Read Tzotzil Deuteronomio 29 Bible Online

Deuteronomio 29 - Tzotzil bible

Deuteronomio 29

¹Li'e, ja' yabtel yip ti trate laj xchapan ti Dios ta stojol ti israeletic ti ta lum Moabe. Ti trate taje, ja' sts'acleb ti strate ti yalojbe ya'iic ti israeletic ta vits Horebe.

²Ti Moisese laj stsob talel scotol ti israeletic ti xi laj yalbe ya'iique: “Ti vo'oxuque laj avil ta aba ta asatic scotol ti c'u s'elan laj spas ti Dios ta muc' ta lum Egiptoe, ta stojol ti faraone, ta stojol ti yaj'opisialtaque, xchi'uc scotol ti c'u s'elan c'ot ta pasel ta slumalique.

³Ti c'usitic muc'tic laj c'otuc ta pasel ti vinaje, ti senyailtaque, ti ch'ayal c'ot o'ntonal yu'une, rexticooxuc, yu'un laj avilic.

⁴Ja'uc tana le' une, mu'yuc to yac'oj ye ti Dios ta yac'beloxuc abijilic ta xchiquintaele, ta ya'yibel smelol scotol ti c'u cha'al le'e.

⁵Yu'un cha'vinic (40) jabil sjalil laj jbeiltasoxuc talel ta sbajtical banomil. Ti jech yorail taje, mu'yuc laj avilic ti laj ti ac'u'ique, ti laj ti axonobique.

⁶Mi ja'uc jset'uc laj ave'ic ti pane, ti laj avuch'ic ti vinoe. Mi ja'uc laj avuch'ic ti uch'bolal ti pasem xae yo' jech ta xana'ic ti Ajvalile, ja' ti Dios avu'unique.

⁷“C'alal lijvulotic ta osil li'e, loc' talel stsacotic ta leto ti Sehón ti ja' ajvalil yu'un ti Hesbone, xchi'uc ti Og ti ja' ajvalil yu'un ti lum Basane. Ja'uc le' une, tsalbil c'ot cu'untic.

⁸Ma'uc no'ox taje, yu'un laj cu'ninbetic ti slumalique, ti c'ot ta xrexto cu'untic snitilultac ti Rubene, ti Gade, xchi'uc snitilultac ti Manasese.

⁹Ja' yu'un le' un cha'e, c'otuc ta pasel avu'unic yabtel yip ti strate li'e. Chanic ta yabtelanel yo' jech lec ta xc'ot ta loq'uel avu'unic ta scotol ti c'usitic ta xapasique.

¹⁰“Ti c'ac'al tana li' une, xi s'elan tsoboloxuc ta sba ta sat ti Ajvalil Dios avu'unique: ti banquilaletic yu'un ti jujuvoc' nitiluletique, ti j'opisialetique, scotol ti viniquetic yu'unic ti israeletique,

¹¹ti ololetique, ti antsetique, ti jyanlumetic ti xchi'inojoxuc ta nacleje, c'alal to ta jcuch-si' xchi'uc ta jcuch-vo' ti li' oyique.

¹²Li' tsoboloxuc yo' jech jamal ta xaval ta yaq'uel ave ati' yu'un strate ti Dios ti ta xac' ta atojolic tana li'e.

¹³Avi tana li'e, bejel lec ta xcom ta atojolic ta svinajesel ti ja' yalab xnich'naboxuque, ti ja' Dios avu'unic ti stuque, jech c'u cha'al laj sva'an ta yalel ta stojol ti Abrahame, ti Isaaque, ti Jacobe, ti ja' amolmuc'totic laj ech'icuc ta vo'nee.

¹⁴Ti jech laj sva'an sba ta rextico ta yaq'uel ti stratee, ma'uc no'ox ta xac' ta atojolic.

¹⁵Ta xac' ta stojolic xtoc ti buch'utic mu'yuc to li' xchi'inojotique, ti ta to xtalique.

¹⁶Ti vo'oxuque xana'ic lec ti c'u s'elan lijnaquiotic ta jteclum Egiptoe, xchi'uc ti c'u s'elan laj jtatic talel ta jujun muc'tiquil lumetic ti laj jtatic talel ta be ti livul li'e.

¹⁷Ti ta lumetic taje, ja' to vul jtatic ta ilel ti oy jeche' diosetique, xchi'uc ti jeche' loc'obbail ti meltsanbil ta te'e, ti ta tone, ti ta platae, ti ta oroe, ti nijil chimilic ta xich'ic ta muc' ti jnaclejetique.

