Read Tzotzil San Juan 2 Bible Online

San Juan 2 - Tzotzil bible

San Juan 2

¹Ta yoxibal c'ac'al un, oy buch'u nupun ta jteclum Caná ti oy ta Galilea banomile. Batem ec sme' ti Jesuse.

²Jech ec, ti Jesuse xchi'uc ti yajchanc'optaque ic'bilic ta uch'vanej ta sventa ti nupunele.

³Laj ti vinoe. Jech o xal xi laj yal sme' ti Jesuse: —Mu'yuc xa vino yu'unic.

⁴Xi laj stac' ti Jesuse: —Jun me'tic, ¿c'u cha'al jech xtal avalbun ti va'i s'elan taje c'alal mu'yuc to c'otem ti coraile?

⁵Ti sme'e xi laj yalbe ti jtuneletique: —Pasic scotol ti c'u s'elan ta xalboxuque.

⁶Ti bu taje, oy vacbej (6) bin ti meltsanbil ta tone, sventa xch'amobil vo' yu'unic ti yo' ta smes stus sbaic ti israeletique, ti ta x'och yu'un vo'vinic (100) ta litro vo' ti jujubeje.

⁷Xi ti Jesús ta stojol ti jtuneletique: —Nojesic ta vo' ti binetic li'e. Xjaxet c'ot yu'unic sti' ti bin c'alal laj snojesic ta vo'e.

⁸Xi laj yal ti Jesuse: —Lupic loq'uel jutebuc. Ba ac'beic ti jpas-mantal yu'un ti q'uine. Jech laj spasic ti jtuneletique.

⁹Ti jpas-mantal yu'un ti q'uine, laj spas preva ti vo' ti joybijem xa ta vinoe. Mi ja'uc sna' bu tal. Ja' no'ox sna'ic ti jtuneletic bu laj slupic loq'uele. Jech o xal ti jpas-mantal yu'un ti q'uine, laj yic' talel ti jnupunele,

¹⁰ti xi laj yalbee: —Jcotoltic jech jtaleltic ti ja' ba'yel ta xcuch'tic ti lequil vinoe. C'alal mi laj xa yuch'ic ti jq'uel-q'uinetique, ts'acal ta xlic yich' uch'el ti siclojan vinoe. Ja'uc ti vo'ote ja' laj aq'uej ti bu jun yutsil meltsanbile.

¹¹Ja' sliquebal to ti va'i s'elan laj spas ti Jesús ta jteclum Caná ti oy ta Galileae, ti laj yac' iluc senyail ti oy c'usi ch'ayal c'ot o'ntonal yu'un ta sventa ti slequil yutsilale, ti ich'bil ta muc' ic'ot yu'un ti yajchanc'optaque.

¹²Ts'acal to taj un, bat ta jteclum Capernaum xchi'uc ti sme'e, ti yits'inabtaque, xchi'uc ti yajchanc'optaque. Joc'tsajic jayib c'ac'al ti bu taje.

¹³Nopol xa sc'an ti q'uin Colel yu'un ti israeletique. Ti Jesuse bat ta jteclum Jerusalén.

¹⁴Noj ta jchon-vacaxetic, ta jchon-chijetic, ta jchon-palomaetic, xchi'uc jel-taq'uinetic chotajtic ta sts'el sti'il xmexa ta sjelic staq'uinic c'ot sta ti ch'ulnae.

¹⁵Ti jech laj yile, ti Jesuse lic smochilan ch'ojon. Laj snutsan loq'uel ti jchonolajeletique xchi'uc ti xvacaxique, ti xchijique. Laj stanibe ta banomil ti staq'uinique. Laj svalc'unanbe xmexaic ti jel-taq'uinetique.

¹⁶Xi laj yalbe ti jchon-palomaetique: —¡Loq'uesic batel li'e! ¡Mu xapasic ta jun ch'ivit sna ti Jtote!

¹⁷Va'i un, ti yajchanc'optaque vul ta yo'ntonic ti xi ta xal ti ch'ul c'ope: “Tsots sc'oplal c'otem ta co'nton ta xca'i ti ach'ulna ti lecuc oyuque.”

¹⁸Xi laj sjaq'uic ti j'abteletic yu'un ti israeletic ta stojol ti Jesuse: —¿C'usi senyail ta xavac' quilcutic yo' ta jna'cutic buch'u yac'ojbot avabtel ti vi s'elan ta xapase?

¹⁹Xi laj stac' ti Jesuse: —Lilinic ti ch'ulna li'e, ta oxib c'ac'al xu' ta jcha'va'an ta ach'.

²⁰Xi laj yalbeic Jesús ti israeletique: —Laj yich' vaquib yoxvinic (46) jabil ta yabtelanel ti ch'ulna li'e yo' c'ot ta meltsajel. ¡Bu xata ti vo'ot ta xameltsan ta oxib c'ac'ale!

²¹Ti ch'ulna ti ta xalbe sc'oplal ti Jesuse, ja' sbec'tal stacopal stuc.

²²Jech o xal c'alal cha'cuxie, vul ta yo'ntonic ti yajchanc'optac ti jech ono'ox laj yale. C'ot ta yo'nton xtoc ti c'u s'elan ta xal ti ch'ul c'ope xchi'uc sc'op ti Jesuse.

²³C'alal oy ta q'uin Colel ta Jerusalén ti Jesuse, ep ti buch'utic laj yich'ic ta muc' ta sventa ti laj yac' iluc ti oy c'usi ch'ayal ta xc'ot yu'un ti o'ntonale.

²⁴Ma'uc ma' ti Jesús xch'un xa ti jun yo'ntonic ta stojole, yu'un xojtiquinbe yo'nton scotolic.

²⁵Ma'uc to sc'an ti oy buch'u ta x'albun c'u s'elan ta snop ti jnaclejetic ta banomile, yu'un sna'be c'u s'elan yo'nton ti buch'uuc no'oxe.