Read Tzotzil Deuteronomio 32 Bible Online

Deuteronomio 32 - Tzotzil bible

Deuteronomio 32

¹“Ch'ul vinajel, ts'etanbun ani' achiquin yu'un ti jc'ope; ch'ul banomil, a'yibun ava'i ti jc'opojel jti'inele.

²“Yu'un ti chanubtasel ta xcaq'ue, co'ol s'elan vo' ta xyal talel. Yu'un ti c'u s'elan ta xic'opoj ta xiti'ine, co'ol s'elan sjob ac'ubal ta xyal talel, co'ol s'elan vits'il vo' ta xyal talel ta momol, co'ol s'elan uni bajlajetel vo' ta xc'ot ta sba ti yaxale.

³“Yu'un xichi ta xcalbe sc'oplal ti Diose: Ojtiquinic avilic lec ti jelavem smuc'ul ti Dios cu'untique.

⁴Ja' c'otem ta jpojobbailtic; jun yutsil ti yabtel spasoje. Ti c'usi ta spase, lec tuc' ta j'ech'el, yu'un ja' jun Dios ti melel ti c'usi ta xale. Mu'yuc c'usi chopol ta spas ti stuque, yu'un ja' melel, oy lec srazon ti stuque.

⁵“Yu'un xi ac'oplalic ti chopol pucujil jnaclejetic ti ta stsaquic ta c'op ti Diose, ti mu ja'uc jutebuc xc'ot o ti bisbilic ta xnich'nabe.

⁶¿Mi ja' jech ta xatojbeic ta xapacbeic sutel ti Diose? Pimil jteclum, mi ja'uc jutebuc oy abijilic, ¿mi yu'un ma'uc atot ti Buch'u laj yac' ach'ulele, ti laj smeltsanote? Ja' laj smeltsanot, laj yac'bot ach'ulel.

⁷“Q'uelo sutel apat, t'abbo ta avo'nton ti c'usitic laj c'otuc ta pasel ta vo'nee. Ac'o yalbot ava'i ti atot ta slo'iltabelote; ac'o yalbot ava'i ti ta slo'iltabelot ti moletic ti oy xi sc'oplale:

⁸Ti Buch'u oy ta toyole, oy jun velta laj spuc batel ti yajval lumetique xchi'uc ti muc'tiquil lume; laj xchapanbe bu ta xc'ot sts'aquil yosilic ti lume, ja'uc le' une, mu'yuc laj xch'ay ta yo'nton ti israeletique.

⁹Yu'un xrextotac ta xa'i ti Diose, ja' ti steclumaltaque, snitilultac ti Jacobe.

¹⁰Yu'un lamal laj sta ta sbajtical banomil, ta jun taquinal banomil ti bu xjumet ti ic' ta x'ech'e. Laj svol ta yolon yoc sc'ob, laj xchanubtas, laj xchabi jech c'u cha'al ti yuninal sate.

¹¹Jech c'u cha'al junuc muc' ta xic ti ta sjoyobta ta vilel ti stase, ti ta stsatsubtasbe yo'nton ta vilel ti yalabe, ja' jech laj spas ti Dios ti laj xlich'an ti xiq'ue, yu'un laj yic'anan batel ta sba xic'.

¹²“Ja' tojobtasatic ech'el yu'un ti Diose, yu'un mu'yuc buch'u yan, mi ja'uc coltaatic ech'el yu'un ti yan diosetique.

¹³Xlajun xanavic no'ox ech'el yu'un ti mu'yuc tsalbil ta j'ech'el ti ta toyol vitstic yu'un ti muc' ta lume; laj smalq'uintas ta sat te'etic ti x'ayan ta osiltique. Laj sts'uts' yu'un ajapom ti oy ta c'al ch'ene; laj stunes slajes aceite yu'un ti oy ta yijiquil tonetique.

