Read Tzotzil San Juan 17 Bible Online

San Juan 17 - Tzotzil bible

San Juan 17

¹C'alal laj c'opojuc ti Jesuse, laj sq'uel muyel vinajel ti xi laj yale: —Sta xa yorail, Tot, ac'bo yich' slequilal ti Anich'one yo' jech ta svinajes alequilal ec.

²Yu'un laj avac'bun cabtel ta sbainel scotol ti jnaclejetic ta banomile, yo' jech ta xcac'beic xcuxlejalic sbatel osil ti buch'utic laj avac'bune.

³Taje, ja' sc'oplal ti xcuxlejalic sbatel osil ti xi s'elane: Ti ac'o xayojtiquinic ti atuc no'ox Diosot ta melele, xchi'uc ti ac'o xiyojtiquinicun ti Jesucristoun ti laj atacun talele.

⁴“Yu'un laj xa jvinajes avutsil li' ta banomile, yu'un tsuts xa cu'un ti cabtel laj avac'bun jbaine.

⁵Avi tana une, Tot, ac'bun quich' ti jlequilal ti oy ta atojol jech c'u cha'al quich'oj to ox c'alal mu'yuc to ox meltsajem ti banomile.

⁶“Ti buch'utic laj at'uj loq'uel li' ta banomil ti laj avac'bune, laj xa cac'be sna'ic Buch'uot ta melel. Ti buch'utic laj avac'bune, ja' ono'ox avu'un, xchi'uc c'ot xa ta yo'ntonic ti ac'ope.

⁷Scotol ti c'usi laj xa avac'bune, avi tana une, laj xa sna'ic ti liquem talel ta atojole.

⁸Yu'un laj xa calbe ya'iic ti c'u s'elan laj avac'bun jna'e, laj xa xch'unic. Laj sna'ic ti liquemun talel ta atojole, c'ot ta yo'ntonic ti laj atacun talele.

⁹“Avocoluc ta jc'ubanbot ta atojol ti buch'utic laj avac'bune. Ma'uc ta jc'ubanbot ta atojol ti buch'utic lec xa'i ti sba banomile. Ja' ta jc'ubanbot ta atojol ti buch'utic laj avac'bune, yu'un ja' avu'untac.

¹⁰Scotol ti bu c'otem ta cu'untaque, ja' avu'un. Ti bu c'otem ta avu'une, ja' cu'un ec. Ta xvinaj ti xojobin no'ox ti jlequilal cutsilal ta stojolique.

¹¹“Mu li'uc ta xicom ta sba banomile. Ti stuquique li' ta xcomic ta sba banomile, yu'un ta xtal jchi'inot. Jch'ul Tot, ti buch'utic laj avac'bune, chabio ta sventa ti amuc'ul atsatsale, ja' ti amuc'ul atsatal ti laj xa avac'bune, yo' jech co'oluc yo'ntonic jech c'u cha'al ti vo'otique.

¹²C'alal li' jchi'inoj ta banomil ti buch'utic laj avac'bune, laj jchabi lec ta sventa ti amuc'ul atsatsal ti laj avac'bune. Mi junuc ch'ay. Ja' no'ox ch'ay ti buch'u ch'ayem xa ono'oxe yo' jech ta xc'ot ta pasel jech c'u cha'al ts'ibabil ta ch'ul ac'ope.

¹³“Avi tana une, ta xital ta atojol. Ja'uc le'e, ta jc'oponic comel ti li' oyun ta banomile yo' jech ta staic ti j'ech'el xmuyubajicuc jech c'u cha'al ti vu'une.

¹⁴Yu'un laj xa calbe ya'i ti ac'ope. Ja'uc le'e, contrainbilic yu'un ti jnaclejetic ta banomile, yu'un mu co'oluc yo'ntonic xchi'uc ti buch'utic oyic ta banomile, jech c'u cha'al ti vu'un mu co'oluc co'nton xchi'uque.

¹⁵Ma'uc ta jc'ubanbot ti ta xach'ac loq'uel li' ta banomile. Ja' no'ox ta jc'ubanbot ti pojo yo' mu stsalatic yu'un ti pucuje.

¹⁶Jech c'u cha'al mu co'oluc co'nton xchi'uc ti buch'utic oyic ta banomile, ja' jech ti stuquique, ma'uc xa co'oluc yo'ntonic xchi'uc ti buch'utic oyic ta banomile.

¹⁷Ti buch'utic laj avac'bune, lecubtaso ta sventa ti melel ta xavac' ta na'ele, yu'un melel ono'ox ti ac'ope.

¹⁸Jech c'u cha'al laj atacun talel ta stojol ti jnaclejetic ta banomile, ja' jech ta jtaquic batel ta stojol ti jnaclejetic ta banomile.

¹⁹Ventainbiluc c'otuc avu'un ta sventa ti melel ta xcac' ta na'ele, jech c'u cha'al ventainbil lic'ot avu'un ec ti laj cac' jba ta tunele.

²⁰“Ma'uc no'ox ta jc'ubanbot ta atojol ti stuquique, ta jc'ubanbot ta atojol xtoc ti buch'utic ts'acal to ta xlic c'otuc ta yo'ntonic ta xch'unelun ta sventa ti ac'op ta xalic batele.

²¹Ta jc'ubanbot ta atojol ti co'oluc yo'ntonic scotolique, jech c'u cha'al, Tot, ti jun avo'nton ta jtojole, ti jun co'nton ta atojole, ti co'oluc ti yo'ntonic ta jtojoltic yo' jech ta xc'ot ta yo'ntonic ti jnaclejetic ta banomil ti vo'ot laj atacun talele.

²²Laj xa cac'be yich'ic ti jlequilal ti laj avac'bune yo' jech jun sjol yo'ntonic jech chac c'u cha'al ti vo'otique.

²³Oyun ta stojolic ec jech c'u cha'al oyot ta jtojole yo' jech jun no'ox ta xc'otic ti junuc yo'ntonic ta jbel sc'oplale, yo' jech ta xlic yilic ti jnaclejetic ta banomil ti vo'ot laj atacun talele, ti c'ux ta xava'iic jech c'u cha'al c'ux ta xava'iune.

²⁴“Tot, yu'un vo'ot laj avac'bun, ta jc'an ti tey oyicuc ti bu oyun eque, yo' jech ta xilic ti jlequilal laj avac'bune, yu'un ac'uxubinojun ono'ox c'alal mu'yuc to meltsaj ti banomile.

²⁵Jch'ul Tot, ti oy alequilal avutsilale, ti buch'utic sventainojic ti sba banomile mu xayojtiquinic. Ti vu'une xacojtiquin. Ti jayib li' oyique laj xa sna'ic ti vo'ot laj atacun talele.

²⁶Laj xa cac'be sna'ic Buch'uot. Staoj yav jech ta jpasolan ta yac'bel sna'ic yo' jech oy ta stojolic ti syail xc'uxul avo'nton ti laj avac'bune yo' jech oyun ta stojolic.”