Read Tzotzil Deuteronomio 18 Bible Online

Deuteronomio 18 - Tzotzil bible

Deuteronomio 18

¹“Scotol snitilultac ti Levi ti ja'ic ti pale levitaetic xcaltique, mu'yuc ta xich'ic sparte osilic jech c'u cha'al ta xich'ic ti jlom israeletique. Yu'un tsots sc'oplal ta sta sve'elic yu'un ta sventa ti milbil matanaletic ti ta xich' ac'bel ti Diose, ti ja' c'otem ta yu'untaque.

²Yu'un mi ja'uc ta xich' xrexto osilic jech c'u cha'al ta xich' ti yan svinquileltaque. Yu'un ti xrextoique, ja' ti c'usitic ta x'ac'bat ti Dios ti jech ono'ox yaloje.

³“Xi s'elan ti tsots sc'oplal ta stunesic ti paleetic ti c'otem ta sbaic ta xich'ic ta sventa ti milbil tot vacaxe, xchi'uc ti ch'iom chij ti ta xaq'uic ta stojol Dios ti jteclume: ja' ti xpech-pechul sbaquil snequebe, sjoylej ti sbaquil yolon yee, xchi'uc ti stsucute.

⁴Ma'uc no'ox taje, ta xich' xtoc ti sba sat trigoe, ti vinoe, ti aceitee, ti tsotsil chijetic ti sba to ta xich' loq'uele.

⁵Yu'un ta scotol ti jaychop nitiluletique, ja' t'ujbil c'otic ti levitaetic yu'un ti Ajvalil Dios avu'unique yo' jech ti totiletique, ti alab nich'nabiletique, ta xcom ta sbaic ta j'ech'el ta spasbel sventa yich'el ta muc' ti Diose.

⁶“C'alal mi oy jun levita ta junuc alumalique, buyuc no'ox ta yosilal ti Israel ti tijbil yo'nton ta xbat ya'i ta yavil ti bu t'ujbil yu'un ti Diose,

⁷xu' ta xlic abtejuc ta paleal ta sventa ti Diose, jech c'u cha'al scotol ti svinquileltac ta levitail ti ta xtunic ta stojol ti Diose.

⁸Ti c'u yepal ta xich' spuculal ti svinquileltaque, ja' jech yepal ta xich' ec. Yu'un mu'yuc no'ox taje, ta me xich'be ti c'u yepal xrexto ti stot ti oy sc'oplale.

⁹“C'alal mi la'ochic ech'el ta lum ti bu ta xa'ac'batic yu'un ti Ajvalil Dios avu'unique, mu xaco'oltas abaic ta spasel jech c'u cha'al ti toj chopol ti c'u s'elan liquem yu'unic ta spasel ti muc'tiquil lumetic teye.

¹⁰J'ech'eluc ti mu'yucuc buch'u junucal avu'unic ti ta xac' ta milel ti xnich'on ti c'alal to c'oc' ta sten ochele. Mi ja'uc xachanic ti t'unjvaneje, ta scaj'alel ti c'usi ta xc'ot ta pasel le' ech'ele. Mi ja'uc ta yo'ntolinel ta xachanic ti ac'-chamele.

¹¹Mi ja'uc ta xavac' ta chanel ti xilic toyol cajale, ta jaq'uel abaic ta stojol ti jt'unvanejetique, mi ja'uc ta xchanel stael ta c'oponel ti yan snopbenal yu'une, mi ja'uc ta xchanel sjaq'uel aba ta stojol ti buch'u xu' ta xic'be talel xch'ulel ti animae.

¹²Yu'un ti Diose toj chopol ta xil ta j'ech'el ti buch'utic ta spasic ti va'i s'elan taje. Ti jech ta xjipatic loq'uel ta aba ta asatic yu'un Ajvalil Dios avu'unic ti muc'tiquil lum taje, ja' ta scoj ti c'otem ta pasel yu'unic ti va'i s'elan liquem ti chopol ta j'ech'ele.

¹³Yu'un ti vo'oxuque, tsotsuc sc'oplal c'otuc ta pasel avu'unic ti j'ech'eluc junuc avo'ntonic ti lecuc xavil abaic xchi'uc ti Diose.

¹⁴Yu'un ti muc'tiquil lumetic taje, ti ta xavu'ninbeic ti sbanomilique, toj c'otel yo'ntonic ta xch'unbeic sc'op ti buch'utic ta scaj'al ti c'usitic ta xc'ot ta pasel le' to batele, ta xch'unbeic sc'op ti c'usitic ta xal ti jt'unvanejetique. Ja'uc ti Ajvalil Dios avu'unic une, mi ja'uc xac' ye sti' ti jech ta xapasic ti va'i s'elan taje.

¹⁵“Ti Ajvalil Dios avu'unique, ta xc'ot ta pasel yu'un ti ta xvul ta loq'uel jun j'alc'op ta atojolic jech c'u cha'al ti vu'une, ti tsots sc'oplal ich'bil ta muc' ta xc'ot avu'unique.

¹⁶Taj une, ja' me sc'oplal ta melel ti laj ac'anbeic ti Ajvalil Dios avu'unic ti c'alal oyoxuc ta vits Horeb ti c'alal sc'ac'alil tsoboloxuc acotolic ti xi laj avalbeique: ‘Mu xa jc'an xca'ibecutic sc'opojel ti Ajvalil Dios cu'untic yan veltae, mi ja'uc ta sq'uelel ti muc' ta tilemal c'oc' ti ta xijcham o yu'une.’

¹⁷Ja'uc le' une, xi laj yalbun ti Diose: ‘Jechuc un cha'e, ti jech laj yalique,

¹⁸jech ta xc'ot ta pasel cu'un ti ta xvul ta loq'uel jun j'alc'op ta stojolic jech c'u cha'al ti vo'ote, ti ja' junuc svinquilel sbaique, yo' jech ta x'albat ya'iic ti c'usi ta xcale.

¹⁹Scotolic ti buch'utic mu xich'ic ta muc' ti j'alc'op ti ta xc'opoj ta jventae, ta xquich'be ye sti'ic ya'i.

²⁰Ja'uc ti j'alc'op ti cajal xa xa'i sba ti oy c'usi ta xal ta jventa yilel ti c'alal mu'yuc c'usi calojbee, mi mo'oje, mi ja' ta xalbe sc'oplal ti yan diosetique, chapal sc'oplal ta xich' milel.’

²¹Yan ti mi xachi ta xlic anopique: ‘¿C'u s'elan ta na'el mi ja' sc'opojel Dios ti c'usi ta xale?’, xi s'elan ti oyuc ajol ta snopele:

²²Mi mu xc'ot ta pasel ti c'u s'elan laj yal ti j'alc'ope, ja' svinajeb ti mu'yuc c'oponat yu'un ti Diose. Yu'un ti j'alc'op ti c'opoje, c'ajomal no'ox tijbil yo'nton yu'un stoyobbail ti jech c'opoje. Mi ja'uc xaxi'ic yu'un.