Read Tzotzil San Marcos 9 Bible Online

San Marcos 9 - Tzotzil bible

San Marcos 9

¹Xi laj yal ti Jesús xtoque: —Ta xcalboxuc ava'iic ta melel, oy jlom ti li' oyoxuque ja' to ta xachamic mi laj avilic ta aba ta asatic smuc'ul stsatsal ti ventainel yu'un Dios ti ta xvul ta loq'uele.

²C'alal ech'em xa ox vaquib (6) c'ac'ale, ti Jesuse bat ta jun toyol vits, ti ja' no'ox laj yic' batel ti Pedroe, ti Jacoboe, ti Juane. Ti bu taje, ta sba ta satic xojobin liquel ti Jesuse.

³Xlablun no'ox liquel xojobal ti sc'u'e, ti mu'yuc xa buch'u jech sac ta xicta comele manchuc mi xchuc'chun xchi'uc.

⁴Laj yilic ta xlo'ilaj xchi'uc Elías, xchi'uc Moisés ti Jesuse.

⁵Ti Pedroe xi laj yalbe ti Jesuse: —Jchanubtasvanej, jun no'ox yutsil ti li' oyotique. Xi s'elan ta jpascutic oxbejuc (3) axibal nae: jun avu'un, jun yu'un Elías, jun yu'un Moisés.

⁶Ta xi'el xa ti yajchanc'optaque, mu stac' a'yeluc ta xa'iic c'usi xu' ta xal ti Pedroe.

⁷C'alal jech taje, ja' o yal talel toc, tal voliaticuc yu'un ti squeovale. Ti ta toque laj ya'iic oy Buch'u xi ta xc'opoje: “Jc'uxubinbil Nich'on ma' li'e. A'yibeic ti sc'ope.”

⁸Ta jech yepal un, xjoyet lic sq'uelic ta jujot, mu'yuc xa buch'u laj yilic, ja' xa no'ox ti Jesuse.

⁹C'alal ta xa xyalic talel ta vitse, xi tsots laj yal ti Jesuse: —Mu'yuc buch'u xavalbe ya'iic ti c'usi laj avilique. Ja' to xavalic c'alal mi licha'cuxi ti vu'un co'ol j'elantique.

¹⁰Yo'nton no'ox sna'ic ma' taje, ac'o mi ta sjac'olanbe sbaic c'usi xal ti cha'cuxiele.

¹¹Xi laj sjac'beic ti Jesuse: —¿C'u cha'al ta xalic ti jchanubtasvanejetic yu'un ti oy c'usi tsots albil sc'oplale ti ja' ba'yel ta xvul ta loq'uel ti Eliase?

¹²Xi laj stac' ti Jesuse: —Ta melel, ba'yel ta xtal ti Elías ta xchapanel scotol. Ti vu'un co'ol j'elantique ta xal ti ts'ibabil ta ch'ul c'ope, ta xquich' ti jvocole, ta xquich' jipel tenel.

¹³Ta xcalboxuc ava'iic, ay xa ti Eliase, pasbat xa ta stojol ti c'usi xal yo'nton ti jnaclejetique jech chac c'u cha'al ta xal ti ch'ul c'op ta xc'ot ta pasele.

¹⁴C'alal sutic talel bu oy ti yan yajchanc'optaque, volibil xa laj sta ta epal jnaclejetic ti xvulajetic ta stsacolan sbaic ta c'op xchi'uc jun chib jchanubtasvanejetic yu'un ti oy c'usi tsots albil sc'oplale.

¹⁵C'alal laj yilic tal ti Jesuse, ch'ayal c'ot yo'nton scotolic. Bat sc'oponic ta anil.

¹⁶Ti Jesuse xi laj sjac'be ti jnaclejetique: —¿C'usi c'ot ta pasel ti tsots xavochlajetique?

¹⁷Oy jun ta scotolic ti xi laj staq'ue: —Jchanubtasvanej, li' quic'ojbot talel ti jnich'one, ta x'ilbajinat yu'un ti pucuje, ta xmacbat ye.

