Read Tzotzil San Juan 16 Bible Online

San Juan 16 - Tzotzil bible

San Juan 16

¹“Jech ta xcalboxuc ava'iic taje, yo' jech mu xchibaj avo'ntonic ta jtojol.

²Yu'un ta xavich'ic jipel loq'uel ta ch'ul na. Xu' ta xc'ot ta pasel ti oy buch'u ta xasmiloxuc ti ta snopic ti ja' jech ta xtunic yu'un ti Diose.

³Jech ta spasic, yu'un mu xojtiquinic ta j'ech'el ti Jtote, mi ja'uc xiyojtquinicun ec.

⁴Jech ta xcalboxuc ava'iic yo' xavules ta ajolic ti c'alal ta sta yoraile, ti jech ono'ox laj calboxuc ava'iique. “Ti ta sliquebale, mu'yuc laj calboxuc ava'iic ti ta xavich'ic ilbajinele, yu'un li' to jchi'inojoxuque.

⁵Ja'uc avi tana li'e, ta xibat ta stojol ti Buch'u laj stacun talele. Ja'uc le'e, mu'yuc buch'u junucal avu'un ta sjac' ti bu ta xibate.

⁶C'ajomal no'ox ochemoxuc ta at o'nton yu'un ti jech laj cal taje.

⁷Xi jamal ta xcalboxuc ava'iique: Yu'un toj lec ta xc'ot ta pasel ta atojolic ti ta xibate. Yu'un mi mu xibate, mu xtal ta atojolic ti Buch'u ta scoltaoxuque, ti ta xac' smuc'ul avo'ntonique. Ti mi libate, ta jtac talel.

⁸C'alal jech ta xtal ti Ch'ul Espiritue, ja' ta xac'be sna'ic ti jnaclejetic ta banomil c'usi ti mulile, c'usi ti lequilale, xchi'uc ti chapanel yu'un ti Diose.

⁹Ti mulile, ja' ti mu xisch'unique.

¹⁰Ta xilic ti oy jlequilale, yu'un ta xibat bu oy ti Jtote, mu xa xilbeicun liquel ti jsate.

¹¹Ta x'ac'bat sna'ic ti chapanel yu'un ti Diose, yu'un laj xa yich' chapanel ti buch'u sventainoj ti banomile.

¹²“Yepal no'ox ti oy c'usi ta jc'an xcalboxuc ava'iique. Ja'uc li'e, ma'uc to yorail, yu'un mu xava'ibeic smelol.

¹³C'alal ta xtal ti Ch'ul Espíritu ti melel c'usi ta xac' ta na'ele, ja' ta stojobtasoxuc ta yaq'uel ana'ic ti bu melel scotole. Yu'un mu ta yo'ntonuc stuc ti c'usi ta xale, yu'un ja' ta xal scotol ti c'u s'elan ta x'ac'bat sna'e, xchi'uc ta xac'boxuc ana'ic ti c'usitic ta xc'ot ta pasele.

¹⁴Yu'un ja' ta xac' ta ilel ti jlequil cutsile, yu'un ta xlic sbain ti c'usi c'otem ta jventae, ja' ta xac'boxuc ana'ic scotol.

¹⁵Scotol ti c'usitic oy yu'un ti Jtote, ja' cu'un. Jech o xal laj calboxuc ava'iic sc'oplal ti Ch'ul Espiritue, yu'un ja' ta xich' ta sventa ti c'usitic oy cu'une, yo' jech ta xac'boxuc avojtiquinic ti vo'oxuque.

¹⁶“Mu xa jaluc ta xavilicun li'e, ts'acal to ta xlic avilicun —xi ti Jesuse.

¹⁷Oy jlom ti yajchanc'optaque xi lic sjac'be sbaic ta jujun tale: —¿C'usi smelol ta xac' ta na'el taje? Ta xal ti ‘mu xa jaluc li' oyun ta atojolic ti ta xavilicune’. Ta xal ti ‘ts'acal to ta xtal ti ta xavilicune’. ¿C'usi taje, ti ta xbat bu oy ti Totile?

