Read Tzotzil San Lucas 9 Bible Online

San Lucas 9 - Tzotzil bible

San Lucas 9

¹Ti Jesuse laj stsob ta stojol ti lajcha'vo' (12) yajchanc'optaque. Laj yac'be yich' yabtelic, stsatsalic ta sloq'uesel ti c'usiuc no'ox pucujale, xchi'uc ta scolesel ti jchameletique.

²Laj stacanan batel ta yalel ti ventainel yu'un ti Diose, xchi'uc ta scolesel ti jchameletique,

³xi ti Jesuse: —Mu c'usi xavich'ic batel ta sventa ti abeique, mi ja'uc anamte'ic, mi ja'uc amoralic, mi ja'uc avotic, mi ja'uc ataq'uinic. Jlic no'ox ac'u'ic xavich'ic batel.

⁴Comanic ta na ti bu ta xac'otique ja' to mi laloq'uic batel ti teye.

⁵Ti bu mu xa'ich'atic ta muq'ue, loc'anic batel ta jteclum. Lilinic comel ti spucuquil avoquique, senyail ti iltabil ta xc'ot yu'un ti Diose.

⁶Loq'uic batel un, batic ta jteclumetic, ta bic'tal lumetic ta yalel ti lequil ach' c'ope, xchi'uc ta scolesel ti jchameletique.

⁷Scotol c'usi ta spas ti Jesuse, laj ya'i ti ajvalil Herodese. Mu stac' a'yeluc ta xa'i c'usi xu' ta snop. Yu'un oy jlom ta xalic ja' cha'cuxi ti Juan ti chame.

⁸Ti yane ta xalic ti ja' vul ta loq'uel ti j'alc'op Eliase. Ti yane ta xalic ti ja' nan jun vo'neal j'alc'op ti cha'cuxie.

⁹Xi ta xal ti Herodese: —Vu'un laj cal mantal laj yich' c'ocbel sjol ti Juane. ¿Buch'u van taje ti ta xca'ibe ep ti sc'oplale? Jech o xal ti Herodese oy ta yo'nton ta sq'uel ya'i ti Jesuse.

¹⁰C'alal sutic talel ti jcholc'opetique, lic yalbeic Jesús ti c'usi laj spasique. Laj sq'uej sbaic loq'uel, batic ta jteclum Betsaida.

¹¹Ja'uc le' une, c'alal laj ya'iic ti jnaclejetique, laj sts'acliic batel, ich'bil c'otic ta muc' yu'un ti Jesuse. Laj yalbe ya'iic sc'oplal ti ventainel yu'un ti Diose, xchi'uc laj scolesan ti jchameletique.

¹²C'alal ta xa xmal ti c'ac'ale, ti lajcha'vo' (12) jcholc'opetique nopajic batel ta stojol ti Jesuse, xi c'ot yalbeique: —Taco xa batel scotol ti jnaclejetique yo' xu' xba sa' bu ta xcux yo'ntonic, xchi'uc ta sa'el sve'elic ta jujun bic'tal lum ti bu nopol no'oxe, yu'un ti bu oyotique, mu'yuc c'usi x'ayan.

¹³Xi laj yal ti Jesuse: —Ac'beic sve'el ti vo'oxuque. Xi laj yalique: —¿C'usi ta xcutcutic, ti c'ajomal xa no'ox vo'bej pan xchi'uc cha'cot choye? Ja' no'ox mi xba jmancutic tal sve'el ti jnaclejetique.

¹⁴Yu'un nopol vo'miluc (5,000) viniquetic tsobolic. Ti Jesuse xi laj yalbe ti yajchanc'optaque: —Albeic ya'i, ac'o chotiicuc ta lajuneb yoxvinic (50) ta jujuvoc'.

¹⁵Jech laj spasic jech c'u cha'al albatique, choti scotolic.

¹⁶Ti Jesuse laj stsac ti vo'bej pane xchi'uc ti cha'cot choye, laj stoy muyel sat ta vinajel, lic yalbe vocol ti Diose, lic sc'osilan ti choye, laj xet' ti pane, laj yac'be jelavel ti yajchanc'optaque yo' jech ta spucbeic ta scotol ti c'u yepal oyique.

¹⁷Ve'ic ti bu xa c'alal xal ti yo'ntonique. Ts'acal to, laj stsobbeic lajcheb (12) moch ti scomelale.

¹⁸Oy jun c'ac'al ti Jesuse laj sq'uej sba batel ta c'opojel ti'inel. Xi laj sjac'be ti yajchanc'optac ti tey xchi'uque: —¿Buch'uun ta xalic xana' ti jnaclejetique?

¹⁹Xi laj staq'uique: —Oy jlom ta xalic ti vo'ot la ti Juan j'ac'-ich'-vo'e. Oy jlom ta xalic ti vo'ot la ti Eliase. Ti jlome ta xalic ti vo'ot la jun vo'neal j'alc'op ti cha'cuxie.

²⁰Xi laj sjaq'ue: —Ti vo'oxuque, ¿mi xana'ic ti buch'uune? Xi laj stac' ti Pedroe: —Vo'ot ti Cristoe, ti talemot ta stojol ti Diose.

