Read Tzotzil Deuteronomio 22 Bible Online

Deuteronomio 22 - Tzotzil bible

Deuteronomio 22

¹“Mi oy buch'u junucal avu'unic laj yil jcot vacax, mi jcot chij ti ch'ayem yu'un ti svinquilele, mu xjax q'uel no'ox comel. Ac'o yic' ech'el ta stojol ti svinquilele.

²Yan ti mi ma'uc yu'un jun slac'nae, mi mu xojtiquinbe ti yajvale, ac'o yic' ech'el ti chon bolom ta snae. C'ajomaluc no'ox ac'o xchuc, ja' to ti mi tal jac'batuc yu'un ti svinquilele. Va'i unbi, tsots sc'oplal ta xac'be sutel.

³Ja' no'ox jech sc'an ta xapasic xtoc xchi'uc ti burroe, mi ja' ti c'u'ile, mi c'usiuc no'ox ta xch'ay comel yu'un ti mu laj sta asatique. Mu xaq'uelic no'ox comel.

⁴“Mi oy buch'u junucal avu'unic ti laj yil ti balch'ujem ta be sburro, mi xvacax ti svinquilele, mu xjax q'ueluc no'ox comel. Yu'un tsots sc'oplal, ac'o stoy liquel.

⁵“Ti antse mu stac' slap c'u'il sventa vinic ti c'alal ma'uc sventae. Mi ja'uc ti vinique, mu stac' slap c'u'il sventa ants ti c'alal ma'uc sventae. Yu'un ti Diose toj chopol ta xil ti buch'u jech ta spas scotol ti va'i s'elan taje.

⁶“Mi oy buch'u ta sta jpatlom mut ti yac'oj stas ta te'e, mi ta banomil ti bu ta x'ech'e, mi ston to, mi yalab xa ti patal sluts'oje, ma'uc ti stsacbe ech'el xchi'uc ti sme'e.

⁷Ja' no'ox, ac'o stsacbe ech'el ti yalabe. Ja'uc ti sme'e, ac'o scolta batel. Ti jech taj une, mu'yuc c'usi sna', ta xnatij ti xch'iel sc'opojele.

⁸“C'alal mi oy buch'u junucal avu'unic ta smeltsan junuc ach' nae, ac'o yac'be c'uc stailejuc spac'balil sventa smacal ta joyob ti sjol snae, yo' mu xc'ot ta pasel ti cajal ta xc'ot ta sba ti mi oy buch'u baj yalele.

⁹“Mu xats'un cha'tos sts'unubal ti bu ts'unbil ti uva avu'une, naca mi mu xatunes ti slubel xchamel avoc ac'obique.[4]

¹⁰“Mu snupin sbaic avu'unic ta abtel ta banomil jcot vacax xchi'uc ti jcot burroe.

¹¹“Mu xalapic c'u'il ti capbil ta jalel ta xela noe xchi'uc ta bats'i tsotse.

¹²“Ti ac'u'ic ta xalapique, ac'beic volajtic stsitsimaltac ta jujujot ti xchanjotal xchiquine.

¹³“Mi oy jun vinic ti c'ot ta sat jun ants ti ta xiq'ue, mi ts'acal to ta xlic stuc'ulan ti ma'uc sc'upil ta xil ti c'alal laj xa ox xchi'ine,

¹⁴ti xi ta xal ta soquesbel ti sc'oplale: ‘Laj quic' ti ants li'e, ti c'alal laj jchi'ine, laj ca'i ti ma'uc xa tojol tsebe’,

¹⁵va'i un, ti stot sme' ti tsebe ta xich'ic batel senyail ti ja' tojol tseb ti stsebic ta stojol ti moletic ti ich'bil ye sti' yu'un ti jteclum ti ja' jchapanvanejetique.

¹⁶Ti stot sme' ti tsebe xi ta xalbeic ya'i ti moletique: ‘Ti vinic li'e, laj cac'be yajnilin ti jtsebe. Ja'uc ti stuc une mu xa la c'u sta yu'un.

