Read Tzotzil Deuteronomio 16 Bible Online

Deuteronomio 16 - Tzotzil bible

Deuteronomio 16

¹“C'alal ta xc'ot yual ti Abib sbie, c'otuc ta pasel avu'unic ti ta xapasic sna'obil ti q'uin Colel sventa yich'obil ta muc' ti Ajvalil Dios avu'unique, yu'un ja' o me yu'al jech ac'ubal ti c'alal laj sloq'uesoxuc talel ti Ajvalil Dios avu'unic ta Egiptoe.

²“Ti c'u sjalil sq'uinal ti Colele, ta xavaq'uic vacaxetic xchi'uc chijetic ti ta xich' milel ta sventa ti Ajvalil Diose, ta yavil ti bu st'ujoj stuc ta sventa stael ta na'ele.

³“Ti milbil chon bolometique, ta xalajesic xchi'uc pan ti ch'abal ac'bil ti spajubtasobile. Vucub c'ac'al sjalil ta xave'ic pan ti ch'abal ac'bil ti spajubtasobile, ti ja' jun pan sventa svinajeb oy ti vocole, yu'un ta jech no'ox yepal laloq'uic talel ta anil ta Egiptoe. Ti jech to cuxuloxuc une, vuleso ta avo'ntonic ti sc'ac'alil laloq'uic talel ta Egiptoe.

⁴Ti vucub c'ac'al sjalil taje, mi jset'uc ta xatunesic spajubtasobil pan ti c'u sjamlej ti avosilique. Ti sbec'tal ti milbil matanal ta xich' aq'uel ta smalil c'ac'al ta sliquebal c'ac'ale, ta j'ech'el mi jset'uc ta xcom scomelal avu'unic ta yoc'omal.

⁵Mi ja'uc buyuc no'ox ta xavaq'uic milbil matanal ta jujun lumetic ti bu la'ac'batic yu'un ti Ajvalil Dios avu'unique.

⁶Ja'uc le'e, c'ajomal no'ox ta xbat avaq'uic ti bu t'ujbil yu'un ta yavil ti bu ta xich' tael ta na'ele. Tsots sc'oplal ta xavaq'uic ta smalil c'ac'al ti c'alal ta xa xch'ay batel ti c'ac'ale. Yu'un ja' o jech yorail laloq'uic talel ta Egipto.

⁷Ti beq'uet ti ta xavaq'uic ta matanale, ta'ajesic, tunesic, lajesic ta yavil ti bu t'ujbil yu'un ti Ajvalil Dios avu'unique. Sutanic ech'el ta anaic sob ta yoc'omal un.

⁸Yu'un vaquib c'ac'al sjalil ta xave'ic pan ti ch'abal ac'bil ti spajubtasobile. Ja'uc ta yucubal c'ac'al une, ta xapasic jun muc' ta ch'ul tsoblej sventa stael ta na'el ti Ajvalil Dios avu'unique. Yu'un ti jech c'ac'al taje, mi jtosuc abtel ta xavabtelanic.

⁹“C'alal mi ech' xa ox yucubal xemuna ti bu lic talel sc'ac'alil ti lic atsobic ti trigoe,

¹⁰ta xapasic q'uin ta sventa Xemunaetic ti ja' stael ta na'el ti Ajvalil Dios avu'unique. Ta xavaq'uic ti matanaletic ti loc' ayan ta o'ntonal avu'unique ti c'u s'elan laj sva'an sba ta yac'beloxuc ti Ajvalil Dios avu'unique.

¹¹Yu'un ta xapasic q'uin ta sba ta sat ti Ajvalil Dios avu'unique, ta yavil ti t'ujbil yu'un ti bu xba yich' tael ta na'ele, jmoj tsobol ta xabatic xchi'uc ti avalab anich'nabique, ti amosovique, ti levitaetique, ti jyanlumetique, ti buch'u mu'yuc xa buch'u oy yu'une, ti me'unal antsetic ti nacal ta alumalique.

