Read Tzotzil San Lucas 5 Bible Online

San Lucas 5 - Tzotzil bible

San Lucas 5

¹Oy jun c'ac'al ti c'alal oy ta ti' nab Genesaret ti Jesuse, laj ya'i ti ta xnet'e yu'un ti epal jnaclejetic yo' ta xa'iic ti lequil ach' c'op yu'un ti Diose.

²Ti Jesuse laj yil oy chib barco xocajtic ta sti' nab. Ja' o loq'uemic batel ta barco ti jmas-choyetic ta xchuq'uel ti smasobil xchoyique.

³Ti Jesuse och batel ta jun barco, ti ja' yu'un ti Simone, ti laj sc'an ti xujicuc batel jutuc ta yut nabe. Chot xi ta barco, lic xchanubtas talel ti jnaclejetic ti bu taje.

⁴C'alal laj yo'nton ta c'opojele, xi laj yalbe ti Simone: —Xujic batel ti barco bu snatil ti nabe. Jipic yalel ti smasobil achoyic ti bu taje yo' ta xamasic loq'uel ti choye.

⁵Ti Simone xi tac'ave: —Jchanubtasvanej, sjunul ac'ubal li'abtejcutic, mi jcotuc laj jtacutic ta masel ti choye. Ti jech loc' xa ta alel avu'un ti mantale, ta jip yalel avil ti smasobile.

⁶C'alal jech laj spasique, noj talel ta choy ti smasobil xchoyique. Sc'an xa ta xjat ya'i.

⁷Jech o xal laj svelc'obtaic ti xchi'iltac ti oyic ta yan barcoe yo' xtal coltavanicuc. Laj snojesic ta choy ti cha'cot barcoe. Sc'an xa ti ta xmut'ij ya'i ti sbarcoique.

⁸C'alal jech laj yil ti Simón Pedroe, laj squejan sba ta stojol ti Jesuse, ti xi laj yalbee: —Cajval, ch'aco aba ta jtojol yu'un ti vu'une jsa'mulilun.

⁹Ti Simone xchi'uc ti xchi'iltaque xi'ic ta scoj ti laj yilic ti yepal no'ox laj staic ta masel ti choye.

¹⁰Xi'ic ec ti Jacobe, ti Juane, xnich'nabtac ti Zebedeoe, xchi'il sbaic ta abtel xchi'uc ti Simone. Ja'uc ti Jesuse xi laj yalbe ti Simone: —Mu xaxi', Simón, avi tana li'e, ta xcac' yan avabtel ta sbainel ta yiq'uel talel ti jnaclejetique.

¹¹C'alal laj sloq'uesic batel ta ti' nab ti sbarcoique, laj yictaic comel scotol, bat xchi'inic ti Jesuse.

¹²Oy jun c'ac'al ti c'alal ja' o oy ta jun jteclum ti Jesuse, c'ot jun vinic ti tsacbil ta c'a'emal chamele, snupilan xa banomil laj spatan sba ta lumtic ti xi laj sc'anbe vocol c'alal yil ti Jesuse: —Cajval, ac'anuc lae, xu' xames xapoc loq'uel ti jchamele.

¹³Ti Jesuse laj scajan sc'ob ta sba, ti xi laj yalbee: —Lec oy, mesbil pocbil ta xacom. C'alal jech laj yale, ta jech yepal sac ch'ay xchamel ti vinique.

¹⁴Ti Jesuse xi laj yalbe ya'i ti vinique: —Mi junuc mu'yuc buch'u xavalbe ya'ie. Ja' no'ox batan, ba ac'o aba ta ilel ta stojol ti palee. Ich'o batel matanal ta sventa ti amesel apoquel jech c'u cha'al ta xal smantal ti Moisese, yo' jech ta sna'ic scotolic ti mesbil pocbil xa ti achamele.

¹⁵Manchuc mi jech un, yantic xpuc batel sc'oplal ti Jesuse. Yepal no'ox ta stsob sbaic ti jnaclejetic ta stojol yo' ta xa'ibeic ti sc'ope, yo' ta xcolesbatic ti xchamelique.

¹⁶Ja'uc ti Jesuse ta sq'uej sba batel ti bu sts'ijlajane yo' ta xc'opoj xti'in.

¹⁷Oy jun c'ac'al ta xchanubtasvan ti Jesuse. Ti bu taje, chot xiic jun chib fariseoetic xchi'uc jun chib jchanubtasvanejetic yu'un ti oy c'usi tsots albil sc'oplale, ti liquemic tal ta jujun jteclum ta Galileae, ta Judeae, xchi'uc ta Jerusalene. Laj yac' sba iluc smuc'ul stsatsal Dios ta stojol Jesús ta scolesel ti jchameletique.

¹⁸Va'i un, ja' o tal viniquetic spoyojic tal ta svayeb jun vinic ti pasem ta moch'e. Sc'an ox ta stiq'uic ya'iic ochel bu oy ti Jesuse.

¹⁹Ja'uc le'e mu'yuc laj staic bu xu' ta x'ochic batel, yu'un yepal no'ox noj ti jnaclejetique. Jech o xal muyic batel ta jol na. Laj stotsic ti texae. Chechbil yal yu'unic ta svayeb ti jchamele. C'ot ta o'lol bu oy ti Jesuse.