¹⁴Oy lec ya'lel xchu' ti xvacaxique, ti lec tot ta j'ech'ele; jun yutsiquil ti ch'iom chijetic laj sti'ique, ja' ti xchijtac ti Basane xchi'uc ti tot tentsunetique. Jun yutsiquil ti sat trigo laj stun laj slajesique; laj yuch'ic ti vinoe, ti co'ol s'elan ch'ich' stsajal ti sat uvae.

¹⁵“Ti jech taj une, jub ta j'ech'el ti Jesurune,[5], ti c'ot ta jun toyobba ta j'ech'el xchi'uque, (ti xt'ajet no'ox ti sat yu'un xepu'al ti sjubemale). Tey laj sjip laj sten comel ti Dios yu'une, ti ja' ac'bun xch'ulel yanimae; laj sbaj ti jchabivanej jpojvanej yu'une.

¹⁶Laj syanijesbe, laj sliquesbe sc'ac'al yo'nton ti Dios yu'une, ti c'alal lic snijan xchiman sba ta yich'el ta muc' ti chopol yan diosetique.

¹⁷Yu'un laj smilbeic smoton ti pucujetique, ti biiltasbilic ta diosetic ti mu ja'uc jutebuc xojtiquinique, ti ach' to sliquele, ti ach' to svulele, ti mu ja'uc oy bu jutebuc laj snijan xchiman sbaic ta yich'el ta muc' ti stot sme'ique.

¹⁸“Laj ach'ay ta avo'nton ti atote, Israel, ti c'alal ja' jpojvanej avu'une; yu'un laj ach'ay ta avo'nton ti Diose, ti ja' laj yac'bot acuxlejale.

¹⁹Ilin ti Dios ti jech laj yil taje, laj xuj loq'uel ti squerem stsebtaque,

²⁰ti xi laj yal xtoque: ‘Ta jvalopatinic comel. Jq'ueltic quic bu to c'alal ta xc'otic xchi'uquic. Ta melel cac'tic spajebal xa no'ox chopol lumetic, nich'nabiletic ti mu junuc co'nton xchi'uquique.

²¹J'ech'el mu sts'ic cu'un ti buch'u ta spec'tsanbun ti jc'oplale, ti ich'bil ta muc' ta xc'ot yu'un ti yan diosetic ti c'alal ma'uc diose. Laj sliquesbeicun sc'ac'al co'nton yu'un ti yan diosetic yu'unique. Jechun ec un, ta jtic'beic ya'iic ta sjol ta yo'ntonic ti mu xa c'usi x'ech' o ta xa'i ti c'alal ta xilic jun jteclumetic ti ma'uc ic'bilic cu'une. Ta jliquesbeic sc'ac'al yo'nton ya'iic xchi'uc jun jteclum ti mu xa'ibeic ti xchiquinale.

²²Yu'un co'ol xa s'elan junuc tilemal c'oc' ti sc'ac'al co'ntone, ta xtil ta j'ech'el ti bu xa c'alal slajebal snatil ti banomile, ta xcules ta chiq'uel ta j'ech'el ti banomile xchi'uc ti c'usi x'ayan yu'une, ta sjumbe sc'ac'al yoctac ti vitstique.

²³Ta jlamanbe ta sba ya'iic scotol ti c'usi chopole; ta jlamanbe ta sba ya'iic scotol ti sni' jyolobtaque.

²⁴Ta vi'nal, ta sic c'oc', ta xchamic; tsots ta j'ech'el ti vocoletic ta xtal ta stojolique, ja' to ti c'uxi xc'otic ta tsutsel yu'une. Ta jtacbeic talel ta stojolic jti'oval te'tical chonetic xchi'uc venenoal chonetic.

²⁵Ti xnich'nabique ta xlajic ta milel ta espada ta calleetic; c'ajomal xa no'ox mu xnel mu x'ech' ti xi'el ta xa'iic ta snaique. Ta xc'ot ta pasel ti ta xcham ep ti jva'lej viniquetique, ti tsebetique, ti mol me'eletique, xchi'uc ololetic ti ta xchu'unique.