¹²Vuleso ta avo'ntonic ti mosovil la'ech'ic ta Egiptoe. Ja' yu'un un cha'e, abtelanic ta spasel scotol ti va'i s'elan ti oy c'usi jbel ti tsots albil sc'oplale.

¹³“C'alal mi c'ot xa ta pasel ti laj xa ox atsobic ta j'ech'el ti trigoe, mi laj xa apits'ic xtoc ti uvae, vucub c'ac'al sjalil ta xapasic q'uin ta sventa ti Axibal yanal te' nae.

¹⁴Muyubajanic, mu'yucuc c'usi xana'ic ta x'ech' avu'unic ti q'uin jmoj xchi'uc ti avalab anich'nabique, ti amosovique, ti levitaetique, ti jyanlumetique, ti buch'u mu'yuc xa c'usi oy yu'une, xchi'uc ti me'unal antsetic ti nacal ta alumalique.

¹⁵Ti q'uin taje, vucub c'ac'al sjalil ta xapasic sventa ta stael ta na'el ti Dios ta yavil ti bu t'ujbil yu'une. Yu'un ti Ajvalil Dios avu'unique laj sva'an sba ta atojol ta sventa ti c'usitic xloc' x'ayan avu'unique, xchi'uc ti laj apich' avoc ac'obic ta abtel ti c'ot ta pasel ti mu'yuc c'usi xana'ic ta j'ech'el yu'une.

¹⁶“Scotol viniquetic sc'an ta xbatic ta stojol Dios oxib velta ta jabil ta yavil ti bu t'ujbil yu'un ti Diose, ti c'alal xi yorail ta x'ech' ti q'uinetic jech c'u cha'al li'e: ti sc'ac'alil ti ta xich' ve'el ti pan ti ch'abal ac'bil ti spajubtasobile, ti sq'uinaltac ti Xemunaetique, ti sq'uinal ti Axibal yanal te' nae. J'ech'el mi junuc buch'u xu' ta xtal ta jtojol mi mu'yuc c'usi yich'ojic talele.

¹⁷Yu'un ta jujun tal ta xich' batel ti matanal jech c'u cha'al staoj ti sva'anoj sba ta stojolal ti Ajvalil Dios yu'une.

¹⁸“Va'anic jchapanvanejetic xchi'uc j'opisialetic ta sventa scotol ti lumetic ti bu ta xa'ac'batic yu'un ti Ajvalil Dios avu'unic ta jujuvoq'ue, yo' jech oy tuq'uil chapanel yu'un ti jteclume.

¹⁹Mu xayanijesbeic sc'oplal ti lequil chapanele. Mi ja'uc xapas abaic ti jeltos xa ta xapasic ta stojol ti lume. Mi ja'uc ti aq'ueloj xa no'ox aba yu'un ti mich'ob c'abale. Yu'un ti mich'ob c'abale, sbic'tajesobil yo'nton xchi'uc ti buch'utic bijique. Ta syanijesbe smelol sc'op xtoc ti buch'u mu'yuc smule.

²⁰Yu'un ti lequil chapanele, tamo ech'el. Ja' jech ti tsots sc'oplal ta xatamic ta spasel yo' jech ta xacuxiic, yo' jech ta xavu'ninic ti banomil ti bu ta xa'ac'batic yu'un ti Ajvalil Dios avu'unique.

²¹“Mi jtosuc ts'unubal ti xats'unic ta stunesel sventa yich'el ta muc' ti loc'obbail diose. Mi ja'uc xba avac' ta sts'el yaltar ti Ajvalil Dios avu'unique.

²²Mi ja'uc xava'anic loc'obbailetic ti meltsanbil ta ton ti ta xanijan xachiman abaic ta yich'el ta muq'ue. Yu'un ti va'i s'elan taje, toj chopol ta j'ech'el ta xil ti Ajvalil Dios avu'unique.