Read Tzotzil Deuteronomio 26 Bible Online

Deuteronomio 26 - Tzotzil bible

Deuteronomio 26

¹“C'alal mi la'ochic xa ech'el ta banomil ti yaloj ti Ajvalil Dios avu'unic ti ta xac' ti arextoique, mi lanaquiic ta j'ech'ele,

²ti sba sat ti ts'unubal ti loc' ayan ta banomile, ich'ic batel ta junuc alcu moch ta yavil ti bu t'ujbil yu'un ti Ajvalil Dios avu'unic ti staobil ta na'ele.

³Ti bu taje, xi ta xc'ot avalbe ti pale ti ta x'abtej ti c'alal ta xac'ot ava'an aba ta stojole: ‘Tana li'e, ta sba ta sat ti Ajvalil Dios cu'une, jamal ta xcal ti li'och xa ta lum ti bu albilic ti jmolmuc'totic yu'un ti Dios ti laj sva'an sba ta yalel ti ta xiyac'botique.’

⁴Va'i un, ti palee ta xich' ti alcu moch ti avich'oj batel ti oy sc'oplal ta xavac'be yich'e. Ta xbat yac' ta yaltar ti Ajvalil Dios avu'une.

⁵Ja'uc le' une, xi xcholet ta jamal ta xaval ta stojol ti Ajvalil Dios avu'un jech c'u cha'al li'e: ‘Ti jmolmuc'totac ta vo'nee, ja' arameoetic ti xloc' x'ochic no'ox batele, ti uni jutebic ta j'ech'el ti bat nacliicuc ta Egiptoe. Comic ta naclej ti bu taje. C'otic ta jun muc' ta lum ta j'ech'el. Ts'acal to une, ech'em yepalic ta jmec ti tsots xu' yu'unique.

⁶Taj une, laj yilbun jvocolcutic, laj yilbajinuncutic, laj yutilanuncutic ta mosovinel ti egipcioetique.

⁷Va'i un, laj jc'ancutic pojel coltael yu'un ti Ajvalile, ti ja' Dios yu'unic ti jmolmuc'totcutic ta vo'nee. Laj ya'i ti jech xivocoletcutic ta stojole. Laj yil ti jme'inal jmu'natilcutique, ti quilbajinelcutic ta abtele, ti spajebal xa o ti utilanel ta xquich'cutic ta j'ech'ele.

⁸Laj syales talel ti smuc'ul stsatsal yoc sc'obe, ti mu no'ox albajuc xi'elal laj c'otuc ta pasel yu'une, ti ch'ayal ta xc'ot o'ntonal yu'un ti lijloc'cutic talel yu'un ta Egiptoe.

⁹Avi tana li'e, laj yic'otic talel. Laj yac'botic ti banomil ti bu co'ol s'elan vo' ta xbein ti chu' vacaxe, ti ajapome.

¹⁰Jech o xal tana li' une, quich'oj talel ti sba sat ts'unubal ti laj yac' ti banomile, ti ja' laj yac'botic ti Diose.’ “Ta jech to yepal un, ta xavac' jelavel ti alcu moch ta stojol ti Ajvalil Dios avu'une, ti ta xlic aquejan aba ta stojole.

¹¹Mi laj une, ta xlic apasic jun q'uin xchi'uc ti avalab anich'nabe ta sventa ti oy c'usitic lec la'ac'batic yu'un ti Ajvalil Dios avu'une. Ja' jech xtoc ta xchi'inot ta muyubajel ti levitaetique, xchi'uc ti jyanlumetic ti xchi'inojoxuc ta nacleje.

¹²“C'alal ta xc'ot yorail ti yoxibal jabile, ta xich' aq'uel scotol ti jujun lajlajunebe. Ta xich' aq'uel ti laj ach'ac to ox loq'uel ti sat ts'unubaletic ti ta xavac'beic yich' ti levitaetique, ti jyanlumetic ti nacal ta ateclumalique, ti buch'u mu'yuc buch'u oy yu'une, xchi'uc ti me'unal antsetique, yo' jech oy lec sve'elic ti buch'utic nacalic ta ateclumalique.

¹³C'alal ta xavac'beique, xi xcholet ta xlic aval ta jamal ta stojol ti Ajvalil Dios avu'une: ‘Ja'uc le' une, ti ta jnae, laj jch'ac loq'uel ti c'u yepal albil sc'oplal ti sat ts'unubil ti oy sc'oplal ta xtune. Yu'un laj xa cac'be yich'ic ti levitaetique, ti jyanlumetic ti nacalic ta jlumalcutique, ti buch'u mu'yuc buch'u oy yu'une, ti me'unal antsetique. Yacal ta xc'otilan ta pasel cu'un scotol ti c'u s'elan laj avac' ta na'ele. Mi ja'uc ta jbaj ta jch'ay ta o'ntonal ti amantaltaque.

¹⁴Mi ja'uc jutebuc laj jtsac ta stunesel ta slajesel ti c'alal oyun ta me'inale, ti c'alal jsoquesoj jba xchi'uc jtosuc ti albil sc'oplal ti mu staq'ue. Mi ja'uc laj cac'be ta xrexpon ti animae. Cajval Dios, ti c'u s'elan ta xac'ane, laj jch'un. C'ot ta pasel cu'un scotol ti c'u s'elan laj avac' ta na'ele.

¹⁵Ta vinajeluc to, ta ach'ul nauc to, va'ano aba ta stojolal ta yac'bel slequilal ti jteclumal Israele, xchi'uc ti banomil ti laj avac'buncutic ti bu co'ol s'elan vo' ta xbein ti chu' vacaxe, ti ajapome, ti jech ono'ox laj avalbe ya'i ti jmolmuc'totcutic ti laj ech'icuc ta vo'nee.’

¹⁶“Ti Ajvalil Dios avu'une ta xalbot ava'i tana li' une, ti c'otuc avu'un ta pasel ta sjunuluc avo'nton, ta sjunuluc ach'ulel ta yabtelanel ta spasel ti oy c'usi jbel tsots albile, xchi'uc ti smantaltaque.

¹⁷Tana li'e, laj aval ta jamal, ti Ajvalile, ja' ti Dios avu'une. Laj avac' ave ati' ti j'ech'el ta xach'unbe ti jbel ti c'usi albil yu'une, ti smantaltaque, ti c'usi nopbil yu'une, ti jun ono'ox avo'nton ta xach'unbee.

¹⁸Ja' jech ti Dios xtoque laj yal ta jamal avi tana li' eque, ti vo'ote, Israel, steclumaloxuc ti c'otemoxuc ta yu'untaque, jech c'u cha'al yaloj ono'oxe, ti c'otuc ta pasel avu'unic scotol ti smantaltaque.

¹⁹Ta xc'ot ta pasel yu'un ti ta xac'otic ta jun muc' ta lum ti jelavem ta j'ech'el ti alequilal avutsilalique, ti ta spuc ti ac'oplalique, ti ich'biloxuc ta muc' ta xac'otique, ti ja' mu sta sc'oplal ti yan muc'tiquil lum ti laj yac'anbe xch'ulele. Yu'un ja' jech ta xata ac'oplalic jech c'u cha'al laj yale, ti ja' jun jteclum ti yac'oj sbaic ta tunel yu'un ti Ajvalil Dios avu'unique.”