Read Tzotzil Deuteronomio 28 Bible Online

Deuteronomio 28 - Tzotzil bible

Deuteronomio 28

¹“Mi ta melel teq'uel ta xc'ot ta avo'nton ta xch'unel ti c'usi ta sc'an ti Ajvalil Dios avu'une, ti ta xlic avabtelan ta spasel scotol ti smantaltac ti laj calbot ava'iic tana li'e, va'i unbi, ich'bilot ta muc' ta xac'ot yu'un scotol ti jnaclejetic ta banomil yu'un ti Dios avu'une, ja' mu sta ti stuquique.

²Ma'uc no'ox taje, scotol ti lequilal ti oy sc'oplal ta xavich'e, ta xvul ta bajel ta atojol un, ta sventa ti ta xach'un ti c'usi ta sc'an ti Ajvalil Dios avu'une.

³Ataoj ti sva'anoj sba ti Dios ta atojolal ta jteclume xchi'uc ta avosil abanomile.

⁴Ataoj ti sva'anoj sba ti Dios ta stojol ti anich'nabe, ti ats'unube, ti yoltac ti avacaxe, ti achijtaque, xchi'uc xa scotol ti yan chon bolometic avu'une.

⁵Ataoj ti sva'anoj sba ti Dios ti c'usi oy avu'un ta alcu moche, ti yavil ti bu ta xich' vots'el ti ninal juch'bil trigoe.

⁶Ta scotol ti c'usiuc no'ox ta xapase, ataoj ti sva'anoj sba ti Dios ta atojolale.

⁷“Yu'un ti Ajvalil Diose ta xac' ta avoc ta ac'ob ti avajcontra ti c'alal ta xastsacot ta letoe. Manchuc mi lec xa nopbil yu'unic ti c'u s'elan ta xvolvanique, ja'uc le'e, ta jech no'ox yepal tan puc ta xjatavic batel ta atojol.

⁸“Yu'un ti Ajvalil Diose ta sva'an sba ta stojol scotol ti c'usiuc no'ox ta xapase, ta stojol ti c'usitic oy avu'une. Xamuyubaj yu'un ta xac' naclan ta lum ti bu ta xac'bot avich'e.

⁹“Mi ta xc'ot avu'un ta yabtelanel spasel ti smantaltaque, mi jun avo'nton ta stojole, jech ti Ajvalil Dios avu'une staoj yav ti st'ujojot ta steclumal jech c'u cha'al laj yal ti laj sva'an sba ta rextico ti stuque.

¹⁰Va'i un, scotol ti lumetic ti oy ta banomile, ta xilic ti ja' jpojvanej ti Dios ti tabil ta c'oponel avu'une. Ta xlic ochuc xi'el ta yo'ntonic avu'un.

¹¹Yu'un ti Ajvalil Diose ta xac' avil ti yutsil slequil yo'nton ti naca xac'bot no'ox ti anich'one, ti naca xvoc' no'ox yoltac ti achije, ti avacaxtaque, ti yepal no'ox ta j'ech'el ti ts'unubaletic ti c'usitic ta xloc' ta banomil ti bu yalojbe ono'ox ti amolmuc'totac ti laj sva'an sba ta rextico ti ta xac'bote.

¹²Ta xac'bot ti slequil sc'ulejale, ti ja' sc'oplal ti vinajele, yo' jech ta xyal talel vo' ta banomil ti ta xtun yu'une. Yu'un xloc' x'ayan no'ox ti stojol alubel achamele, ti xu' avu'un xavac'be xch'amun ti epal muc'tiquil lume. Mu ja'uc juteb xajotet xa ta ch'om ti vo'ote.

¹³Yu'un cajal ac'oplal ta xac'ot yu'un ti Dios avu'une. Mi ja'uc ma' ti yamal xa no'ox avuni c'oplal ta xa'ilee. Yu'un ta j'ech'el cajal ac'oplal ta xc'ot ta stojol ti yane. Yu'un ta j'ech'el ma'uc ma' ti jutuc no'ox avuni c'oplal ta xa'ilee. Ja' no'ox venta mi ta xatuc'ulan ta spasel ta yabtelanel smantaltac ti Ajvalil Dios avu'une ti laj calbot ava'i li'e, ti tsots sc'oplal ta xaliques ta yabtelanele.

