Read Tzotzil San Juan 13 Bible Online

San Juan 13 - Tzotzil bible

San Juan 13

¹Ta yac'ubalil xa ti q'uin Colele, sna'oj xa ti Jesuse ti c'ot xa yorail ta xicta comel ti banomile, ti ta sut batel ta stojol ti Stote. Ti jech mu tuch'baj jipbaj ta xa'i ti yu'untac li' ta banomile, jech o staoj o yav c'ux ta xa'i ti c'uxi ta xc'ot ta tsutsele.

²Ti jech yorail xa ta xve'ique, tijbat yo'nton yu'un pucuj ti Judas Iscariotee, xnich'on ti Simone, ti ta xac' ta c'abal ti Jesuse.

³Ti Jesuse sna'oj xa ti ac'bat xa ta yoc ta sc'ob yu'un Stot scotol ti c'usitic x'ayane, xchi'uc ti ta sut xa batel ta stojol Dios ti bu liquem talele.

⁴Ti jech yacal ta xve'ic ta mexae, va' xi liquel ta sloq'uel ti xcha'lomal sc'u'e, tsac xut jlic poc' ti laj sc'am ta xchucbenale.

⁵Laj taj une, lic sq'ueb vo' ta pocob-c'obal. Lic spocbe yacan ti yajchanc'optaque. Laj scusbe o ti yacantac ta poc' ti c'amal ta xchucbenale.

⁶C'alal ja' o xa ta xpocbat yacan ti Simón Pedroe, xi laj yale: —¿C'u ono'ox xi ti vo'ot ta xtal apocbun ti coque, Cajval?

⁷Xi laj stac' ti Jesuse: —Avi tana li'e, mu xava'ibe smelol ti jech ta jpase. Ta ts'acal to ta xlic ava'ibe smelol.

⁸Xi laj yal ti Pedroe: —Mi ja'uc xcac' apoc ma' ti coque. Xi laj stac' ti Jesuse: —Mi mu jpoc ti avoque, mu stac' xatal ta jtojol.

⁹Xi laj yal ti Pedroe: —Ma'uc no'ox xapocbun ti cacane, Cajval, pocbun ti jc'obe, ti jole.

¹⁰Xi laj stac' ti Jesuse: —Ti Buch'u atinem xae, laj xa sc'oplal ta xich' poquel sjunul, yacan xa no'ox ta xich' pocbel, yu'un pocbil xa sjunul. Ti vo'oxuque pocbiloxuc xa, ac'o mi mu acotolicuc.

¹¹Ti mu'yuc pocbiloxuc acotolic ti xie, yu'un sna'oj ti oy buch'u ta x'ac'van ta c'abale.

¹²C'alal jech laj yo'nton ta spoquel ti acanile, ti Jesuse lic xcha'lap ti sc'u'e, bat chotluc ta sts'el sti'il mexa xtoc, ti xi laj yale: —¿Mi laj ava'ibeic smelol ti jech laj jpas ta atojolique?

¹³Ti ‘Jchanubtasvanej, Cajval’, xavuticune, melel ava'uquic un, yu'un vu'unun ono'ox.

¹⁴Vu'un ti Jchanubtasvaneje, ti Ajvalilun avu'unique, laj xa jpoc ti avacanique. Jech xapocbe abaic avacanic ta jujun tal un.

¹⁵Yu'un laj xa cac' avilic ti jech sc'an xapasic jech c'u cha'al laj cac' avilique.

¹⁶Ta xcalboxuc ava'iic ta melel, ti mosovile ma'uc cajal ta xac' sba ta stojol ti yajvale. Ti buch'u tacbile, ma'uc cajal ta xac' sba ta stojol ti jtacvanej yu'une.

¹⁷Mi ta xava'ibeic smelol ti jech laj jpase, mi ta xapasic xtoc jech c'u cha'al laj cac' avilique, xamuyubajic no'ox.

¹⁸“Ma'uc ac'oplal acotolic ti va'i s'elan laj cale, yu'un jna'oj ti buch'u t'ujbilic cu'une. Ja'uc le'e, yu'un tsots sc'oplal ta xc'ot ta pasel jech c'u cha'al ti xi ts'ibabil ta ch'ul c'ope: ‘Ti buch'u jmoj ta xive' xchi'uque, joybij ta cajcontra.’

¹⁹C'alal ta xavilic jech ta xc'ot ta pasele, jpoco'alojboxuc xa ono'ox ava'iic yo' ta xc'ot ta avo'ntonic ta xch'unel Buch'uun ta melel.

