Read Tzotzil Deuteronomio 31 Bible Online

Deuteronomio 31 - Tzotzil bible

Deuteronomio 31

¹Ti Moisese xi xcholet laj yal ti c'alal laj sc'oponan yan velta ti israeletique:

²“Quich'oj xa vacvinic (120) jabil, mu'yuc xa yipal cu'un ti xital xibat ta jujujote. Ja' jech xtoc ti Diose laj xa yalbun ca'i ti mu xa x'ech' jtuch' ti uc'um Jordane.

³Manchuc mi jech un, ja' jba'be ta xjelav ech'el avu'unic ti Ajvalil Diose. Ta stubbe comel sc'oplal ti muc'tiquil lumetic ti c'alal ta xa'ech'ique yo' jech ta xavu'ninbeic ti sbanomilique. Yu'un ja' jba'be ech'el avu'unic ti Josuee ti ta xc'ot ta banquilal jech c'u cha'al yaloj ono'ox ti Diose.

⁴Yu'un ti Diose jech ta spas ta stojol ti lumetic jech c'u cha'al laj spas ta stojol ti Sehone xchi'uc ti Oge, ti ja' to ox ajvaliletic yu'un ti amorreoetique, ti laj slilinbe ta j'ech'el ti steclumaltaque.

⁵C'alal ta xac'boxuc ta avoc ta ac'obic ti muc'tiquil lumetic ti Diose, ja' me jech xapasic scotol jech c'u cha'al yaloj ono'ox ti mantale.

⁶Tsotsanic, ac'beic yipal, mi ja'uc xatsiq'ues avo'ntonic. Mi ja'uc xaxi'ic yu'un ti c'alal ta sta yorail ta xatsaquic ta leto ti avajcontraique. Yu'un xchi'inojoxuc ti Ajvalil Dios avu'unique. Mi ja'uc ta xayictaoxuc comel, mi ja'uc ta xastenoxuc comel.”

⁷Ts'acal to un, ti Moisese xi laj yalbe ti Josuee ta sba ta sat scotol ti israeletic ti c'alal laj yic' talele: “Tsotsan, ac'bo yipal, ti c'u yepalic li'e, vo'ot ta xavic' batel ta yu'ninel ti muc' ta lum ti bu laj yal ti Dios ti ta xac'be ti amolmuc'totic ta vo'nee, ti c'otem ta aventa ti ta xavac'be yu'ninic ti banomile.

⁸Ja' stuc jba'be ech'el ti Dios avu'une, ta xaschi'inot. Mi ja'uc xayictaot comel. Mi ja'uc ta stenot comel. Ja' yu'un un cha'e, mu xavicta aba, mi ja'uc xaxi'.”

⁹Ti Moisese laj sts'iba ti jbel ti c'usi tsots albil sc'oplale. Laj yac'be jelavel ta sc'ob ti pale levitaetic ti ja' sbainojic ta xchechel batel xcaxail ti bu ts'ibabil strate ti Diose, xchi'uc scotol ti moletic yu'un ti israeletique.

¹⁰Va'i un, xi laj yalbe ya'i mantal jech c'u cha'al li'e: “C'alal ta sta ti jujun vucub jabile, ti ja' sjabilal ti xch'ayobil ilil ti c'u sjalil ta x'ech' sq'uinal ti yanal te' axibal nae,

¹¹c'alal ta stsob sbaic talel scotol ti israeletic ta stojol ti Ajvalil Dios ti ta yavil ti bu t'ujbil yu'une, ta sba ta satic scotol, ac'o yich' avtael ti oy jbel tsots albil sc'oplale.

¹²Yu'un tsots sc'oplal ta stsob sbaic scotol ti lume, jech c'u cha'al ti viniquetique, ti antsetique, ti ololetique, ti jyanlumetic ti nacalic ta ateclumalique, yo' jech ta xa'iic ta xich' avtabel ti jbel ti c'usi tsots sc'oplal albile, yo' jech ta xchanic ta yich'el ta muc' ti Ajvalil Dios avu'unique, xchi'uc ta xchanic ta spasel ti c'u s'elan ta xale.

¹³Va'i un, ti anich'nabic ti mu sna'beic smelol ti va'i s'elan taje, xu' ta xlic ya'iic, xchi'uc ta xich'ic ta muc' ti Ajvalil Dios avu'unic ti c'u sjalil ti ach'iel ac'opojelic ta jteclum ti ta xavu'ninic c'alal mi ech' xa atuch'ic ti uc'um Jordane.”

¹⁴Laj taj une, ti Diose xi laj yalbe ti Moisese: “A'yio ava'i, jutuc xa sc'an xc'ot yorail ti ta xachame. Ja'uc le' un cha'e, ic'o talel ti Josuee. Batanic achibalic ta Axibalna ti bu nupel ta bee yo' jech ta xcalbe ya'i ti jmantale.” Jech ti Moisese xchi'uc ti Josuee batic ta Axibalna ti bu nupel ta bee.

¹⁵Ti bu taje, tal jun pimil ic'luman toc ti xvolet batel ta sti' ti Axibalna ti bu laj yac' sba iluc ti Diose.

