Read Tzotzil San Juan 6 Bible Online

San Juan 6 - Tzotzil bible

San Juan 6

¹Laj taj une, ti Jesuse bat ta jot sti'il nab Galilea, ti ja' ono'ox ti snabil ti Tiberiase.

²Yepal no'ox jnaclejetic ts'acalic batel, yu'un laj yilic ti ch'ayal no'ox ta xc'ot o'ntonal ta scolesel ti jchameletique.

³Va'i un, ti Jesuse muy batel ta vits ti bu c'ot chotluc xchi'uc ti yajchanc'optaque.

⁴Yu'un nopol xa sc'an ti q'uin Colele, sq'uinic ti israeletique.

⁵C'alal laj yil ti Jesús ti yepal no'ox ta xtal ts'acliatuc yu'un ti jnaclejetique, xi laj sjac'be ti Felipee: —¿Bu ta xba jmanbetic talel sve'elic scotol ti vi yepal le'e?

⁶Jech laj yal yo' ta xvinaj c'u s'elan ta stac' ti Felipee, yu'un ti Jesuse sna'oj lec ti c'usi ta spase.

⁷Xi laj stac' ti Felipee: —Ac'o mi ta jmantic talel chib (2) ciento denario taq'uin ti ve'lile, mi ja'uc xloq'uic o jujuti'uc ti jujune.

⁸Va'i un, ti Andrese, ti ja' jun yajchanc'op ti Jesuse, ti yits'in Simón Pedroe, xi laj yale:

⁹—Oy li' jun querem yich'oj talel vo'bej pan ti pasbil ta jchop o ta trigoe, xchi'uc cha'cot choy. ¿Mi yu'un ta xloc' o ti yepal no'ox ti jnaclejetique?

¹⁰Xi laj stac' ti Jesuse: —Albeic ya'i ti ac'o chotliicuc scotolic. Yu'un naca yaxaltic ti bu oyique, chotiic nopol van vo'miluc (5,000) ta vo'.

¹¹Ti Jesuse laj stsac ti pane. C'alal laj yalbe vocol ti Diose, laj yac'be jelavel ti yajchanc'optaque. Ti yajchanc'optaque laj spuquic batel ti pan ta stojol scotolic ti c'u yepal chotolique. Ja' jech xtoc laj spuquic batel ti choye. Ac'batic ti bu xa c'alal xal ti yo'ntonique.

¹²C'alal laj yac'beic bu xa c'alal xal ti yo'ntonique, ti Jesuse xi laj yalbe ti yajchanc'optaque: —Tsobic ti scomelale yo' mu jeche'uc no'ox ta x'ixtolaj.

¹³Laj stsobic un, noj lajcheb (12) moch xch'uch'ulil scomelal ti vo'bej pan meltsanbil jchop o ta trigoe.

¹⁴Ti jech laj yilic ti jnaclejetic ti laj yac' iluc ti Jesús ti ch'ayal ta xc'ot o'ntonal yu'une, xi laj yalique: —Ta melel ti vinic li'e, ja' jun j'alc'op ti albil ono'ox sc'oplal ta xtal li' ta banomile.

¹⁵Ti Jesuse laj yilbe yo'nton ti jnaclejetic ti tsots sc'oplal ta scomtsanat ta ajvalil yu'unique. Laj sq'uej sba batel, bat comuc stuc ta jun toyol vits.

¹⁶C'alal ac'ubaltic xae, ti yajchanc'optac ti Jesuse batic ta ti' nab.

¹⁷Ochic ta jun barco, ta xjelavic batel ta jot sti'il nab yo' jech ta xc'otic ta Capernaum jteclum. C'alal jal xa yic'ubele, jech ti Jesuse mu'yuc to sutem talel ti bu oye.

¹⁸Ti jech taj une, lic tsots ic'. Xva'i xcotij xa liquel ti nab yu'une.

¹⁹C'alal xanavic xa ox batel o'loluc xchibal revae, laj yilic ta xanav talel ta ba vo' ti Jesuse. Ti ta xnopaj talel ta sts'el ti barcoe, lic xi'icuc.

