Read Tzotzil Hechos 12 Bible Online

Hechos 12 - Tzotzil bible

Hechos 12

¹Ti jech yorail taje, ja' o lic yilbajin jlom jch'unolajeletic ti ajvalil Herodese.

²Laj yal mantal ti yich'uc milel ta espada ti Santiagoe, yits'in ti Juane.

³Ti jech laj spas taje, toj lec laj ya'iic ti israeletique. Jech o xal laj stsac ta chuquel ti Pedro eque. Taje, ja' o c'ot ta pasel ta yorail q'uin ti ta xich' ve'el pan ti ch'abal yich'oj ti spajubtasobile.

⁴C'alal tsacluj ti Pedroe, tiq'ue ta chuquel yu'un ti ajvalil Herodese, ti bu chabibil lec ta chanchop soldado ti oy chanib soldado ti jujuchope. Yu'un laj snop ta sjol ti ta sva'an ta sba ta sat jteclumetic c'alal mi ech' ti q'uin Colele.

⁵Jech ti Pedroe chabibil lec ti tiq'uil ta chuquinabe. Ja'uc ti jch'unolajeletique yac'ojbeic yipal ta c'opojel ti'inel ta stojol Dios ta sventa ti Pedroe.

⁶Ti Herodese snopoj xa ox ti ta sva'an ta sba ta sat jteclum ta yoc'lomal ti Pedroe. Ti ta yac'ubalil taje, ti Pedroe chabibil lec ta cha'vo' soldado ta xvay ti chucul ta cha'bej cadenae xchi'uc oy yan soldadoetique xchabiojic lec sti' ti chuquinabe.

⁷Ta jech to yepal un, c'ot jun yaj'ánjel ti Diose, ti sac jaman no'ox c'ot xojobal ta chuquinabe. Xi laj yal ti ánjel ti laj svuyilanbe xocon ti Pedro yo' ac'o julavuque: —Lican no'ox ta ora. Ta jech to yepal laj coluc yalel ti cadena ti chucul to ox ta sc'ob ti Pedroe.

⁸Xi laj yal ti ánjele: —Chuco ach'ut, lapo axonob. Ja' jech laj spas ti Pedroe. Xi to lic yalilan ti ánjele: —Lapo ti ac'u' sventa smac ti sique, tijlan talel ta jpat.

⁹Ti Pedroe tijil loc' batel ta spat ti ánjele, ti mu a'yibajuc ta xa'i mi ja' ta melel jech ta spas ti ánjele mi mo'oj, mi ja' no'ox jambat sba sat yo' oy c'usi ta xil.

¹⁰Ja'uc le'e, jelavic batel bu oy ti sliquebal jchabivanejetique. Ech'ic batel bu oy ti xcha'voc'al jchabivanejetique. C'alal c'otic ta muc' ta ti' chuquinab taq'uin sventa ti callee, ta jech yepal jam stuc. Loq'uic batel un. C'alal xanavic batel jun callee, ictae comel stuc ti Pedro yu'un ti ánjele.

¹¹Va'i un, ti Pedro ja' to laj sna' lec ti melel ono'oxe, ti xi lic yale: —Avi tana une, ta xquil ta melel laj stac talel yaj'ánjel ti Diose yo' jech tal scoltaun loq'uel ta yoc ta sc'ob ti ajvalil Herodese xchi'uc ti c'usi snopoj ta spasbun ox ti israeletique.

¹²C'alal laj yil ti Pedro ti jech c'ot ta pasele, bat ta sna ti Mariae, sme' ti Juane, Marcos ti yan sbi xtoque. Ti bu taje, yepal no'ox stsoboj sbaic ta c'opojel ti'inel.

¹³C'alal xc'ojc'un c'otel ta ti' na ti oy ta callee, loc' talel jun tseb ti sbiinoj Rode ta sq'uelel buch'ue.

¹⁴C'alal laj ya'i ja' sc'opojel ti Pedroe, ch'ay ta yo'nton ta sjamel ti ti'na ti oy sc'oplal ta sjame. C'ajomal xmuyubaj xa ta j'ech'el ba yalbe ya'i ta anil ti jch'unolajeletic ti ja' Pedro va'al ta ti'nae.

¹⁵Ti stuquique xi laj yalbeique: —Xlic achuvaj. —Melel xcal —xi ti tsebe. —Ma'uc, ja' no'ox xch'ulel ma' taje —xi laj yalique.

¹⁶Ja'uc ti Pedroe xc'ojc'un smalaoj ta xtal jambatuc ti ti' nae. C'alal bat sjamic ti ti'nae, xi'ic ti c'alal laj yilbeic ti sate.

¹⁷Jech ti Pedroe laj spas senyail ta sc'ob ti ac'o ts'ijlicuque. Lic yal c'u s'elan loq'uese ta chuqinab yu'un ti Diose. Oy to ti xi laj yale: —Albeic ya'i ti Santiagoe xchi'uc ti yan jch'unolajeletic ti va'i s'elan taje. Ts'acal to un, ti Pedroe loc' batel, slecoj bu bat.

¹⁸C'alal sacub talel ti osile, ti soldadoetique mu stac' a'yeluc ta xa'iic c'usi c'ot ta pasel ti ch'abal xa ti Pedroe.

¹⁹Ti Herodese laj yal mantal ac'o yich' sa'el ti Pedroe. Ti jech mu'yuc laj staic ta sa'ele, lic xchapan ta yich'bel ye ti soldadoetique. Laj yal mantal ti ac'o yich'ic milele. Ts'acal to ti Herodese loc' ech'el ta Judea, bat nacluc ta Cesarea jteclum.

²⁰Ti ajvalil Herodese soquem sjol xchi'uc ti jnaclejetic ta jteclum Tiroe xchi'uc ti ta jteclum Sidone. Ja'uc ti stuquique laj scomonop sc'opic ti ta xbat sva'an sbaic ta stojol ti ajvalile ta sventa ti laj svosesbeic yo'nton ta mich'ob c'abal ti Blasto jun cajal yaj'abtel ti ajvalile ti laj sc'anbeic ac'o lamajuc ti c'ope. Yu'un ti Tiroe xchi'uc ti Sidone, yu'un tey ta xlic talel sve'elic ta banomil bu c'alal smacoj ti ajvalile.

²¹Ti Herodese laj yal ti xiuc c'ac'al talicuc ti jnaclejtic taje. Ja' o lic slap ti lequil c'u'il sventa ajvalilale, ti bat chotluc ta xchotleb ti bu spasob mantale. Lic yal ti c'u s'elan sc'an alele.

²²Va'i un, ti jnaclejetique xi lic avanicuque: —Ti buch'u ta xc'opoj li'e, ma'uc jun vinic, ja' jun dios.

²³Ta yorail no'ox, tal jun yajánjel ti Diose. Laj yac' yaluc ta chamel ti Herodese. Ta scoj ti ma'uc laj yac' ta ich'el ta muc' ti Diose, volibil cham laj ta xuvit.

²⁴Taj une, ti sc'op Diose yacal ta xpuc ech'el ti buyuc no'ox ta xtanij batele.

²⁵Ti Bernabee, ti Sauloe, c'alal tsuts yu'unic ti c'usi ta sc'an pasel ta Jerusalene, laj yiq'uic batel ti Juane, Marcos ti yan sbi xtoque, ti c'alal sutic batele.