Read Tzotzil San Lucas 17 Bible Online

San Lucas 17 - Tzotzil bible

San Lucas 17

¹Ti Jesuse xi laj yalbe ti yajchanc'optaque: —Oy ono'ox ti bajel ta mulil ti mu'yuc c'usi stac' utele. ¡Mu no'ox cha'bel un ti buch'u ta sta smul yu'un ti yane!

²Ja' lec ti chuc xi cho' ta snuq'ue, ti jip xi yalel ta nabe, yo' jech mu sta mulil yu'un junuc ti ololetique.

³“Q'uelo abaic, bijanic, mi oy jun achi'il laj sta smul ta atojole, lequil albo ya'i. Mi ta xlic ya'i sbae, ch'aybo smul scolo'.

⁴Manchuc mi vuc-coj ta c'ac'al laj sa' smul ta atojol, mi vuc-coj xi ta xtal yalbote: ‘Jna' ti ja' jmule, mu xa jpas jech’, mi xayute, ch'aybo ti smul scolo'e.”

⁵Ti jcholc'opetique xi laj sc'anbeic ti Jesuse: —Epajesbuncutic ti xch'unajel co'ntoncutique.

⁶Xi laj stac' ti Jesuse: —Ti oyuc ta avo'ntonic jech c'u cha'al jbejuc ta uni bec' mostaza ti oy c'usi stac' xc'ot ta pasele, xu' xi xavalbe ya'i ti jpets sicómoro te' li'e: ‘Pitso aba loq'uel, ba ts'uno aba ta nab’, mi xavute, ta xch'un.

⁷“Ti vo'oxuque, mi oy jun avaj'abtel ti c'alal ta sut talel ta abtele, mi ta sq'uelel ti vacaxe, ‘La', ochan talel, chotlan, ve'an’, ¿mi xachi ta xavalbeique?

⁸C'ajomal xachi ta stojole: ‘Chapano talel jve'el, yu'un ta xive', ta xcuch' vo'. Paso c'usi sc'an pasel c'alal yacalun ta ve'ele, ts'acal to, xave' xavuch' vo'.’

⁹Mi ja'uc ‘colaval’ xavut c'alal laj xa spas scotol ti c'usi laj avalbee.

¹⁰Ja' jech ti vo'oxuque, c'alal mi laj apasic c'u s'elan yaloj ti Diose, sc'an ti xi ta xavalique: ‘Ma'uc lequil jtuneluncutic, ja' no'ox laj jpascutic ti c'u yepal ja' cabtel laj ca'icutique.’ ”

¹¹C'alal jech ta xanav batel ta Jerusalén ti Jesuse, ech' batel ti bu sts'aquinoj sba yosilic ti Samaria banomile xchi'uc ti Galileae.

¹²C'alal c'ot ta jun biq'uit jteclume, ja' o talic lajunvo' (10) viniquetic ti tsacbilic ta c'a'emal chamele, ti nom va'ajtic comique,

¹³ti xi lic avanicuque: —Jesús, Jchanubtasvanej, c'uxubinuncutic.

¹⁴C'alal ilatic yu'un ti Jesuse, xi albatique: —Batanic, ba ac'o abaic ta ilel ta stojol ti paleetique. C'alal ta xanavic batele, ja' o mesbil tusbil c'ot ti xchamelique.

¹⁵Oy buch'u jun yu'unic, c'alal laj yil ti colem xae, sut talel, ti tsots x'avet xa talel ta yalbel slequilal ti Diose.

¹⁶Vul squejan sba ta stojol ti Jesuse, ti snupilan xa banomil laj spatan sba ta lumtic yo' ta xalbe coliyal. Ti vinic taje, liquem talel ta Samaria.

¹⁷Xi laj yal ti Jesuse: —¿Mi mu lajunvo'oxuc (10) col ti achamelique? ¿Bu oy ti yan balunvo'e (9)?

¹⁸¿Mi c'ajomal no'ox stuc sut talel ti jyanlum vinique yo' tal xalbe slequilal ti Diose?

¹⁹Xi albat ti vinique: —Lican, batan, colemot xa ta sventa ti c'ot ta avo'ntone.

