Read Tzotzil Deuteronomio 24 Bible Online

Deuteronomio 24 - Tzotzil bible

Deuteronomio 24

¹“Mi oy jun vinic ti lec laj yil jun antse, ti laj yiq'ue, ts'acal to un, mu xa junuc yo'nton xchi'uc ta scoj ti oy c'usi mu lecuc laj sta ti c'alal laj yiq'ue, ac'o smeltsanbe jlicuc ts'ibabil vun ti ta xalbe sc'oplal ti bajobbaile. Va'i un, ta stam loq'uel sbe yu'un ti ta snae.

²Ja'uc ti stuc une, ti c'alal loc' xa ech'el ta nae, xu' xa xmalij ta yan.

³Va'i xtoc un, mi ja' no'ox jech c'ot yorail ti mu lecuc x'ile yu'un ti xchibal smalale, ti ta smeltsanbat jlicuc ts'ibabil vun ti ta xalbe sc'oplal ti bajobbaile, ti ta xtaque loq'uel ta nae, mi ja' no'ox cham ti xchibal smalal ti ic'bil to ox yu'une,

⁴mi ja'uc xa xu' xba xcha'ic' ti ba'yel malalil to oxe, ta scoj ti laj xa soques sbae. Yu'un ti jech taje, toj chopol ta xil ta j'ech'el ti Diose. Ja'uc ti vo'oxuque mu xasoquesic ti lum ti bu ta xa'ac'batic ti arextoic yu'un ti Ajvalil Dios avu'unique.

⁵“Mi oy jun vinic ti ach' to no'ox laj yic' ti yajnile, mu xu' ta xich' taquel ta ac'-leto jun jabil, mi ja'uc c'usi ta x'ac'bat sbain jtosuc ti abtele. Ti va'i s'elan taje, colem ta sq'uelel ti c'usi sc'an pasel ta snae yo' jech ta snopes ti yajnile.

⁶“Mi ja'uc junuc ti oy buch'u ta xac'anbeic ti ac'o yac' comel ta rental ti yuni molino ton ti ts'otbil ta stunese, mi ja' ti yuni cho'e. Yu'un ti mi jeche, co'ol s'elan ja' chucul com ta rental avu'un ti stuque.

⁷“Mi oy jun israel ti ile ti yacal cuxul ta xq'uex nac' junuc ti svinquilel yo' ta xac' ta mosovile, mi ta xchon ech'ele, chapal xa sc'oplal ta xich' milel yo' jech ta xtub sc'oplal ti c'usi toj ech'em chopol ta xc'ot ta pasel ta atojolique.

⁸“Yan ti mi ja' sc'oplal ti c'a'emale, tsots sc'oplal, ch'unic scotol ti c'u s'elan ta xa sbijubtasoxuc ti pale levitaetique. Yu'un tsots sc'oplal ta xapasic scotol jech c'u cha'al laj calbeic ya'iique.

⁹Mu me xch'ay xava'iic ti c'usi laj spas ti Ajvalil Dios avu'unic ta stojol ti María ti c'alal laloq'uic talel ta Egiptoe.

¹⁰“Mi oy c'usi laj avac'beic xch'amun ti avinquilelique, mi ja'uc xa'ochic batel ta yut snaic ti ta xapojbe loq'uel talel ti c'usi x'ayan yu'un ti ta xc'ot ta rentale.

¹¹Ja'uc le'e, malaic ta amac' yo' ta sloq'ues talel ti c'usi x'ayan yu'un ti ta xac' ech'el ta rentale.

¹²Yan mi ja' jun me'un mu'nat ta j'ech'ele, mu sjunuluc ac'ubal avich'oj ti c'usi x'ayan yu'un ti laj yac'bote.

¹³Yu'un ta smaliluc no'ox c'ac'al, sutesbo ech'el yo' jech oy c'usi ta smac sba vayuc. Va'i un, ti stuc une ta xc'opoj xti'in ti ac'o sva'an sba ti Dios ta atojolique. Ti vo'oxuc xtoc une lec avabtelic ta xapasic ta stojol ti Ajvalil Dios avu'unique.

