Read Tzotzil San Juan 8 Bible Online

San Juan 8 - Tzotzil bible

San Juan 8

¹Ti Jesuse laj stam batel sbe, bat ta vits Olivos.

²C'alal sacub ta yoc'omale, sut batel ta ch'ulna. Laj stsob sbaic talel ti jnaclejetic ta stojole. Lic chotiuc ta chanubtasvanej.

³Ti jchanubtasvanejetic yu'un ti oy c'usi tsots albil sc'oplale xchi'uc ti fariseoetique, yic'ojic talel jun ants ti yacal ta spas smul laj staique. Laj sva'anic ta o'lol ta stojol ti c'u yepal oye.

⁴Xi laj yalbeic ti Jesuse: —Jchanubtasvanej, ti ants li'e yacal ta spas smul laj staic.

⁵Ti buch'u jech jun ants jech c'u cha'al li'e, ta xalbotic ta smantal ti Moisese ti ac'o yich' milel ta tone. ¿C'u xachi ti vo'ote?

⁶Jech laj sjaq'uic taje yo' ta slajeltsaic ta stabel ti smule. Ti Jesuse cuji. Laj sts'iba ti banomil ta sni' sc'obe.

⁷Ti jech xvulajetic ta sjaq'uele, ti Jesuse va'i ti xi laj yale: —Buch'uuc no'ox junucal avu'unic mu sna' sa' ti smule, ja' ac'o syales ba'yel ti yoc sc'ob ta yac'bel ton ti antse.

⁸Lic cha'cujiuc ta sts'ibael ti banomile.

⁹Oy smul laj ya'iic ti c'alal jech albatique. Ta jujun tal loq'uic batel. Ti buch'u ba'yel loq'uic batele ja' ti moletique. C'alal stuc xa ti Jesús com xchi'uc ti antse,

¹⁰va' xi liquel ti xi laj sjac'be ti antse: —¿Bu bat ti buch'utic ta sa' amule? ¿Mi oy buch'u laj yac' atoj ti amule?

¹¹Xi laj stac' ti antse: —Mu'yuc chquil, Yojtot. Xi laj yal ti Jesuse: —Mi ja'uc vu'un ta xcac' atoj ti amule. Avi li'e, batan. Mu xa xasa' yan amul.

¹²Ti Jesuse xi laj no'ox yal xtoc ta stojol ti jnaclejetique: —Luzun yu'un ti jnaclejetique. Ti buch'u ta xists'aclie, oy luz yu'un ti ta x'ac'bat ti xcuxlejale. Mi ja'uc ta xanav ta ic'al osil.

¹³Xi albatic yu'un ti fariseoetique: —Ti vo'ote ja' no'ox ta xavalbe aba ac'oplal atuc. Ti jech ta xaval taje, mu'yuc c'usi bal o.

¹⁴Xi tac'av ti Jesuse: —Tsots sc'oplal ta xcalbe jba jc'oplal ti jtuque, yu'un jna' ti bu litale, ti bu ta xibat xtoque. Ja'uc ti vo'oxuque, mu xana'ic.

¹⁵Ti vo'oxuque ja' no'ox ta xachapanvanic c'u s'elan xac' ti ajol avo'ntonique. Mu jechuc ta jpas ma' ti vu'une.

¹⁶Mi ta xichapanvane, ja' melel ti c'u s'elan ta xcale. Mu jtucuc no'ox ti ta xichapanvane, ja' tacbilun talel yu'un ti Jtote, xchi'inojun ta xchapanel.

¹⁷Ti ts'ibabil ti oy c'usi tsots albil sc'oplal ti oy ta atojolique, ich'bil ta muc' ta xc'ot mi oy chib rextico mi co'ol ti sc'opique.

¹⁸Ti jun cajrextico oy ta jtojole, vu'un jtuc. Ti yan rextico xtoque, ja' ti Jtot ti Buch'u laj stacun talele.

¹⁹Xi laj sjac'beique: —¿Bu oy ti atote? Xi laj stac' ti Jesuse: —Ti vo'oxuque mu xavojtiquinicun, mi ja'uc xavojtiquinic ti Jtote. Ti yu'unuc xavojtiquinicune, xavojtiquinic ti Jtot jechuque.

²⁰Ja' jech laj yal ti Jesuse c'alal ta xchanubtasvan ta ch'ulna ti bu oy xcaxail smoton ti Diose. Mi ja'uc junuc oy buch'u tsacvanic yu'un mu to ta xc'ot ti yoraile.

²¹Xi laj xcha'al ti Jesuse: —Ti vu'une ta xibat. Ta xasa'icun un. Le' une, acuchoj amul xacham xalajic. Yu'un ti bu ta xibate, mu xac'otic.