²⁶‘Yu'un c'ot xa ox ta jnopel cu'un ti tan puc ta xbatique, ti ta jch'aybeic sc'oplal ta banomil ti mu ja'uc xa svulesatic ta o'ntonale.

²⁷Ja'uc le' une, mu ts'icbaj laj ca'i ti labanel yu'un ti cajcontrataque. mi ja'uc ts'icbaj laj ca'i ti j'ilbajinvanejetic ti cajal toyol xa ye ti xi ta xalic liquele: Ti vi s'elan le'e, ma'uc Dios laj spas, yu'un ta quiptic ta jmuc'ul jtsatsaltic jtuctic ti jech c'ot ta pasele.’

²⁸“Yu'un ti lum Israele ch'ay ti snopobil yu'unique, mi ja'uc xa'ibeic xchiquinal.

²⁹Yan ti yu'unuc oyuc sbijilique, ta xa'ibeic xchiquinal, ta xa'ibeic stuq'uil ti bu ta xc'otic ta loq'uel ti jechuque.

³⁰¿C'uxi laj yutic ti ta jun no'ox vinic laj sjatviltas ech'el jmil ta vo'e? ¿C'uxi laj yutic ti ta cha'vo' no'ox vinic laj sjatbiltas ech'el lajunmil ta vo'e? Taje, ja' no'ox ta sventa ti Dios ti ja' jpojvanej yu'unique, ti c'ot ta nopel yu'un ti ta x'aq'ueic ta yoc ta sc'obic ti yajcontraique.

³¹“Sna'ic lec ti cajcontratique ti mu stac' sco'oltasic ti jpojvanej yu'unic jech c'u cha'al ti jpojvanej cu'untique.

³²Yu'un ti stuquique, co'ol s'elanic jech c'u cha'al junuc ts'unubal uva ti soquem xae, ti ja'ic snitilultac ti lum Sodomae xchi'uc ti Gomorrae, ti ch'aiquil uva xloc' x'ayan yu'unique, ti ta xmilvane.

³³Veneno ti svinoique, ¡svenenoal chon ti jbel sc'oplal ta xmilvane!

³⁴“Xi laj yal ti Diose: ‘Scotol ti va'i s'elan taje, ta jcaj-tsobilan batel, ti co'ol s'elan jun c'ulejal ti toyol stojol ta jchabi leque.

³⁵Ta xcac'beic lec stoj ti c'alal ta sta yorail ta jpac sutele, ti c'alal ta sta yorail ta xyalic ta lume. Jutuc xa sc'an ta sta yorail ti ta xtub sc'oplalique, yu'un jutuc xa sc'an ta sta yorail.’

³⁶“Ti Diose ta xloc' talel ta spojel ti slumal ti c'alal ta xil ti mu'yuc xa ti yipal yu'unique. Yu'un ti Diose ta xlic xc'uxubaj yo'nton yu'un ti yajtuneltac ti c'alal ta xil ti mu ja'uc xa junuc ta xcom ti buch'u tsotsique, ti mu ja'uc xa junuc ta xcom ti buch'u ch'abal ti yipic ono'oxe.

³⁷Va'i un, xi ta x'albatic liquel une: ‘¿Bu oy ti avajdiosique, ti jpojvanejetic avu'unic ti apatoj avo'ntonic ta stojole?

³⁸Yu'un laj avac'beic stun slajesic ti xepu'al smotontac ti laj amilbeique; laj yuch'ic ti vino ti laj avac'beic ta smotone. Talicuc ta sva'anel stec'anel sbaic ta spojeloxuc un cha'e. Talicuc ta sva'anel stec'anel sbaic ta scoltaeloxuc un cha'e.