¹⁴Mu xatselbunic comel taje. Ma'uc me ta xlic ats'acli ti yan diosetic ta snijan xchimanel abaic ta yich'el ta muq'ue.

¹⁵“Yan ti mi ta xatoy aba ta stojol ti Ajvalil Dios avu'une, ti mi mu xachan ta yabtelanel ti smantaltaque, xchi'uc ti oy jbel ti tsots albil ti laj calbot tana li'e, ta xvul ta loq'uel ta atojol ti bac vocol ti xi s'elan sc'oplale:

¹⁶Bisbilot ta cotol chaval xa'ech' xajelav ta jteclum, xchi'uc ti ta osil banomil avu'une.

¹⁷Yu'un bisbil ta cotol chaval ti avalcu moche, xchi'uc ti bu ta xich' vots'el ti ninal juch'bil trigoe.

¹⁸Bisbilic ta cotol chaval ti avalab anich'nabe, ti ats'unubtaque, ti yoltac avacaxe, ti achijtaque, xchi'uc scotol ti yan chon bolometic ti oy avu'une.

¹⁹Bisbilot ta cotol chaval ec xchi'uc scotol ti c'usitic ta xapase.

²⁰“Yu'un ti Diose ta stacbot talel bac vocol ti naca xa no'ox vocol ti mu xa xava'i aba lec xchi'uc ta scotol ti c'usi ta xapase, ti mu ta sjaliluc ta xac'ot ta soquel ta tsutsel yu'un ta scoj ti laj ach'ac aba ta stojol ta yac'bel yipal ta spasel ti c'usi mu lecuc ta pasele.

²¹Yu'un ti Diose ta stacbot talel jun lajel tubel ta atojol, ti ta j'ech'el ta xac'ot ta tsutsel yu'un ta lum ti bu ta xavu'nine.

²²Ta xac'bot talel xtoc muc' ta c'oc' ti ta xacham o yu'une, jun sic c'oc' ti toj chopol ta j'ech'ele, ti situbele, ti mu no'ox albajuc ta xava'i ti c'ac'al ta j'ech'ele, ti ta xtaquij yu'un ti banomile, ti ta stacbel talel xchanul ti trigoe, ti lamal ta xvul ta atojol ti muc' ta c'oq'ue, ja' to ti c'uxi lac'ot ta tsutsel yu'une.

²³Ti le' ta ac'ole, ti vinajele ta sjaltabot ti vo'e. Ti li' ta olone, ti banomile ta sjaltabot ti c'usitic ta xch'i yu'une.

²⁴Yu'un ti Diose c'ajomal no'ox pucuc xchi'uc yi' xvajet no'ox vulel ta aba yu'un, c'alal ja' sc'oplal vo' ta alele, ja' to ti c'uxi lac'ot ta tsutsel yu'une,

²⁵ti net'bil lubtsanbil ta xac'ot yu'un ti avajcontraique. Manchuc mi lec nopbil avu'un ti xavolet batel ta tsaquel ta letoe, ja'uc le' une, j'ech'el ti tan puc ta xajatavic ech'el yu'unique, ti j'ac'vanejot ta xi'el ta xac'ot ta xayilic ti jbainvanejetic ta banomile.

²⁶Mu'yuc buch'u ta sibtas batel ti xulemetique, ti yan jti'oval chonetic ti c'alal ta sti' ti abec'tale.

²⁷“Yu'un ti Diose ta xac'bot avocol ta jun yayijemal jech c'u cha'al ac'batic xchamelic ti egipcioetique, ta jun muc' ta chacal, ta seb, ta sal, ti mu jayloq'uel xpoxtaj ti achamele.

²⁸Ja' jech xtoc ta xajoybij ta jun chuvaj yu'un, ta xajoybij ta jun ma'sat yu'un, ti mu xa stac' a'yiel ta xava'i ti c'usi ta xc'ot ta atojole.

²⁹Max-max picbil ta xaxanav ech'el xtoc jech c'u cha'al ta xanav ti ma'sat ti oy ta ic'al osil ta xa'ie. Mi ja'uc jutebuc lec ta xc'ot ta loq'uel avu'un ta scotol ti c'usi ta xapase. Yu'un c'ajomal ono'ox lamal ta aba ti ilbajinele, ti elc'anbilote ti mu'yuc buch'u stic' sba ta apojele.

