Read Tzotzil Deuteronomio 25 Bible Online

Deuteronomio 25 - Tzotzil bible

Deuteronomio 25

¹“C'alal mi oy buch'u oy sc'opic xchi'uque, baticuc ta chapanobbail yo' jech ta xich'ic chapanel. Ja'uc ti jchapanvanejetique jamal ta xalic ti ch'abal smul ti buch'ue. Ta xac'beic stoj ti buch'u oy smul tabate.

²Mi ta xilic ti ja' xtun o ta xich' tsitsel ti buch'u oy smul tabate, ti jchapanvanejetique ta xalbeic mantal ti ac'o spatan sba ta banomil ti buch'ue. Ta sba ta satic ta xac'beic yich' nucul ti ja' xtun o ti c'u s'elan laj sta ti smule.

³Ja'uc le' une, mu xjelav cha'vinic (40) ta moj yo' jech mu xc'ot ta yo'nton ti avinquilelique ti tenbil ta xc'ot avu'unic ti toj ech'em ta xich' ti nucule.

⁴“C'alal yacal ta smaj trigo ti vacaxe, mu xavac'be svosal sni'.

⁵“Xu' van ti oy bu ta xc'ot ta pasel ti ta jun snaic ti oy buch'u jmojic ta voq'uele. Ti june, ch'abal xnich'on ta xicta comel ti c'alal ta xchame. Jech ti me'unal ants une mu xu' ta xcha'malij mi ma'uc junuc yuts' yalal smalal ta xiq'ue. Ti xchi'il ta voq'uel ti smalal to oxe ta xic'be yajnil ti animae. Yu'un ja' jech yabtel ta spas ta stojolal ti xc'ot o ta mu'il yu'une.

⁶Ja'uc ti sba xnich'on ta svoq'uesbat yu'un ti antse, ja' ta sbiinbe sbi ti anima xchi'il ta voq'uele, yo' jech mu xch'ay o sc'oplal ta stojol ti israeletique.

⁷Mi ja' ti vinic une, mi mu sc'an xic' ti smu'e, va'i un, ti antse ta xbat xchapanbe ya'i ti moletic ti xi ta xc'ot yal ta stojolique: ‘Ti jmu'e mu sc'an ti vulesbil ta o'ntonal ta xcom sc'oplal ta stojol ti israeletic ti xchi'il ta voq'uele. Mu sc'an sbis sba ta mu'il ta jtojolal.’

⁸Ja' yu'un un, ti moletic yu'un ti jteclume ta staic ta iq'uel yo' ta xchi'inic ta lo'il. Mi jbel ti sc'op ta xal ti mu sc'an xiq'ue,

⁹va'i un, ti mu'il une ta xnopaj ech'el ta stojol. Ta sba ta satic ti moletique, ta sloq'uesbe ti xonob ti slapoje, ti xi ta xal ti c'alal ta stubtabe ti sate: ‘¡Ja' jech ta pasbel ti buch'u mu sc'an ti oyuc yu'un snitilul ti xchi'il ta voq'uele!’

¹⁰Sicotan, ta xcom sna ti buch'ue, xi ta x'albat sc'oplal yu'un ti israeletique.

¹¹“Mi oy chib viniquetic ti co'ol ta smaj sbaique, mi oy buch'u junucal yu'unic nab xi yajnil ta spojel ti smalale, ti j'ech'el abtel mich' xutbe sc'unil ti yan vinique,

¹²mi ja'uc jutebuc xc'uxubaj avo'ntonic yu'un. Alic mantal ti ac'o yich' c'ocbel sc'ob ti antse.

¹³“Mu xatunes ti x'ech' to yalal ta sbis ti c'usitic bisbil ta xamane. Mu xatunes ti c'usitic mu sta yalal ta sbis ti c'usitic sbisol ta xachone.

¹⁴Mu xatunes muc' sbisol ti c'usitic ta yepal bisbil ti c'usitic ta xamane. Mu xatunes biq'uit sbisol ti c'usitic ta yepal bisbil ti c'usitic ta xachone.

¹⁵Ja'uc le'e, ts'acaluc tijiluc lec ti sbisol avu'une yo' jech jal jabil ta xach'i xac'opoj ta lum ti bu ta xac'bot ti Ajvalil Dios avu'une.

¹⁶Yu'un ti buch'u jech ta spas ti va'i s'elan taje, toj chopol ta xil ti Diose. Yu'un ch'abal lec ta j'ech'el ti buch'u jech ta spase.

¹⁷“Vuleso ta ajolic ti c'usitic laj spasboxuc ti amalecitaetic ti c'alal oyoxuc to ox ta be ti c'alal laloq'uic xa ox talel ta Egiptoe.

¹⁸Na'ic me ti mu ja'uc juteb laj xi'taic Dios ti c'alal laj stsacanan ta milel ti buch'utic comemic ta patil avu'unique. Lec laj ya'i ti laj stsacoxuc ta leto ti c'alal lubemoxuc xae, ti aluneboxuc xa yu'un ti lubele.

¹⁹Ja' yu'un un, vuleso ta ajolic ti c'alal ta xc'ot ta pasel ta stsalboxuc scotol avajcontraic ti Ajvalil Dios avu'unic ti joyolic ta naclej ta banomil ti bu ta xayac'boxuc ta arextoique, ¡ta j'ech'el, ch'aybeic sc'oplal ta banomil ti amalecitaetique!