Read Tzotzil San Juan 5 Bible Online

San Juan 5 - Tzotzil bible

San Juan 5

¹Ech' c'uc sjaliluc un, ti Jesuse sut batel ta Jerusalén ti bu ta spasic q'uin ti israeletique.

²Ti ta jteclum Jerusalene, nopol ta sts'el ti'na ti sbiinoj Chijetique, oy jun yavil sts'anleb vo' ti Betesda sbi ta hebreo c'ope, ti yich'oj vo'ob scot-cotil scoriolal ti nae.

³Ta yolon scoriolal ti nae, yepal jchameletic puch'ajtic ta lumtic jech c'u cha'al ti ma'satetique, ti coxovetique, xchi'uc ti buch'u aluneb ti sbec'talique. Yu'un ta smalaic ta xlic yuq'uilajuc ti vo'e.

⁴C'otem ta yo'ntonic ta xch'unel ti ta xyal talel ta vinajel jun ánjel ti ta xtal syuq'uilan ti vo' snom stae. Jech ti buch'u ba'yel ta sts'aj sba ochele, ta xcol yu'un ti c'usiuc no'ox ti xchamelique.

⁵Ta scotol ti c'u yepal taje, oy jun vinic yich'oj xa vaxaclajuneb xcha'vinic (38) jabil ti oy xchamele.

⁶C'alal laj yil ti Jesús puch'ul ti vinic ti bu taje, ti jal xa c'ac'al sts'icoj talel ti xchamele, xi laj sjac'bee: —¿Mi ta xac'an ta xacol yu'un ti achamele?

⁷Xi laj stac' ti jchamele: —Yojtot, mu'yuc buch'u xu' ta xists'aj ochel c'alal ta xyuq'uilaj ti vo'e. C'alal ta jc'an jtic' jba ca'i ochel ta vo'e, yan o ti buch'u ba'yel ta sts'aj sba ta anile.

⁸Xi albat yu'un ti Jesuse: —Lican, balo batel ti apope, batan.

⁹Ta jech yepal laj stam sba ti jchamele, ta ora no'ox lecub. Laj sbal batel ti spope, lic xanavuc. Ja' o xa sc'ac'alil cuxob o'ntonal ma' taje.

¹⁰Jech o xal ti israeletique xi laj yal ta stojol ti buch'u cole: —Avi li'e, sc'ac'alil ti cuxob o'ntonale, jech mu stac' xavich' batel ti apope.

¹¹Xi laj stac' ti vinique: —Ti Buch'u laj scolesune, xi laj yalbune: “Balo bal ti apope, batan”, xiyut.

¹²Xi laj yalbeique: —¿Buch'u ti va'i s'elan xi laj yalbote: “Balo batel ti apope, batan”, ti xayute?

¹³Ti vinic taje, mu sna' ti Buch'u icoltavane, yu'un ti Jesuse laj scap sba batel ti bu xvolvun ti jnaclejetique.

¹⁴Laj taj une, ti vinique tae ta ch'ulna yu'un ti Jesuse, ti xi albate: —Ti li'e, colemot xa. Mu xa xasa' amul yo' jech mu xc'ot ta atojol ti x'ech' to chopole.

¹⁵Ti vinique bat yalbe ya'i ti israeletique ti ja' coltaat yu'un ti Jesuse.

¹⁶Jech o xal ti israeletique lic scontrainic ti Jesuse xchi'uc sc'an ta smilic ya'iic, yu'un ta sc'ac'alil cuxob o'ntonal ti va'i s'elan ta spase.

¹⁷Xi laj yal ti Jesuse: —A'yio ava'iic, ti Jtote yacal ta abtel avi li'e. Ja' jech ti vu'une ta xi'abtej ec.

¹⁸Jech o xal ti israeletique x'ech' to stsac yip yo'ntonic ta smilic ya'iic ti Jesuse, yu'un ma'uc no'ox mu xich' ta muc' smantalil ti cuxob o'ntonale, yu'un ta sco'oltas sba jech c'u cha'al ti Diose, ti laj yal ti ja' stot ti Diose.

¹⁹Xi laj yal ti Jesuse: —J'ech'el ta xcalboxuc ava'iic, ti vu'un Xnich'onun ti Diose, mu'yuc c'usi stac' jpas ta jtuc no'ox. Ja' no'ox ta jpas ti c'u s'elan ta xquil ta spas ti Jtote. Scotol ti c'usi ta spas ti Jtote, ja' jech ta jpas ti vu'un Xnich'onune.

²⁰Yu'un ti Jtote c'ux ta xiya'i ti vu'un Xnich'onune. Ja' ta xac'bun jna' scotol ti c'usi ta spase. Oy yan to c'usi x'ech' ta xac'bun jpas ti ch'ayal ta xc'ot avo'ntonic yu'une.

²¹Jech c'u cha'al ti Jtot ta xcha'cuxes ti animaetic yo' ta xac'be ti xcuxlejale, ja' jech ti vu'un Xnich'onune, ta xcac'be xcuxlejal ti buch'u ta jc'an ta xcac'bee.

²²Mi junuc sbainoj ta xchapanel ma' ti Jtote. Laj xa yac'bun jmuc'ul jtsatsal ta xchapanel scotol,

²³yo' scotolic ac'o yich'icun ta muc' ti vu'un Nich'onilune jech c'u cha'al, ta xich'ic ta muc' ti Jtote. Ti buch'u mu xiyich'icun ta muc' ti vu'un Nich'onilune, mu xich'ic ta muc' ti Jtot ti ja' laj stacun talele.