¹⁸¿C'usi ta xac' ta na'el ti ‘mu xa jaluc’, ti xie? Mi ja'uc xca'ibetic smelol ti sc'ope.

¹⁹Ti Jesuse laj yil ti oy c'usi ta xjac'bate, xi laj yale: —¿Mi ja' ta xajac'be abaic ti laj cal ti mu xa jaluc li' oyun ti ta xavilicune, ti ts'acal to ta xital ta xavilicun ti xichie?

²⁰Jbel sc'oplal ta xcalboxuc ava'iic, ta xlic oc'anic, ta xavat avo'ntonic, ja'uc ti jnaclejetic ta banomile xmuyubajic xa liquel. Ti jech oyoxuc ta vul o'ntone, ta xlic joybijuc ta muyubajel.

²¹C'alal ta svoq'ues yol ti jun antse, mu x'ech' ta xa'i ti svocole, ja' ti sta xa yorail ti xc'uxule. Ts'acal to un, mi voc' xa ti yole, ta xch'ay ta yo'nton ti xc'uxule, xmuyubaj xa ti lec voc' ti yole.

²²Ja' jech ti vo'oxuc avi tana li'e, mu x'ech' ta xava'iic ti avocolique. Ja'uc c'alal ta xisut talel jq'ueloxuque, ta xlic muyubajanic, jun muyubajel ti mu'yuc buch'u xasmacboxuque.

²³“Ti jech c'ac'al taje, mu'yuc xa c'usi ta xajac'beicun. J'ech'el ta xcalboxuc ava'iic, scotol c'usi ta xac'anbeic ti Jtot ta jventae, ta xayac'boxuc.

²⁴Avi li'e, mu'yuc to c'usi ac'anojbeic ti Jtot ta jventae. C'anic un, yo' ta xavich'ic, yo' ta xataic ti xamuyubajique.

²⁵“Naca ta co'oltasbil c'op ti c'u s'elan laj jc'oponoxuque. Oy bu ta sta yorail un ti ma'uc xa ta co'oltasbil c'op ta jc'oponoxuque. Jamal xa ta xcalboxuc ava'iic sc'oplal ti Jtote.

²⁶Ti jech c'ac'al taje, oy c'usi ta xac'anbeic ti Jtot ta jventae. Ma'uc xa vu'un ta jc'anbe vocol ti Jtote.

²⁷Yu'un ti Jtote, c'ux ta xaya'ioxuc. C'ux ta xaya'ioxuc, yu'un c'ux ta xava'iicun, yu'un c'ot ta avo'ntonic ta xch'unel ti liquemun talel ta stojol ti Diose.

²⁸Lilic talel ta stojol ti Jtote yo' lital li' ta banomile. Avi tana un, ta xquicta comel ti banomile, ta xisut batel ti bu oy ti Jtote.”

²⁹Xi laj yalic ti yajchanc'optaque: —Avi tana, jamal xa ta xavalbuncutic. Ma'uc xa ta co'oltasbil c'op ta xac'opoj.

³⁰Ta xquilcutic ti ta xana' scotole, ti ma'uc tsots sc'oplal ta xava'i ti oy buch'u ta sjac'bote. Ta xc'ot ta co'ntoncutic ti liquemot talel ta stojol ti Diose.

³¹Xi laj stac' ti Jesuse: —¿Mi ta xc'ot ta avo'ntonic avi tana une?

³²Sta xa yorail, ja' xa yorail avi tana li' une, ti tan puc ta xabatique, jtuc ta xavictaicun comel. Manchuc mi jech, yu'un chi'inbilun yu'un ti Jtote.

³³Ja' jech laj cal ava'iic scotol taje, yo' jech lamajem avo'ntonic ti oyoxuc ta jtojole. Ti li' ta banomile, ta xavich' avocolic. Ja'uc le'e, tsotsanic, yu'un tsal xa cu'un ti sba banomile.