²⁰Xi laj yal ti Jesús ta stojol ti yajchanc'optaque: —Vu'unun, mu xaxi'ic.

²¹Xmuyubajic xa laj yiq'uic ochel ta barco. C'otic no'ox ta ora ta banomil ti bu ta xbatique.

²²Ta yoc'omal un, ti jnaclejetic ti comic ta jot sti'il nabe laj yilic ti jchanc'opetic ja' ochic batel ta barco ti cotol to ox ta ti' nabe, xchi'uc laj sna'ic ti mu'yuc xchi'inojic batel ti Jesuse.

²³Ti jech taj une, ja' o yacal ta xc'ot barcoetic ti ta xlic talel ta jteclum Tiberías ti bu nopol laj sve'ic ti pane, ti bu laj yalbe vocol Dios ti Jesuse.

²⁴C'alal laj yilic ti mu'yuc xa ti Jesuse, mi ja'uc ti yajchanc'optac ti bu taje, ti jnaclejetique ochic ta barco ec. Laj stam batel sbeic ta sa'el c'alal to jteclum Capernaum.

²⁵C'alal c'otic ta jot sti'il nabe, laj staic Jesús ti bu taje, ti xi laj sjac'beique: —Jchanubtasvanej, ¿c'usi ora lavul li'e?

²⁶Xi laj yal ti Jesuse: —Ta xcalboxuc ava'iic ta melel, ta xasa'icun yu'un noj lec ach'utic c'alal lave'ique, mu yu'unuc ja' laj ava'iic smelol ti c'usi ch'ayal ta xc'ot o'ntonal yu'un laj cac' iluque.

²⁷Ma'uc xavabtelanic ta sa'el ti ave'elic ti sna' xlaje. Ja' ac'beic yipal ta sa'el ti ve'lil ti mu sna' xlaje, ti ta xac' cuxlejal sbatel osile. Vu'un ta xcac' ti ve'lile, ti vu'un co'ol j'elantique. C'ot ta jventa yu'un ti Jtot ti ja' Diose.

²⁸Xi laj sjac'beique: —¿C'usi sc'an ta jpascutic yo' ta xc'ot ta pasel ti c'usi ta sc'an yo'nton ti Diose?

²⁹Xi laj stac' ti Jesuse: —Ti c'usi ta sc'an ti Dios ta xapasique, c'otuc ta avo'ntonic ta yich'el ta muc' ti Buch'u tacbil talele.

³⁰Va'i un, xi laj sjaq'uique: —¿C'usi jtosucal avabtel, c'usi senyail ta xavac' quilcutic yo' ta xc'ot ta co'ntoncutic ta xch'unel?

³¹Yu'un ti ch'ul c'ope xi ta xale: ‘Ti jmolmuc'totic ta vo'ne ti oyic ta sbajtical banomile, ac'bat sve'ic yu'un Dios ti maná liquem talel ta vinajele.’,

³²Xi laj stac' ti Jesuse: —Ta xcalboxuc ava'iic, ma'uc ti Moisés laj yac' ti pan ti liquem talel ta vinajele. Ti bats'i pan ti liquem talel ta vinajele, ja' laj yac' talel ti Jtote.

³³Yu'un ti pan ta xac' ti Diose, ja' ti Buch'u yal talel ta vinajele, yu'un ja' tal yac'be xcuxlejal ti jnaclejetic ta banomile.

³⁴Xi laj sc'anbeique: —Yojtot, j'ech'el ac'buncutic o ti pan taje.

³⁵Ti Jesuse xi laj yale: —Vu'unun ti pan ta xac' cuxlejale. Ti buch'u ta xtal ta jtojole mu xa'i o vi'nal. Ti buch'u ta xc'ot ta yo'nton ta xch'unelune, j'ech'el mu xa'i o taqui ti'il.

³⁶Ja'uc le'e, laj ono'ox calboxuc ava'iic ti mu xc'ot ta avo'ntonique manchuc mi laj xa avilbeicun jsat.

³⁷Scotol ti buch'utic ta xac' ta coc ta jc'ob ti Jtote, ta xtal ta jtojol. Ti buch'u ta xtal ta jtojole, mu'yuc ta jten loq'uel.

