Read Tzotzil Deuteronomio 5 Bible Online

Deuteronomio 5 - Tzotzil bible

Deuteronomio 5

¹Ti Moisese xi laj yal ti c'alal laj stsob talel scotol ti lum israeletique: “A'yio ava'iic, israeletic, ti jbel ti c'usitic albile, ti c'usitic nopbil ta xcalboxuc ava'iic li'e. Tojobanic ta snopel ta yabtelanel.

²“Yu'un ti Ajvalil Dios cu'untique laj spas trate ta jtojoltic ta stselej vits yu'un ti Horebe.

³Yu'un ma'uc no'ox laj spas ta stojolic ti jmolmuc'totic ti laj ech'icuc ta vo'nee. Yu'un ta spas ta jtojoltic jcotoltic ti c'u quepaltic ti li' tsobolotique.

⁴Yu'un ti Diose, aq'ueloj ta aba ta asatic ti c'alal laj sc'oponoxuc talel ta o'lol leb c'oc' ta stselej vitse.

⁵Yu'un vu'un lic'ot ta j'et'esej-c'op yu'un ti Dios ta atojolique yo' jech ta xcalboxuc ava'iic ti sc'ope. Ti vo'oxuc une ochemoxuc xa ta xi'el yu'un ti leb c'oq'ue. Mi ja'uc lamuyic ech'el ta stselej vits. Va'i un, xi laj yal ti Dios une:

⁶‘Yu'un vu'unun ti Ajvalil Diosun avu'unique ti laj jloq'uesoxuc talel ta Egipto ti bu mosovinbiloxuque.

⁷‘Mu xava'anan yan avajdiostac ta jtojol.

⁸‘Mi ja'uc xaloc'ta junuc loc'obbail dios, mi ja'uc sloc'obbailtac ti c'usitic oy ta vinajele, ti c'usitic oy ta banomile, ti c'usitic oy ta nabe, ti c'usitic oy ta yolon banomile.

⁹Mu xaquejan abaic ta stojol. Mi ja'uc xamuyubtaic ta yich'el ta muc'. Yu'un vu'unun ti Ajvalil Dios avu'unique. Yu'un ti jech Diosune, mu jutebuc sts'ic cu'un ti buch'u ta xac' sba ta sc'ob ti yane, ti ta jtsits ti totil me'iletic ta scoj ti smulic ti xti'et sjolic ta jtojole, ti ta sta ta maquiel ti xnich'nabique, ti smomique, ti syialmomique.

¹⁰Ac'o mi jech un, ja' no'ox ti mu'yuc spajeb sbatel osil ta jc'uxubinan ti buch'utic mu xituch' ta yo'ntonique, ti ta xc'ot ta pasel yu'unic ti jmantaltaque.

¹¹‘Mu xatailan ta alel ti Ajvalil Dios avu'un ti c'usiuc no'ox ta xavalilane. Yu'un ti stuque mu teyuc no'ox sq'ueloj ti buch'u ta xtae ta alilanel ta c'usiuc no'ox ta xalilane, ta stsitsat yu'un.

¹²‘Mu xch'ay xava'i sc'ac'alil ti cuxob o'ntonale yo' jech ta xavac' ta ich'el ta muc' ti Diose jech c'u cha'al yalojbot mantal ti Dios avu'une.

¹³Yu'un vaquib no'ox c'ac'al ta xa'abtej. Yu'un ja' o yorail ta xavabtelan scotol ti c'usitic sc'an pasele.

¹⁴Ja'uc ta yucubal c'ac'al une, ja' jun c'ac'al ti sc'ac'alil cuxob o'ntonal ti chapanbil yu'un ti Ajvalil Dios avu'une. Mi ja'uc xa'abtej jset'uc ti jech c'ac'al taje, mi ja'uc ti aquerem nich'one, ti avantsil nich'one, mi ja'uc ti amosov vinique, ti antse, mi ja'uc ti avacaxe, ti aburroe, mi jcotuc ti chon bolom avu'une, mi ja'uc ti jyanlumetic ti oy ta atojolique, yo' jech ti amosov vinique, mi ja' ti antse, ac'bo xcux yo'ntonic ec jech c'u cha'al ti ta xacuxe.

¹⁵Mu xch'ay xava'i ti mosovinbiloxuc to ox la'ech'ic ta Egiptoe, ti laj sloq'uesot talel ti Ajvalil Dios avu'un ti bu taje, yu'un laj slaman ti smuc'ul stsatsale. Jech o xal ti Ajvalil Dios avu'une ta xalbot mantal ti c'otuc ta pasele, ich'o ta muc' ti sc'ac'alil cuxob o'ntonale.

¹⁶‘Bic'tajeso aba ta yich'el ta muc' ti atote, ti ame'e jech c'u cha'al laj yalbot mantal ti Ajvalil Dios avu'une yo' jech ta xnatij ach'iel ac'opojel, yo' jech lec ta xbat ac'oplal ta banomil ti bu ta x'ac'bat yu'un ti Ajvalil Dios avu'une.

