batel ti Jesús ti laj svule.

³³Ti Jesuse joyij, laj sq'uel batel ti yajchanc'optaque, xi tsots laj svul ti Pedroe: —Ch'ac aba loq'uel ta jtojol, Pucuj, ma'uc ta xanop jech c'u cha'al oy ta yo'nton ti Diose. Ja' ta xanop jech c'u cha'al ta snop ti viniquetique.

³⁴Laj taj une, ti Jesuse laj yic' talel ti yajchanc'optaque xchi'uc ti jnaclejetic ta banomile, xi laj yale: —Mi oy buch'u sc'an ta xists'acliun batele, ac'o sten ta yo'nton ti xcuxlejale, manchuc mi ta xich' svocol.

³⁵Ti buch'u ta xc'uxubin sbae, ta xch'ay ti xcuxlejale. Ja'uc ti buch'u ta sten ti xcuxlej ta jventae, ta sventa ti lequil ach' c'ope, ta sta ti xcuxlejale.

³⁶¿C'usi la ta xtun o yu'un ti buch'u ta xu'nin ya'iic scotol ti c'usi oy ta banomile mi ch'ayel ta xbat ti xch'ulele?

³⁷¿Mi oy la c'usi xut ta sman loq'uel talel xch'ulel mi ch'ayel ta xbate?

³⁸Mi oy buch'u ta xq'uexavic ta sventa lequil ach' c'op ta stojol ti jsa'muliletic ti yan sjol yo'ntonique, ja' jechun ti vu'un co'ol j'elantique, ta xiq'uexav ta stojolic c'alal ta xicha'sut talel xchi'uc yutsilal slequilal ti Jtote, xchi'uc ti ch'ul ánjeletique.