²⁰Ta xcalboxuc ava'iic ta melel, ti buch'u ta xich' ta muc' ti buch'u ta jtac batele, ta xiyich'un ta muc'. Ti buch'u ta xich'un ta muq'ue, ta xich' ta muc' ti Buch'u laj stacun talele.”

²¹C'alal jech laj yal ti Jesuse, lic ochuc ta at o'nton ti xi to laj sts'ac batel ti lo'ile: —Ta xcalboxuc ava'iic ta melel, oy jun avu'unic ta xiyac' ta c'abal.

²²Ti yajchanc'optaque, sq'uel-q'uelbe xa sba satic ta jujun tal, ti mu sna'ic buch'u sc'oplal taje.

²³Oy jun ta scotolic ti mu tuch'baj ta o'ntonal yu'un ti Jesuse, ti nabal ta sts'el c'alal ta xve'ique.

²⁴Ti Simón Pedroe lic spas senya ti ac'o sjac'be Jesús buch'u sc'oplal ta xalbe taje.

²⁵Jech ti stuque x'ech' to to laj snaban sba ta sts'el ti Jesuse, ti xi laj yalbee: —¿Buch'u, Cajval?

²⁶Xi laj stac' ti Jesuse: —Ti buch'u ta xcac'be avil ti juteb pan ta jts'aj ta jsets'e, ja' me unbi. Ta jech yepal un, laj sts'aj ti juteb pane, laj yac'be jelavel ti Judas Iscariotee, xnich'on ti Simone.

²⁷C'alal laj stsac pan ti Judase, ta jech yepal ventainbat yo'nton yu'un ti pucuje. Xi albat yu'un ti Jesuse: —Paso me xch'a ti c'usi ta xapas ono'oxe.

²⁸Ja'uc le' une, mi junuc laj ya'ibeic smelol yu'unic ti ta xve'ic ta mexa ti va'i s'elan laj yal ti Jesuse.

²⁹Oy jlom laj snopic ti pase ta mantal yu'un Jesús ti bat sman talel ti oy nan c'usi ta xtun ta sventa ti q'uine. Ti jlome laj snopic ti oy c'usi ta xac'be ti me'unetique, yu'un ja' yich'oj ta sventa yavil taq'uin ti Judase.

³⁰C'alal laj stsac pan ti Judase, loc' batel. Ac'ubaltic xa.

³¹Va'i un, c'alal loc' xa batel ti Judase, xi laj yal ti Jesuse: —Avi tana ti vu'un co'ol j'elantique, ta xvinaj ti jlequilale, ta xvinaj yutsil slequilal ti Diose ta sventa.

³²Mi ta xvinaj yutsilal slequilal ti Dios ta jventa ti co'ol j'elantique, ta xac' iluc yutsilal slequilal Dios ta jtojol ec. Ta xa xc'ot ta pasel un.

³³Mu xa jaluc li' oyun ta atojolique, Cuni nich'nab. Xasa'icun xa un, ja' no'ox ta xcalboxuc ava'iic jech c'u cha'al xichi laj calbe ya'iic ti israeletique: ‘Mu xac'otic ti bu ta xibate.’

³⁴Xi ta xcalboxuc comel sc'oplal ti ach' mantale: J'ech'el c'uxuc xava'i abaic ta jujun tal jech c'u cha'al laj c'uxubinoxuque. Jechuc c'uxuc xava'i abaic ta jujun tal.

³⁵Mi jech c'ux ta xava'i abaique, ta xalic scotolic ti vo'oxuc cajchanc'opoxuque.

³⁶Xi laj sjac'be Jesús ti Simón Pedroe: —¿Bu ta xabat un, Cajval? Xi laj stac' ti Jesuse: —Ti bu ta xibate, mu to stac' xats'acliun batel avi li'e. Ta ts'acal to ta xc'ot ta atojol.

³⁷Xi laj yal ti Pedroe: —¿C'u cha'al mu stac' ta jts'acliot batel avi li'e, Cajval? Jchapanoj xa jba ta xcac' jba ta milel ta aventa.

³⁸Xi laj stac' ti Jesuse: —¿Mi melel ti chapalot xa ta xavac' aba ta milel ta jventae? Ta xcalbot ava'i ta melel, laj xa ox aval oxcoj ti mu xavojtiquinun c'alal mu'yuc to ta x'oc' ti cotse.