³⁰Avac'oj xa ave ta yiq'uel ti alecome, yan o ti buch'u ta spas yabtel xchi'uc ti alecome. Avac'ojbe yipal ta xameltsan ti anae, mi ja'uc ta xac'upin ta naclej. Avac'ojbe xa yipal ta sts'unel ti a'uvae, yan o ti buch'u ta slo' ti sate.

³¹Va'al aq'ueloj ta xich' milel ti stot avacaxe, mi ja'uc ta xati'be ti sbec'tale, ta aba ta asat poj xayutbeic ech'el ti aburroe, mi ja'uc xa ta xasutesbeic talel. Mac xutic ech'el achij ti avajcontrae, mi ja'uc oy buch'u ta stic' sba ta spojel talel yo' ta scoltaot.

³²Va'al aq'ueloj, ac' xi ech'el ta sc'ob jyanlumetic ti avantsil nich'one, ti aqueremtaque. Scotol ora juteb ta avo'nton ti ac'anuc xa ava'i ta sq'uelbel ti sate, mi ja'uc oy c'usi xavut.

³³Yu'un ti laj apich' avoc ac'ob yu'un ti avabtel ti oy c'usi laj ats'un ta abanomile, ja' ta stun ta slajesic ti jyanlumetic ti mu ja'uc jutebuc laj avojtiquin ta j'ech'ele. Xlic xcaj no'ox ti avilbajinele, ti avocol ti ta xc'ot ta atojole.

³⁴Ta xachuvajib yu'un ti c'alal ta xavil scotol ti va'i s'elan ta xc'ot ta pasele.

³⁵Yu'un ti Diose ta xac'bot avich' avocol ta jun yayijemal ta sjol avoc, ta smuc'ul avo', ta sjunul abec'tal, ti mi ja'uc xpoxtaj avu'une.

³⁶“Yu'un ti Diose ta stenot ech'el xchi'uc ti ajvalil avu'une, ta yan muc' ta lum ti mu ja'uc jutebuc xavojtiquine, mi ja'uc laj yojtiquinic ti atot ame'ique. Ti bu taje, ta xlic anijan achiman abaic ta yich'el ta muc' ti diosetic ti meltsanbil ta te'e, ti meltsanbil ta tone.

³⁷Yu'un ta xac'otic ta jun j'ac'-xi'el, ta j'ac'-na'levanej, ta j'ac'-lo'il, ta j'ac'-tse'imol yu'un ti lumetic ti bu ta stacoxuc ech'el ti Diose.

³⁸Jun yepal ta xats'un ti ats'unube, uni juteb ta xataic ta tsobel ti sate, ja' ti laj ta ixtolanel yu'un ti c'ulube.

³⁹Ta xats'un ti uva ti lec ta xaq'uele, mi ja'uc ta xavuch'be ya'lel ti sate. Mi ja'uc ta xatsob ti uvae, ja' ti laj yixtolan ta tsutsesel scotol ti xuvite.

⁴⁰Buyuc no'ox ts'unbil avu'un ta banomil ti olivoe, mi ja'uc ta xamuibtas aba yu'un ti yaceiteile, ja' ti ta jech no'ox yepal ta xbaj stuc ti yuni sattaque.

⁴¹Oy ti avalab anich'nabe, mu'yuc achi'ucanoj, yu'un chucbil ta xbatic ta yan muc'tiquil lum.

⁴²Scotol ti sat te' ti jtunel jlajesele, xchi'uc ti te'tique, ta stsutses ta j'ech'el ti c'ulube.

⁴³Ja'uc ti jyanlumetic ti nacalic ta alumalique, yantic stsac yipic ti xjelav to xu' yu'unic ta j'ech'ele. Ja'uc ti vo'ote, yantic tsalbil ta xac'ot.

⁴⁴Ja'uc ti stuquique xu' yu'unic ta xac'boxuc ach'amunic. Yan ti vo'ot une, mi ja'uc xa xloc' ti ta xavac'be xch'amune. Ti cajal to ox ac'oplal oyote, ja' xa ta xc'ot ta sc'oplal stuquic, yu'un labat me ta yoc un.

