Read Tzotzil Deuteronomio 12 Bible Online

Deuteronomio 12 - Tzotzil bible

Deuteronomio 12

¹“Ti c'u sjalil ta xach'i xac'opojic ta banomil ti bu ta xa'ac'batic avu'ninic yu'un ti Ajvalil Dios yu'un ti amolmuc'totique, ja' jech s'elan ti sc'an xavabtelanic ta spasel ti oy jbel ti c'usitic tsots albil ti sc'oplale, xchi'uc ti c'usitic nopbile.

²“Yu'un xi s'elan sc'an xapasique: Lilinic ta j'ech'el ti jujun c'opojebal ti'inebal yu'unic ti lum yavil ti bu ta snijan xchiman sbaic ta yich'el ta muc' ti diosetic ta banomil ti bu ta xavu'ninique, ja' ti oy ta jujun toyol jol vitse, ti ta jujun yoc vitse, ti ta jujun yolon ti limlim yoc te'etique.

³Lilinic ti scajanobil matanale. Bic'tajesic ta voq'uel ti tonetique. Chiq'uic ta j'ech'el ti c'usi va'ajtic ta snijan sbaic ta yich'el ta muq'ue. Lilinic ta j'ech'el ti sloc'obbail diosetique. Ch'ayic tubic sc'oplal ta o'ntonal ti tsots sc'oplal yu'unic ti bu taje.

⁴“Yu'un ti Ajvalil Dios avu'unique, mu xaco'oltasic ta yich'el ta muc' jech c'u cha'al taje.

⁵Yu'un ti ta stojol ti anitilultaque, ti Diose ta ono'ox st'uj ti bu ta xcom ti yich'obil ta muq'ue. Ti bu ta xc'ot taj une, ja' me ti xu' chbat anijan achiman abaic ta yich'el ta muq'ue.

⁶Ti bu taje, ja' ti bu xu' ta xamilic ta xachiq'uic ti chon bolometic sventa yich'obil ta muq'ue. Ti bu taje, ja' me ta xavich'ic batel ti jun ta jujun lajlajunebe, ti matanal ti ta xich' ye'el ta toyole, ti c'usi ta xloc' ta alel ti ta xich' aq'uele, xchi'uc ti c'usi loq'uem ayanem ta o'ntonal ti ta xich' aq'uele, jech c'u cha'al ti sba yoltac ti vacaxetique xchi'uc ti chijetique.

⁷Ti bu taje, ta xave' xavuch'ic vo' ta sts'el ta sba ta sat ti Diose, jmoj xchi'uc ti c'u avepalic ta nacleje. Jmoj xamuyubajic ta sventa ti oy c'usi lec ch'i ta sventa avabtelic ti jech laj sva'an sba ta atojolic ti Ajvalil Dios avu'unique.

⁸“Ti bu taje, mu xa jechuc ta xc'ot apasic jech c'u cha'al ta jpastic tana li'e, ti bu ja' no'ox ta jpastic ti c'usi lec ta xca'itic ta jujun tale.

⁹Ta melel, mu'yuc to c'otemoxuc ta yavil ti bu ta xataic ti mu'yuc xa c'usi xana'ic ti albiloxuc yu'un ti Ajvalil Dios avu'unic ti ta xayac'boxuque.

¹⁰Yan mi ech' xa atuch'ic ti uc'um Jordane, ti nacaloxuc xa ta lum ti bu ta xa'ac'batique, mu'yuc xa yatel avo'ntonic ma' ti ta to xavich'ic joyobtael ta sibtasel yu'un ti avajcontraique. Yu'un mu'yuc xa c'usi jtosuc xi'el ta xavilic.

¹¹Va'i un, ti bu ta xlic st'uj ti Ajvalil Dios avu'unic ti ta xc'ot ta sna stuc sventa ti yich'obil ta muq'ue, yu'un ta xtal avac'beic scotol ti xi xa ono'ox s'elan laj xa calboxuc ava'iique: ti milbil chon bolometic ti ta xich' chiq'uel ta sventae, ti jun ta jujun lajlajunebe, ti matanal ti ta xich' ye'el muyel ta stojole, xchi'uc scotol ti c'usitic lec t'ujbil ti ta xaval ti ta xavaq'uic ta stojol ti Diose.

¹²Yu'un ti bu taje, ta xapasic q'uin ta sba ta sat ti Ajvalil Dios avu'unique jmoj xchi'uc ti c'u avepalic ta nacleje, ti amosovique, xchi'uc ti levitaetic ti nacalic ta atojolique. Yu'un ti stuquique, mi ja'uc ta xich'ic jutebuc xrextoic ta banomil ti bu ta xavich' ta arextoique.

¹³“Bijanic me cha'e, mu xachic'beic smoton Dios ti bu ono'ox oyoxuc ta nacleje.

¹⁴Yu'un c'ajomal no'ox xu' ta xapasic ti bu ta st'uj ti Ajvalil Dios avu'unic ta stojol junuc ti anitilulique. Ti bu taje, c'otuc me ta pasel avu'unic scotol ti va'i s'elan laj calboxuc ava'iique.

¹⁵“Manchuc mi jech un, xu xamilic xati'ic beq'uet ti c'usi ora xal avo'ntonic ti jech oyoxuc ta alumalic ja' ti c'u s'elan ac'biloxuc yu'un ti Ajvalil Dios avu'unique. Xu' xati'ic acotolic mi mesbil tusbiloxuc, mi mu'yuc, co'ol s'elan jech c'u cha'al ta xati'beic sbec'tal ti tsajal te'tical chije, mi ja' ti muc'tic yaxal te'tical chije.

