Read Tzotzil Deuteronomio 20 Bible Online

Deuteronomio 20 - Tzotzil bible

Deuteronomio 20

¹“C'alal ta xaloq'uic batel ta stsaquel ta c'op ti avajcontraique, ti ta xavilic ti mu albajuc yepal svinictac ti cajalic ta ca'e, xchi'uc ti ep scarretaic sventa ac'ob-letoe, ti yepal to x'ech' ti soldadoetic yu'unique, ti ja' mu sta ti vo'oxuque, mu xaxi'ic yu'un. Ja'uc ti vo'oxuque, oy ta atojolic ti Ajvalil Dios avu'unic ti laj sloq'uesoxuc talel ta Egiptoe.

²Yu'un ti c'alal ta xc'ot yorail ta xlic ti ac'-letoe, ti palee ta sbijubtas ta stojobtasel ti soldadoetique.

³Yu'un xi ta xalbe ya'iique: ‘A'yio ava'iic, israeletic, ts'et chiquintaic li'e. Li' tanae, ta xbat atsaquic ta c'op ti avajcontraique. Mi ja'uc xatsiq'ues avo'ntonic yu'un. Mi ja'uc xaxi'ic yu'un. Mu xasibtas abaic. Mi ja'uc xanicnunic xa liquel yu'un. Mi ja'uc xbat ach'ulelic yu'un ta xi'el.

⁴Yu'un xchi'inojoxuc ti Ajvalil Dios avu'unique. Yu'un ja' stuc ta sva'an sba ta stsaquel ta c'op ti avajcontraique, ti ta xc'ot ta pasel yu'un ta atojolic ti ta xac' ta ilel ti mu'yuc c'usi xu' yu'unique.’

⁵“Ts'acal to un, xi ta xalic ti ta xchi'invan ta lo'il ti banquilal moletic ti c'alal ta xlic c'opojicuque: ‘Le' une, mi oy buch'u junucal avu'unic ti ja' to no'ox tsuts comel yu'un ta smeltsanel ti snae, ti mu'yuc to stsajoj comele, sutuc ech'el ta sna, naca mi yanuc o ti buch'u ta stsaj ti ach' na yu'une, ta scoj mi cham ta ac'-letoe.

⁶Mi oy buch'u junucal avu'unic ti sts'unoj ti uva ti mu'yuc to bu slo'ojbe ti sate, sutuc ech'el ta sna, naca mi yanuc o xa buch'u ta stsob yu'une, ta scoj mi cham ta ac'-letoe.

⁷Mi oy buch'u junucal avu'unic ti tac'bil xa yu'un tseb ti mu'yuc to yic'oje, sutuc ech'el ta sna, naca mi chamuc ta ac'-leto, xu ti yan ta xic' ti slecome.’

⁸“Mi laj taj une, xi ta xlic yalic ta ach' ti banquilal moletic ti ta xalbeic ya'iic ti soldadoetique: ‘Mi oy buch'u junucal avu'unic ti mu'yuc yip yo'ntone, ti ta xi' ta xa'ie, sutuc ech'el ta sna yo' jech mu stsiq'uesbe yo'nton ti xchi'iltaque.’

⁹C'alal mi laj yo'nton ta c'opojel ti banquilal moletic une, jech ti banquilal soldadoetic yu'un ti soldadoetique, jba'be jelavicuc ech'el ta stojol ti epal soldadoetique.

¹⁰“C'alal ta xanopajic ech'el ta lum ti ta xatsaquic ta letoe, tsots sc'oplal ba'yel albeic ya'iic ti ac'o yac' ochanic ta lequilale.

¹¹Mi ta xc'ot ta yo'ntonic ti jnaclejetic ta lum ti ta lequilal ta xac' ochanique, ja' yu'un unbi, c'otuc ta amosovic, ti tsots abtejicuc avu'unique.

¹²Yan ti mi mu xac' ochanic ta lequilale, ti c'ajomal no'ox ta sliquesic ti letoe, ta jech to yepal, joyobta ya'iic ti lume, tsaquic ya'iic ta leto.

¹³Ti Ajvalil Dios avu'unique ta xac'boxuc ta avoc ta ac'obic. Jech ti vo'oxuc une ta xamilic ta espada scotol ti jnaclejetic yu'une.

¹⁴Yu'un ochuc ta avoc ta ac'obic ti antsetique, ti ololetique, ti vacaxetique, scotol xa ti c'usi x'ayan yu'un ti lume, ja' avu'unic. Xu' xac'upinic ta stunesel scotol ti bu c'alal ta xac' ye ti Ajvalil Dios avu'unic ti xu' ta xavich'beic ti c'usitic ja' yu'un ti avajcontraique.

¹⁵Ja' ono'ox jech xapasic ya'i ta stojol ti yan jteclumetic ti mu nopoluc ta xavilic liquele, ti ma'uc tiq'uilic ti bu ta xabatic ta yu'ninele.

¹⁶Ja'uc ti jteclumetic yu'un ti muc' ta lume, ti oy sc'oplal ta xac'boxuc ta arextoic ti Ajvalil Dios avu'unique, jbel sc'oplal ti mu junuc ti oy buch'u cuxul ta xavicta comele.

¹⁷Tsutsesbeic ya'iic sc'oplal ta j'ech'el jech c'u cha'al ta xich' milel smoton ti Diose, ja' ti hititaetique, ti amorreoetique, ti cananeoetique, ti ferezeoetique, ti heveoetique, xchi'uc ti jebuseoetique. Pasic ta stojol jech c'u cha'al yalojbot mantal ti Diose,

¹⁸yo' jech mu xaschanubtasoxuc ta spasel ti spajebal xa no'ox chopol ta spasic ti ta snijan xchiman sbaic ta yich'el ta muc' ti diosetic yu'unique, ti xu' xata amulic yu'un ta stojol ti Ajvalil Dios avu'unique.

¹⁹“Mi jal xavoletic yo' ta xc'ot ta u'ninel avu'unic ti jteclume, mu xajipic ta lomesel ta eq'uel ti ste'ticale. Yu'un ta xtun avu'unic ta stunel slajesel ti sate. Ma'uc no'ox taje, yu'un ja' no'ox jun te' ti tec'ajtic ta osile. Yu'un ma'uc jun jnaclej ti xu' ta spac ti sc'oplal ti c'alal ta xajipic ta lume.

²⁰Manchuc mi jech un, ja'uc le' une, xu' xalomesic ti bu mu stac' tunesel lajesel ti sate, ti xu' ta xatunesic ta moc ti c'alal yacaloxuc ta stsaquel ta c'op ti jteclume, ja' to ti c'uxi och ta avoc ta ac'obique.