Read Tzotzil Deuteronomio 21 Bible Online

Deuteronomio 21 - Tzotzil bible

Deuteronomio 21

¹“Ta muc' ta lum ti bu ta xac'boxuc arextoinic ti Ajvalil Dios avu'unique, oy bu xu' ti telel ta osiltic laj yich' tael junuc anima ti milbile, ti mu xvinaj buch'u laj smile.

²Ja' yu'un un, ti moletic ti ich'bil ye sti'ique, xchi'uc ti jchapanvanejetique, ta xchapic ta nopel c'u snatil yiloj ti jteclumetic ti bu no'ox nopole xchi'uc ti bu telel ti animae.

³Va'i un, ti moletic yu'un ti jteclum ti bu nopol no'oxe, ta stsaquic talel jcotuc ch'iom me' vacax ti mu'yuc to abtejeme.

⁴Ta snitic ech'el ta yoc jun biq'uit uc'um ti bu ta xanav ono'ox ti vo'e, ti bu mu'yuc ts'unbil abtelanbil o ti banomile. Jech ti bu taj une, ta xich' sts'otbel ta c'asbel snuc' ti ch'in me' vacaxe.

⁵“Mi laj une, ta xnopajic ech'el ti pale levitaetique, yu'un ja' t'ujbilic ta yabtelanel ta spasel ti c'usi ta sc'an ti Diose, xchi'uc ta sts'uiltasel ta sventa. Yu'un ja' stsutseb c'op ti c'u s'elan ta xc'ot ta nopel yu'unic mi oy letoe, mi vulvul baile.

⁶Va'i un, scotol ti moletic ti ich'bil yeic yu'un ti jteclume, ta spoc sc'obic ta sba ti milbil ch'in me' vacaxe.

⁷Ts'acal to un, xi cholet ta xlic yalique: ‘Mo'cuncutic laj jmilcutic ti vinic le'e. Mi ja'uc laj quilcutic c'u s'elan laj yich' milele.

⁸Dios, ch'aybo smul scolo'ic ti avalab anich'nab Israel ti laj apoj loq'uel talele. Mi ja'uc xacajanbe ta sba ti jech mu na'baj c'uxi cham ti vinic le'e.’ Ti jech taj une, mi ja'uc ta x'ich'bat ye sti' ti jech cham ti vinique.

⁹Yu'un ti vo'oxuque ja' ta xapasic ti c'usi lec ta xil ta sba ta sat ti Diose. Mi ja'uc cajal ta xc'ot ta abaic ti jech chame.

¹⁰“C'alal ta xatsaquic ta leto ti avajcontraique, jech ti Ajvalil Dios avu'unique ta xac' ta avoc ta ac'obic ti buch'utic ta xatsaquic ta chuquele.

¹¹Mi oy buch'u junucal avu'unic ti laj yil ti oy jun ants ti stuc no'ox c'upil sba ta scotol ti yane, ti ic'bil c'ot yo'ntone, ti ta xlic yic' une,

¹²tsots sc'oplal, ac'o yic' batel ta sna. Ac'o sloc' stsotsil sjol yu'un. Ac'o set sni' yich'ac yu'un.

¹³Va'i un, ac'o sjel sc'u' yu'un ti c'u s'elan slapoj to ox ech'el ti c'alal chucbil bate. Com naquiuc ta sna ti vinique. Jun u ta xyoq'uita sba yu'un ti stot sme'e. Mi laj taj une, xu' xa ta xlic xchi'in sbaic, yu'un ja' xa c'ot xa ta yajnil smalal sbaic.

¹⁴Ts'acal to un, mi oy c'usi tal ta sjol ti mu sc'upiluc ta xile, ta lequilaluc ac'o sutes. Mu xu' ta xchon batel ta taq'uin. Mi ja'uc ta sbis jech c'u cha'al junuc smosov. Yu'un laj xa soquesbe sc'oplal.

¹⁵“Xu' van ti oy jun vinic ti oy cha'vo' yajnile, ti ja' lec snup xch'ulel ta xil ti june. Ja'uc ti june, teytic no'ox ta xil. Ti xchibalique ta x'ilbat ti xnich'nabtac yu'une. Ti banquilale, ja' yol ti buch'u teytic no'ox ta x'ilee.

¹⁶Va'i un, ti c'alal ta sta sc'ac'alil ta xac'be xrexto xnich'nab ti vinic taje, mi ja'uc xu' ta sbis ta sbanquilal xnich'on yol ti buch'u ja' snup xch'ulel ta xile. Yu'un ta xc'ot ta pasel ti ta xilbe svocol yol ti ants ti buch'u teytic no'ox ta xile, ti c'alal ja' banquilal nich'onil ta melele.

¹⁷C'otuc ta yo'nton ti tsots sc'oplal ta sbis ta sba xnich'on ti querem taje, ti x'ech' to ta xac'be ti c'usitic x'ayan yu'un ti albil sc'oplal ta xich'e. Yu'un ja' xq'uexol stuc, tsots sc'oplal ta xich' ti rextoil ta sventa ti ba nich'onile.

¹⁸“Mi oy buch'u spajeb xa no'ox toyobba ti xnich'one, ti mu xch'un ti c'usi ta x'albat yu'un ti stot sme'e, ti mu xch'un ta j'ech'ele, manchuc mi ta xich' tsitsele,

¹⁹jech ti totil me'il une ta xiq'uic batel ti squeremic ta stojol ti moletic ti ich'bil ye sti' yu'un ti jteclum ti ja' jchapanvanejetique.

²⁰Xi ta xc'ot yalbeic ya'ie: ‘Ti col jnich'oncutic li'e, spajebal xa no'ox ti spimil xa'i sba yu'un ti stoyobbaile. Mi jayloq'ueluc ti ta x'ich'van ta muq'ue. Yu'un ja' jun jsoquesvanej, ja' jun jyacubel.’

²¹Va'i un, scotol ti viniquetic ta jteclume ta spujbeic ton ti quereme. Ja' to jech ta xtub sc'oplal ti c'usitic ta soquesvan ta alumalique. C'alal jech ta xa'iic ti israeletique, ta xlic ochuc xi'el yu'unic.

²²“Mi oy jun vinic ti chap xa sc'oplal joc'ol ta te' ta xcham ta scoj ti tsots smul laj stae,

²³ma'uc sjunul ac'ubal ti joc'ol ta xcom ta te'e. Yu'un ta xich' muquel ta sc'ac'alil no'ox. Yu'un ta x'albat ti bisbil xa ta cotol chaval yu'un ti Dios ti buch'u joc'ol ta xcham ta te'e. Ja' yu'un un cha'e, ti vo'oxuque ta j'ech'eluc mu xa soquesbeic sc'oplal ti banomil ti bu ta xa'ac'batic ti arextoic yu'un ti Ajvalil Dios avu'unique.