¹⁷Ti jech mu xa la c'u sta yu'une, ja' la ta xalbe sc'oplal ti ma'uc xa la tojol tseb laj sta ti c'alal laj yiq'ue. Ac'o mi jech ta xal un, li' oy senyail ti ja' tojol tseb toe.’ Ti c'alal jech ta xal ti va'i s'elan taj une, ta sba ta sat ti jchapanvanej moletique, ta xlich'anic batel ti saquil poq'ue.

¹⁸Va'i un, ti moletique ta xac'beic stoj ta chuquel ti vinique.

¹⁹Ma'uc ma' ti ta xcol o xa taj une, yu'un ta to stoj yu'unic multa vo'vinic (100) ta sep plata taq'uin ti ja' ta xac'be yich' stot ti tsebe, ta scoj ti ta soquesbe sc'oplal jun tojol tseb ta stojol ti Israele. Ma'uc no'ox taje, yu'un c'ot ta yajnil. Mi ja'uc xu' ta sbaj ti c'u sjalil ti xch'iel sc'opojel yu'une.

²⁰“Yan ti mi jech ono'ox ta melel ti ma'uc xa tojol tseb c'alal laj xchi'ine,

²¹va'i un, ta sloq'uesat ech'el ta sti' sna ti stote yo' jech ti viniquetic yu'un ti jteclume, ta spujbeic ton ta milel ta scoj ti spajebal xa no'ox ti c'usi chopol laj spas ta stojol ti Israele, ti laj scus ta yic'obal ti stote. Ja' to jech ta stsuts sc'oplal ti jsoquesvanej ta atojolique.

²²“Mi oy junuc vinic ti ch'ayal yo'nton tae ti yacalic ta spasel c'usi chopol xchi'uc jun ants ti ic'bile, xchibalic chapal sc'oplalic ta xich'ic milel. Ja' to jech ta xtub sc'oplal ti jsoquesvanej ta stojol ti israeletique.

²³“Mi oy jun tojol tseb ti jac'bil xa yu'un jun vinique, ti ile yu'un yan vinic ta jteclum ti vay xchi'uque,

²⁴xi s'elan ta xc'ot ta stojolic ti c'alal ic'bil ta xbat xcha'vo'alic ta chapanobbail yu'un ti jteclume: Ta xich'ic milel ta pujel ta ton ti tsebe ta scoj ti mu'yuc x'avan sc'an pojel ti c'alal oy ta yutil jteclume. Ti vinic xtoque ta xich' milel ta scoj ti laj soquesbe sc'oplal jun ants ti jac'bil xa yu'un ti svinquilele. Ja' to jech ta xtub sc'oplal ti c'usitic chopol ta xc'ot ta pasel ta atojolique.

²⁵“Ja'uc le' une, mi oy jun vinic ta sta ta osiltic jun tseb ti jac'bil xa yu'un yan vinique, ti ta stsatsal tsaque yu'une, ja' no'ox ta xich' milel ti vinic ta scoj ti laj stsatsal tsac ti tsebe.

²⁶Yan ti tsebe, mu'yuc c'usi ta xich' pasbel une, ja' ti mu'yuc c'usi yut laj spoj sba ti xtun o ta xich' milele. Taje, yu'un co'ol sc'oplal jech c'u cha'al junuc vinic ti ta stsac ta majel ti svinquilel ti ta xcham o yu'une.

²⁷Yu'un xch'ul tuc laj sta ti tseb ta osiltique. Ac'o mi x'avet ono'ox un, mu'yuc buch'u oy yo' ta xpojun.

²⁸“Ja'uc le' une, mi oy jun vinic ta stsatsal tsac ta yilbajinel jun tojol tseb ti mu'yuc to jac'bil yo' ta x'iq'uee, ti ta x'ilatic xtoc une,

²⁹tsots sc'oplal, ti vinique ta xac'be lajuneb yoxvinic (50) ta sep plata taq'uin stot ti tsebe, ti jech laj soquesbe ti sc'oplale. Tsots sc'oplal ta xc'ot o ta yajnil. Mi ja'uc xu' ta sbaj ti c'u sjalil ti xch'iel sc'opojele.

³⁰“Mu'yucuc buch'u junucal ta sta ta chi'inbel yajnil ti stote. Yu'un ti mi jech ta xc'ot ta spasele, ta scusvan ta ic'obal.