Read Tzotzil Deuteronomio 13 Bible Online

Deuteronomio 13 - Tzotzil bible

Deuteronomio 13

¹“Oy bu xu' ta xvul ta loq'uel ta atojolic mi jun j'alc'op, mi jun jvaichinajel vinic ti ta xalboxuc ti oy c'usi ta xac' ta na'el ti ta xc'ot ta pasele, mi ja' ta xc'ot ta pasel ti oy c'usi ch'ayal ta xc'ot o'ntonal yu'une.

²Xcaltic no'ox une, mi c'ot ta pasel ti c'usi laj yac' ta na'ele, ti xi ta xlic yalboxuc une: ‘Batic, ba jts'aclitic yan diosetic ti mi ja'uc jutebuc xavojtiquinique, batic ta snijanel xchimanel jbatic ta stojol’,

³mu me ja'uc un ti toj c'otel ta avo'ntonique. Yu'un ti Ajvalil Dios avu'unique ta sc'an ta sq'uel ya'i avo'ntonic mi c'ux ta xava'iic ta sjunul avo'ntonic, ta sjunul ach'ulelic.

⁴Nablanic ta stojol, xi'taic ti Ajvalil Dios avu'unique. C'otuc ta pasel avu'unic ti smantaltaque. Chiquintabeic ava'iic ti sc'opojele. Nijano chimano abaic ta yich'el ta muc'. Junanic c'uxianic ta stojol.

⁵Yu'un ti j'alc'op taje, mi ja' ti jvaichinajel vinique, chapal xa sc'oplal ta xich' milel ta scoj ti laj sbijubtasoxuc ta scontrainel ti Ajvalil Dios avu'unic ti c'alal ja' laj scoltaoxuc loq'uel talel ta mosovil ta Egiptoe. Yu'un ti vinic taje ta xac' sjol yo'nton ti ta xch'acoxuc ya'i loq'uel ta be ti bu laj yalboxuc ti Ajvalil Dios avu'unic ti ac'o atamic batele. Yu'un ja' to jech ta xc'ot ta tsutsel ti c'usi ta soquesvan ta atojolique.

⁶“Ja'uc le' une, oy bu ma' ti ta xc'ot ta pasel ja' achi'il ta voq'uele, mi aquerem nich'on, mi atseb, mi ac'uxubinbil ajnil, mi ja' ti buch'u spajem lec xavil abaic xchi'uque, ta mucul ta sc'an ta syanijes ajol yo' jech ta xanijan xachiman abaic ta yich'el ta muc' yan diosetic ti mu ja'uc xavojtiquinique, mi ja'uc laj yojtiquinic ti atot ame'ic ti laj ech'icuc ta vo'nee,

⁷jech c'u cha'al sc'oplal ti diosetic yu'unic ti lumetic ti nopol oyique, ti nom oyique, ti joyol ta apat ta axoconic ta sjoylej banomile.

⁸Mu me ja'uc xc'ot ta pasel ta xaco'oltas ajolic xchi'uc ti jech ta xac' ti sjol yo'nton stuque. Mi ja'uc xach'unbeic. Mi ja'uc ti ta xc'uxubaj avo'ntonic yu'une. Mi ja'uc ti abol sba ta xavile. Mi ja'uc xamucbe smul.

⁹Mi yu'un la q'uelbil no'ox ti avaloj une, milo ya'i. Yu'un vo'ot ba'yel ta xayales avoc ac'ob ta stojol. Tijilic talel ec ta syales yoc sc'obic scotol ti lum ti c'alal laj xa ox avaq'ue.

¹⁰Ac'beic ya'i ton ja' to ti c'uxi ta xcham ta scoj ti laj yac' sjol yo'nton ta sc'an ta xch'acoxuc loq'uel ta stojol ti Ajvalil Dios avu'unic ti ja' laj sloq'uesoxuc talel ti bu to ox mosovinbiloxuc ta Egiptoe.

¹¹Ti jech taj une, scotol israeletic ta xc'ot ta sni' ta xchiquinic, xi'bal xa sba ta xa'i mi ta xlic xcha'pas yan velta chopol mulil jech c'u cha'al taje.

¹²“Oy yic'al ta xava'ibeic sc'oplal junuc jteclum ta scotol ti lum ti ac'biloxuc yu'un ti Ajvalil Dios avu'unic yo' ta xanaquiique, ti ta xc'ot ta ani' achiquinic ti oy xa vul ta loq'uel

¹³viniquetic ti stoyoj sbaic ta stojol ti Diose, ti ta soquesan ti jnaclejetic ta lum taje, ti ta sujvan ta snijanel xchimanel bail ta yich'el ta muc' diosetic ti mu'yuc xavilic oe.

¹⁴Tsots sc'oplal, t'unic lec ti va'i s'elanil ti c'op taje. Mi jech ono'ox ta melel ti va'i s'elan xpuquet ti c'op ti oy buch'u mu ts'icbaj ti c'usi ta spase,

¹⁵milic ya'i ta espada ti jnaclejetic yu'un ti lum taje, xchi'uc scotol ti chon bolometic yu'unique. Jech xtoc c'otuc ta pasel ti tubbeic sc'oplal ta j'ech'el scotol ti c'usitic oy yu'unique.

¹⁶Tsobbeic talel ta o'lol lum scotol ti c'usitic ja' sc'ulejalique. Tsanbeic sc'ac'al ti ta lum taje. Scotol ti c'usitic laj apojbeic talel ti avajcontraique, tubic sc'oplal ta j'ech'el jech c'u cha'al ta xc'ot ta pasel ti chic'bil matanal ta xich' ac'bel ti Ajvalil Dios avu'unic sventa yich'obil ta muq'ue. C'otuc ta pasel ti jteclum taje ti j'ech'eluc o ti stucuc xa xch'uch'ulil busuluc comuque, ti mi ja'uc xa ta j'ech'el ta xich' cha'meltsanele.

¹⁷“Mi ja'uc xavich'ic comel ti c'usitic chapbil xa sc'oplal ta xich' tubele. Jech o xal un, mi ja'uc ta x'ilin ti Dios ta atojolic une. Yu'un c'ajomal no'ox ta xc'ot ta pasel ti c'ux ta xaya'iique, ti ta xac' epajanic jech c'u cha'al albilic ti amolmuc'totic ti laj ech'icuc ta vo'nee.

¹⁸Yu'un mi staoj ono'ox yav ta xach'unbeic ti c'usi sc'an pasbel ti Ajvalil Dios avu'unique, ti ta xc'ot ta pasel avu'unic scotol ti smantaltac ti laj calboxuc ava'iic li'e, lec tuc' ta xil ta sba ta sat ti c'usi ta xapasique.