Read Tzotzil San Juan 21 Bible Online

San Juan 21 - Tzotzil bible

San Juan 21

¹Laj taj une, ti Jesuse laj yac' sba iluc ta stojol ti yajchanc'optac ta sti'il nab Tiberiase. C'alal laj yac' sba iluque, xi s'elan c'ot ta pasele:

²Jmoj tsobolic xchi'uc Simón Pedro ti Tomas sbiinoj vach yu'unique, ti Natanael liquem talel ta jteclum Caná ti oy ta Galileae, ti cha'vo' xnich'nab Zebedeoe, xchi'uc yan cha'vo' yajchanc'op ti Jesuse.

³Xi laj yal ti Simón Pedroe: —Ta xibat ta mas choy. Xi laj yalic ti yan xchi'iltaque: —Ta xba jchi'inotcutic ec. Batic un, ochic ech'el ta jun barco. Ja'uc ti ta ac'ubaltic taj une, mu'yuc bu laj staic ta masel jcotuc ti choye.

⁴C'alal ta xa sacub talel ti osile, ja' o vul ta loq'uel ta ti' nab ti Jesuse, ja'uc ti yajchanc'optaque mu sna'ic mi ja' ti Jesuse.

⁵Xi laj yal ti Jesuse: —Jmas choyetic, ¿mi mu'yuc laj ataic jcotuc ti choye? Xi laj staq'uic ti yajchanc'optaque: —Ch'abal.

⁶Xi laj yal ti Jesuse: —Jipic ochel ti smasobil achoyic ta sbats'i xocon ti barcoe, ta xataic talel ti choye. Jech laj spasic jech c'u cha'al albatique. Yepal no'ox laj staic ta masel ti choy ti mu stac' nitel loq'uel talel ta vo' ti smasobil xchoyique.

⁷Va'i un, ti jun jchanc'op ti mu tuch'baj ta o'ntonal ta x'a'yie yu'un ti Jesuse, xi laj yalbe ti Pedroe: —¡Ja' Cajvaltic ta xquil une! Naca jech laj ya'i ti Simón Pedro ti ja' Cajvaltique, laj slap ta anil ti sc'u' ti sloc'oj to oxe. Laj sjip sba batel ta vo'.

⁸Ja'uc ti yan yajchanc'optaque c'otic ta ti' nab xchi'uc ti barcoe, ti xjochojic batel ti smasobil xchoyique, yu'un noj ta choy. Oy nan vo'vinicuc (100) metro ochemic batel ta yutil ti nabe.

⁹C'alal c'otic ta ti' nabe, x'ubet xa yac'alil laj staic ti c'oq'ue, ti cajal jcot choy ta sba ti ac'ale, xchi'uc jbej pan.

¹⁰Xi laj yal ti Jesuse: —Ich'ic talel jaycotuc choy ti naca to laj amasique.

¹¹Ti Simón Pedroe och batel ta yut barco, ti loq'uel xjoch talel ta ti' nab ti smasobil xchoy ti noj ta muc'tic choye, ti tiq'uil nan oxlajuneb xvaxacvinic (153) ta cot ti choye. Manchuc mi noj ta choy ti smasobil xchoyique, mi ja'uc jat.

¹²Xi laj yal ti Jesuse: —La' ve'anic. Mu'yuc buch'u junucal ti yajchanc'optac laj sjac'beic ti Buch'ue, yu'un sna'ojic xa ja' ti Cajvaltique.

¹³Ti Jesuse laj stsac ti pane, laj yac'be ti yajchanc'optaque. Ja' jech laj spas xchi'uc ti choye.

¹⁴Yoxcojal xa taje ti laj yac' sba iluc ti Jesús ta stojol ti yajchanc'optac ti c'alal cha'cuxiem xae.