²²Xi laj yal ti israeletique: —¿Mi yu'un ta snop ta smil sba ya'luc? ¿Mi jech o xal ti xi laj yale: ‘Ti bu ta xibate, mu xac'otic?’

²³Xi laj yal ti Jesuse: —Ti vo'oxuque, ta banomil oyoxuc, yan ti vu'une, ta ac'ol liquemun talel. Ti vo'oxuque, jnaclejoxuc ta banomil. Ja'uc ti vu'une ma'uc c'otem ta jventa ti sba banomile.

²⁴Jech o xal laj calboxuc ava'iic ti acuchoj amul xacham xalajique, yu'un mi mu xc'ot ta avo'ntonic ti Buch'uun ta melele, acuchoj amul xacham xalajic, xacutoxuc.

²⁵Xi laj sjaq'uique: —¿Buch'uot un cha'e? Xi laj stac' ti Jesuse: —Laj xa calboxuc ava'iic ta sliquebal.

²⁶Oy ep ti c'usi xu' ta xcalboxuque xchi'uc ta xchapaneloxuque, yu'un ti Buch'u laj stacun talele, ja' melel ti c'usi ta xale. Ti c'u s'elan ta xcalbe ya'i ti jnaclejetic ta banomile, ja' ta xcal ti c'u s'elan laj yac'bun jna' ti stuque.

²⁷Mi jutebuc laj ya'ibeic smelol ti ja' ta xalbe sc'oplal ti Stote.

²⁸Xi laj yal ti Jesuse: —C'alal ti vo'oxuc ta xajipanic ta curus ti vu'un co'ol j'elantique, ja' to ta xlic avojtiquinicun Buch'uun ta melel. Scotol ti c'usi ta xcale, ma'uc ta jol jtuc, yu'un ja' ta xcal c'u s'elan lichanubtasat yu'un ti Jtote.

²⁹Yu'un ti Buch'u laj stacun talele, li' xchi'inojune. Mu'yuc yictaojun comel jtuc ti Jtote. Ti vu'une ja' ta jpas ti c'usi lec ta xile.

³⁰C'alal jech laj yal ti Jesuse, ep buch'u c'ot ta yo'ntonic.

³¹Ti Jesuse xi laj yalbe ti israeletic ti buch'utic laj xch'unique: —Mi staoj yav avo'ntonic ta xch'unel ti c'u s'elan laj calboxuque, ta j'ech'el ja' cajchanc'opoxuc.

³²Ta xlic avojtiquinic ti bu ja' melele, xchi'uc ta xaspojoxuc loq'uel ta mosovil ti melele.

³³Xi laj staq'uique: —Laj to c'op ma' ti ochemuncutic ta mosovinele. Ti vu'uncutique snitiluluncutic ti Abrahame. ¿C'u cha'al ta xaval ta jtacutic pojel colel?

³⁴Xi laj stac' ti Jesuse: —Ta melel ta xcalboxuc ava'iic, scotol ti buch'u ta sa' smulique, ja' mosovinbilic yu'un ti mulile.

³⁵Ti jun mosovile mu xcom o ta bats'i alab nich'nab, ja'uc ti bats'i nich'onile ta xcom o ta bats'i alab nich'nab.

³⁶Jech o xal un, mi ta jcoltaoxuc ti vu'un Nich'onilune, c'otem ta jventa ti apojel acolelique.

³⁷Jna' lec ti snitiluloxuc ti Abrahame. Ja'uc le' une, ta xamilicun ava'iic, mu xac'an xach'unic ti c'u s'elan ta xcale.

³⁸Ja' no'ox ta xcal ti c'u s'elan laj yac'bun jna' ti Jtote. Ti vo'oxuque ja' ta xapasic c'u s'elan ta xa'albatic yu'un ti atotique.

³⁹Xi tac'avique: —Ti jtotcutique, ja' ti Abrahame. Xi laj yal ti Jesuse: —Ti xnich'nabucoxuc ti Abrahame, jech ta xapasic jech c'u cha'al laj spas ti stuque.

⁴⁰Manchuc mi ta xcalboxuc ava'iic ti ja' chanubtasbilun yu'un ti Diose, ta xamilicun ava'iic. Ti Abrahame mu jechuc laj spas jech c'u cha'al le'e.

⁴¹Ja'uc ti vo'oxuque, ja' jech ta xapasic jech c'u cha'al ta spas ti atotique. Xi laj yalique: —Ti vu'uncutique ma'uc tsobbilal ololuncutic, yu'un oy jun jtotcutic, ja' ti Diose.

⁴²Xi tac'batic yu'un ti Jesuse: —Ti ja'uc Atotic ti Diose, c'ux ta xava'iicun ti jechuque. Yu'un liquemun talel ta stojol Dios ti li' oyune. Ma'uc talemun ta jventa jtuc, yu'un ja' tacbilun talel yu'un ti Diose.