³⁹C'ajomal no'ox vu'un jtuc Diosun; mu'yuc xa ma' ti oy to yan diosetic ta tael jech c'u cha'al ti vu'un une. Vu'un ta xcac' ti cuxlejale, vu'un ta jtuch'; vu'un ta jliques ti yayijesele, vu'un ta jpoxta. Mu'yuc buch'u ma' ti ta sq'uej sba loq'uel ta stojol ti jmuc'ul jtsatsal une.

⁴⁰Ta jye' muyel coc jc'ob ta vinajel. Ti jech cuxulun sbatel osile, ta jva'an jba ta yalel ta jamal,

⁴¹ti c'alal ta sta yorail ta juxbe ye ti jts'ayetel quespadae, ti ta xlic lequilal chapanvancune, ta jpacbe ya'iic sutel ti cajcontrataque. Ta xcac'be stojolic ti buch'utic laj sti'-joltaicune.

⁴²Ta jbon ta ch'ich' ti sni' jyolobtaque, ta xve' ta sbec'talic ti quespadae, ta jmalbe xch'ich'eltac ti buch'utic yayijemique, ti buch'utic tsacbilic ta chuquele, ti banquilaletic yu'un ti cajcontratac ti co'ol s'elan stsotsil león ti sjolique.’

⁴³“Siquetuc avo'ntonic, lumetic, xchi'uc steclumal ti Diose. ¡Ti jech milbat ti yajtuneltaque, ta spacbe sutel, ti yajcontrataque ta xilbe svocol, ja'uc ti yosilale, xchi'uc ti steclumale, ta xch'aybe ti smulique!”

⁴⁴Va'i un, ti Moisese xchi'uc ti Josué xnich'on ti Nunee, lic sva'an sba ta yalel scotol ti c'usitic ts'ibabil ta sventa q'uejimol ta sba ta sat scotol ti lume.

⁴⁵C'alal tsuts yu'un ta yalel ta stojol scotol Israel ti c'u s'elan ts'ibabil ti c'ope,

⁴⁶ts'acal to un, ti Moisese xi laj yalbe ya'i ti israeletique: “Nopo ava'iic lec scotol ti va'i s'elan laj calboxuc ava'iic li'e. Albeic ya'iic ti anich'nabique ti c'otuc yu'un ta yabtelanel yip scotol ti oy jbel ti c'usi tsots albil sc'oplale.

⁴⁷Yu'un ti jbel c'usi tsots albile, mu ta jeche'uc no'ox ti oy sc'oplale. Yu'un ja' ta xac' cuxlejal, ja' ta sventa jal ta xanaquiic ta banomil ti oy ta jot uc'um Jordane, ti oy sc'oplal ta xbat avu'ninique.”

⁴⁸Ta yorail no'ox ti jech c'ac'al taje, xi albat yu'un Dios ti Moisés ti c'alal tal c'oponatuque:

⁴⁹“Batan ta vitstic ti Abarim sbie. Muyan ech'el ta vits Nebo ti oy ta yosilic ti moabitaetique, ta yeloval ti Jericoe. Ti bu taje, lic q'uelo ech'el ti banomil Canaán ta xcac'be ta xrextoic ti israeletique.

⁵⁰Ti bu taje, c'alal mi lamuy ech'el ta vitse, ta xacham. Yu'un ta xbat achi'in ti amolmuc'totaque jech c'u cha'al ti achi'il ta voq'uel Aarón ti cham ta vits Hore, ti bat svol sbaic xchi'uc ti xchi'iltaque.

⁵¹Yu'un ti vo'oxuc achibalique mu'yuc lec laj apas abaic ta jtojol ti laj yil ta sba ta sat ti israeletic ti c'alal oyoxuc ta Meriba-cades ta sts'el vo' ti oy ta sbajtical banomil yu'un ti Zine. Yu'un mi ja'uc laj anijan achiman abaic ta yich'elun ta muc' ta sba ta sat ti stuquique.

⁵²Ja' yu'un un, ta nom no'ox ta xavelomta ech'el ti banomil ti ta xcac'beic ti israeletique. Ja'uc le' une, mu xa'och batel un.”