Read Tzotzil Hechos 13 Bible Online

Hechos 13 - Tzotzil bible

Hechos 13

¹Ta stojol ti jch'unolajeletic ti oyic ta jteclum Antioquiae, oy j'alc'opetic xchi'uc jchanubtasvanejetic. Taje, ja'ic ti Bernabee, ti Sauloe, ti Simone (Negro ti yan sbi xtoque), ti Lucio ti liquem talel ta Cirene banomile, ti Manaheme (ich'i talel ta stojol ti ajvalil Herodes ta Galileae).

²Oy jun c'ac'al c'alal scomtsanoj yotic ta sventa yalbel vocol ti Diose, xi albatic yu'un ti Ch'ul Espiritue: —T'ujbun loq'uel ti Bernabee, ti Sauloe, ta yich'el ti yabtelic ti laj jtaic ta iq'uele.

³Va'i un, c'alal laj yo'ntonic ta scomtsanel ti yotique xchi'uc ti ta c'opojel ti'inele, laj scajan sc'obic ta stojol, laj staquic batel un.

⁴Ti Bernabee, ti Sauloe tacbilic yu'un ti Ch'ul Espiritue, c'otic ta Seleucia jteclum. Ti bu taje, ochic batel ta jun barco yo' ta xbatic ta Chipre banomil.

⁵C'alal c'otic ti bu xloc' x'och ti barco ta Salamina jteclume, lic yalic ti sc'op Dios ta jujun ch'ul na yu'un ti israeletique. Xchi'uc batel ti Juan ti c'otem ta yajcoltaobbaique.

⁶Laj jxaniic c'u sjamlej ti joyobtabil ta nab ti Chipre banomile. C'otic ta jteclum Pafos ti bu laj staic jun j'ac'-chamel israelal vinique, ti sbiinoj Barjesuse, ti ta xal ti ta xc'opoj ta sventa ti Diose ti c'alal ja' jun jutc'ope.

⁷Ti j'ac'-chamel vinique oy ta stojol ti ajvalil Sergio Pauloe ti ja' jun bijil vinique. Ti ajvalile laj stac ta iq'uel ti Bernabee, ti Sauloe, yu'un ta sc'an ta xa'i ti sc'op Diose.

⁸Ja'uc ti j'ac'-chamel taje, Elimas ti yan sbi ta griego c'ope, tsots laj sva'an sba ta spasel yo' mu xc'ot ta yo'nton ta xch'unel sc'op Dios ti ajvalil Sergio Pauloe.

⁹Va'i un, ti Sauloe, ti ja' Pablo ti yan sbi xtoque, ti jech ventainbil yo'nton yu'un ti Ch'ul Espiritue, tsots laj sq'uelbe ech'el sat ti j'ac'-chamel vinique,

¹⁰ti xi laj yalbee: —Jti'-o'nton, jlo'lavanej, xnich'on pucuj, contrainej scotol ti c'usi leque. ¿C'u cha'al mu xavicta aba ta soquesel ti lequil tuq'uil be yu'un ti Diose?

¹¹Avi tana un, xi s'elan ta xastsitsot ti Diose: Ta xacom ta ma'sat. Jal mu xavil ti saquilal osile. Ta jech to yepal ti Elimase, mac ti sate, mu xa xil ti saquilal osile, ti sa'ilan xa ti oyuc buch'u xnitun batele, yu'un mu xa xil ti sbee.

¹²C'alal laj yil ti ajvalil c'usi c'ot ta pasele, c'ot ta yo'nton ta xch'unel ti Diose, yu'un labal laj ya'i ti c'u s'elan chanubtasel ta sventa ti Cajvaltique.

¹³Ti Pabloe xchi'uc ti xchi'iltaque ochic ech'el ta barco ta jteclum Pafos. Batic ta jteclum Perge ti oy ta Panfilia banomile. Ja'uc ti Juan Marcose ictavan comel, sut batel ta Jerusalén.

¹⁴Loq'uic batel ta jteclum Perge, batic ta jteclum Antioquía ti oy ta Pisidia banomile. Ti bu taje, ochic batel ta ch'ul na c'alal ja' o sc'ac'alil ti cuxob o'ntonale, c'ot chotiicuc.

¹⁵Ti jpas-mantaletic yu'un ti ch'ul nae, c'alal laj yo'ntonic ta yavtael ti oy c'usi tsots albil sc'oplale, xchi'uc svun ti j'alc'opetique, xi laj yalique: —Jchi'iltac, mi oy c'usi ta xavalic ta jtojolcutic ta yaq'uel yip ti o'ntonale, xu' xaval avi tana li'e.

¹⁶Va'i un, ti Pabloe va' xi liquel. Laj spas senya ta sc'ob ti ac'o sts'ijliicuc ti xi laj yale: —A'yio ava'iic ti vo'oxuque, israeletic, xchi'uc vo'oxuc jyanlumetic ti axi'taojic ti Diose.