⁴⁵“Scotol ti bac vocoletic taje, ta xtal ta atojol ti nabpatibilot ech'el yu'une, ti buyuc no'ox taluque, ja' to ti c'uxi ta xatsuts yu'une, ja' ti mu xac'an xach'unbe ti c'usi ta sc'an ti Ajvalil Dios avu'une, ti mu'yuc xc'ot ta pasel avu'un ti smantaltaque, ti oy jbel ti tsots albil ti c'alal ja' laj yalbot ava'i ti stuque.

⁴⁶Ti jech ta xc'ot ta atojol ti va'i s'elan taj une, ja' svinajeb ti tsots contrainbil ta xac'ot ta j'ech'el ta scoj ti ta xatoy abae,

⁴⁷ta scoj ti mu xamuyubaj xa laj anijan achiman aba ta yich'el ta muc' ta melel ti Ajvalil Dios avu'une, ti c'alal oy ep ti c'usitic lec yac'ojbote.

⁴⁸Ti avajcontratac ti ta stac talel ti Diose, ta xavac' aba ta tunel yu'unic. Ta xlic avich' avocol yu'un ti vi'nale, ti taqui ti'ile, ti ch'abal jset'uc ac'u'e, ti c'usiuc xa no'ox ti ame'unal mu'natil ta xavile. Ti Diose toj tsots ta j'ech'el ta xac' avocol ta mosovil, ja' to ti c'uxi ta stsuts ti ac'oplale.

⁴⁹Yu'un ti Diose ta stac' talel jyanlumetic ti co'ol to s'elan junuc muc' ta xic ti xvilil to talel ta xliquic talel ta jot to banomil ti ta stsacoxuc ta letoe. Mu ja'uc jutebuc ta xava'ibeic ti sc'opique.

⁵⁰Jyanlumetic ti xi'el xac' ta q'uelbel satique. Mu ja'uc jutebuc xaq'uic ta venta ti moletique. Mi ja'uc jutebuc xc'uxubaj yo'ntonic yu'un ti ololetique.

⁵¹Va'i un, ta xlic sti'ic yoltac ti chon bolometic avu'une, xchi'uc ti c'usitic loc' ayan ti laj ats'un ta abanomile, ja' to ti c'uxi mu'yuc c'usi ta xayic'tabot comele. Yu'un xquechet ta xac'be ech'el ti trigoe, ti vinoe, ti aceitee, ti yoltac ti avacaxe, ti yoltac ti achije. Ta xlic chaman ta vi'nal yu'un un.

⁵²“Ta sjoyobtaic ta maquel ti jteclumetic avu'une. Ta xu'ninan ja' to ti c'uxi ta xlom yu'unic ti smocaltac ti toyolic yich'oje, ti c'alal ja' apatoj avo'nton yu'un ti c'otem apojobbaile. Melel, ta sjoyobta ta maquel ta yu'ninel scotol ti jteclumetic ti ja' laj yac'bot ti Ajvalil Dios avu'une.

⁵³Ti c'u sjalil sjoyobtaojic ta maquel avajcontraic ti jteclumetic avu'une, mi ja'uc x'ech' xnel ta xava'iic ti vi'nale, ti ta xc'ot ta pasel ta xlic ati'ic ti avalab anich'nabe, ti c'alal ja' avalab anich'nab laj yac'bot ti Diose.

⁵⁴Ja'uc ti jun vinic ti buch'u sna' stuc'ulan sbae, ti sna' xc'uxubaj yo'nton to ox ti oy ta atojolique, soquemtic xa sat ta sq'uel ech'el ti xchi'il ta voq'uele, ti xc'uxubinbil ajnile, xchi'uc ti xnich'nab ti oy ta stojole,

⁵⁵yu'un mu ch'acbaj ta xa'i xchi'uc yan sbec'tal ti xnich'nab ti c'alal ta xlic sti'e. Yu'un mi jutebuc oy c'usi x'ayan ta lajesel jset'uc ti c'u sjalil yu'ninojic ti jteclumetique, ti mu x'ech' mu xnel ta xava'i ti avocol ta sjunlej ateclumal ta xavich' yu'un ti avajcontrae.