¹⁸Ti buyuc no'ox oye, ta xjipat ta lum yu'un ti pucuje, xvocan xa ye, xc'uxuxet ye, ta ste' sba. Laj jc'anbe vocol ti avajchanc'optac ti ac'o sloq'uesic ti pucuje. Ja'uc le' une, mu'yuc xu' yu'unic.

¹⁹Xi laj stac' ti Jesuse: —¡Jeche'oxuc ta j'ech'el ti mu'yuc c'usi c'otem ta avo'ntonic ta xch'unele! ¿C'u to ono'ox sjalil ta xac'anic li' oyun ta atojolique? ¿C'u to no'ox sjalil ta jts'icboxuc? Ic'bun tal ti quereme.

²⁰Va'i un, laj yic'beic talel ti querem ta stojol ti Jesuse. C'alal laj yil Jesús ti pucuje, laj stubbe yic' ti quereme, xbalalij yal ta lum, xvocan xa liquel ye.

²¹Ti Jesuse xi laj sjac'be stot ti quereme: —¿C'u xa sjalil sts'icoj talel le'e? Xi laj stac' ti stote: —Ta sbic'tal ono'ox tsacbil talel.

²²Ti pucuj taje, ep ta coj laj xa sjipbun ta c'oc', ta vo', yo' ta smil ya'i ti jnich'one. Mi oy c'usi xavut, coltauncutic, c'uxubinuncutic.

²³Ti Jesuse xi laj yale: —¿C'u ono'ox la xachi ‘mi oy c'usi xcut’? Ti buch'u ta xc'ot lec ta yo'ntone, ta xc'ot ta pasel.

²⁴Va'i un, stot ti quereme xi tsots avane: —Ta xc'ot ta co'nton. Coltaun xa ti vi s'elan xtal xbat ti co'ntone.

²⁵C'alal laj yil ti Jesús ti snet' net' sbaic talel ti jnaclejetique, xi lic sjajanta ti pucuj ti mu stac' q'uelel ti c'usi ta spase: —Uma' pucuj, jmacal chiquin, ta xcalbot ava'i, loc'an. Ictao comel ti quereme. Mu xa xacha'och ta stojol.

²⁶Ti pucuje tsots avan. Laj sjip ta lum, laj stubbe yic' ti quereme. C'alal loc' batel ta stojole, co'ol s'elan chamem xa laj yicta comel. Yepal no'ox ta xalic ti chamem xa ti quereme.

²⁷Ti Jesuse laj snitbe liquel sc'ob. Va'i ti quereme.

²⁸Ti Jesuse och batel ta jbej na xchi'uc ti yajchanc'optaque. Ti yajchanc'optaque xi laj sjac'beic ta mucule: —¿C'u cha'al mu'yuc xu' cu'uncutic ta sloq'uesel ti pucuj le'e?

²⁹Xi tac'batic yu'un ti Jesuse: —Ja' no'ox xu' ta xloc' batel ti pucuj le'e ta sventa ti c'opojel ti'inele.

³⁰C'alal loq'uic batel ti bu oyic to oxe, ech'ic ta Galilea banomil. Ti Jesuse mu sc'an ti mu junucuc sna'ic ti bu oye.

³¹Yu'un xi yacal ta xchanubtas ti yajchanc'optaque: —Ti vu'un co'ol j'elantique, ta xi'aq'ue batel ta yoc ta sc'ob ti jnaclejetique yo' ta xismilicun. Ta yoxibal (3) c'ac'al une, ta xicha'cuxi.

³²Mu'yuc laj ya'ibeic smelol ti va'i s'elan albatique. Yu'un ta xi'ic ta sjac'bel.

³³C'otic ta jteclum Capernaum. C'alal oyic xa ta jbej nae, ti Jesuse xi lic sjac'be ti yajchanc'optaque: —¿C'usi ta xavalolanic talel ti yacalotic talel ta xanobale?

