Read Tzotzil Deuteronomio 17 Bible Online

Deuteronomio 17 - Tzotzil bible

Deuteronomio 17

¹“Mi ja'uc jcotuc tot vacax, mi jcotuc chij ti oy yuni vocol xa'i sbae, ti oy c'usi soquem yu'une, mu xamilbeic ta sventa smoton ti Ajvalil Dios avu'unique. Yu'un ti jech taje, toj ech'em chopol ta xil.

²“Xu' van ti oy bu ta xc'ot ta pasel ta alumalic ti bu ta xa'ac'batic yu'un ti Ajvalil Dios avu'unique, ti ta xvinaj sc'oplal mi jun vinic, mi jun ants ti ta xlic xch'ay ta yo'nton ti tratee, ti ja' ta xlic spas ti c'usi mu lecuc ta xil ti Diose,

³ti ta xlic snijan xchiman sba ta yich'el ta muc' ti yan diosetique, mi ja' ti c'ac'ale, mi ja' ti ue, mi ja' ti c'analetique, ti c'alal mu jutebuc jechuc yaloj ti Diose.

⁴Mi c'ot lec ta ani' achiquinic ti sc'oplale, t'unic lec ti va'i s'elan taje. Mi jech ono'ox ta melel sc'oplal ti jech yacal ta xc'ot ta pasel ti c'usi chopol ta stojol ti Israele,

⁵ic'bil ta xbat ta stojol ti jchapanvanejetic yu'un ti jteclum ti buch'u yacal xa ta spas ti c'usi toj chopole. Yu'un j'ech'el ta xchapanbat sc'oplal ti ta xich' pujel ta milel ta tone.

⁶“Ti jech ta xloc' sc'oplal ta xich' milele, ja' no'ox mi oy chib mi oxibuc rextico ta xalique. Mi jun no'ox ti uni rextico ta xal ti c'u s'elane, mu'yuc buch'u xu' ta xjelav yoc sc'ob ta smilel.

⁷Yu'un ti rexticoetique ja' ba'yel ta syales yoc sc'obic ta spujbel ton ti buch'u chapal sc'oplal ta xich' milele. Jech ta spasic ec ta ts'acal scotol ti jteclume. Yu'un ja' to jech ta xich' ch'aybel sc'oplal ti c'usi ta soquesvan ta atojolique.

⁸“Mi oy ta xc'ot ta pasel ti toj vocol ta chapanel ta j'ech'el ti sc'an chapanele, mi ja' sc'oplal ti chamem xae, mi ja' ti letovajele, mi ja' ti yayijesele, mi c'usiuc no'ox yan ti ta xc'ot ta pasel ta alumalique, batanic c'alal to ta yavil ti bu t'ujbil yu'un ti Ajvalil Dios avu'unique.

⁹Va'i un, bat ich'beic ye sti' ti pale levitaetique xchi'uc ti jchapanvanej ti ja' o c'otem ta sba ti chapanvaneje, yo' jech ta xavalbeic ya'i ti c'usi c'ot ta pasele. Ti stuquic une ja' ta xloc' ta ye ta sti'ic ti bu c'alal sq'ueloj batel ti c'opetic taje.

¹⁰Jech ti vo'oxuc une ja' me jech ta xapasic scotol ti c'u s'elan xcholet laj sbijubtasoxuque.

¹¹Yu'un ti c'u s'elan loc' ta ye ta sti'ique, ja' me xatamic ech'el. Mi ja'uc xajelic jutebuc.

¹²Ja'uc ti buch'u ta spas ti c'u s'elan ta x'ac'bat sna' yu'un ti stoyobbaile, ti ta sbaj ti c'u s'elan ac'bat sna' yu'un ti pale ti yac'oj sba ta tunel yu'un ti Diose, mi ja' ti c'u s'elan loc' ta ye ti jchapanvaneje, chapal xa sc'oplal ec ti ta xich' milele. Yu'un ja' to jech ta xtub sc'oplal ti c'usi chopol oy ta stojol ti israeletique.

¹³C'alal ta xa'iic ti jteclum ti va'i s'elan taje, ta x'och xi'el ta yo'ntonic. Ta xicta sbaic yu'un ti stoyobbailique.

¹⁴“C'alal mi la'ochic batel ta banomil ti bu ta xa'ac'batic yu'un ti Ajvalil Dios avu'unique, ti laj xa avu'ninic yo' jech ta xanaquiique, xu' ti xi ta xlic avalique: ‘Ta jc'ancutic junuc ajvalil yo' xisventainotic jech c'u cha'al oy yu'unic scotol ti lumetic ti nopol xquiltic ta nacleje.’

¹⁵Ti jech taje, tsots sc'oplal ja' ta xava'anic ta ajvalilal ta ateclumalic junuc avinquilelic ti buch'u ta xt'ujat yu'un ti Ajvalil Dios avu'unique. Ma'uc xava'anic ta ajvalil avu'unic ti jyanlumetique, ti c'alal ma'uc avinquilelique.

¹⁶Ja'uc ti ajvalil taj une, ja' ta sc'an ti ma'ucuc batem ta yo'nton ta smanel ti epal ca'etique, mi ja'uc ta staquel batel svinictac ta Egipto ta smanel ca'etic yo' ta x'epaj yu'un. Yu'un ti Diose xi ono'ox laj yalboxuque: ‘Ta j'ech'el mi ja'uc xa ta xtal axaniic ti be li'e.’

¹⁷Ja' jech xtoc tsots sc'oplal ti ma'uc ep ti yajniltac ta sa'e yo' jech mu xyanij ta be xchi'uc. Mi ja'uc ti busul yu'un ti oro ti plata ta sta ta tsobele.

¹⁸“C'alal mi laj snup yabtel ta ajvalilal yo' ta spas mantale, ta xal mantal ti ac'o yich' cha'loc'tael jlicuc ta sme' ti c'u s'elan ts'ibabil ti chanubtasel taje. Ti jlic taje, ac'o yich' comel ti ajvalile. Ti sme' ti c'u s'elan ts'ibabil taje, ja' xchabiojic ti pale levitaetique.

¹⁹Yu'un tsots sc'oplal ti oyuc ta yoc ta sc'ob jlicuc ti cha'loc'tabil vune. Yu'un ta xavta scotol c'ac'al ti c'u sjalil cuxule yo' jech ta xchan ta snijanel xchimanel sba ta stojol ti Ajvalil Dios yu'une, yo' jech ta xchan ta yabtelanel ti smantaltaque,

²⁰yo' jech ta xc'ot ta pasel ti mu cajaluc xa xa'i sba ta stojol ti svinquileltaque, ti j'ech'eluc mi ja'uc ta sq'uej sba ta stojol ti mantal taje. Ti jech taj une, ti stuque xchi'uc ti snitilultaque, jal xu' ta xtunic ta ajvalilal ta stojol ti israeletique.