¹⁷‘Mu xamilvan.

¹⁸‘Mu xamulivaj.

¹⁹‘Mu xa'elc'aj.

²⁰‘Mu xajut c'op ta soquesel achi'il.

²¹‘Mu xc'upij avo'nton yu'un yajnil ti achi'ile. Mu xpich' avo'nton yu'un sna ti achi'ile, mi ja'uc ti sbanomile, mi ja'uc ti smosov mi vinic mi antse, mi ja'uc ti xvacaxe, mi ja'uc ti sburroe, mi ja'uc jtosuc ti c'usi x'ayan yu'une.’

²²“C'alal tsoboloxuc acotolic ta yoc ti vitse, ja' jech s'elan tsots lic c'opojuc ti Dios ti vinaj talel ta o'lol leb c'oq'ue xchi'uc ti volibil ta jun lumal ic'al toque. Ts'acal un, mi ja'uc oy xa c'usi laj yal, c'ajomal laj sts'iba talel ti c'opetic ta chib pech-pech tone. Laj yac'bun talel.

²³Ja'uc ti c'alal laj ava'iic ti sc'opojel ta xvinaj talel ta ic'al lumal toque, ti c'alal laj avilic ti volibil ta leb c'oc' ti vitse, ti vo'oxuque, ti banquilaletic yu'un ti jujuvoq'ue, xchi'uc ti moletique, tal ac'oponicun.

²⁴Va'i un, xachi ti laj avalbeicune: ‘Ta melel ti Ajvalil Dios cu'untique laj yac' quiltic ti yutsilal slequilale, ti smuc'ul stsatsale. Laj ca'ibetic sc'opojel ti ta xvinaj talel ta o'lol leb c'oq'ue. Avi tana une, yu'un laj quilcutic ta jba ta jsa'cutic ti xu' ta xchi'inan ta lo'il viniquetic ti Diose, ti mu ja'uc ta xchamic xchi'uc ti sc'opojele.

²⁵Manchuc mi jech un, ¿mi yu'un la li' jq'ueloj jbatic yu'un avalojic ta xijchamotic yu'un ti c'oc' ti xi'bal sba ta xtil ta j'ech'el le'e? Mi yu'un yan to velta ta xlic ca'itic sc'opojel ti Diose, ta j'ech'el xa c'op ta xijcham unbi.

²⁶¿Mi oy la buch'u junucal vinic xana' ti mu xcham c'alal ta xa'i ta xc'opoj ti Dios ta o'lol leb c'oc' jech c'u cha'al laj ca'itique, ti mu'yuc xijchame?

²⁷Ja' lec nopajan ech'el ti vo'ote. A'yio ca'itic scotol ti c'u s'elan ta xalbot ti Ajvalil Dios cu'untique. Mi laj une, xlic avalbuncutic ti c'usi laj yalbote. Ja'uc ti vu'uncutic une, c'ajomal no'ox c'otuc ta pasel cu'uncutic scotol ti c'usi laj yalbot talele.’

²⁸“C'alal ja' o ta xac'oponicune, laj ya'i ti Dios ti c'usi ta xavalique. Jech o xal xi laj yalbun xtoc une: ‘Laj xa ca'i scotol ti c'usi ta xalic ti lum li'e. Ta xc'ot ta o'ntonal yu'unic ti jech laj yalique.

²⁹Ma' taj une, mu'yuc xa stijelic ta c'op ta j'ech'el ti buch'u ta snop ti va'i s'elan taje, ti ta xiyaq'uicun ta ich'el ta muq'ue, ti scotol ta xc'ot ta pasel yu'unic ti jmantaltaque. Jech ti stuquique, xchi'uc ti xnich'nabique, ta staic ti mu'yuc xa c'usi sna'ic ta xch'i xc'opojique.

³⁰Batan, ba albo ya'iic ti ac'o suticuc batel ti bu lamalic ta nacleje.

³¹Ja'uc ti vo'ote, coman to li' ta jtojole. Yu'un ta xcalbot ava'i scotol ti mantaletique, ti jbel c'usitic tsots sc'oplal albile, xchi'uc ti c'usitic nopbil ti ta xachanubtase, yo' jech ta xchanic ta yabtelanel ti lum ti bu ta xcac'beic ta xrextoique.’

³²Ja' yu'un un cha'e, abtelanic ta spasel scotol ti c'u s'elan laj yalboxuc ava'iic smantal ti Ajvalil Dios avu'unique. Mi ja'uc xach'ac abaic jset'uc ta stojol.

³³Ja' tamic ech'el sbelel ti c'u s'elan laj xchanubtasoxuc ti Ajvalil Dios avu'unique yo' jech lec ac'oplalic, ti jal jabil ta xach'i xac'opojic ta banomil ti bu ta xayac'boxuc ti arextoique.