Read Tzotzil Hechos 14 Bible Online

Hechos 14 - Tzotzil bible

Hechos 14

¹C'alal oyic ta Iconio ti Pabloe, ti Bernabee, ochic batel ta ch'ul na yu'un ti israeletique. Yepal no'ox israeletic xchi'uc jyanlumetic c'ot ta yo'ntonic ta xch'unel ta sventa ti oy stsatsal ti sc'opique.

²Ja'uc ti israeletic ti mu xc'ot ta yo'ntonic ta xch'unele, laj stijbeic sjol ti jyanlumetic ti socuc sjolic ta stojol ti Pabloe, ti Bernabee.

³Manchuc mi jech un, ti jcholc'opetique jal comic ti bu taje. Mu ta xi'eluc ta xc'opojic ta sventa ti spatoj yo'ntonic ta stojol ti Diose, xchi'uc ja' stuc Dios ta svinajes ti c'alal ta xalic ti oy syail xc'uxul yo'ntone, xchi'uc ac'bat yip stsatsalic yo' ta xaq'uic ta ilel ti oy c'usi ch'ayal ta xc'ot o'ntonal yu'unique.

⁴Ja'uc ti jnaclejetic ta muc' ta lume, cha'voc' spasoj sbaic. Ti jlome oyic ta stojol ti israeletique. Ti jlome oyic ta stojol ti jcholc'opetique.

⁵Va'i un, ti israeletique, ti jyanlumetique laj scomonop sc'opic xchi'uc ti j'opisialetic yo' ta xilbajinic xchi'uc ta spujbel ton ti jcholc'opetique.

⁶Ja'uc ti c'alal ya'i ti Pabloe, ti Bernabee, jatavic batel ta jteclum Listra xchi'uc ta jteclum Derbe, jteclumetic ti oy ta Licaonia banomile, xchi'uc ta sjoylejal ti bu taje.

⁷Tey xanavic ta yalolanel ti lequil ach' c'ope.

⁸Ti ta Listrae, oy jun vinic mu stac' xanav. Mu'yuc xanav o, yu'un coxov voc'.

⁹Ts'etel xchiquin ta xa'i c'usi ta xal ti Pabloe. Ti Pabloe laj stuc'ulan lec. Laj yil ti juteb ta yo'nton sc'an ta xcol ya'ie.

¹⁰Va'i un, xi tsots laj yalbee: —Lican, tuc' xava'an aba. Ti coxov vinique bituj xi, va'al c'ot, lic xanavuc.

¹¹C'alal laj yilic ti jnaclejetic jech laj spas ti Pabloe, xi lic avanicuc ta sc'op stuquic ti licaoniaetique: —Co'ol s'elan vinic yal talel ti diosetic ta jtojoltique.

¹²Ti Bernabee laj sbiin yu'un dios Júpiter. Ti Pabloe laj sbiin yu'unic dios Mercurioe, yu'un ja' oy ta ye ta sti' ti c'opojele.

¹³Ti pale ti sventainojbe xch'ul na ti dios Júpiter ti oy ta ochebal yu'un ti jteclume, laj yich' talel vacaxetic xchi'uc nichimetic, yu'un ti stuque xchi'uc ti jnaclejetique ta ox xac'beic milbil matanal.

¹⁴Ja'uc ti c'alal laj yilic ti Pabloe, ti Bernabee, laj xch'i' ta jatel ti sc'u'ique, ti xi x'avetic xa laj stic' sbaic ochel ta stojol ti jnaclejetique:

¹⁵—Jchi'lactic, ¿c'u cha'al jech ta xapasic le'e? Vinicuncutic no'ox jech c'u cha'al ti vo'oxuque. Ti jech litalcutic li'e, ja' tal calcutic ava'iic ti lequil ach' c'ope yo' ta xavictaic ta spasel ti vi s'elan le'e, ti ma'uc toj tsots sc'oplale. Sutanic xa talel ta stojol ti cuxul Dios ti Buch'u laj spas ti vinajele, ti banomile, ti muc' ta nabe, xchi'uc scotol ti c'usitic oye.

¹⁶Ta vo'ne talele, ti Diose laj yac'be comel ta sba ti jnaclejetic ta spasel ti c'usi sc'an ti yo'ntonique.

¹⁷Yu'un mu'yuc laj yicta sba ta yaq'uel sba iluc, ta spasel ti c'usi leque. Yu'un ta ono'ox xac' sba iluc ti Buch'ue, yu'un ja' ta xac'boxuc talel ti vo'e, ti lec ta xch'i ti ats'unobique, xchi'uc ta yac'beloxuc ti yepal no'ox ave'el avuch'omique yo' xamuyubajic.

¹⁸Manchuc mi jech laj yalic ti jcholc'opetique, toj vocol pajtsaj yu'unic ti jnaclejetic ti oy ta yo'ntonic ta smilic ti vacaxetic ta sventa matanale.

¹⁹Ti jech xyaquet taje, ja' o c'otic jun chib israeletic liquemic talel ta Antioquiae, ta Iconio jteclume, ti laj syanijesbeic yo'ntonic ti jnaclejetic taje. Va'i un, laj spujbeic ton ti Pabloe. Yac'toicuc ti cham xa yu'unique. Laj xjochic loq'uel ta sti'il jteclum.

²⁰Ja'uc ti c'alal laj stsob sbaic ta joyob ti jch'unolajeletic ti bu bitsil ti Pabloe, va'i liquel. Och batel xtoc ta jteclum. Ta yoc'lomal un, loc' batel xchi'uc ti Bernabee. Batic ta Derbe jteclum.

²¹Yepal no'ox c'ot ta yo'ntonic ta xch'unel lequil ach' c'op ti jnaclejetic ta Derbe jteclum c'alal laj yich'ic albele. Ts'acal to un, ti jcholc'opetique sutic batel xtoc ta Listra, ta Iconio, ta Antioquía jteclum.

²²Ti bu taje, ech' stsatsubtasbe yo'ntonic ti jch'unolajeletique, ti mu stsiq'ues yo'ntonic ta xch'unel ti Cajvaltique, xchi'uc laj yalbe ya'iic ti buch'u ta x'ochic batel ta ventainel yu'un ti Diose, ta xc'ot ta stojolic ti vocole.

²³Ja' jech xtoc laj sva'anic ancianoetic ta jujun tsobobbail. C'alal laj yo'ntonic ta c'opojel ti'inel ta scomtsanel ti yotique, laj yac'beic comel ta yoc ta sc'ob Dios ti Buch'u c'ot ta yo'ntonic ta xch'unele.

²⁴Ech'ic ta yosilal Pisidia banomil, c'otic ta Panfilia jteclum.

²⁵Laj yalic ti lequil ach' c'op ta Perge jteclume. Batic c'alal to Atalia jteclum.

²⁶Ti bu taje, ochic ech'el ta jun barco yo' ta sutic batel ta Antioquía jteclum, ta jteclum ti bu c'ubanatic yu'un Dios ta yabtelanel yalel ti syail xc'uxul yo'ntone, ti c'ot ta tsutsel yu'unique.

²⁷C'alal c'otic ta jteclum Antioquiae, laj stsobic talel ti jch'unolajeletic ta yalbeic ya'i ti c'usi laj spas ti Dios ta stojolique, xchi'uc ti c'u s'elan abtej ta sjamel be ta stojol ti jyanlumetique yo' ta xc'ot ta yo'ntonic ta xch'unic ec.

²⁸Ti bu taje, ti Pabloe, ti Bernabee jal comic ta stojol ti jch'unolajeletique.