Read Tzotzil Deuteronomio 15 Bible Online

Deuteronomio 15 - Tzotzil bible

Deuteronomio 15

¹“Ta jujun vucub jabile, ta xach'aybe yil ti buch'u oy yilic ta atojole.

²Xch'ayel ti ilil taje, xi s'elan xcholet ti smelol jech c'u cha'al li'e: Scotol ti buch'utic oy c'usi yac'oj ta ch'om jujuti' ta stojol ti xchi'ile, loc'uc ayanuc xa ta yo'nton ti ac'o xch'aybe yil ti mu'yuc sutesbat yu'un ti c'usi ch'amunbile. Yu'un laj xa sc'oplal ma' ti ta to svulilan ta stojel yil ti yuts' yalale, mi ja' ti svinquilele, ja' ti sta xa yorail ta xich' alel sc'oplal sjabilal ti ta xich' ch'ayel ti ilil ta sventa ti ich'bil ta muc' ta xc'ot ti Diose.

³Yan ti jyanlume, xu' xavulilan ta sc'anbel ti ac'o stoj ti yile. Ja'uc ti avinquilele, ch'aybo yil ta sventa ti oy c'usi laj sc'anbote.

⁴Ti jech taj une, mi junuc ti oy buch'u abol sba avu'unic ta acotolique. Yu'un ti Ajvalil Dios avu'unique ta sva'an sba ta atojolic ta lum ti bu ta xac' ti arextoique,

⁵ja' to ono'ox un mi ta ono'ox xach'unbeique, mi ta xavabtelanbeic ta spasel scotol ti smantaltac ti laj calboxuc ava'iic li'e.

⁶Melel unbi, ti Ajvalil Dios avu'unique ta sva'an sba ta atojolic jech c'u cha'al yaloj ono'oxe. Yu'un oy avu'unic ta xavac'beic xch'amun ti epal muc'tiquil lume, ti mu ja'uc xajotet xa ta ch'ome, ti peq'uel ta xc'ot sc'oplal avu'un ti epal muc'tiquil lume, ti mu ja'uc ti peq'uel ta xc'ot ac'oplalic yu'une.

⁷“Yu'un mi oy buch'u me'un mu'nat jlomuc ti avinquileltac ta junuc jteclum ti bu ta xa'ac'batic yu'un ti Ajvalil Dios avu'unique, mu me ja'uc xapas ti mu'yuc ach'ulel ta xapas aba ta sjalantabel scoltael ti avinquilel ti c'usi tsots sc'oplal ta xtun yu'une.

⁸Ja'uc le' une, oyuc ti xc'uxul avo'nton ta stojole, ac'bo xch'amun ti c'usi ta xtun yu'une.

⁹Mu me ja'uc xavac' abtejuc ta ajol avo'nton ti xi s'elan ta xlic snop ti chopol snopbenal avu'une: ‘¡Yanche! ta xa sta yorail ta stsuts ti yucubal jabil ti ja' xa sjabilal ta xich' ch'aybel yil ti buch'u oy yile’, ti chopol xa asat ta xaq'uel ti avinquilel ti buch'u mu'yuc c'usi x'ayan yu'une, ti mu xavac'be xch'amune. Yu'un ti stuc une ta xlic oc' avanuc ta stojol ti Dios avu'une. Jech o xal un, ja' xa amul c'ot ti jech laj apas taj une.

¹⁰Tsots sc'oplal, coltao no'ox. Mi ja'uc vocoluc xava'i. Ti jech abtel ta xapase, ta sva'an sba ta atojolal ti Ajvalil Dios avu'un ta scotol ti c'usi ta xapase, xchi'uc ti c'usiuc no'ox ta xavabtelane.

¹¹Ti li' ta abanomile, mu'yuc bu xavil ti mu'yuc buch'u abol sbae. Ta xcalbot ava'i un, oyuc ti yutsil slequil avo'nton yu'un ti avinquileltac ti buch'u oy svocolic yu'un sme'onal smu'natil ta alumale.

¹²“Mi oy jlomuc avinquileltac hebreoetic mi vinic, mi ants ti ta xchon yoc sc'ob ta mosovinel ta atojole, vaquib no'ox jabil ta xtun ta atojol. Ja'uc ti yucubal jabile, colem xa ta xc'ot.

¹³Ja'uc ti c'alal ta xbate, mu me jechuc smeyoj yoc sc'ob ta xloc' batel avu'un un.

¹⁴Yu'un le'e, ta xavac'be ech'el xchon sbolomtac ti ja' avu'une, xchi'uc yepal trigo, xchi'uc vino, ti lec xcaltic ava'ie, ti mu atucuc lec utsucot xa yu'un ti c'usitic laj yac'bot ti Ajvalil Dios avu'une.

¹⁵Mu me xach'ay ta avo'nton ec ti mosovinbilot la'ech' ta Egiptoe. Yu'un ti Dios avu'une laj spojot loq'uel talel. Jech o xal avi une, ta xcalbot ava'i ti tsots sc'oplal sc'an ta xapase.

¹⁶“Ja'uc le' une, mi ta xal ti amosov ti mu sc'an xictaot comele, ti mu xastuch'ot ta yo'nton yu'un ti c'u avepalique, ta sventa ti lec ac'uxubinoje,

¹⁷va'i un unbi, ic'o batel, ba va'ano ta sti' ana, jombo xchiquin ta junuc jich'il ni' taq'uin. Yu'un ti jech taj une, ta xcom o ta amosov ta j'ech'el. Ma'uc no'ox taje, ja' jech xapas ta stojol ti ame' mosov xtoc mi sc'an xcom ta atojole.

¹⁸Mu me ja'uc xc'ot ta pasel ti chopol xa ta xava'i yu'un ti ta xavac' coluc batel ti amosove. Yu'un oy xa ta svaquibal jabil laj yac' sba ta tunel ta atojol ti c'ajomal no'ox o'lol laj atoj jech c'u cha'al ta xich' tojel ti jun j'abtele. Jech xtoc un ti Ajvalil Dios avu'une ta sva'an sba yu'un ta stojol scotol ti c'usitic ta xapase.

¹⁹“Scotol sba yoltac ti avacaxique, mi ja' ti achijique ti stot chlaj voc'uque, ch'acbil xa ta xc'ot ta sventa yo' ta xich' ac'bel ti Ajvalil Dios avu'une. “Ja'uc le' une, mu xatic' ta abtel ti sba xch'in ol ti sme' avacaxe. Mi ja'uc xaloc'be stsotsil ti sba xch'in ol ti sme' achije.

²⁰Jujun jabil, jmoj vololoxuc ti c'u avepalic ta jchop na ta xati'ic ta sba ta sat ti Ajvalil Dios avu'unic ta yavil ti bu t'ujbil yu'un ti Diose.

²¹Yan ti mi oy yuni vocol xa'i sbae, mi coxov, mi ma'sat, mi oy to yan ti mu'yuc yutsil ta q'uelele, mu me xavac' ta milel ta sventa smoton ti Diose.

²²Tunic lajesic ta alumalic ti bu nacaloxuque. Yu'un xu' xatun xalajes acotolic mi mesbil tusbiloxuc, mi mo'oj, jech c'u cha'al ta xati'ic ti tsajal te'tical chije, mi ja' ti yaxal muc' ta te'tical chije.

²³Ja'uc le' une, j'ech'el mi ja'uc xati'beic ti xch'ich'ele. C'ajomal no'ox, malic ech'el ta banomil jech c'u cha'al junuc vo'.