³⁸Ti liyal talel ta vinajele, ma'uc tal jpas ti c'usi ta sc'an ti co'ntone. Ti litale, ja' tal jpas ti c'usi ta sc'an yo'nton ti Buch'u laj stacun talele.

³⁹Ti oy ta yo'nton ti Buch'u laj stacun talele, ja' ti mu xch'ayic cu'un junuc ti laj yac'bun ta coc ta jc'obe, ti ja' ta jcha'cuxesic ta slajeb ti c'ac'ale.

⁴⁰Yu'un ti c'usi oy ta yo'nton ti Jtote, ti scotolicuc ac'o yojtiquinicun vu'un Xnich'onun ti Diose, ti c'otuc ta yo'ntonic ta xch'unelicune, ti staicuc ti xcuxlejalic sbatel osile, xchi'uc ti ta jcha'cuxesic ta slajeb ti c'ac'ale.

⁴¹Ti va'i s'elan taje, ti israeletique lic bic'tal c'opojicuc ta sna'leel ti Jesuse ta scoj ti laj ya'iic ti xi laj yale: “Vu'unun ti pan liquem talel ta vinajele.”

⁴²Ti israeletique xi ta xalbe sbaique: —¿Mi mu ja'uc xnich'on José ti Jesús li'e? Yu'un xcojtiquinbetic ti stote, ti sme'e. ¿C'u cha'al ta xalbe sba ti liquem talel ta vinajele?

⁴³Xi laj yal ti Jesús une: —Ch'an chanic ta vulajetel xchi'uc taje.

⁴⁴Mu'yuc buch'u junuc xu' ta xtal ta jtojol mi ma'uc ic'bil talel yu'un ti Jtot ti laj stacun talele yo' ta jcha'cuxes ta slajeb ti c'ac'ale.

⁴⁵Yu'un xi ta xal ti ts'ibabil ta spocol-poc vunetic yu'un ti j'alc'opetique: ‘Scotolic ta xtojobtasatic ta xchanubtasatic yu'un ti Diose.’ Scotol ti buch'utic ta xa'ibeic sc'opojel ti Jtote xchi'uc ti ta xchanbeic ti yo'ntone, ta xtalic ta jtojol un.

⁴⁶“Mu yu'unuc oy buch'u yiloj ti Jtote. Ja' no'ox yiloj ti Buch'u liquem talel ta stojol ti Diose.

⁴⁷Bats'i ta xcalboxuc ava'iic, ti buch'u ta xc'ot ta yo'nton ta xch'unelune, oy xcuxlejal sbatel osil.

⁴⁸Vu'unun ti pan ti ta xac' cuxlejale.

⁴⁹Ti amolmuc'totic ta vo'nee laj sve'ic ti maná ta xocol banomile. Manchuc mi jech un, chamic ono'ox.

⁵⁰Ja'uc ti vu'une ta xcalbe sc'oplal ti pan ti liquem talel ta vinajele. Ti buch'u ta sve'e mu xcham.

⁵¹Vu'unun ti cuxul pan liquem talel ta vinajele. Ti buch'u ta sve' ti pan taje, ta xcuxi o sbatel osil. Ti pan ti vu'un ta xcaq'ue, ja' ti jbec'tal jtacopale. Ta xcac' ta c'abal yo' jech ta sta xcuxlejal scotol ti jnaclejetic ta banomile.”

⁵²Xi xvulajetic liquel ta yalbel sbaic ti israeletique: —¿C'usi xut ta xijyac'botic jve'tic ti sbec'tale?

⁵³Xi laj yal ti Jesuse: —Ta xcalboxuc ava'iic ta melel, mi mu xave'ic ti jbec'tal ti vu'un co'ol j'elantique, mi mu xavuch'ic ti jch'ich'ele, mu xata acuxlejalic.

⁵⁴Ti buch'u ta sve' ti jbec'tale, ti ta xuch' ti jch'ich'ele, oy xcuxlejal sbatel osil. Vu'un ta jcha'cuxes ta slajeb c'ac'al.