²¹Tsots laj sc'uban Jesús ti mu'yucuc buch'u junucal xalbeic ya'i ti ja' Cristo ti stuque,

²²ti xi laj yale: —Ti vu'un co'ol j'elantique ta xquich' ep vocol. Ta sjip stenicun ti moletique, ti banquilal paleetique, ti jchanubtasvanejetic yu'un ti oy c'usi tsots albil sc'oplale. Ta xiyaq'uicun ta milel, ja'uc, ti ta yoxibal c'ac'ale, ta xicha'cuxi.

²³Ti Jesuse xi laj yalbe scotol ti jnaclejetique: —Ti mi oy buch'u ta x'och ya'i ta cajchanc'ope, ac'o xtuch' ta yo'nton ti xcuxlejale, ac'o sts'ic svocol jujun c'ac'al, ac'o sts'acliun.

²⁴Yu'un ti buch'u tsots sc'oplal ta xa'i ta spoj ti xcuxlejale, ta xch'ay, ja'uc ti buch'u ta xch'ay ti xcuxlejal ta jventae, ta sta xcuxlejal.

²⁵¿C'usi bal o ti vinique, ti mi ja' no'ox ta xu'nin scotol ti sba banomile, ti mi ch'ayel ta xbat ti stuque?

²⁶Mi oy buch'u ta xq'uexav ta jtojol xchi'uc ta xq'uexav yu'un ti lequil ach' c'op cu'une, ja' jechun ec ti co'ol j'elantique, ta xiq'uexav ta stojol c'alal ta xital xchi'uc yutsilal ti Jtote, xchi'uc ti ch'ul anjeletique.

²⁷Ta xcalboxuc ava'iic ta melel, oy jlomoxuc li'e mu'yuc to ta xachamic mi mu'yuc ta xavilic ta aba ta asatic ta xventainvan ti Diose.

²⁸Ech'em xa vaxaquib (8) c'ac'al ti va'i s'elan laj yal ti Jesuse, imuy batel ta vits ta c'opojel ti'inel, ti chi'inbil batel yu'un ti Pedroe, ti Jacoboe, ti Juane.

²⁹C'alal yacal ta c'opojel ti'inele, lic yanijuc ti sate, ti sc'u'e toj sac icom, lic xojobanuc.

³⁰Vinaj cha'vo' viniquetic ta xlo'ilaj xchi'uc ti Jesuse. Taje, ja' ti Moisese xchi'uc ti Eliase.

³¹Tey joyobtabilic ta xojobal ti toj yan yutsile. Ti cha'vo' viniquetique ta xalbeic sc'oplal ta x'iq'ue batel li' ta banomile, ti ta xc'ot ta pasel ta xich' svocol ta Jerusalene.

³²Manchuc mi ta xvay ya'iic ti Pedroe xchi'uc ti xchi'iltaque, vic' to ti satique, ti laj yilic yutsilal slequilal ti Jesuse xchi'uc ti cha'vo' viniquetic xchi'inojane.

³³C'alal laj xch'ac sbaic batel ti cha'vo' viniquetic ta stojol ti Jesuse, ti Pedroe xi laj yale: —Jchanubtasvanej, ¡jun yutsil ta j'ech'el ti li' oyotique! Xi s'elan ta jpascutic oxbejuc axibal na: jun avu'un, jun yu'un ti Moisese, jun yu'un ti Eliase. Jech laj yal ti Pedroe yu'un mu stac' a'yeluc c'usi xu' ta xal.

³⁴C'alal jech ta xc'opoje, ja' o tal voliaticuc ta toc. Xi'ic ta jmec ti volibilic ta toque.

³⁵Ti ta toque, oy Buch'u ic'opoj talel ti xi ta xale: —Ja' ti Jnich'on li'e, ti toj c'ux ta xca'ie. A'yibeic ti sc'opojele.

³⁶C'alal laj c'opojuc ti Buch'u ta xc'opoj talele, laj yilic stuc xa ti Jesuse. Mu'yuc buch'u laj yalbeic ya'i ti c'usi laj yilique, ts'ijil comic.

³⁷Ta yoc'lomal c'alal yalic talel ta vitse, yepal no'ox xvoletic batel, ba snupic ta be ti Jesuse.

³⁸Oy jun vinic ta stojol ti jnaclejetique, ti tsots avan ti xi laj yale: —Jchanubtasvanej, yu'un jun ti jnich'one, avocoluc colesbun.

³⁹Ta x'ilbajinat yu'un ti pucuje. C'alal ta x'ilbajinate, tsots ta x'avan ta jmec. Ta xtubbat yic', xvocan xa ye, mu xcomtsanat.

⁴⁰Laj jc'anbe vocol ti avajchanc'optac ta sloq'ues ti pucuje, ja'uc le' une, mu'yuc xu' yu'unic ta sloq'uesel.