¹⁷Ti jmolmuc'totic ta vo'nee, t'ujeic yu'un ti Dios yu'un ti jteclum Israele. C'ot ta jun muc' ta jteclum yu'un c'alal tiq'uilic ta mosovil ta Egipto banomile. Ts'acal to un, ta sventa smuc'ul stsatsal stuc, laj sloq'ues talel ta mosovil.

¹⁸Cha'vinic (40) jabil ts'icbat stoyobbailic yu'un Dios ti jmolmuc'totic ta vo'ne c'alal xjoyetic talel ta xocol banomile.

¹⁹Ti Diose laj slilin vucub (7) muc'tiquil lumetic ti oy ta yosilal ti Canaán banomile yo' ta x'ac'bat xrextoinic ti jmolmuc'totique.

²⁰Ta scotol taje, jalij nan o'loluc yo'obal ciento (450) jabil. “Ts'acal to un, va'anbatic jchapanvanejetic ja' to ti c'uxi c'ot sc'ac'alil vul ta loq'uel ti j'alc'op Samuele.

²¹Va'i un, ti jmolmuc'totique lic sc'anic jun ajvalil yo' jech ta xventainatic. Ac'batic jun ajvalil yu'un ti Diose, ti ventainatic cha'vinic (40) jabil yu'un ti Saul xnich'on ti Cise, ti ja' jun vinic snitilul ti Benjamine.

²²Ts'acal to un, ti Diose laj sloq'ues ta yabtel ti Saule, ja' ac'bat ta ajvalil yu'unic ti Davide, yu'un xi laj yale: ‘Laj xa jta jun vinic ti lec ta xquile, ti ximuyubaj yu'une, ti ta spas scotol ti c'usi ta jc'ane, ja' xnich'on ti Isaie.’

²³Yo' ta xc'ot ta pasel ti yaloj ono'ox ti Dios ta xpojvan xcoltavane, laj sva'an ti Jesús ti ja' jun ta scotol snitilul ti Davide.

²⁴C'alal mu'yuc to ta xvul ta loq'uel ti Jesuse, ti Juane yacal xa ta xalbe ya'i scotol ti israeletic ti suticuc talel ta stojol ti Diose, xchi'uc ta yich'el ti vo'e.

²⁵Xi laj yal ti Juan ti c'alal po'ot xa stsuts ti yabtele: ‘Ti c'u s'elan ta xanopic ta jtojole, mo'cun. Ja'uc le'e, oy Buch'u ta xtal xvul ta loq'uel ta ts'acal ti mu ja'uc jutebuc oy jlequil jtuq'uil ta sjitunbel ti yaq'uil xonobe.’

²⁶“Jchi'iltac snitiluloxuc ti Abrahame xchi'uc ti vo'oxuc jyanlumoxuc ti axi'taojic ti Diose: Sc'oplal ti pojel colel taje, ja' c'otem ta jventatic.

²⁷Ti jchi'iltic nacalic ta Jerusalene xchi'uc ti banquilaletic yu'unique, mi ja'uc laj sna'ic Buch'u ti Jesuse. Mi ja'uc laj ya'ibeic smelol ti c'u s'elan laj sts'ibaic comel ti j'alc'opetic ta sq'uelic ta ch'ul na ta jujun sc'ac'alil ti cuxob o'ntonale. Ti jech laj yaq'uic ta milel ti Jesuse, ja' c'ot ta pasel yu'unic ti c'u s'elan laj sts'ibaic ti j'alc'opetique.

²⁸Ac'o mi mu'yuc laj stabeic smul yo' ta xaq'uic ta milele, laj sc'anbeic ti Pilatoe ti ac'o yal mantal yich'uc milele.

²⁹Laj taj une, c'alal laj xa spasic scotol jech c'u cha'al ts'ibabil sc'oplal ti Jesús ta ch'ul c'ope, laj syalesic talel ta curus. Laj smuquic.

³⁰Ja' stuc Dios laj xcha'cuxes.

³¹Jal c'ac'al, ti Jesuse laj yac' sba iluc ta stojol ti buch'utic laj xchi'inic ta xanobal ti lic talel ta Galileae, ti c'ot ta Jerusalene. Ja'ic rexticoetic avi tana li'e ta xalbeic ya'i ti jnaclejetic sc'oplal ti Jesuse.

³²“C'otem ta jventacutic ta yalel ava'iic ti xi s'elan ti lequil c'ope, ti c'u s'elan albilic yu'un Dios ti jmolmuc'totique.

³³Ti vo'otic snitilulotic ti jmolmuc'totique, c'ot ta pasel yu'un ta jtojoltic. Yu'un laj xa xcha'cuxes ti Jesuse jech c'u cha'al ti xi s'elan ts'ibabil ta xchibal Salmoe: ‘Vo'ot ti Jnich'onote, yu'un ti c'ac'al avi tana li'e, laj xa cac'bot acuxlejal.’

³⁴Scaj'aloj ono'ox ti Dios ta xcha'cuxes yo' mu xc'a' ti sbec'tale, co'ol jech c'u cha'al ti xi s'elan ta xal ta xch'ul c'ope: ‘Ta xc'ot ta pasel cu'un ti ch'ul lequilal ti oy ta jventa jech c'u cha'al laj ono'ox calbe ya'i ti Davide.’

