Read Tzotzil Deuteronomio 27 Bible Online

Deuteronomio 27 - Tzotzil bible

Deuteronomio 27

¹Ti Moisese xchi'uc ti moletic yu'un ti israeletique xi xcholet laj yalbe ya'iic ti jteclume: “C'otuc ta pasel avu'unic scotol ti c'u s'elan laj calboxuc ava'iic tana li'e.

²C'alal ta x'ech' atuch'ic ti uc'um Jordane, mi la'ochic xa ech'el ta banomil ti bu ta xa'ac'batic yu'un ti Ajvalil Dios avu'unique, va'anic muc'tic tonetic ti ta xasac-jaxic ta tane.

³Va'i un, ta xlic ats'ibaic scotol ti va'i s'elan laj calboxuc ava'iic li'e. Ja' no'ox me ta xa'ochic ta sts'ibael c'alal mi la'ochic xa ech'el ta banomil ti bu co'ol s'elan vo' ta xbein ti chu' vacaxe, ti ajapome, ti ja' ta xayac'boxuc ti Ajvalil Dios avu'unique, jech c'u cha'al laj ono'ox yalbe ya'iic ti amolmuc'totic laj ech'icuc ta vo'nee.

⁴Ja' yu'un un, c'alal mi ech' xa ox atuch'ic ti uc'um Jordane, ts'unic ta pajel tonetic ti ta vits Ebale, ti sac jaxbil ta tan avu'unique.

⁵Ma'uc no'ox taje, ta xava'anic ta meltsanbel yaltar ti Ajvalil Diose, ti ta uni ton no'oxe, ti ma'uc ta xava'an ti meltsanbil ta taq'uine,

⁶ti sbejequiluc ta ton ta xich' meltsanel yaltar ti Ajvalil Dios avu'une. Ti ta altar taje, ta xlic achic'beic smoton ti Ajvalil Dios avu'unique.

⁷Ma'uc no'ox taje, ta xamil ta yaq'uel matanal sventa ti lajesobil o'ntonale. Ti bu taj une, ta sba ta sat ti Dios avu'une, ta xave'ic, ta xapasic q'uin.

⁸Ja'uc ti ta ton une, xbejlajanuc lec ta q'uelel ti ts'ib ti va'i s'elan laj calbot ava'iic li'e.”

⁹Ts'acal to un, ti Moisese chi'inbilic yu'un ti pale levitaetique, ti xi laj yalbe ya'iic ti israeletique: “Ts'ijlanic, israeletic, chiquintaic ava'iic li'e: Avi tana li'e, lac'otic xa ta xnich'nab ti Ajvalil ti ja' Dios avu'unique.

¹⁰Ja' yu'un un cha'e, tsots sc'oplal ta xachanic ta spasel ta xch'unel ti smantaltaque, xchi'uc ti oy c'usi jbel albil ti tsots sc'oplal ti laj calboxuc ava'iic li'e.”

¹¹Ti ta sc'ac'alil no'ox taje, ti Moisese xi laj yalbe ya'i mantal ti jteclume:

¹²“C'alal mi ech' xa atuch'ic ti uc'um Jordane, snitilultac ti Simeone, ti Levie, ti Judae, ti Isacare, ti Josee, xchi'uc ti Benjamine, sva'anoj sbaic sq'uelojic ech'el yeloval vits Guerizim ti c'alal ta xich' ac'bel slequilal yutsilal ti jteclume.

¹³Ja'uc snitilultac ti Rubene, ti Gade, ti Asere, ti Zabulone, ti Dane, xchi'uc ti Neftalie, sva'anoj sbaic sq'uelojic ech'el yeloval ti vits Ebale, ti c'alal ta xloc' ta eilal ta sbisel ta cotol chavale.

¹⁴Ti levitaetique ta xlic sva'an sbaic ta sc'oponel scotol ti jteclum Israele, ti xi tsots xvulvunic xa liquel ta yalele:

¹⁵‘Bac svocol chamuc ta banomil ti buch'u ta smeltsan ti sdiostaque, mi oy c'usi unijesbil ta taq'uin ta sloc'tae, mi ta xac' ta meltsanel ti oy bu c'otem ta pasel ti snac'oj xa leque. Ti jech taje, toj chopol ta xil ti Diose.’ Xi ta stac' scotol ti lume: ‘Jechuc.’

¹⁶‘Bac svocol chamuc ta banomil ti buch'u mu lecuc xil ti stote, mi ja' ti sme'e.’ Xi ta stac' scotol ti lume: ‘Jechuc.’

¹⁷‘Bac svocol chamuc ta banomil ti buch'u ta snet' sts'aquil xrexto osil ti slac'nae yo' ta xelc'anbe ti yosile.’ Xi ta stac' scotol ti lume: ‘Jechuc.’

¹⁸‘Bac svocol chamuc ta banomil ti buch'u ta xac' xanavuc ech'el ta yan o be ti jun ma'sate.’ Xi ta stac' scotol ti lume: ‘Jechuc.’

¹⁹‘Bac svocol chamuc ta banomil ti buch'u ta xlic yilbajin ti jyanlume, mi ja' jun me'unal ants, mi ja' ti buch'u mu'yuc buch'u oy yu'une.’ Xi ta stac' scotol ti lume: ‘Jechuc.’

²⁰‘Bac svocol chamuc ta banomil ti buch'u ta stsac ta ilbajinel yajnil ti stote, yu'un ta scus ta yic'obal.’ Xi ta stac' scotol ti lume: ‘Jechuc.’

²¹‘Bac svocol chamuc ta banomil ti buch'u ta stsac ta yilbajinel yo' ta chi'inel ti jun chon bolome.’ Xi ta stac' scotol ti lume: ‘Jechuc.’

²²‘Bac svocol chamuc ta banomil ti buch'u ta stsac ta yilbajinel yo' ta xchi'in ti xchi'il ta voq'uele, mi ja' xnich'on ti stot ti yan o ti sme'e, mi yan ti stote.’ Xi ta stac' scotol ti lume: ‘Jechuc.’

²³‘Bac svocol chamuc ta banomil ti buch'u ta stsac ta yilbajinel yo' ta xchi'in ti sme'ni'e.’ Xi ta stac' scotol ti lume: ‘Jechuc.’

²⁴‘Bac svocol chamuc ta banomil ti buch'u ta spa'i ta milel ti svinquilele.’ Xi ta stac' scotol ti lume: ‘Jechuc.’

²⁵‘Bac svocol chamuc ta banomil ti buch'u ta stsac taq'uin ta smil ti buch'u ch'abal smule.’ Xi ta stac' scotol ti lume: ‘Jechuc.’

²⁶‘Bac svocol chamuc ta banomil ti buch'u mu xac' ta venta ti va'i s'elan ti bijubtasele, ti mu sc'an xchan ta yabtelanele.’ Xi ta stac' scotol ti lume: ‘Jechuc.’