Read Tzotzil San Lucas 2 Bible Online

San Lucas 2 - Tzotzil bible

San Lucas 2

¹C'alal ja' o tiq'uil ta banquilal ajvalil ti Augusto Cesare, laj yal mantal ti ac'o yich' bejanbel ta vun sbiic scotol ti jnaclejetic oy ta banomile.

²Sba to lic ti tsacob-biil taje, ja' o c'ot ta pasel c'alal tiq'uil ta its'inal ajvalil Quirinio ti liquem talel ta Siria banomile.

³Scotolic tsots sc'oplal chba yac' ta tsaquel sbiic ti bu oy ti steclumalique.

⁴Ti jech taje, ti Josee loc' batel ta jteclum Nazaret ti oy ta Galilea, bat ta jteclum Belén bu voc' ti ajvalil David ti oy ta Judeae, yu'un ti Josee ja' snitilul ti Davide.

⁵Ti jech chapal sc'oplal ta xic' sbaique, bat yac' ta tsaquel sbiic xchi'uc ti María ti xchi'inoj xa yole.

⁶C'ot ta pasel c'alal oyic ta jteclum Belene, ja' o sta sc'ac'alil ta xvoc' yol ti Mariae.

⁷Ti bu taje, voc' ti sba yole. Laj svol ta uni poc', laj xpuch'an ta yav sve'eb vacax, ja' ti mu'yuc xocol laj staic ta ch'amunel ti nae.

⁸Nopol ta Belén oy jun chib jq'uel-chijetic ti ta x'ech' yu'unic ac'ubal ta xchabiel xchijic ta osiltique.

⁹Ta jech yepal un, laj yac' sba iluc ta stojolic jun yaj'ánjel ti Cajvaltique, ti joyobtabil c'otic ta yutsilal xojobal ti Cajvaltique. Ep xi'ic ta j'ech'el.

¹⁰Ja'uc le'e, xi albatic yu'un ti anjele: —Mu xaxi'ic, yu'un oy c'usi ach' tal calboxuc ava'iic ti xi s'elan ta sta smuyubajel yo'nton scotolique:

¹¹Avi tana li'e, voc' xa jun Jcoltavanej avu'unic ta steclumal David, ja' ti Ajvalil Cristoe.

¹²Ti senyail ta xataic ti nene' olole, volbil ta poc', puch'ul ta sve'eb vacax.

¹³Ta jech yepal vul ta loq'uel yan anjeletic ta vinajel ta stojol ti jun anjele ta yalbel slequilal Dios ti xi ta xalique:

¹⁴“Mu albajuc yutsilal slequilal ti Dios oy ta vinajele. Yu'un ti jnaclejetic ti oyic ta banomile, laj xa staic ti lec x'ileic yu'une, ja' ti buch'utic jun yo'nton oyic ta stojole.”

¹⁵C'alal sut batel ta vinajel ti anjeletique, jech ti jchabiej-chijetique xi lic yalbe sbaic ta jujun tale: —Batic ta Belén un cha'e, ba jq'ueltic ti c'usi c'ot ta pasele jech c'u cha'al laj yalbotic ti Cajvaltique.

¹⁶Batic ta anil, c'otic bu oy ti Mariae, ti Josee xchi'uc ti nene' olol puch'ul ta yavil sve'eb vacaxe.

¹⁷C'alal laj yilique, lic xchapeic ya'i c'u s'elan albatic yu'un ánjel sc'oplal ti nene' olole.

¹⁸Scotol ti buch'u laj ya'iic c'u s'elan ta xalic ti jq'uel-chijetique, ch'ayal c'ot yo'ntonic.

¹⁹Ja'uc ti Mariae, mu xch'ay ta yo'nton, ta snopilan c'usi smelol ti va'i s'elan taje.

²⁰Jech ti jq'uel-chijetique, xmuyubajic xa, sutic batel, ta xalbeic xa yutsilal slequilal Dios ti jech laj yilic scotol jech c'u cha'al laj ya'iique, xchi'uc ti c'u s'elan albatique.

²¹C'alal yich'oj xa svaxaquibal (8) c'ac'al ti olole, laj yac'beic yich' circuncisión. Jesús laj yac'beic sbi jech c'u cha'al albat ti María yu'un ti ánjel c'alal mu'yuc to ox xchi'uque.

²²C'alal c'ot sc'ac'alil ta stus ta spoc sbaic jech c'u cha'al ta xal smantal ti Moisese, laj yiq'uic batel c'alal to jteclum Jerusalén ti olole yo' ta xac'beic sventain ti Cajvaltic Diose.

²³Jech laj spasic taje, yu'un ti oy c'usi tsots sc'oplal albil yu'un ti Dios ti xi ts'ibabile: “Scotol ti ba olol querem ta xvoq'ue, ventainbil ta xc'ot yu'un ti Diose.”

²⁴Batic un, bat yaq'uic milbil matanal jech c'u cha'al yaloj ti oy c'usi tsots sc'oplal albil yu'un Dios ti xi ts'ibabile: “Ac'o yich'icuc batel cha'cot toltora, mi mo'oje, cha'cot paloma.”

²⁵Ti jech sc'ac'alil taje, oy jun vinic ventainbil yu'un ti Ch'ul Espíritu ti nacal ta Jerusalén, ti sbiinoj Simeone, ti oy slequil yutsil ti yich'oj ta muc' ti Diose, xchi'uc ti smalaoj spojel scoltael ti israeletique.

²⁶Ac'bil sna' ti mu'yuc to ta xcham mi mu ta xilbe sat ti Cristo ti ta xtaque talel yu'un ti Diose.

