Read Tzotzil San Juan 10 Bible Online

San Juan 10 - Tzotzil bible

San Juan 10

¹Va'i un, xi laj yal ti Jesuse: —Ta xcalboxuc ava'iic ta j'ech'el, ti buch'u mu x'och talel ta sti' ti scorral bu lapal ti chije, ti ta x'och talel bu ma'uc ti sti'e, ja' jun j'elec' j'ilbajinvanej.

²Ja'uc ti buch'u ta x'och talel ta ti' ti corrale, ja' jq'uel-chij unbi, ta xchabi ti chije.

³Ta xjambat sti' corral yu'un ti jchabiej ti' corrale, ta x'och batel. Ti j'il-chije, ta jujun ta sloq'uesbe sbi ti xchijtaque. Ti chijetique ta xa'ibeic ti sc'opojele. Ta sloq'ues ech'el ta corral un.

⁴C'alal loc' xa batel scotole, jba'be ta xanav batel ti stuque. Xlamet ech'el ti xchijtac ta spate yu'un xa'ibeic ti sc'opojele.

⁵Yu'un mi ma'uc sc'opojel ta xa'iic ti buch'u mu xojtiquinique, mu sts'acliic batel, c'ajomal ta xjatavic.

⁶Jech laj sbabac'opta ti Jesuse. Mi ja'uc laj ya'ibeic ti smelol ti va'i s'elan laj yale.

⁷Xi laj xcha'al ti Jesuse: —J'ech'el ta xcalboxuc ava'iic, xi oy ti jc'oplale: Vu'unun ma' ti ti' corral bu ta x'och batel ti chijetique.

⁸Scotol ti buch'u ba'yel talique, naca j'elec', j'ilbajinvanejetic. Ja'uc ti chijetique mu'yuc laj ya'ibeic ti sc'opojele.

⁹Vu'unun ti ti' corrale. Ti buch'u ta x'och talel ta jtojole, ta xcol. Co'ol s'elan chij ti x'och xloc' ta corral ta stael ti sve'ele.

¹⁰Ti j'eleq'ue, ja' no'ox ta xtal ta soquesel, ta yelc'anel, ta smilel. Ja'uc ti vu'une lital ta yac'bel xcuxlejal ti ja' bats'i xcuxlejal ta j'ech'ele.

¹¹“Vu'unun ma' ti lequil j'il-chije. Ti lequil j'ilchije ta xac' sba ta milel ta sventa ti xchijtaque.

¹²Yu'un ti buch'u ta x'abtej ta sventa tojel no'oxe, c'alal ta xil ta xtal ti jti'oval oq'uile, ta xjatav batel. Lamal ta xicta comel ti chije yu'un ma'uc bats'i j'il-chij. Ma'uc yu'un ti chijetique. Ti chije, ta x'ilbat svocol yu'un jti'oval oq'uile. Tan puc ta xbat yu'un.

¹³Ta xjatav ti vinic taje yu'un ja' no'ox tsots sc'oplal ta xa'i ti tojel ta sa'e. Ma'uc tsots ta xa'i ta sventainel ti chijetique.

¹⁴Vu'unun ti lequil j'il-chije. Xcojtiquinan ti jchijtaque, xiyojtiquinic ec.

¹⁵“Jech c'u cha'al ti Jtot xiyojtiquine, jechun ec, xcojtiquin ti Jtote. Ta xcac' jol jbaquil yu'un ti chijetique.

¹⁶Oy to yan jchijtac ti mu'yuc to ochem talel ta corral li'e, ti tsots sc'oplal ta xba jtsob talele. Jech ec un, ta sts'etan xchiquinic ta ya'yiel ti jc'ope, ta xch'unic, ta stsob sbaic ta jmoj, jun no'ox ti j'il-chij yu'unique.

¹⁷“C'uxun ta yo'nton ti Jtote, yu'un ta xcac' jol jbaquil yo' ta jcha'ich' ti jcuxleje.

¹⁸Mi junuc buch'u xu' ta xtuch' ti jcuxleje, yu'un ta xloc' x'ayan ta co'nton jtuc ti jech ta xc'ot ta pasele. Oy ta jba ta yaq'uel yo' jech ta jcha'ich' ti jcuxleje. Taje, ja' jech albilun talel yu'un ti Jtote —xi ti Jesuse.

¹⁹C'alal jech laj ya'iic ti j'abteletic yu'un ti israeletic ti va'i s'elan laj yale, ch'ac sba ti snopbenal yu'unique.

²⁰Xi laj yalic ti yepale: —¿C'u cha'al ta xach'unbeic sc'op le'e? Yu'un chuvajibem xchi'uc xch'ulelinojbe xch'ulel pucuj.