⁴³¿C'u cha'al ti mu xava'iic ti c'usi ta xcale? Yu'un ja' ti mu xac'an xava'iic ti jc'ope.

⁴⁴Yu'un ti atotique, ja' ti pucuje. Yu'un ja' yu'unoxuc. Ja' ta xapas ava'iic jech c'u cha'al ta sc'an ti stuque. Ta sliquebal ono'ox, ja' jun jmilvanej ti pucuje. Mu xac' ta venta ti bu ja' melele. Mu no'ox meleluc sna' xal. Ti buch'u naca jutbil ti c'usi ta xale, jech ta xal jech c'u cha'al ti stuque. Yu'un jutc'op ono'ox ta j'ech'el, ja' jun totil jutc'op.

⁴⁵Ti jech melel ti c'usi ta xcale, mu xc'ot ta avo'ntonic.

⁴⁶¿Buch'u junucal avu'unic xu' ta svinajes ti oy jmule? Melel ti c'usi ta xcalboxuque, ¿c'u cha'al mu xc'ot ta avo'ntonic?

⁴⁷Ti buch'u ja' xnich'nabtac ti Diose, ta sts'etan sni' xchiquin ta ya'yiel ti c'u s'elan ta xal ti sc'op Diose. Ti vo'oxuque mu xac'an xats'etan ani' achiquin ta ya'yiel ti jc'ope, yu'un ma'uc xnich'naboxuc ti Diose —xi ti Jesuse.

⁴⁸Xi laj yalic ti israeletique: —Oy smelol ti ta xcalcutic ja' jun samaria vinicote, yu'un ach'ulelinojbe xch'ulel ti pucuje.

⁴⁹Xi laj stac' ti Jesuse: —Ma'uc quich'ojbe xch'ulel ti pucuje. Ti c'usi ta jpase, ja' yich'el ta muc' ti Jtote. Ja'uc ti vo'oxuque mu xavich'icun ta muc'.

⁵⁰Ti vu'une ma'uc tal jsa' ti lecuc ti jc'oplal avu'unique. Yu'un oy Buch'u ta xiyac'un ta ich'el ta muc', ja' ti Buch'u ta xchapan scotole.

⁵¹Ta xcalboxuc ava'iic ta melel, ti buch'u ta xich' ta muc' ti c'usi ta xcale, mi ja'uc ta xcham.

⁵²Xi laj staq'uic ti israeletique: —Melel ach'ulelinojbe xch'ulel ti pucuje. Yu'un ti Abrahame, scotol ti j'alc'opetique laj xa chamicuc. Ja'uc ti vo'ote xachi ta xavale: “Ti buch'u ta xich' ta muc' ti c'usi ta xcale, mu xcham.”

⁵³¿Mi yu'un vo'ot x'ech' to cajal latal? ¿Mi ja' mu sta ti jmolmuc'totic Abrahame? Yu'un ti stuque cham xa. Ti j'alc'opetique chamic xa xtoc. ¿Buch'uot ya'yel ta xabis aba un cha'e?

⁵⁴Xi laj stac' ti Jesuse: —Ti tauc xcac' jba ich'el ta muq'ue, j'ech'el mu'yuc c'usi bal o. Yu'un ti Buch'u ta xiyac'un ta ich'el ta muq'ue, ja' ti Jtote, ti ja' Dios avu'un ta xavalique.

⁵⁵Ti vo'oxuque mu xavojtiquinic. Ja'uc ti vu'une xcojtiquin. Mi ta xcal ti mu xcojtiquine, ja' jun jutc'opun ta j'ech'el jech c'u cha'al ti vo'oxuque. J'ech'el xcojtiquin ma' ti vu'une, xchi'uc ta xquich'be ta muc' ti c'usi ta xale.

⁵⁶Ti Abraham ti ja' amolmuc'totic ta vo'nee, xmuyubaj xa yo'nton ti laj ya'i ti ta xitale. Laj yil ti litale, xmuyubaj xa ta jmec.

⁵⁷Xi laj yalic ti israeletic ta stojol ti Jesuse: —Ti vo'ote mu'yuc to avich'oj lajuneb yoxvinic (50) jabil. ¿C'usi laj avut ti laj avil ti Abrahame?

⁵⁸Xi laj stac' ti Jesuse: —Ta xcalboxuc ava'iic ta melel, c'alal mu'yuc to ox voq'uem ti Abrahame, oyun xa ono'ox.

⁵⁹Va'i un, ti stuquique laj stsaquic ton yo' ta xac'beic. Ja'uc ti Jesuse laj sq'uej sba, loc' batel ta ch'ulna. Ech' batel ta o'lol yu'unic, bat.