³⁵Jech o xal oy bu xi ta xal ta yan Salmoe: ‘Mu'yuc xavac' ave ati' xc'a' sbec'tal ti ch'ul jtunel avu'une.’

³⁶Melel un, ti Davide laj yac' sba ta tunel ta stojol ti xchi'iltac ti co'ol ech'ic ta banomile jech c'u cha'al albil yu'un ti Diose. Ta ts'acal to un, cham, bat xchi'in ti stot sme'e, c'a' ti sbec'tale.

³⁷Ja'uc sbec'tal ti Buch'u cha'cuxese yu'un ti Diose, mu'yuc xc'a'.

³⁸Na'o ava'iic, jchi'iltac, ta xavich'ic albel ti ja' no'ox ta sventa Jesús ta xataic ti ch'aybil ta xc'ot ti amulique.

³⁹Yu'un ti vo'oxuque mu'yuc xch'ay amulic ta sventa ti oy c'usi tsots albil sc'oplal yu'un ti Moisese. Ja' no'ox ta sventa Jesús ta tael ti ch'aybil ta xc'ot smul ti buch'u ta xc'ot ta yo'nton ta xch'unele.

⁴⁰Bijanic un cha'e yo' mu jechuc xc'ot ta atojolic jech c'u cha'al ti xi s'elan laj sts'iba comel ti j'alc'opetique:

⁴¹‘A'yio ava'iic, jna'levanejetic, ch'ayal avo'ntonic xacham xalajic, yu'un oy c'usi yacalun ta spasel ti jech cuxuloxuc li'e, ti mu ch'unbaj ta xava'iic mi oy buch'u ta xalbote’ ”, xi ti Pabloe.

⁴²C'alal loq'uic batel ta ch'ul na yu'un israeletic ti Pabloe xchi'uc ti xchi'iltaque, ti jyanlumetique laj sc'anbeic ti Pabloe ti chanubtasvanuc xtoc ta yan sc'ac'alil cuxob o'ntonal.

⁴³C'alal laj yo'ntonic ta tsobleje, yepal no'ox ti israeletique xchi'uc ti jyanlumetic ti xch'unojic ec jech c'u cha'al ti israeletique, laj sts'acliic batel ti Pabloe, ti Bernabee. Albatic ti bijubtasatic yu'un ti mu xch'ac sbaic loq'uel ta stojol ta syail xc'uxul yo'nton ti Diose.

⁴⁴C'alal sta ti yan xemuna ta sc'ac'alil ti cuxob o'ntonale, jutuc mu scotoluc ti jteclum tal ya'iic ti sc'op Diose.

⁴⁵Ja'uc ti israeletique, c'alal laj yilic ep laj stsob sbaic talel ti jnaclejetique, lic yit'ixal yo'ntonic, ta scontrainel, ta sa'bel ti smul ti Pabloe.

⁴⁶Va'i un, ti Pabloe, ti Bernabee mu ta xi'eluc ti xi laj staq'uique: —Ti jech israeloxuque, tsots sc'oplal ti ba'yel ta xcalboxuc ava'iic ti sc'op Diose. Ta xquil ti mu xc'ot ta avo'ntonic ta xch'unele, ti mu tsotsuc sc'oplal ta xava'iic ti cuxlejal sbatel osile. Ta xibatcutic ta stojol ti jyanlumetique.

⁴⁷Yu'un laj yalbuncutic mantal ti Diose, ti xi ta xale: ‘C'otemoxuc ta saquil osil yu'un ti muc'tiquil jyanlumetique ta sbainel ta yalel sc'oplal ti pojel colel cu'une, ti bu xa c'alal spajeb snamal ti banomile.’

⁴⁸C'alal jech laj ya'iic ti jyanlumetique, xmuyubajic xa laj yalic ti jun yutsil ti sc'op Diose. C'ot ta yo'nton ta xch'unel scotolic ti buch'utic oy sc'oplal ta stael ti xcuxlejalic sbatel osile.

⁴⁹Jech c'ot ta pasel ti puc sc'op ti Dios ta sjunul ti banomil taje.

⁵⁰Ja'uc israeletique laj yich'beic ye sti' jun chibuc antsetic ti ich'bilic ta muc' ti oy yutsil slequil yo'ntonic yiluque xchi'uc viniquetic ti ich'bil ye sti'ic ta jteclume. Ja'ic laj sliquesic c'op ti yich'uc contrainel ti Pabloe xchi'uc ti Bernabee yo' jech ta snutsic loq'uel ta slumalic.

⁵¹Va'i un, laj slilinic spucuquil xonobic yo' ta xvinaj oy smulic ti jnaclejetic taje. Batic ta jteclum Iconio un.

⁵²Ja'uc ti jch'unolajeletique xmuyubajic no'ox, xchi'uc ventainbil yo'ntonic yu'un ti Ch'ul Espiritue.