²¹Xi ta xalic ti yan xtoque: —Ati yu'unuc xch'ulelinojucbe xch'ulel ti pucuje, mu xc'opoj jech c'u cha'al le'e. Ati yu'unuc xch'ulelinojucbe xch'ulel ti pucuje, ¿mi yu'un xu' la yu'un ta sjambe sat ti ma'satetic jechuque?

²²Ti israeletic ta Jerusalene, yacalic ta spasel q'uin sna'obil stsajobil ti ch'ulna yu'unique, c'alal ja' o yorail ti sique.

²³Ti Jesuse oy ta ch'ulna ec. Ta xanav ta cotcot na ti sbiinoj Salomone.

²⁴Ti israeletique laj sjoyobtaic ti Jesuse, ti xi laj yalbeique: —Xmacmun co'ntoncutic avu'un. Mi vo'ot ti Cristoe, alo xch'a ta jamal.

²⁵Xi laj stac' ti Jesuse: —Laj xa calboxuc ava'iic, mi ja'uc xc'ot ta avo'ntonic. Ta sventa Jtot ti c'usi ta jpase, ja' ta xayac'boxuc avilic ta jamal ti Buch'uun ta melele.

²⁶Ti vo'oxuc une, mi ja'uc xc'ot ta avo'ntonic yu'un ma'uc jchijoxuc jech c'u cha'al laj xa calboxuc ava'iique.

²⁷Ti jchijtaque ta xa'iic ti jc'opojele, xcojtiquinic ec un, ta xists'acliicun.

²⁸Sbatel osil ta xcac'beic xcuxlejalic, mi ja'uc ta xch'ayic, mu'yuc buch'u xispojbun ta coc ta jc'ob.

²⁹Ti laj yac'bun ta coc ta jc'ob ti Jtote, stuc no'ox cajal sc'oplal ta j'ech'el. Laj to sc'oplal ma' ti xpojbun ta yoc ta sc'ob une.

³⁰Jununcutic xchi'uc ti Jtote.

³¹Ti israeletique laj stamic ton xtoc yo' ta xac'beic ti Jesuse.

³²Xi laj yal ti Jesuse: —Ta sventa smuc'ul stsatsal ti Jtote, ep ti c'usi laj jpas ta aba ta asatique. ¿C'usi jtosucal yo' ta xavac'beicun ti ton yu'un une?

³³Xi laj staq'uic ti israeletique: —Ma'uc ta xacac'becutic ton yu'un ti c'usi lec laj apase. Yu'un ti c'u s'elan ta xac'opoje, ta soquesbe sc'oplal ti Diose. Yu'un ta xabis aba ta Dios c'alal vinicot no'oxe.

³⁴Xi laj stac' ti Jesuse: —Ti ts'ibabil ti oy c'usi tsots albil sc'oplal oy ta atojolique, xi ta xale: ‘Laj calboxuc ava'iic, vo'oxuc ti diosoxuque.’

³⁵Jna'tic lec ti c'u s'elan ts'ibabil ta ch'ul c'ope, j'ech'el mu stac' muquel. Diosetic, laj yac'be sbi ti buch'utic laj xch'unbeic ti sc'op Diose.

³⁶Ti Diose laj st'ujun ti laj stacun talel li' ta banomile. ¿C'u cha'al un cha'e ta xavalic ta soquesbe sc'oplal Dios ti c'alal laj cal ti vu'unun Xnich'onune?

³⁷Mi mu xco'olaj yabtel ti Jtot ti c'usi ta jpase, mu xavich'icun ta muc'.

³⁸Yan mi xco'olaj yabtel ti Jtot ti c'usi ta jpase, manchuc mi mu xavich'icun ta muq'ue, ja' tsots sc'oplal sc'an xavich'ic ta muc' yabtel ti Jtot ti c'usi ta jpase yo' jech j'ech'el ta xava'iic ti oy ta jtojol ti Jtote xchi'uc ti oyun ta stojol eque.

³⁹Ta ox stsaquic ya'iic xtoc, ja'uc ti Jesuse col batel.

⁴⁰Ti Jesuse sut batel ta jot xocon sti'il uc'um Jordán ti oy ta sloq'ueb c'ac'ale. Ti bu come, ja' ti bu to ox laj yac' ich'uc vo' ti Juane.

⁴¹Xi ta xalic ti buch'utic xvoletic batel ta sq'uelele: —Ti Juan j'ac'-ich'-vo'e, ac'o mu'yuc c'usi laj yac' iluc ti ch'ayal ta xc'ot o'ntonal yu'une, scotol ti c'u s'elan laj yalbe sc'oplal ti vinic li'e, ja' melel.

⁴²Ti bu taje, yepal c'ot ta yo'ntonic ti ja' Jcoltavanej ti Jesuse.