Read Tzotzil Deuteronomio 33 Bible Online

Deuteronomio 33 - Tzotzil bible

Deuteronomio 33

¹C'alal mu to ta xcham ti Moisese, ti ja' jun yajtunel Diose, laj yac'be yich' slequilal Dios ti israeletique,

²ti xi xcholet lic yale: “Lic talel ta vits Sinaí ti Diose; yu'un ta Seir to, sac jaman no'ox talel ti jbetic yu'une. Yu'un xojobin no'ox vulel ta vits Parán, ti sac jaman no'ox ech'el yu'un c'alal ta Mariba-cadés, ti xtuchoj talel ta sbats'i c'ob ti co'ol s'elan junuc c'oc' sc'oplal ti oy jbel c'usi albil yu'une.

³Yu'un ti Diose, oy syail xc'uxul yo'nton ta stojol ti slumale; ti buch'u ta xac' sba ta tunel ta stojole, ta spoj, yu'un nijil chimil ta yoc ta sc'ob, ta xch'unbeic ti c'usi ta x'albatic yu'une.

⁴Ti jvoc'otic snitilulotic ti Jacobe, jun yutsil ti jrextotic laj jtatique, yu'un laj yac'botic ti Moisés ti jbel ti c'usi albil sc'oplale.

⁵Ti ta Jesurune, ayan talel jun ajvalil ti c'alal laj stsob sbaic ti banquilaletic yu'un ti jteclume,” ti c'alal lic stsob sbaic ti snitilultac ti israeletique.

⁶Ta sventa sc'oplal ti Rubene, xi albate: “Cajal c'otuc sc'oplal ti Rubene, c'otuc ta pasel ti mu xchame ac'o mi juteb no'ox ti svinictaque.”

⁷Ta sventa sc'oplal ti Judae, xi albate: “Ch'ul Dios, a'yibo sc'opojel sti'inel ti Judae; c'otuc ta pasel avu'un ti jmojuc vololuc xchi'uc ti slumale. Ta sventauc amuc'ul atsatsal, pojo, tic'o aba ta scoltael yu'un ti yajcontrae.”

⁸Ta sventa sc'oplal ti Levie, xi albate: “Ja' avu'untac, Ch'ul Dios, ti buch'u yich'oj ti Tumime ti Urime. Ja' avu'untac ti vinic ti buch'u jun yo'nton ta atojole, ti laj aq'uelbe yo'nton ta Masae, ti laj avul abaic xchi'uc ta vo' ti oy ta Meribae,

⁹ti buch'u xi laj yalbe ti stot sme'e: ‘Ta j'ech'el mu'yuc xaquiltic o.’ Ti buch'u xi laj yalbe ti xchi'iltac ta voq'uele: ‘Ta j'ech'el mu xaxcojtiquintic’, ti buch'u xi laj yalbe ti xnich'nabe: ‘Mu jna' buch'uoxuc.’ Yu'un ti stuquique ta xc'ot ta ch'unel yu'unic ti ac'ope, ti j'ech'el tsots sc'oplal ta xa'iic ti tratee.

¹⁰Yu'un ti stuquique ta xchanubtasic ti Jacob ti jbel ti c'usi albile, xchi'uc ti c'usi nopbil avu'une. Ta xabtelan ta atojol ta yaq'uel ta sba avaltar ta xchiq'uel ti pome, xchi'uc ti chon bolometic ti ta xc'ot ta matanale.

¹¹Va'ano aba ta stojol ti c'usi ta spasic un cha'e, Cajval, lequil tsacbo ti slubel xchamel yoc sc'obique. C'avbunbo ta lilinbel ta j'ech'el ta sc'asbel sbaquil spatic ti yajcontraique, ti mu ja'uc xa ta stam sbaic liquel ti jti'-joltavanetique.”

¹²Ta sventa sc'oplal ti Benjamine, xi albate: “Ti jech c'uxubinbil tuc'ulanbil yu'un ti Diose, jun yo'nton ta xcuxi. Yu'un pojbil yu'un ti Buch'u nacal ti jelavel to ti bu oy ta toyole. Chabibil nacal ta yolon squeoval yaxinal yu'un.”

¹³Ta sventa sc'oplal ti Josee, xi albate: “Sva'anojuc sba ti Dios ta yosil sbanomil ta sventa ti sjob ac'ubal ta xyal talel ta vinajele, xchi'uc ti vo' ti jelavem ta snatil banomile.

¹⁴Oyuc no'ox yu'un ta j'ech'el ti ts'unubil ta x'ech' ti jujun jabile, xchi'uc ti jtunel jlajesel sat te' ti ta xloc' jujun ue.