¹⁶Ja'uc ti xch'ich'el une, mu xati'beic. Yu'un c'ajomal no'ox malic ech'el ta banomil jech c'u cha'al junuc vo'.

¹⁷“Mi ja'uc xatun ta xalajesic ta alumalic jset'uc ti jun ta jujun lajlajuneb ti atrigoique, ti avinoique, ti avaceiteique, ti sba yoltac avacaxique, ti achijique, ti c'usitic avalojic ti ta xavac'beic ti Diose, xchi'uc ti matanal ti loq'uem ayanem ta o'ntonale.

¹⁸Yu'un c'ajomal no'ox xu' xatun xalajesic ta stojol ti Ajvalil Dios avu'unic ti bu t'ujbil yu'une. Ti bu taje, ta sba ta sat ti Ajvalil Dios avu'unique, ta xatun xalajesic xchi'uc ti avalab anich'nabique, xchi'uc ti amosovique, xchi'uc ti levitaetic ti nacal ta atojolique, ti jmoj ta xamuyubajic ta slajesel ti c'usitic laj ataic yu'un ti avabtelique.

¹⁹Ti jech yacaloxuc ta ch'iel c'opojel ta muc' ta lume, ta j'ech'eluc mu xaten xajip ta avo'nton ti levitaetique.

²⁰“C'alal mi laj xa yepajesoxuc ech'el ta naclej ti Ajvalil Dios avu'unic jech c'u cha'al yaloj ono'oxe, mi ta xati' ava'iic ti beq'uete, xu' xati'ic ti c'usiuc no'ox ora xal ti avo'ntonique.

²¹Yu'un mi nom to xavilic ti bu nacaloxuc ti yavil ti bu t'ujbil yu'un ti Ajvalil Dios avu'unic ti bu ta xich' tael ta na'ele, ti bu oyoxuque, xu' xamilic ti avacaxique, ti achijic ti ac'biloxuc yu'un ti Diose. Yu'un xu' xati'ic scotol ti c'usi jtosucal sc'an ti avo'ntonic jech c'u cha'al calojboxuc ono'ox ava'iique.

²²Taje, co'oluc c'otuc ta pasel jech c'u cha'al ta xati'beic sbec'tal ti tsajal te'tical chije, mi ja' ti muc'tic yaxal te'tical chije, yu'un acotolic xu' xati'ic mi mesbil tusbiloxuc, mi mu'yuc.

²³Ja'uc ti xch'ich'el une, ta jbel sc'oplal mu xati'beic. Yu'un ti xch'ich'ele ja' xcuxlej. Ja' yu'un un, mu xu' ti capal ta xati'beic ti sbec'tal xchi'uc ti xcuxleje.[1]

²⁴Ti c'usi ta sc'an ta xapasique, malic ech'el ta banomil ti ch'ich'e jech c'u cha'al junuc vo'.

²⁵Ta j'ech'el mi ja'uc xati'ic yo' jech lec ta xbat ac'oplalic xchi'uc ti avalab anich'nabic ta sventa ti lec ta xapasic ta sba ta sat ti Diose.

²⁶Ja'uc ti c'usitic avalojic xa ti ac'bil ta matanale, xchi'uc ti c'usi avaloj ta xavac' ti ta xc'ot ta pasel avu'une, ich'ic ech'el ta yavil ti bu t'ujbil yu'un ti Diose.

²⁷Ti bu taje, ta xavac' ta sba yaltar ti Ajvalil Dios avu'unic ti c'usi ta xachiq'uique. Ja'uc xch'ich'el ti chon bolometic ti ta xavaq'uique, malic ta sba yaltar ti Ajvalil Dios avu'unique. Ja'uc ti sbec'tale, xu' xati'ic.

²⁸“Chiquintao ava'iic lec, c'otuc me ta pasel avu'unic ti va'i s'elan laj xa calboxuc ava'iique yo' jech lec ta xbat ac'oplalic xchi'uc ti avalab anich'nabic sbatel osile. Ti jech ta xich' pasel ti c'usi jun yutsil ta q'uelele, jun yutsil ta xil ta sba ta sat ti Ajvalil Dios avu'unique.

²⁹“C'alal ti Ajvalil Dios avu'unique mi laj xa stsutsesbe sc'oplal ti muc'tiquil lum ti bu ta xabat ta yu'ninele, ti c'ot xa o ta arextoe, ti nacaloxuc ta j'ech'el ta sbanomilique,

³⁰bijanic me un cha'e, mu me ja'uc ti achanojic xa liquel ta spasel ec ti c'u s'elan laj spasic to ox ti lumetic taje, ti c'alal ta xavil ta aba ta asatic ta stsuts ti sc'oplalique. Mi ja'uc ti xachiic xa liquel ta yalbel sc'oplal ti sdiosique: ‘Ti c'u to ox s'elan laj snijan xchiman sbaic ta yich'el ta muc' ti sdiosique, ja' jech ta xlic jnijan jchiman ta yich'el ta muc' ec.

³¹Mu me jechuc xapasbeic ti Ajvalil Dios avu'unic ti va'i s'elan taje. Yu'un ta scotol ti mu ts'icbaj ta xa'i ti Dios ti chopol ta xile, ja' ti va'i s'elan ta spasic ti lum ti nijil chimil ta xich'ic ta muc' ti diosetic yu'unique, ti ta xc'ot ta pasel yu'unic ti ta smilic ti ta xchiq'uic ta c'oc' ti yalab xnich'nabique.

³²“Lic abtelanic ta spasel scotol ti va'i s'elan laj calboxuc ava'iique. Mi ja'uc xavepaltasic. Mi ja'uc xach'ayic jutebuc ti c'u yepal albil ono'oxe.