¹⁶Va'i un, ti Diose xi laj yalbe ti Moisese: “Ti jech jutuc sc'an xc'ot yorail ta xachame, ti lum li'e, ta jech yepal ta xlic syanijes sbaic. Ta xich'ic ta muc' sdiosic ti jteclum ti bu ta xu'ninique. Va'i un, ta xlic yictaicun comel. Ta xlic soquesbeic sc'oplal ti jtrate ti laj jpas ta stojolique.

¹⁷Ja'uc le' une, ta xlic tiluc ti sc'ac'al co'nton ta stojolique. Ta jipic comel ya'iic stuquic. Mu ja'uc jset'uc ta jvulesic ta co'nton. Mu albajuc ta xlic ti svocolique, ti at-o'nton ta xtal ta stojolique, ti lajebale, ti ta xc'ot ta pasel ti xi ta xlic yalique: ‘¿Mi mu ja'uc xana' ti mu'yuc xa li' xchi'inojotic ti Dios ti vi s'elan ta xquich'tic ti jvocoltique?’

¹⁸C'alal jech ta xc'ot yorail taje, x'ech' to ta jq'uej jba loq'uel ta stojolic ti jech chopol laj xa spasic ti laj snijan xchiman sbaic ta yich'el ta muc' ti yan diosetique.

¹⁹“Avi tana li' une, ts'ibao jcojuc q'uejimol. Chanubtaso ti israeletic yo' jech ta sq'uejintaic ta svinajesel ti sc'oplalic stuquique.

²⁰C'alal mi ochic xa batel cu'un ta banomil ti bu laj jva'an jba ta yalel ti ta xcac'beic ti smolmuc'totique, ta banomil ti bu co'ol s'elan vo' ta xbein ti chu' vacaxe, ti ajapome, c'alal mi laj xa yet'es yo'ntonic ta stunel ta slajesel ti c'usitic x'ayane, mi jubic lec xchi'uque, ta xlic snijan xchiman sbaic ta yich'el ta muc' ti yan diosetique. Ta xlic stenic sbajicun comel xchi'uc ta soquesel ti jtratee.

²¹Ja'uc le' une, c'alal lamal ta xc'ot ta sbaic ti mu albajuc ti vocole, ti ilbajinele, va'i un, ti q'uejimol une, ta xc'ot ta pasel ti ja' sc'oplal stuquic ti c'usi ta xale. Yu'un ti snitilulique ta svules ta sjolic, ta sq'uejintaic. Yu'un ti c'alal mu to ta x'ochic ta banomil ti caloj ta xcac'beique, jq'ueloj xa ono'ox ti c'usi ta snopique.”

²²Ta yorail no'ox ti jech c'ac'al taje, lic sts'iba q'uejimol ti Moisese. C'ot ta pasel ti laj xchan yu'un ti israeletique.

²³Ti Josuee, xnich'on ti Nune, xi xcholet albat mantal yu'un ti Diose: “Tsotsan, ac'bo yipal, yu'un vo'ot ta xabain ta stiq'uel ochel ti israeletic ta muc' ta lum ti laj jva'an jba ta yalel ti ta xcac'beique. Yu'un nabalun ta axocon.”

²⁴C'alal laj yo'nton ti Moisés ta sts'ibael ta jpoc vun ti jbel ti c'usi tsots sc'oplal albile,

²⁵xi laj yalbe ya'i ti levitaetic ti sva'anojic ta xchechel ech'el xcaxail strate ti Diose:

²⁶“Ilic jpoc svunal ti jbel ti c'usi tsots albil sc'oplale. Tiq'uic ochel ta xocon xcaxail strate ti Ajvalil Dios avu'unique yo' jech ta xavinajesbatic ac'oplalic ta scoj ti c'usi ta xapasique.

²⁷Yu'un jna' lec ti toyobba lumoxuque, ti tsots avo'ntonique. Ac'o mi li' to jchi'inojoxuque, laj xa atoy abaic ta stojol ti Diose. ¿C'usi xa ono'ox van ta xc'ot ta pasel mi lichame?

²⁸Iq'uic talel scotol ti moletic avu'unique, ti banquilaletic yu'un ti jujuvoc' nitiluletique, yu'un ta jc'oponic ya'iic ta yalbel ti c'usi ta xc'ot ta pasele. Ta jva'an ta rextico ti vinajele, ti banomile, ti ta xlic yich'ic contrainele.

²⁹Yu'un ta jna' lec ti c'alal mi licham xa oxe, ta xlic soques sbaic. Ta sq'uej sbaic loq'uel ta be ti bu laj calboxuc ava'iic ta stamel batele. Jna' lec ti ta xc'ot ta pasel ti oy c'usi chopol ta xtal ta stojolic ta scoj ti mu'yuc c'usi lec ta spasic ta xil ta sba ta sat ti Diose, ti ta sa'beic ti sc'ac'al yo'ntone.”

³⁰Va'i un, ti Moisese xi xcholet lic sq'uejinta ta sliqueb ta stsutseb ti q'uejimol ta sba ta sat scotol ti israeletic ti tsobolique: