Read Tzotzil Deuteronomio 30 Bible Online

Deuteronomio 30 - Tzotzil bible

Deuteronomio 30

¹“Laj xa jcaj'alboxuc ava'iic sc'oplal ti c'uxubinele, xchi'uc sc'oplal ti bac vocol ti laj cac' ana'ic snopel ta st'ujele. C'alal ta xvul ta loq'uel ta atojolic scotol ti va'i s'elan taje ti ta lumetic bu ta stenoxuc ech'el ti Ajvalil Dios avu'unique, ta xvul ta avo'ntonic ti laj cac' ana'ic snopel st'ujele.

²Mi ta sjunul avo'ntonic, mi ta sjunul ach'ulelic ta xasutic talel yan velta ta stojol ti Dios xchi'uc ti avalab anich'nabique jech c'u cha'al laj calboxuc ava'iique,

³va'i un, ti Ajvalil ti ja' Dios avu'unique, ta sjel ti avorailique. Ta xlic c'uxubajuc yo'nton ta atojolic. Ti bu laj stanioxuc ech'el ta yan muc'tiquil lumetique, ta stsoboxuc talel yan velta.

⁴Ti jlom avu'unic ti toj nom batic ta sjoylej banomil ti c'alal jipatic loq'uele, ta xba yich'ic tsobel talel yu'un ti Ajvalil Dios avu'unique. Yu'un xba sa' talel ti bu oyic taje.

⁵Yu'un ta ach' ta stsoboxuc talel ta muc' ta lum ti laj yu'ninic ti amolmuc'totique, ta xacha'u'ninic. Lec ti c'usitic ta xataic liquel yu'une. Ta xepajesboxuc ti avalab anich'nabique, ja' mu sta laj staic ti amolmuc'totic ti laj ech'icuc ta vo'nee.

⁶Yu'un ta stec'an ti trate ta avo'ntonique xchi'uc ta yo'ntonic ti avalab anich'nabique yo' jech c'ux ta xava'iic ta sjunul avo'ntonic, ta sjunul ach'ulelic ti Diose, yo' jech ta xc'ot ta pasel ti oy acuxlejalique.

⁷Ti Ajvalil Dios avu'unique ta slamanbe ta sbaic ti bac vocol ta stojol ti avajcontraique, xchi'uc ta stojol ti buch'utic ta sc'ac'al yo'nton laj snutsoxuque.

⁸Va'i un, ta xasutic talel ta stojol ti Diose. Ta xach'unbeic ta spasbel ti c'usi ta sc'ane. Ta xlic avabtelanic ta spasbel ti smantaltac ti laj calboxuc ava'iique.

⁹Scotol ti c'usi ta xapasic une, ta xabolesbatic yu'un ti Diose, ti anich'nabique, ti yoltac avacaxique, xchi'uc ti c'usi ta xats'unique. Jech o no'ox un, yu'un ti Ajvalil Dios avu'unique, xmuyubaj xa liquel ti ta xcha'pas ti c'usi leque jech c'u cha'al laj spas talel to ox ta stojol ti amolmuc'totic laj ech'icuc ta vo'nee.

¹⁰Ja' no'ox venta mi ta xach'unbeic ti c'usi ta sc'an pasbel ti Ajvalil Dios avu'unique, mi ta xach'unbeic ti smantaltaque, mi ta xapasbeic ti jbel ti c'usi tsots albil ti ts'ibabil ta jpoc vun li'e, mi ta xasutic ta stojol yan velta ta sjunul avo'ntonic ta sjunul ach'ulelic.

¹¹“Ti mantaletic ta xcalboxuc ava'iic tana li'e, mu toj vocoluc ta ch'unel. Mi ja'uc toj vocol ta pasel.

¹²Mu yu'unuc ta vinajeluc to oy yo' xachi ta xavale: ‘¿Buch'u ono'ox la xu' ta xmuy batel ta vinajel yo' ta xich'botic talel ta yaq'uel jna'tic, yo' jech ta jchantic ta yabtelanel?’

¹³Mu yu'unuc ta jotuc to nab oy yo' xachi ta xavalique: ‘¿Buch'u la ono'ox xu' ta x'ech' ta jot nab yo' jech ta xich'botic talel ta yaq'uel jna'tic yo' jech ta jchantic ta yabtelanel?’

¹⁴Ja'uc le'e, nopol no'ox oy ta atojolic ti mantaletique. Yu'un oy ta ave ati'ic. Oy ta snopobil avu'unic yo' jech ta xc'ot ta pasel avu'unic.

¹⁵“Oy jun stac' xat'uj. Ti june, ja' sc'oplal ti cuxlejale, xchi'uc ti lequilal ti laj cac'bot ana' ta xchiquintael tana li'e. Ja'uc ti xchibale, ja' ti oy c'usi chopol ta xc'ot ta pasele, ti lajel tubele.

¹⁶Mi ta xach'unic ti c'usi laj calboxuc ava'iic avi li'e, mi c'ux ta xava'iic ti Ajvalil Dios avu'unique, mi jbel sc'oplal ta xatamic batele, mi jun avo'ntonic xchi'uque, mi ta xc'ot ta pasel avu'unic ti smantaltaque, mi ta xapasic ti oy c'usi jbel ti tsots albil sc'oplale xchi'uc ti c'usi nopbil yu'une, ta xacuxiic. Ta xbol ep avalab anich'nabic. Ta sva'an sba ta atojolic ti Ajvalil Dios avu'unic ta lum ti bu ta xavu'ninique.

¹⁷Yan mi mu xach'unbeic scotol taje, ti ja' no'ox ta xbat anijan abaic ta yich'el ta muc' ti yan diosetique,

¹⁸va'i unbi, ta jamal ta jt'abboxuc ava'iic ti ta jliquel no'ox ta xac'otic ta chamele. Yu'un mi ja'uc ta xajalijic ta lum mi laj avu'ninic xa c'alal mi ech' xa atuch'ic ti uc'um Jordane.

¹⁹Yu'un ta jva'an ta rextico ti vinajele, ti banomil ta atojolique, ti laj calboxuc ava'iic ti nopic ta st'ujel ti acuxlejalique, mi ja' ti lajebal tubele, mi ja' ti lequilale, mi ja' ti bac vocole. Ja' t'ujic ti cuxlejale yo' jech ta xacuxiic xchi'uc ti anitilulique.

²⁰C'uxuc xava'iic ti Ajvalil Dios avu'unique. Ch'unbeic ti c'usi ta sc'an pasbele. Co'oluc avo'ntonic xchi'uc. Yu'un ja' sbainoj ti acuxlejalique. Ta sventain stuc ti jaluc cuxianic ta lum ti laj sva'an sba ta rextico stuc ti ta xac'be yich' ti Abrahame, ti Isaaque, ti Jacobe, ja' ti amolmuc'totic ti laj ech'icuc ta vo'nee.”