⁴¹Xi laj stac' ti Jesuse: —Jeche'oxuc, mu'yuc atuq'uilic, mu'yuc c'otem ta avo'ntonic ta xch'unel. ¿C'u ono'ox sjalil ta sc'an li' oyun ta atojolic ti mu jts'icbaj ta xca'i avu'unique? Ic'bun talel ti anich'one.

⁴²C'alal nopaj talel ti quereme, jipat ta lum yu'un ti pucuje. Tubbat yic' no'ox xtoc. Ja'uc ti Jesuse, laj sjajanta ti pucuje. Laj scoles ti quereme. Laj yac'be batel ti stote.

⁴³Scotolic ch'ayal c'ot yo'ntonic yu'un smuc'ul stsatsal ti Diose. C'alal ch'ayal yo'nton scotolic yu'un c'usi ta spas ti Jesuse, xi laj yalbe ti yajchanc'optaque:

⁴⁴—A'yic lec li'e, xi s'elan ti mu xach'ay ta avo'ntonique: ti vu'un co'ol j'elantique, ta xi'aq'ue ta yoc ta sc'ob ti viniquetique.

⁴⁵Mi ja'uc xa'ibeic smelol ti va'i s'elan ta x'albatique yu'un mu'yuc to ta x'ac'bat sna'ic, xchi'uc ta xi'ic ta sjac'beic smelol ti c'usi albatic yu'un ti Jesuse.

⁴⁶Ti yajchanc'optaque lic svul sbaic buch'u ti cajal sc'oplal ta xc'ot yu'unique.

⁴⁷Ja'uc ti Jesuse laj sna' ti jech ta snopique. Laj yic' talel jun ch'in querem ti laj sva'an ta sts'elique.

⁴⁸Xi laj yalbe ti yajchanc'optaque: —Buch'uuc no'ox ti ta jventa ta xich' ta muc' ti olol li'e, ta xiyich'icun ta muc' ec. Ta xich'ic ta muc' xtoc ti Buch'u laj stacun talele. Ti buch'u x'ech' to peq'uel yuni c'oplal ta xac' sba ta atojolique, ja' cajal sc'oplal ta xc'ot.

⁴⁹Ti Juane xi laj yalbe ti Jesuse: —Jchanubtasvanej, laj quilcutic jun vinic ta sloq'ues pucuj ta aventa. Laj jpajescutic yu'un ma'uc jchi'uctic ta abtel.

⁵⁰Xi laj stac' ti Jesuse: —Mu xapajtsanic, yu'un ti buch'u mu xiscontrainotique, ja' jchi'iltic ta abtel.

⁵¹C'alal po'ot xa sta yorail ta xcha'sut muyel ta vinajel ti Jesuse, sjunul yo'nton bat c'alal Jerusalén.

⁵²Laj stac jelavel yajtuneltac ta biq'uit jteclum ti oy ta Samaria banomile yo' ta xba xch'amunic na.

⁵³Ja'uc ti samariaetique laj yilic ti ta xbat ono'ox ta Jerusalene. Jech o xal mu'yuc xaq'uic ta ch'om ti snaique.

⁵⁴C'alal jech laj yilic ti Juane, ti Jacobe, ja'ic ti yajchanc'optaque, xi laj yalique: —Cajval, ¿mi ta xac'an ti jc'ancutic yaluc talel c'oc' ta vinajel yo' ta xlajic scotol le'e jech c'u cha'al laj spas ti j'alc'op Eliase?

⁵⁵Ti Jesuse lic sq'uelbe sat ti cha'vo'ique, ti xi laj yalbe ti laj sjajantae: —Ti vo'oxuque mu xava'iic buch'u xch'ulel avich'ojic.

⁵⁶Ti vu'un co'ol j'elantique ma'uc tal jtubbe xcuxlejalic ti jnaclejetique, tal jcolta. Batic ta yan biq'uit jteclum.

⁵⁷Xi tal yal jun vinic c'alal yacal ta xanavic batel ta bee: —Cajval, ta jc'an ta jchi'inot batel ti buyuc no'ox ta xabate.

⁵⁸Xi laj stac' ti Jesuse: —Ti vete oy snail ch'enic, ti mutetique oy stasic, ja'uc ti vu'un co'ol j'elantique, mi ja'uc oy bu juteb xu' ta jcux ti co'ntone.

⁵⁹—Batic —xi laj yalbe yan vinique. Xi laj staq'ue: —Cajval, ac'bun ave ati' ti ta jmuc ba'yel ti jtote.

⁶⁰Xi laj stac' ti Jesuse: —Ac'o smuc yanimaic ti buch'u chamemic ono'oxe. Ja'uc ti vo'ote, ba alo ti ventainel yu'un ti Diose.

⁶¹Xi laj stac' ti jun xtoque: —Cajval, ta jc'an ta jchi'inot batel. Ja'uc le' une, malaun jliqueluc, ta xba cal jba comel ta jna.

⁶²Xi laj stac' ti Jesuse: —Ti buch'u ta sq'uel sutel svalopat ti yic'ojbe batel yabtejeb ti vacaxe, mu xtun ta yabtelanel ti ventainel yu'un ti Diose.