¹⁸Mu me ja'uc oy buch'u junucal mi vinic, mi ants, mi jchop ta na, mi jvoc'uc nitilulil ta atojolic ti ta svalopatin comel ti Ajvalil Dios cu'untique, yo' ta xlic snijan xchiman sbaic ta yich'el ta muc' sdiosic ti muc'tiquil lumetic taje. Mu me ja'uc oy buch'u junucal avu'unic jech c'u cha'al junuc yibel te' ti toj ch'a ta j'ech'el ti oy svenenoale.

¹⁹“C'alal mi laj xa ava'iic scotol ti va'i s'elan yip ti trate ti ic'ot ta rexticoe, yic'al nan oy jun chiboxuc ti oy slequilal yutsilal ta xa'i sba ti xi ta xlic snope: ‘Buch'u la sventa mi ja' ta jpas ti c'usi xal ti co'ntone, lec ta xc'ot ta loq'uel cu'un scotol.’ Ti buch'u taje, ta xc'ot ta pasel ti ja' ta scoj ta xac'be svocol scotol ti yane.

²⁰Ta j'ech'el mi ja'uc ta xch'aybat smul scolo' yu'un ti Diose. Yu'un c'ajomal no'ox ta xcajanbat ta sba ti sc'ac'al soquemal yo'ntone. Jech mu xnel mu x'ech' xa'i yu'un ti mu'yuc stuq'uil ta spas ti vinic taje. Yu'un cajal ta xc'ot ta sba scotol ti bac vocol ti albil xa talel sc'oplal yu'un ti jpoc vun li'e. Lamal ta xc'ot ta sba scotol. Ta xtubbat sc'oplal yu'un Dios ti snitilultac ta banomile.

²¹Yu'un stuc no'ox xcuchoj ta xcom yu'un Dios ti vinic taje, ta stojol snitilultac israeletic ti ta sta svocol yu'un jech c'u cha'al ts'ibabil sc'oplal ti bac vocol ta jpoc svunaltac ti trate ti c'otem ta jbel c'usi tsots albile.

²²Yu'un ti alab nich'nabiletic tana li'e, ti anitilulic ti ta to xvulic ta loq'uele, ti jyanlumetic ti ta xliquic talel ta namal banomile, ta xilic ta sba ta satic ti c'usitic chopol ta xc'ot ta pasele, ti chamel lajele, ti ta stac talel ta banomil ti Ajvalil Diose.

²³Ti ta scotol ti muc' ta lume, c'ajomal no'ox ta xilic ti azufree, ti ats'ame, ti c'aq'uem ti banomile. Mu'yuc c'usi stac' ts'unel ta banomil taje. Ta j'ech'el mu'yuc c'usi xch'i mi ja'uc jtec'uc momol jech c'u cha'al c'ot ta pasel ti c'alal lilij ti jteclum Sodomae, ti Gomorrae, ti Admae, xchi'uc ti Zeboime, ti ta sc'ac'al soquemal yo'nton ti Diose laj stubbe ti sc'oplale.

²⁴“Va'i un, scotol banomil xi ta sjac'be sbaique: ‘¿C'u cha'al jech laj spas ti Dios ta stojol ti lum li'e? ¿C'u cha'al toj ech'em soc ti sjole?’

²⁵Ti stac'obile, xi s'elan ta xloc' yu'unic ta alele: ‘Yu'un ja' ta scoj ti laj sjip laj sten ta svalopatinel strate ti Ajvalil Dios yu'un ti smolmuc'totique, ti albilic ono'ox ta xloq'uesatic talel ta Egiptoe.

²⁶Yu'un ja' lic snijan xchiman sbaic ta yich'el ta muc' yan diosetic ti mu ja'uc jutebuc xojtiquinique, ti mu ja'uc jutebuc oy c'usi laj yich'ic yu'une.

²⁷Jech o xal ti Diose laj yilta ti banomil li'e. Laj slamanbe talel ta sba scotol ti bac vocol ti ts'ibabil ta jpoc vun li'e.

²⁸Ta sc'ac'al yo'nton, ta soquemal sjol ta j'ech'el, laj sten loq'uel ta slumalic. Laj stacan batel ta yan muc'tiquil lum jech c'u cha'al ta xc'otilan ta pasel tana li'e.’

²⁹“Yu'un oy jaytos ti mu jayloq'ueluc jna'tique: Taje, ja' sventainoj ti Ajvalil Dios cu'untique. Oy lij'ac'bat jna'tic xchi'uc ti calab jnich'nabtac ti c'otuc ta pasel cu'untic ta j'ech'ele: ja' ti c'ot ta smantaltac scotol ti jbel c'usi tsots albile.