³⁴Ti stuquique ts'ijil icomic yu'un ta sjac'olanbe sbaic talel ta be buch'u ti x'ech' cajal ta xc'ot sc'oplal yu'unique.

³⁵Jech o xal ti Jesuse ichotij, laj yic' talel ti lajcha'vo' (12) jchanc'optaque, ti xi laj yalbee: —Mi oy buch'u ta sta ya'i ti cajal sc'oplal ta xc'ote, biq'uit ac'o yac' sba, ac'o tunuc ta stojol ti yane.

³⁶Laj taj une, ti Jesuse laj snit talel jun olol. Laj sva'an ta o'lol ti bu oyique. Lic spet ti olole, xi laj yale:

³⁷—Ti buch'u ta xich' ta muc' jun olol ta jventa jech c'u cha'al ti olol li'e, ta xiyich' ta muc'. Ti buch'u ta xiyich' ta muq'ue, ma'uc no'ox ta xiyich' ta muc', ta xich' ta muc' ti Buch'u laj stacun talele.

³⁸Ti Juane xi laj yalbe ti Jesuse: —Jchanubtasvanej, laj quilcutic jun vinic ta sloq'ues pucuj ta aventa. Ta scoj ti mu jmojuc ta xixanav jchi'uctique, laj jpajtsancutic.

³⁹Ti Jesuse xi laj yale: —Mu xapajtsanic, ch'an utic. Yu'un ti buch'u tsots xu' yu'un ta jventae, ma'uc jun vinic ti chopol ta xc'opoj ta jtojole.

⁴⁰Ti buch'u mu xiscontrainotique, ja' jchi'iltic ta abtel.

⁴¹Buch'uuc no'ox, manchuc mi jboch vo' ta xac'boxuc ta jventa ti jech cu'unoxuque, ta melel ta sta ti smotonique.

⁴²Ti Jesuse xi laj yal xtoque: —Buch'uuc no'ox ta sta smul yu'un junuc ti ololetic ta xiyich' ta muq'ue, ja' lec ti chuc xi cho' ta snuc', jip xi yalel ta nab.

⁴³Mi ta scoj no'ox ac'ob ta xata amul yu'une, ta lec no'ox, seto loq'uel. Ja' xi to smuc'ul mi jun ac'ob ta xa'och batel ta cuxlejal. Altic ta j'ech'el mi xchibal ac'obic ta xabat ta tojob mulil bu mu xtub ti c'oq'ue.

⁴⁴Ti ta c'oq'ue, cuxul o ti xuvit yu'unique, mu xtub ti c'oq'ue.

⁴⁵Mi ta scoj no'ox avacan ta xata amul yu'une, ta lec no'ox, seto loq'uel. Ja' xi to smuc'ul mi jun xa avacan ta xa'och batel ta cuxlejal. Altic ta j'ech'el mi xchibal avacan ta xajipat ochel ta tojob mulil ti bu mu xtub ti c'oq'ue.

⁴⁶Ti ta c'oq'ue, cuxul o ti xuvit yu'unique, mu xtub ti c'oq'ue.

⁴⁷Mi ta scoj no'ox sbec' asat ta xata o amul yu'une, ta lec no'ox, pitso loq'uel jbejuc. Ja' xi to smuc'ul mi jbej sbec' asat ta xa'och batel bu ta xventainvan ti Diose. Altic ta j'ech'el mi xchibal sbec' asatic ta xajipat ochel ta tojob mulile.

⁴⁸Ti ta c'oq'ue, cuxul o ti xuvit yu'unique, mu xtub o ti c'oq'ue.

⁴⁹“Scotolic ta c'oc' ta vocol ta xmeltsaj jech c'u cha'al ta xich' ac'bel yats'mil smoton Dios ti ta xich' chic'bele.

⁵⁰Ti ats'ame toj tunel. Jechuc oyuc yutsilal slequilal avo'ntonic, lecuc xavil abaic. Yan mi mu jechuc une, ta xtub sc'oplal alequil avutsilalic jech c'u cha'al ti ats'am ta xch'ay yutsil smuil ti xchi'ile.”