²⁴“J'ech'el ta xcalboxuc ava'iic, buch'uuc no'ox ta sts'etan xchiquin ta ya'yiel ti c'usi ta xcale, ti ta xich'ic ta muc' ti Buch'u laj stacun talele, oy xa xcuxlejal sbatel osil. Mu'yuc ta xich'ic chapanel. Laj xa yech'ta comel ti lajebale, laj xa sta ti cuxlejale.

²⁵“Ta xcalboxuc ava'iic ta melel, sta xa yorail, ja' xa yorail li'e, ti buch'u chamemique ta xa'ibeicun jc'opojel ti vu'un Xnich'onun ti Diose. Ti buch'u ta xich'ic ta muc' ti jc'ope, ta xcuxiic.

²⁶Yu'un ti Jtote, stalel o cuxul, oy smuc'ul stsatsal ta yaq'uel ti cuxlejale. Ja' jech ti vu'un Nich'onilune, ac'bilun jmuc'ul jts'ats'al ta yaq'uel ti cuxlejale.

²⁷Laj yac'bun tsots cabtel ta chapanvanej yu'un vu'un ti co'ol j'elantique.

²⁸Mu ch'ayaluc xc'ot avo'ntonic yu'un taje, yu'un ta sta yorail ta xa'ibeicun jc'opojel scotol ti animaetique.

²⁹Ta xloq'uic talel ta muquinaltic. Ti buch'utic oy c'usi lec laj spasique, ta xcha'cuxiic yo' ta staic ti cuxlejale. Ja'uc ti buch'utic oy c'usi chopol laj spasique, ta xcha'cuxiic yo' ta x'ac'bat stoj ti smulique.

³⁰“Mu'yuc c'usi stac' jpas ta jtuc no'ox. Ti ta xichapanvane, ja' ti c'u s'elan ta xi'albat yu'un ti Jtote. Lec tuc' ti c'u s'elan ta xichapanvane, yu'un ma'uc ta jpas ti c'u s'elan ta jc'an jtuque, yu'un ja' ta jpas ti c'u s'elan ta sc'an stuc ti Jtot ti Buch'u laj stacun talele.

³¹Yan mi ta jvinajes ti jc'oplal jtuc no'oxe, mu'yuc c'usi xtun o ti oy c'usi ta xcale.

³²Le'e, oy buch'u yan laj sva'an ta svinajesel ti jc'oplale. Ti c'usi laj yale, xvinaj ti ja' melele, yu'un jna' lec.

³³Ti oy buch'u laj ataquic batel ta sjaq'uel ta stojol ti Juane, ti c'usi laj stac'boxuque, ja' melel.

³⁴Yu'un ma'uc tsots sc'oplal ta xca'i ta svinajesbun jc'oplal jun vinic. Ti jech ta xcalboxuc ava'iic taje, yo' xu' ta xata acolelic.

³⁵Yu'un ti c'usi laj yalboxuc ti Juane, co'ol s'elan jun lámpara ti tsanal ta xac' xojobale. Jech ti vo'oxuque jayib no'ox c'ac'al xamuyubajic xa yu'un ti luz taje.

³⁶Ja'uc le'e, oy Buch'u x'ech' to ta svinajesbun ti jc'oplale. Ti c'u s'elan ta jpase, ta svinajes ti ja' laj yac'bun jbain ta spasel yu'un ti Jtote, xchi'uc ta svinajes ti tacbilun yu'un ti Jtote, ti ja' mu sta laj svinajesbun jc'oplal ti Juane.

³⁷Manchuc mi mu'yuc ava'binojic ti sc'opojele, mi mu'yuc avilojic ti stuque, ti Jtot ti laj stacun talele, ja' ta xalboxuc ti jc'oplale.

³⁸Mi ja'uc xc'ot ta avo'ntonic ti sc'ope, yu'un mu xavich'ic ta muc' ti tacbilun talel yu'un ti Jtote.

³⁹Ti ch'ul c'ope ta xalbun jc'oplal xtoc. Ac'o mi batem xa avo'ntonic ta sq'uelel ti ch'ul c'ope, ti avalojic xa ta xataic ti acuxlejalic yu'une,

⁴⁰ja'uc ti vo'oxuc une, mu xac'an xatalic ta jtojol yo' ta xata ti acuxlejalique.

⁴¹“Yu'un ma'uc ta jc'an ti lec xa ave ati'ic yilel ta jtojole.

⁴²Ma'uc no'ox taje, yu'un xacojtiquinoxuc, yu'un jna' lec mu'yuc c'ux ta xava'iic ti Diose.

⁴³Tacbilun talel ta sventa ti Jtote, mi ja'uc xavich'icun ta muc'. Yan mi ta xtal yan vinic ti spasoj sba ta mantal stuque, lec xava'iic, xavich'ic ta muc'.

⁴⁴Ti mi ja' no'ox ta xac'anic ti ich'el ta muc' yu'un ti achi'iltaque, ti mi mu xasa'ic ti ich'biloxuc ta muc' yu'un ti Dios stuque, ¿c'usi la ta xavutic ta xavich'icun ta muc'?

⁴⁵Ma'uc tac'al xc'ot avu'unic ti vu'un ta jtic' amulic ta stojol ti Jtote. Ti buch'u ta stic' amulique ja' ti Moisese, ti buch'u apatoj avo'ntonic ta stojole.

⁴⁶Ti tauc xc'ot ta avo'nton ti c'usi laj sts'iba ti Moisese, ta xavich'icun ta muc' ti jechuque. Yu'un ti Moisese, ja' laj sts'iba comel jc'oplal.

⁴⁷Mi mu xavich'ic ta muc' ti c'usi laj sts'iba comele, mi ja' xa la ta xavich'ic ta muc' ti c'usi ta xcale.”