Read Tzotzil Deuteronomio 11 Bible Online

Deuteronomio 11 - Tzotzil bible

Deuteronomio 11

¹“C'uxuc xava'iic ti Ajvalil Dios avu'unique. C'otuc ta pasel avu'unic ti c'usitic jbel tsots albil yu'une, ti c'usitic nopbil yu'une, xchi'uc ti smantaltaque.

²Avi tana li' une, ojtiquinic avilic lec ti c'u s'elan laj stojobtasoxuc ti Dios avu'unique, ti mu ja'uc jutebuc yojtiquinojic ti avalab anich'nabique, mu sna'ic, mi ja'uc yilojic. T'abuc to ta avo'ntonic xtoc ti smuc'ul stsatsale, ti laj slaman talel yoc sc'ob ta atojolic ti ech'em xu' yu'une.

³Ma'uc no'ox taje, t'abuc to ta avo'ntonic xtoc ti laj yac' avilic ti laj svinajes ti muc'tic no'ox ch'ayal ta xc'ot o'ntonal yu'un ti laj spas ta Egipto ta scontrainel ti faraón xchi'uc ta sjunul ti slumale.

⁴Ma'uc no'ox taje, t'abuc to ta avo'ntonic xtoc ti c'usitic laj spasbe ta stojol ti soldadoetique, ti ca'etique, ti carretaetic yu'un ti ac'ob-letoe, ti c'ot ta pasel yu'un ta j'ech'el ti jbel sc'oplal laj smut'ian ta ya'lel Tsajal Nab ti c'alal snutsojoxuc talel ti egipcio soldadoetique.

⁵T'abuc to ta avo'ntonic scotol xtoc ti c'usitic laj spas ta atojolic ti ta sbajtical banomile, xchi'uc ti c'u s'elan lavulic ta loq'uel li'e.

⁶T'abuc to ta avo'ntonic xtoc ti c'u s'elan laj spas ta stojol ti Datane, ti Abirame, xnich'nab ti Eliab ti ja' snitilultac ti Rubene, ti ta sba ta sat scotol ti israeletique, ochic yalel ta banomil xchi'uc yalab xnich'nabic, xchi'uc yaxibal naic, xchi'uc scotol ti c'usitic x'ayan yu'unic ti c'alal jav ti banomile.

⁷Yu'un ti c'usitic ep ta tos ti muc'tic no'ox laj spas ti Diose, rexticooxuc.

⁸“Scotol smantaltac Dios ti laj calboxuc ava'iic li'e, c'otuc ta pasel avu'unic. Jech oy lec avipic ta yu'ninel ti lum ti ta xbat apojique.

⁹Jal jabil ta xach'i xac'opojic ta banomil ti yaloj ono'ox ti Dios ta xac'be ti amolmuc'totic ti laj ech'icuc ta vo'nee, xchi'uc ti snitilultaque, ja' ti banomil ti bu co'ol s'elan vo' ta xbein ti chu' vacaxe, xchi'uc ti ajapome.

¹⁰Ti banomil ti bu xbat avu'ninic ta spojele, mu xco'olaj xchi'uc jech c'u cha'al ta Egipto ti bu laloq'uic talele, ti bu laxanavic ta smaltael ti ats'unubalic ti laj ats'unique, jech c'u cha'al ta xamaltaic ti ts'unubaletic ta yut moque.

¹¹Ja'uc ti lum ti bu xbat avu'ninique, ja' jun lum ti muc'tic no'ox ti ste'tical ta vitse, xchi'uc lec stenlejal ti xchajet no'ox ta xac'be yalel tal ti ya'lel ta xlic talel ta vinajele.

¹²Ti banomil taje, chabibil yu'un stuc ti Diose, ti scotol jabil yac'oj talel sat ta stojole.

¹³“Ja' yu'un un, c'otuc ta pasel avu'unic ti smantaltac Dios ti laj calboxuc ava'iic ti c'ac'al li'e. C'uxuc ta xava'iic ti Ajvalil Dios avu'unic ta sjunul avo'ntonic, ta sjunul ach'ulelic ta xanijan abaic ta yich'el ta muc'.

¹⁴Jech o xal un, ta xc'ot ta pasel ti c'uc no'ox yorail ta xtal ti vo' yu'une, manchuc mi ja' o yorail, mi ma'uc yorail ti vo'e. Jech ta xloc' lec ti atrigoique, ti avinoique, xchi'uc ti avaceiteique.

¹⁵Ja' jech xtoc lec ta xch'i ti yaxaltic ti oy ta osiltic sventa ta slo'ic ti chon bolometic avu'unique, ti ataojic lec ti ave'el avuch'omic ti bu xa c'alal xal ti avo'ntonique.