¹⁵C'alal laj yo'ntonic ta ve'ele, ti Jesuse xi lic sjac'be ti Simón Pedroe: —Simón, xnich'onot ti Jonase, ¿mi yepal no'ox c'ux ta xava'iun ta avo'nton, mi ja' mu sta ti yan le'e? Xi laj stac' ti Pedroe: —Jech, Cajval, ana'oj lec ti c'uxot ta co'ntone. Xi laj yal ti Jesuse: —Mi c'uxun ta avo'ntone, q'uelbun ti cuni jmimitaque.

¹⁶Xi laj yal no'ox xtoc ti Jesuse: —Simón, xnich'onot ti Jonase, ¿mi c'ux ta xava'iun ta avo'nton? Xi laj stac' ti Pedroe: —Jech, Cajval, ana'oj lec ti c'uxot ta co'ntone. Xi laj yal ti Jesuse: —Mi jech c'uxun ta avo'ntone, q'uelbun tuc'ulanbun ti jchijtaque.

¹⁷Xi laj sjac' ta yoxcojal ti Jesuse: —Simón, xnich'onot ti Jonase, ¿mi c'ux ta xava'iun ta avo'nton? At o'nton xa oy ti Pedroe, yu'un yoxcojal xa albat, ¿mi c'ux ta xava'iun ta avo'nton? ti x'utee. Xi laj yal ti Pedroe: —Cajval, ana'oj scotol. Xana' lec ti c'ux ta xca'iot ta co'ntone. Xi laj yal ti Jesuse: —Mi jech c'uxun ta avo'ntone, q'uelbun tuc'ulanbun ti jchijtac un cha'e.

¹⁸Ta xcalbot ava'i, ti ta aqueremale, laj alap atuc ti ac'u'e, labat ti bu ta xac'ane. Mi layijube, ta xalich' ti ac'obe, yan o ti buch'u ta xac' alap ti ac'u'e. Ta xic'ot batel ti bu mu xmuyubaj avo'nton yu'une.

¹⁹Ti jech laj yal ti Jesús taje, ta xac'be sna' c'u s'elan ta xcham ti Pedroe yo' ta svinajes yutsil slequil ti Dios c'alal ta xcham ti Pedroe. Laj taj une, xi laj yal ti Jesuse: —Batic, ts'acliun.

²⁰C'alal joybij sq'uel spat ti Pedroe, laj yil ti tijil ech'el ta spatic ti jun jchanc'op ti c'ux ta x'a'yie yu'un ti Jesuse, ja' ti buch'u nabal ta sts'el Jesús ti xi laj sjac' ti c'alal jmoj ta xve'ique: “Cajval, ¿buch'u ta xac'ot ta c'abal?”

²¹Xi laj sjac' ti Pedro ta stojol Jesús c'alal laj yil nabal ech'el ta spatic ti jun jchanc'ope: —Cajval, ati jun vinic le'e, ¿c'usi ta xc'ot ta stojol? Xi laj stac' ti Jesuse:

²²—Mi ta jc'an cuxul ta jta c'alal ta xicha'sut talele, ¿c'usi aventa? Tsacliun no'ox batel ti vo'ote.

²³Ti jech taj une, xpuquet no'ox sc'oplal yu'unic ti mu'yuc la ta xcham ti jun jchanc'ope. Ja'uc le' une, ma'uc laj yal ti Jesús ti mu'yuc ta xchame. “Mi ta jc'an ti c'uxul ta jta c'alal ta xicha'sut talele, ¿c'usi aventa?” naca xi laj yale.

²⁴Ti jchanc'op taje, ja' ti buch'u laj sts'iba ti jpoc vun li'e, ti yiloj scotol ti c'usi c'ot ta pasele. Jna'tic lec un, melel ti c'usi ta xale.

²⁵Ti Jesuse, yepal ti oy c'usi laj spase. Ti lajuc yich' ts'ibael ta jujutos ti c'usi laj spase, ta jnop ti mu x'och ta scotol banomil ti spocol-poc vunetic ti lajuc yich' ts'ibael scotole. Jechuc.