⁵⁵Yu'un ja' bats'i ve'lil ti jbec'tale, ja' bats'i j'uch'el ti jch'ich'ele.

⁵⁶Ti buch'u ta sve' ti jbec'tale, ta xuch' ti jch'ich'ele, tsacal xcuxlejal ta jtojol, xchi'uc cuxulun ta stojol ec.

⁵⁷Yu'un cuxul ti Totil ti Buch'u laj stacun talele, cuxulun ta stojol ec. Ti buch'u ta smalq'uin sba ta jtojole, ta xcuxi ta jventa.

⁵⁸Ti pan ta xcal ti liquem talel ta vinajele, mu xco'olaj xchi'uc jech c'u cha'al ti maná laj sve'ic ti amolmuc'totic ta vo'nee, yu'un chamic ono'ox. Ti buch'u ta sve' ti pan li'e, ta xcuxi o sbatel osil.

⁵⁹Ta ch'ulna yu'un Capernaum jteclum ti va'i s'elan chanubtasvan ti Jesuse.

⁶⁰C'alal jech laj ya'iic ti va'i s'elan ti chanubtasele, yepal ti buch'utic sts'acliojic ti Jesús ti xi laj yalique: —Toj vocol ta ch'unel ti va'i s'elan ta xale. ¿Mi yu'un la oy buch'u ta xch'unbat ti yaloj une?

⁶¹Ti Jesuse laj yil ti xvulajetic xa liquel ta labanvanej ti va'i s'elan laj yale, xi laj sjac'bee: —¿Mi ta soc avo'ntonic yu'un taje?

⁶²¿C'usi van ta xc'ot ta avo'ntonic c'alal ta xavilic ta xisut batel ti bu lilic talel ti vu'un co'ol j'elantique?

⁶³Ta sventa ti Ch'ul Espiritue oy cuxlejal, ja'uc ti lum ach'ele, mu'yuc c'usi bal o. Ti va'i s'elan laj calboxuc ava'iique, naca sc'oplal ti Ch'ul Espíritu ti ta xac' cuxlejale.

⁶⁴Ja'uc le'e, oy jlom avu'unic ti mu'yuc to ta xc'ot ta avo'ntonic ta xch'unele. Ja' jech laj yal ti Jesuse, yu'un sna'oj ta sliquebal ti oy buch'u mu xch'unique, xchi'uc sna'oj ti buch'u ta x'ac'van batel ta c'abale.

⁶⁵Xi laj sts'ac batel lo'il ti Jesuse: —Laj ono'ox calboxuc ava'iic, mu'yuc buch'u ta xtal ta jtojol mi ma'uc ic'bil talel yu'un ti Jtote.

⁶⁶Va'i un, ja' o lic xch'ac sbaic ti yepal to ox sts'acliojic ti Jesuse. Mu'yuc xa ta xchi'inic ti Jesuse.

⁶⁷Xi laj sjac' ti Jesús ta stojol ti lajcha'vo' (12) yajchanc'optaque: —¿Mi ta xac'an ta xabatic ec?

⁶⁸Xi laj stac' ti Simón Pedroe: —Cajval, ¿buch'u xa ta jts'aclicutic batel? yu'un ti ac'ope ja' cuxlejal sbatel osil.

⁶⁹Ti vu'uncutique c'ot xa ta co'ntoncutic ta xch'unel. Yu'un laj xa jna'cutic vo'ot ti Cristoe, Xnich'onot ti cuxul Diose.

⁷⁰Xi tac'av ti Jesuse: —¿Mi yu'un mu'yuc laj jt'ujoxuc ti lajcha'vo'oxuque (12)? Manchuc mi jech un, oy jun avu'unic ja' jun pucuj ta j'ech'el.

⁷¹Ti jech laj yal ti Jesuse, ja' ta xalbe sc'oplal ti Judas Iscariote, xnich'on ti Simone. Yu'un ti Judase ja' ta x'ac'van batel ta c'abal, manchuc mi ja' jun ta xlajcha'vo'al (12) yajchanc'optac ti Jesuse.