⁵⁶Ja'uc ti jun ants ti buch'u sna' stuc'ulan sbae, ti mu ts'ujuc c'usi sc'an xatin to ox ti oy ta atojolique, ti jech toj bej ta ic'obal ti mu'yuc xil o ta pis oc ta xani ti banomile, soquemtic xa sat ta sq'uel ti smalal ti xc'uxubinoj to oxe, xchi'uc ti yalabtaque,

⁵⁷yu'un mu xa ch'acbaj ta xa'i ta xac' ta ti'el xchi'uc yan ti c'alal ta svoq'ues ti yol xchi'uc sme'e. Yu'un scotol ta sti' stuc ta mucul. Yu'un mu'yuc c'usi x'ayan jset'uc ta lajesel ti c'alal tsacbil ta c'op ti alumal yu'un ti avajcontrae.

⁵⁸“Mi mu xachan ta yabtelanel scotol ti bijubtasel ti ts'ibabil li' ta jpoc vune, mi mu ja'uc xc'ot ta avo'nton ti Dios ti jelavem ti yutsil slequilal ti xi'bal sbae,

⁵⁹va'i ti stuc une, ta stac talel ep ta tos ti c'usiuc xi'bal sba lajel tubel ilbajinel ta atojole, xchi'uc ta stojolic ti anitilultaque, chopol chameletic ti mu ja'uc jutebuc xatabe ti xpoxile.

⁶⁰Yu'un ja' ta xc'ot ta pasel yu'un yan velta ti ta slaman talel ta aba ti c'usitic toj chopol laj spas ta Egipto ti ep laxi' yu'une, ti ta xavich'olan ti avocol yu'une.

⁶¹Ma'uc no'ox taje, ta stac talel yan avocol ta chamel ti mu'yuc ts'ibabil ta jpoc ti jchanubtasvanej vun li'e, ja' to c'uxi ta xatsuts yu'une.

⁶²Ti co'ol s'elan c'analetic ta vinajel ti avepale, Israel, ta xc'ot ta pasel ti uni juteb xa ta xacom ta scoj ti mu xac'an xach'un ti c'usi ta sc'an ti Ajvalil Dios avu'une.

⁶³Jech c'u cha'al ti Dios ti batem yo'nton ta sboleselote, ta spasel ti lec ta atojole, ja' no'ox jech, batem yo'nton ta yilbelot avocol, ta stsutseselot. Ta jech no'ox yepal, jipbil tenbil ta xaloc' ta jteclum ti bu ta xavu'nine.

⁶⁴Yu'un ti Diose, tan puc ta xabat yu'un ta jujun muc'tiquil lumetic ta jujujot to xocon ti banomile, ti ta xlic anijan achiman abaic ta yich'el ta muc' ti yan diosetic ti meltsanbil ta te'e, ti meltsanbil ta ton ti bu taje, ti mu ja'uc jutebuc laj avojtiquine, ti mu ja'uc laj yojtiquinic ti amolmuc'totic ti laj ech'icuc ta vo'nee.

⁶⁵Ti c'alal jech nacaloxuc ta muc' ta lumetic taje, ma'uc ma' ti mu junuc xa avo'ntonic ta xacuxe, ti mu'yuc xa c'usi xana'e. Oy no'ox xi'el ta xava'i ta avo'nton ta xac'bot ti Diose. Ta xvinaj ta asat ti at-o'ntone, ti oytic no'ox achamel xava'i abae.

⁶⁶Oy ac'oplal o ti mu avu'unuc aba atuc ta xava'ie. C'ac'al ac'ubal oy no'ox xi'el ta xava'i ti chib no'ox c'op avich'oje.

⁶⁷Bats'i yan sba ti xi'el ta xava'i ta j'ech'ele. Ti jech ta xavile, jech o xal ta xc'ot ta pasel ti xachi ta xaval ta sob ic'lumane: ‘¡Oc no'ox la ta alel ti ac'ubalticuc xa ti ic'luman une!’ Ja'uc ti ta ac'ubaltic une, xachi ta xavale: ‘¡Oc no'ox la ta alel ti sacubeluc xa ti osil une!’

⁶⁸Ac'o mi laj yalbot ti Dios ti mu xa x'ech' axani yan velta sbelel ti Egiptoe, ja'uc le' une, ta barco ta xasutic batel yan velta. Yu'un ta xac'an ti xachon aba ta mosovil ta yoc ta sc'ob ti avajcontrataque, mi ja'uc junuc oy buch'u ta smanot.