¹⁴“Mu xavilbajin ta yilbajinel ta j'ech'el ti buch'u me'un mu'nate. Mi ja'uc xajaliltasbeic ti stojole, mi ja' jun avinquilel, mi ja' jun jyanlum ti nacal junuc ta alumalique.

¹⁵Tojic no'ox ta sc'ac'alil ti jun c'ac'al yabtel ti c'alal mu'yuc to ta x'ic'ub ti osile. Yu'un ja' jun me'un mu'nat ti ta xtun yu'un ti taq'uine, yu'un c'ajomal no'ox jech tsacal xchi'uc. Yan ti mi mu jechuque, ta acojic vo'oxuc ta x'oc' ta x'avanic ta stojol ti Diose, laj xa ata amul un.

¹⁶“Ti totil me'ile, mi ja'uc ta xc'ot ta pasel ti chapal xa sc'oplal ta xich' milel ta scoj ti oy c'usi chopol ta xc'ot ta spasel yu'un ti yalab xnich'nabique. Mi ja'uc chapal xa sc'oplal ta xich' milel ti yalab xnich'nabic ta scoj ti oy c'usi chopol ta xc'ot ta spasel yu'un ti stot sme'ique. Yu'un ta jujun tal ta xcham yu'un ti smulique.

¹⁷“Mi jutebuc xavilbajinic ta pasbel chopol ti jyanlumetique, mi ja'uc ta stojol ti buch'u mu'yuc buch'u oy yu'une. Mi ja'uc xavich'beic ta rentail sc'u' spoq'uic ti me'unal antsetique.

¹⁸Mu me xch'ay xava'iic ti mosovil la'ech'ic ta Egiptoe. Ti Ajvalil Dios avu'unique laj sloq'uesoxuc talel ti teye. Jech o xal un, ta xcalboxuc ava'iic, c'otuc ta pasel avu'unic scotol ti va'i s'elan laj calboxuc ava'iique.

¹⁹“Ti c'alal yacaloxuc ta xtuch'el ti c'usi loc' ayan avu'unic ta avosilique, mi ch'ay ta avo'ntonic ta stsobel ech'el jchucuc ti trigoe, mu me xasutic ta stamel talel. Ictaic xa comel. Ac'o stam ech'el junuc jyanlumetic ti achi'inojic ta nacleje, mi ja' ti buch'u mu'yuc buch'u oy yu'une, mi ja' jun me'unal ants, yo' jech lec ta xc'ot ta pasel ti ta sva'an sba ti Ajvalil Dios avu'unic ta scotol ti c'usi ta xapasique.

²⁰“C'alal ta xatulbeic sat ti aceituna yu'un ti olivo te' avu'unique, mi ja'uc xabejel-c'uxc'ulta ta stsobel ta jujutec' ti ta xcom ta sc'obtaque. Yu'un ti c'u yepal ti aceituna ta xcome, ch'an xa uto. Ac'o stul ech'el ti jyanlumetique, mi ja' ti buch'u mu'yuc buch'u oy yu'une, mi ja' ti me'unal antsetique.

²¹“Ti c'alal yacaloxuc ta stulbel sat ti uvae, mi ja'uc xabejel-c'uxc'ultaic ta stsobel. Ti bu ta xcom ta sc'obtaque, ch'an xa uto. Ti c'u yepal ta xcome, ac'o stul ech'el ti jyanlumetique, ti buch'u mu'yuc buch'u oy yu'une, xchi'uc ti me'unal antsetic ta j'ech'ele.

²²Mu me xch'ay xava'iic ti mosovil la'ech'ic ta Egiptoe. Jech o xal ta xcalboxuc ava'iic, c'otuc ta pasel avu'unic scotol ti va'i s'elan laj calboxuc ava'iique.