²⁷Ac'bat sna' yu'un Ch'ul Espíritu ti Simeone, ti batuc ta ch'ulnae. C'alal ja' o ic'bil batel ta ch'ulna yu'un stot sme' ti Jesús yo' ta spasic jech c'u cha'al ta xal ti oy c'usi tsots albil sc'oplale,

²⁸ti Simeone pet xut ti olole, ti xlequil-c'opoj xa ta stojol Dios ti xi laj yale:

²⁹“Cajval, junuc xa avo'nton, ic'un un, xu' xa xicham, yu'un c'ot xa ta pasel avu'un ti oy c'usi laj avalbe ti avajtunele.

³⁰Yu'un laj xa quil ta jba ta jsat ti pojel coltael avu'une

³¹ti c'ot ta pasel ta stojol scotol ti jnaclejetic ta banomile.

³²Ja' saquilal osil banomil yu'unic ti muc'tiquil lum ma'uc Israele, xchi'uc ja' yich'el ta muc' ti israeletic ti ja' anich'nabe.”

³³Ti Josee xchi'uc sme' ti Jesuse toj elom no'ox laj ya'iic ti va'i s'elan laj yal ti Simeón ta stojol ti olole.

³⁴Va'i un, ti lequilal oy yu'un ti Simeone laj yac'be yich' ti olole, ti xi laj yalbe ya'i ti María, sme' ti Jesuse: —A'yio ava'i, ti olol li'e yich'oj talel ti yepal no'ox ta xbajic yu'un ti israeletique mi ta stamel sbaic liquel ta stael ti coltael yu'une. Ta xvinaj ti yepal mu xich'ic ta muq'ue,

³⁵yo' yepal no'ox ta svinajesbat c'u s'elan ta snop ta yo'nton ti ta jujun tale. Jech xtoc, co'ol to s'elan jun cuchilu ta xti'van yipal ta avo'nton ta xava'i ti vo'ot une.

³⁶Ti bu taje, oy jun ants, Ana sbi, ti yayil xae, ti oy ta stojol ta yalel ti c'usi ta x'ac'bat sna' yu'un ti Diose, ti ja' yantsil nich'on ti Penuele, snitilul ti Aser sbie. Tseb to ox ti malije, ja' no'ox vucub (7) jabil laj yic' sbaic xchi'uc ti smalale.

³⁷Oy xa ta chanib yo'vinic (84) jabil ti comem ta me'onal antse. J'ech'el mu xicta comel ti ch'ulnae, yu'un ta xicta yot, xchi'uc c'ac'al ac'ubal ta xc'opoj xti'in ta yich'el ta muc' ti Diose.

³⁸Ja' o c'ot ti Anae, laj yalbe coliyal ti Diose, xchi'uc ta xalbe sc'oplal ti nene' Jesús ta stojol scotol ti buch'utic ta smalaic spojel scolelic ti oy ta Jerusalene.

³⁹C'alal laj spasic scotol c'usi ta xal ti oy c'usi tsots sc'oplal albil yu'un ti Diose, ts'acal to un, sutic batel ta steclumalic Nazaret ti oy ta Galilea banomile.

⁴⁰Lec tsots, bij ta xch'i talel ti olole yu'un sva'anoj sba stuc ti Dios ta stojolale.

⁴¹Stot sme' ti Jesuse stalelic ono'ox ta xbatic ta q'uin Colel jujun jabil ta Jerusalén.

⁴²C'alal yich'oj xa lajcheb (12) jabil ti Jesuse, jmoj batic ta Jerusalén xchi'uc ti stot sme'e yu'un stalelic jech ta xbatic ta q'uin.

⁴³C'alal laj ti q'uine, sutic batel ta snaic. Ja'uc ti ch'in querem Jesuse, com ta Jerusalén, mu sna'ic ti stot sme'e.

⁴⁴Laj snopic ti capal ech'el xchi'uc ti jxanviletique. Jun xa c'ac'al xanvilic un, lic sa'ic ta stojol ti yuts' yalalique xchi'uc ti buch'utic xojtiquinique.

⁴⁵Ja'uc le' une, mu'yuc laj staic. Sutic ech'el ta Jerusalén ta sa'el.

⁴⁶Ta yoxibal (3) to c'ac'al, oy ta ch'ulna laj staic ta sa'el, chotol xchi'uc ti jchanubtasvanejetic yu'un ti oy c'usi tsots albil sc'oplale, ta ya'yibel ti c'usi ta xale, xchi'uc oy c'usi ta sjac'olanbeic smelol xtoc.

⁴⁷Scotol ti buch'u ta xa'i ti oy sbijil ti c'u s'elan ta stac' sutel ti c'ope, ch'ayal ta xc'ot yo'nton yu'un.

⁴⁸Ch'ayal c'ot yo'nton stot sme' c'alal laj yilique, ti xi albat yu'un ti sme'e: —Cuni ol, ¿c'u cha'al jech laj apasbuncutic? Ti vu'un xchi'uc ti atote, mu xa juteb oyuncutic ta banomil ta sa'elot.

⁴⁹Ti Jesuse xi laj staq'ue: —¿C'u cha'al ta xasa'icun? ¿Mi mu xana'ic ti ja' tsots sc'oplal ta xca'i ta jpasbe yabtel ti Jtote?

⁵⁰Ti stot sme'e mu'yuc laj ya'ibeic smelol ti va'i s'elan laj yale.

⁵¹Va'i un, jmoj sutic batel ta Nazaret, ti lec ta xch'unbe smantal ti stot sme'e. Ja'uc ti sme'e, mu xch'ay ta yo'nton ti c'u s'elan albate.

⁵²Yacal ta ch'iel ech'el ti Jesuse, oy sbijil. Sva'anoj sba ti Dios ta stojole. Lec x'ile yu'un ti jnaclejetic ta banomile.