²⁰C'alal laj yil ti Jesús ti c'otem lec ta yo'ntonic ti xu' ta xcol ti jchamele, xi laj yalbe ti jchamele: —Ch'aybil xa amul c'ot ti vo'ote.

²¹Ti fariseoetique, ti jchanubtasvanejetic yu'un ti oy c'usi tsots albil sc'oplale, xi laj snopique: ‘¿Buch'u ti vinic le'e, ti xbet'bun no'ox ye ta xchopol c'optael ti Diose? Mu'yuc buch'u xu' yu'un ta xch'ay ti mulile, ja' no'ox Dios xu' ta xch'ay.’

²²Ja'uc ti Jesuse yiloj ti jech ta snopique, xi laj yalbee: —¿C'u cha'al jech ta xanop ti vo'oxuque?

²³¿C'usi jtosucal ti lec xi ta alele: ‘Ch'aybil xa amul’, mi ja' ti xi ta alele: ‘Lican, va'lan’?

²⁴Lec un cha'e, ti vu'un co'ol j'elantique ta xcac'boxuc avilic ti quich'oj tsots cabtel li' ta banomile yo' ta jch'ay ti mulile. Va'i un, xi laj yalbe ti moch'e: —Ta xcalbot ava'i, lican, balo ti avayebe, batan ta ana.

²⁵Ta jech yepal laj stam sba liquel ti moch' ta sba ta sat scotolique. Laj sbal ti svayeb ti bu to ox puch'ule. Xlequil-c'opoj xa ta stojol Dios, bat ta sna.

²⁶Scotol ch'ayal c'ot yo'ntonic ta xalbeic slequilal Dios, ti xi'eltic xa xi laj yalbe sbaique: —Avi tana li'e, jun yutsil ti c'usi laj quiltique.

²⁷Laj taj une, ti Jesuse loc' batel, sq'ueloj batel jun jc'an-patan-taq'uin sventa Roma, ti Leví sbie, ti chotol bu ta stojic ti patane. Xi albat yu'un ti Jesuse: —Tsacliun batel.

²⁸Va'i un, ti Levie va'i liquel. Ti c'usitic oye, laj yicta comel scotol, sts'aclioj batel ti Jesuse.

²⁹Ts'acal to, ti Levie lic spas jun muc'ul q'uin ta sna ta sventa ti Jesuse. Yepal no'ox ti jc'an-patan-taq'uinetic sventa Romae, xchi'uc yan jmoj chotolic ta sts'el sti'il ti mexae.

³⁰Ja'uc ti fariseoetique, xchi'uc ti jchanubtasvanejetic yu'un ti oy c'usi tsots albil sc'oplal ti co'ol sjol yo'ntonique, laj stsaquic ta c'op yajchanc'optac ti Jesuse. Xi laj yalbeique: —¿C'u cha'al jmoj ta xave'ic ta xavuch'ic vo' xchi'uc ti jc'an-patan-taq'uinetique, xchi'uc ti jsa'muliletique?

³¹Xi laj stac' ti Jesuse: —Ti buch'u xcuxet ti banomil ta xa'iique, ti mu'yuc xchamelique, mu sc'anic jpoxtavanej, ja' no'ox ta sc'anic ti buch'u oy xchamelique.

³²Ti vu'une ma'uc tal quic' ti buch'u oy slequil yutsilique. Ja' no'ox tal quic' ti jsa'muliletique yo' ta sutic talel ta stojol ti Diose.

³³Xi laj yalbeic ti Jesuse: —Yajchanc'optac ti Juane xchi'uc yajchanc'optac ti fariseoetique, ep ta coj ta scomtsan yotic yo' ta xc'opoj xti'inic. Ja'uc ti avajchanc'optaque, naca ve'el uch'om ta spasic.

³⁴Ti Jesuse xi laj staq'ue: —¿Mi yu'un la xu' ta xicta yotic avu'unic ti buch'utic ic'bilic ta uch'vanej yu'un ti nupunele c'alal oy to ta stojolic ti jlecomajel vinique?

³⁵Ja'uc le'e, oy bu ta sta sc'ac'alil ta x'iq'ue batel ti jlecomajel vinique, ja' to ta xlic yicta yotic unbi.

³⁶Xi laj sbaba albe ya'i jun babac'op xtoque: —Mu'yuc buch'u ta setic loq'uel jutebuc ach' c'u'il yo' ta spac' ta poco' c'u'ile. Mi jech ta spase, ta soques ti ach' c'u'ile. Ti juteb ach' c'u'ile, mu xc'ot o xchi'uc ti poco' c'u'ile.

³⁷Mu'yuc buch'u xtoc ta stic' ochel ta spoco'-avil ti ach' ya'lel uvae. Mi jech ta spase, c'alal ta xpajub ti ya'lel uvae, ta xt'om ti spoco'-avile. Ta xch'ay ti ya'lel uvae. Ta xch'ay ti yavil xtoque.

³⁸Jech o xal sc'an tiq'uel ta ach' yavil ti ach' ya'lel uvae, yo' mu'yuc c'usi ta spas.

³⁹Mi junuc buch'u sc'an xuch' ach' ya'lel uva ti buch'u nopem xa xa'i ta yuch'el ti pasem ya'lel uvae, yu'un xi ta xale: ‘Ja' jun yutsil ta uch'el ma' lec ti pasem xae.’