²⁰Ti fariseoetique laj sjac'beic ti Jesuse c'usi ora ta xvul ta loq'uel ti ventainel yu'un ti Diose. Ti Jesuse xi laj staq'ue: —C'alal ta xvul ta loq'uel ti ventainel yu'un ti Diose, mu xvinaj ta q'uelel.

²¹Mu'yuc buch'u ti xi ta xalique: “Li' xa oye, le' xa oye.” Ti ventainel yu'un ti Diose, li' xa oy ta atojolique.

²²Xi laj yalbe ya'i ti yajchanc'optaque: —Oy bu ta sta jun c'ac'al ti ta xac'anic xaq'uelicun ti vu'un co'ol j'elantique. Mi ja'uc xa ta xavilicun.

²³Oy buch'u ti xi ta xalique: ‘Li' xa oye, le' xa oye.’ Mu me xabatic. Mu xats'acliic ti buch'u jech ta xalic taje.

²⁴C'alal ta sta sc'ac'alil ta xital ti vu'un co'ol j'elantique, co'ol s'elan jech c'u cha'al sac tsel ti xjaplajet no'ox xojobal ta jujot vinajele.

²⁵Ja'uc le' une, ba'yel ep ta xquich' vocol, ti bajbil tenbilun yu'un ti jnaclejetic avi li'e.

²⁶Ti c'u s'elan laj spasic ti jnaclejetic c'alal cuxul to ox ti Noee, ja' no'ox jech s'elan ti jnaclejetic c'alal ta xicha'sut talel ti vu'un co'ol j'elantique.

²⁷Yu'un batem yo'ntonic ta ve'el, ta uch' vo', ta xic'an sbaic, ta xaq'uic ta nupunel ti yalab xnich'nabique. Jech ta spasolanic c'alal c'ot yorail och batel ta barco ti Noee. Tal ti nojel ta vo'e, cham scotolic.

²⁸Jech c'ot ta pasel xtoc c'alal cuxul to ox ti Lote. Ja' no'ox batem ta yo'ntonic ta ve'el, ta uch' vo', ta manolajel, ta chonolajel, ta ts'unobajel, ta smeltsanel snaic.

²⁹Ja'uc le'e, c'alal loc' batel ti Lot ta jteclum Sodomae, ja' o yal talel c'oc' xchi'uc asufre ta vinajele, mileic scotolic.

³⁰Ja' jech s'elan ti sc'ac'alil c'alal ta xicha'sut talel ti vu'un co'ol j'elantique.

³¹“Ta sc'ac'alil taje, mi oy buch'u muyem batel ta xcha'cojal snae, mu xa xyal talel ta sloq'uesel ti c'usitic oy yu'un ta nae. Mi oy buch'u batem ta yabtele, mu xa me sut talel ta sna.

³²Vuleso ta avo'ntonic c'u s'elan c'ot ta stojol yajnil ti Lote.

³³Ti buch'utic ta spoj ya'iic ti xcuxlejale, ja' ta xch'ay no'ox. Ja'uc ti buch'utic mu spoj ti xcuxlejale, ta sta ono'ox ti xcuxlejale.

³⁴“Ti ta yac'ubalil taje, ta xcalboxuc ava'iic ti xi s'elan ta xc'ot ta stojolic ti buch'u cha'vo' jmoj ta xvayic ta jun teme: jun ta x'iq'ue batel, jun ta xcomtsanat.

³⁵Xi s'elan ta xc'ot ta stojolic ti cha'vo' antsetic jmoj ta xjuch'najique: jun ta x'iq'ue batel, jun ta xcomtsanat.

³⁶Xi s'elan ta xc'ot ta stojolic ti cha'vo' viniquetic jmoj ta x'abtejic ta yosilique: jun ta x'iq'ue batel, jun ta xcomtsanat.”

³⁷C'alal jech laj ya'iic ti yajchanc'optaque, xi lic sjaq'uique: —¿Bu ta xc'ot ta pasel ti va'i s'elan taje, Cajval? Xi laj stac' ti Jesuse: —Ti bu oy ti animae, ta xbat stsob sba ti xulemetic ti bu taje.