¹⁶Ja' no'ox un, bijanic me ti mu xavac' abaic ta lo'lael ta xch'aquel abaic ta stojol ti Diose, ti xlic aquejan achiman abaic ta yich'el ta muc' ti yan diosetique.

¹⁷Yan ti mi jech taj une, ta xlic ilinuc ta atojolic ti Diose. Mi ja'uc ta xayac'boxuc talel ti vo'e. Ja'uc ti banomil une, mu'yuc c'usi ta satin yu'un. Ta anil ta xachamic ti ta lequil banomil taje, ti bu ta xayac'boxuc ti Diose.

¹⁸“Va'i un, ti c'opetic taj une, bejanic lec ta ajol ta avo'ntonic, ta snopbenal avu'unic ti c'otuc ta senyail avu'unic ti chucbiluc ta snuc' ac'obique, ti ta ati'baique.

¹⁹Chanubtaso ti anich'nab xchi'uque. Alilanbeic ti c'alal oyoxuc ta nae, mi ta be, ti c'alal po'ot xavayique, c'alal mi lajulavic xae.

²⁰Yu'un ts'ibaic ta oyetic, xchi'uc ta sti' anaic.

²¹Ti jech taj une, ti vo'oxuc xchi'uc ti avalab anich'nabique, ta xnatij ti ach'iel ac'opojelic ta banomil ti bu yaloj ono'ox ti Ajvalil Dios avu'unic ti ta xac'be ti amolmuc'totic ti laj ech'icuc ta vo'nee. Ti c'u sjalil oy ti vinajel ta sba ti banomile, ja' jech sjalil ta xanaquiic ta banomil taje.

²²“Mi ta sjunul avo'ntonic ta xc'ot ta pasel avu'unic ti mantaletic laj calboxuc ava'iic li'e, mi c'ux ta xava'iic ti Dios avu'unique, mi jun avo'ntonic ta xats'acliic ech'ele,

²³jech ti Dios une, ta aba ta asatic, ta sten loq'uel ti epal lumetique. Ja'uc ti vo'oxuc une ta xavu'ninic ti lumetic ti xjelav to yepalique, ti jelavem xu' yu'unique.

²⁴Ti bu c'alal ta x'ech' axaniique, ja' xa c'ot ta avu'unic. Yu'un ti ts'aquiltaque, ta xlic ech'el ta sbajtical banomil, ta xc'ot c'alal to Líbano. Ta xlic ech'el ta uc'um Eufrates, ta xc'ot c'alal to ta nab Mediterráneo.

²⁵Yu'un mu'yuc buch'u xu' ta stsaloxuc, yu'un ti Ajvalil Dios avu'unique ta xlic yac' taluc jun muc' ta xi'elal ti bu ta xa'ech'ique, co'ol jech c'u cha'al yaloj ono'oxe.

²⁶“Ti c'ac'al avi tana li'e, ta xcac' at'ujic ti bu junucal ta xac'anique, mi ja' ti c'uxubinele, mi ja' ti bac vocolale.

²⁷C'uxubinel lequilal ta xavich'ic mi ta xach'unbeic smantaltac ti Ajvalil Dios avu'unic ti laj calboxuc ava'iic ti c'ac'al li'e.

²⁸Bac vocol ta xataic mi ta xats'acliic ti yan diosetic ti oy sc'oplal ti mu ich'baj ta muq'ue, mi ta xlic abajbeic smantaltac ti Ajvalil Dios avu'unique, mi ta xach'ac abaic ta stojol ti va'i s'elan laj calboxuc ava'iic avie.

²⁹“C'alal mi laj xa apojic ti lum ti bu ta xa'ochic batel yu'un ti Ajvalil Dios avu'unique, ti c'uxubinele, ta xavalbeic ech'el sc'oplal ta stuq'uil muc' ta vits yu'un Guerizim. Ja'uc ti bac vocolale, ta xavalbeic ech'el sc'oplal ta stuq'uil muc' ta vits yu'un Ebal.

³⁰Ti muc'tiquil vits taje, oy ta jot uc'um Jordán ta stuq'uil batel ti bu ta x'ech' ti be ti ta xbat ta smaleb c'ac'al ta yosilal ti cananeoetic ti nacalic ta stenlejal ti ta yeloval Gilgale, ta sts'el xtoc ti tulantic yu'un ti Moree.

³¹Yu'un ta xa x'ech' atuch'ic ti uc'um Jordane. Ta xanopajic batel ta yu'ninel ti muc' ta lum ti albil sc'oplal ta xa'ac'batic yu'un ti Ajvalil Dios avu'unique. C'alal mi laj avu'ninic une, c'alal mi lanaquiic xa une,

³²chanic ta yabtelanel scotol ti c'usitic jbel albil ti tsots sc'oplale, ti c'usitic nopbil ti laj cal ava'iic li'e.