¹⁵Oyuc no'ox ta j'ech'el ti jtunel jlajesel sat te' ti ta xloc' ta muc'tiquil vitsetique jech c'u cha'al ta vo'nee,

¹⁶xchi'uc ti sat ts'unubil ti busul no'ox ta xac' lec ta banomile. Ac'o stabe yutsil slequil ti Buch'u laj yac' sba iluc ta jtec' ch'ixe, c'otuc ta stojol José scotol ti va'i s'elan taje, ti laj yich' t'ujel loq'uel ta stojol ti sbanquiltaque.

¹⁷Ti Josee, co'ol s'elan sba xnich'on jcot tot vacax ti toj c'upil sbae, ti jech s'elan yip jech c'u cha'al ti te'tical vacaxe, ti naca xluch no'ox ech'el ti jteclumetic ti oy ta scotol xchanjotal ti banomile. Ti jech taj une, ja' sventa ti mu albajuc yepal snitilultac ti Efraine, ti ta mil no'ox oy snitilultac ti Manasese.”

¹⁸Ta sventa sc'oplal ti Zabulone xchi'uc ti Isacare, xi albatique: “Muyubajan, Zabulón, yu'un ta xaloc' batel, ja'uc ti vo'ote, Isacar, muyubajan ta sventa ti axibal na avu'une.

¹⁹Ta xaviq'uic batel ti muc'tiquil lumetic ta vitse. Ti bu taje, ta xavaq'uic milbil matanaletic ti oy sc'oplal stunele. Ta xac'upinic ta stunesel ti c'usitic x'ayan ta nab ti ja' sc'ulejale, xchi'uc ti c'usi toyol stojol ti mucul ta ti' nabe.”

²⁰Ta sventa sc'oplal ti Gade, xi albate: “Lequil c'optabiluc c'otuc ti Buch'u ta smuq'uibtasbat ech'el ti sbanomil yu'une. Yu'un ti Gade, co'ol s'elan me' león ti lubul ta xmalavan ta sc'oquel ti jolile, ta xtuch'el ti c'obile.

²¹Yu'un ti Gade, c'ot ta stojol ti slequile, jun banomil ti sc'otebal ta yosil sbanomil ti banquilaletic yu'un ti soldadoetique. Yu'un c'ot ta jba'be yu'un ti jteclume; c'ot ta pasel yu'un ti c'u s'elan albil yu'un ti Dios ti ac'o spase. Yu'un tojob lec ta yabtelanel ti c'usi sc'an spasel ta stojol ti israeletique.”

²²Ta sventa sc'oplal ti Dane, xi albate: “Ti Dane, co'ol s'elan jcot yol me' león ti ta Basán to xbitet no'ox talele.”

²³Ta sventa sc'oplal ti Neftalie, xi albate: “Ti Neftalie, lec x'ile yu'un ti Diose, yu'un c'otem ta stojolal ti ep sva'anoj sba ti Diose. Yu'un ti sbanomile, lic ech'el ta nab, c'ot c'alal to ta yolon ti yac'ol xocon smaleb c'ac'ale.”

²⁴Ta sventa sc'oplal ti Asere, xi albate: “Lequil c'optabilic c'otuc ti Asere, ti jun ta scotol xnich'nab ti Jacobe, ti staojuc ti c'uxbinbiluc c'otuc yu'un ti xchi'iltac ta voq'uele, ti jaxbatuc no'ox ti aceite ta yacane.

²⁵Ti syavialtac ti sti' snae, ti nacauc tsatsaquil taq'uine xchi'uc ti c'anal taq'uine, jechuc sjalil oyuc yip jech c'u cha'al sjalil ti xcuxlejale.

²⁶“Ta j'ech'el mu'yuc c'usi stac' co'oltasel Dios yu'un ti Jesurune, ti tsots yabtel yich'oj ti xcajet no'ox talel ta ba toc ti oy ta vinajele yo' ta xtal scoltaot.

²⁷Ti cuxul Dios sbatel osile, ja' apojobbail. Yu'un ja' aquicleb ti smuc'ul stsatsal sbatel osile, ti ta aba ta asat laj sjatviltas ech'el ti avajcontrae, ti laj yalbot mantal ti ac'o atsutsesbe sc'oplal ta j'ech'ele.

²⁸Jun yo'nton ta xcuxi xnaqui ti israeletique; mu'yuc no'ox c'usi sna'ic ta xnaquiic xcuxiic ti snitilultaque. Ti ta yosil sbanomilique, xloc' no'ox ma' ti trigoe, ti vinoe, mi ja'uc ta xjaltaj ti vo' ta xlic talel ta vinajele.

²⁹Mu'yuc no'ox c'usi xana' ta j'ech'el, Israel, ¿mi yu'un la oy buch'u stac' ta sco'oltasot? Yu'un ja' laj spojot stuc ti Diose, ja' ta scoltaot, yu'un ja' c'otem ta jtsalvanej espada abtejebal avu'un. Nijil chimilic ta xc'otic ta avoc ta ac'obic ti avajcontraique, ti vo'ot une ta xapech' ta teq'uel ya'iic ta scoj ti stoyobbailique.”