Read Tzotzil Deuteronomio 3 Bible Online

Deuteronomio 3 - Tzotzil bible

Deuteronomio 3

¹“Ts'acal to un, laj jtamtic ech'el yan be. Tuc' lijbatotic ta Basán. Ti Og une, ti ja' ajvalil yu'un ti jteclum taje, loc' ech'el xchi'uc scotol ti yajsoldadotaque yo' jech ta xistsacotic ta leto ta Edrei.

²“Va'i un, xi laj yalbun ti Diose: ‘Mu xaxi' yu'un. Yu'un ti stuque, xchi'uc scotol ti yajsoldadotaque, xchi'uc ti steclumale, laj xa cac'bot ta avoc ta ac'ob yo' jech ta xapasbe ta stojol jech c'u cha'al laj apasbe ti Sehón ti ja' ajvalil yu'un ti amorreoetic ti nacalic to ox ta Hesbone.’

³“Yu'un c'ot ta pasel yu'un ti Ajvalil Dios cu'untic ti laj yac' ta coc ta jc'obtic ti ajvalil Oge xchi'uc scotol ti yajsoldadotaque. J'ech'el laj jmilcutic scotol ti mi junuc cuxul come.

⁴Laj cu'ninbetic scotol ti jteclumetic yu'une. Mi ja'uc xa junuc ti mu'yuc laj cu'nintique, ti ja' oxvinic (60) ta chop jteclum ta scotole, ti lec xcaltique, ja' scotol ti jteclumetic ti oy ta yosilal ti Argobe, ti ja' sventainoj ti ajvalil Og ti oy ta Basane.

⁵Scotol taje, lec bajal ti yich'oj lec toyol ti smocale, ti naca taq'uin yich'oj ti sti'taque, ti sc'atlomte'ale. Yepal ta jmec ti jteclumetic ti mu'yuc yich'oj ti smocale.

⁶C'ot ta nopel sc'oplal cu'untic ti laj jlilintic ta j'ech'el jech c'u cha'al laj jpastic ta stojol ti Sehón ti ja' ajvalil yu'un ti Hesbone. Yu'un laj jtsutsestic ta j'ech'el ti viniquetique, ti antsetique, xchi'uc ti ololetic yu'unique.

⁷Yu'un c'ajomal xa no'ox laj jbalin laj jtunestic ti chon bolometique, xchi'uc scotol ti c'usi toyol stojol oy yu'unic ti cajcontratique.

⁸“Ja' yu'un un, ta vo'ne taj une, ja' jech laj cu'ninbetic yosilic sbanomilic ti cha'vo' ajvalil amorreo ti nacalic ta yeloval sloq'ueb c'ac'al yu'un ti uc'um Jordane, ti lic ta uc'um Arnone, ti c'ot c'alal to ta vits yu'un Hermone.

⁹(Ti vits taje, Sirión yac'ojbeic sbi ti sidonioetique. Ja'uc ti amorreoetique, Senir sbi yu'unic.)

¹⁰Ti jteclumetic ti oy ta stenlejal jol vitse, scotol ti oy ta Galaade xchi'uc ti Basane, ti c'ot c'alal to Salca xchi'uc ti Edreie, och ta coc ta jcobtic scotol ti jteclumetic ti ja' sventainoj to ox ti Og ti oy ta Basane.

¹¹(Ti ajvalil Og taje, ja' slajeb xa sts'unubal ti refaítaetic cuxul to oxe. Yu'un ti steme meltsanbil ta taq'uin, ti chanib vara xchi'uc oxch'ix (4mts.) yich'oj ti snatile, ti ja' chibuc vara xchi'uc jch'ix (2mts.) ti sjamleje. Yu'un ta to sq'uelolanic ta jteclum Rabá ti oy ta slumalic amonitaetic avi tana le'e.)

¹²Ti banomil ti laj cu'nintic ta spojel ti jech ora ta vo'ne taje, ti jteclumetic yu'une, laj cac'be yich' ti snitilultac ti Rubene, ti Gade, ti lic ech'el ta Areore, ti x'ech' ta ti' uc'um yu'un ti Arnone, ti c'ot ta o'lol vitstic yu'un ti Gaalade.

¹³Ja'uc ti c'u to yepal com scomelal yosilal ti Galaade, scotol ti c'u sjamlej yosilal Basán ti sbainoj to ox ta sventainel ti Oge, xchi'uc scotol yosilal ti Argob ti smacojic to ox ta naclej ti refaítaetique, ja' laj cac'be yich' ti o'lol jvoc' ti ja' snitilultac ti Manasese.

¹⁴(Ja'uc ti Jaire, sts'unubal ti Manasese, laj yu'nin ta spojel ti Argobe, ti c'ot c'alal to sts'actac Gesure xchi'uc Maacae, ti sbiinoj to ox Basane, ti lic sbiiltas Havot-jair ti ja' sbi stuque, ti ja' to jech sbiinoj yu'unic avi tana le' une.)

¹⁵Ja'uc ti Maquire, ja' laj cac'beic yich' ti Galaade.

¹⁶Yan ti snitilultac ti Rubene xchi'uc ti Gade, ja' laj cac'beic yich' ti banomil ti oy ta sts'el ti Galaade, ti ta xc'ot ta uc'um Arnone, ti ja' c'ot ta sts'ac yu'unic ti o'lol stenlejale, c'alal to uc'um Jaboc ti ja' sts'aquic ti amonitaetique.

¹⁷Ja'uc ti xi oy ta yeloval sloq'ueb c'ac'ale, ja' laj cac'be yich'ic ti banomil Arabae, c'alal to yoc vits Pisga ta stuq'uil ti sloq'ueb c'ac'ale, scotol ti ta xlic ta stuq'uil ti bu sts'aquinoj sbaic ta xc'ot xchi'uc ti uc'um Jordane, ti x'ech' c'alal to Arabae, ti Sts'ijlajan Nab sbie.

¹⁸“Ti jech yorail ta vo'ne taje, xichi xcholet laj calboxuc ava'iic ti mantale: ‘Ti Ajvalil ti ja' Dios avu'unique ta xac' ta arextoic ti muc' ta lum li'e. Yu'un scotol ti buch'u xu' yu'unic letovajele, ac'o xchapan sbaic xchi'uc ti yabtejebique, ti voleticuc ech'el ta jba'be yu'un ti xchi'iltac ta Israele.

¹⁹Ti ta lum ti bu laj xa cac'boxuque, c'ajomal xa no'ox ta xcom ti avantsilelique, ti anich'nabique, xchi'uc ti avacaxic ti jna' ti ep avu'unique.

²⁰Quiloj to ti vu'un Diosune ti mu'yuc to staojic xcuxobil yo'ntonic cu'un ti achi'ilic jech c'u cha'al laj xa ataic cu'une. Jech o xal un, c'alal mu'yuc to ta xu'ninic cu'un ti banomil ta jot uc'um Jordane, mi ja'uc xu' xasutic talel ta jteclumetic ti bu cac'ojboxuc eque.’

²¹“Yu'un ja' stuc ti Josuee, xi laj calbe ya'i ti mantale: ‘Yu'un aviloj ta aba ta asat atuc scotol ti c'u s'elan laj xa spas ti Ajvalil Dios avu'un ta stojol ti chib ajvalile. Yu'un ja' no'ox jech ta spas ta stojol scotol ti jbainvanej ajvaliletic ti bu ta xa'ech'e.

²²Mu xaxi' yu'un. Ti Ajvalil ti ja' Dios avu'une ja' ta sva'an sba ta letovajel avu'unic.’

²³“Ti jech yorail ta vo'ne taje, xivocolet liquel ti xichi laj jc'anbe ti Diose:

²⁴‘Cajval, lic xa avac' ta ilel amuc'ul atsatsal ta stojol ti avajtunel li'e. Ti ta vinajele, ti ta banomile, mu'yuc xa yan Dios ti ta xac' ta ilel ti ch'ayal ta xc'ot o'ntonal yu'un jech c'u cha'al ta xapase.

²⁵Luban chaman cu'un ti avac'uc ave ati' ti jelavcun ech'el ta jot uc'um Jordane. Yu'un ta jc'an ta jq'uel ca'i c'u yutsil ti ve'ebal banomil taje, ti c'upil sba muc'tiquil vitstique, xchi'uc ti svits Líbanoe.’

²⁶Ja'uc le' une, ilin ti Dios ta jtojol ta acojic ti vo'oxuque. Mi ja'uc xa laj yac' ye sti' ti jech laj jc'anbee. Yu'un c'ajomal no'ox xiyutune: ‘¡Ch'an xa chan! Mu xa jc'an xavulvun xchi'uc taje.

²⁷Muyan ech'el ta jol vits Pisgae. Ti bu taje, q'uelo avil batel ta jot ti oy ta yolon ti yolon xocon sloq'ueb c'ac'ale, ti ta jot ti oy ta yolon ti yac'ol xocon sloq'ueb c'ac'ale, ti oy ta stuq'uil sloq'ueb c'ac'ale, xchi'uc ti oy ta stuq'uil smaleb c'ac'ale. Mu cha'beluc un, yu'un mi ja'uc ta xajelav ta jot ti uc'um Jordane.

²⁸Bijubtaso, tojobtaso lec ti Josuee. Tsatsubtasbo ta yich'el yip xchi'uc smuc'ul yo'nton. Yu'un ti stuque ja' jba'be ta xjelav ech'el ta stojol ti xchi'iltaque. Yu'un ja' jba'be ta xjelav ech'el ta stojol ti svinquileltaque. Ja' ta xac'be yu'ninic ti banomil ti ta xbat aq'uel avi tana li'e.’

²⁹“Va'i un, lijcom ta stenlejal ti oy ta yeloval Bet-peore.