Read Tzotzil Hechos 15 Bible Online

Hechos 15 - Tzotzil bible

Hechos 15

¹Ti jech yorail taje, oy jun chib viniquetic ti loq'uic batel ta Judea banomile, batic ta Antioquía jteclum, ti laj yalbeic ti jch'unolajeletic ti mu cha'bel staic pojel colel mi mu'yuc ta xich'ic ti circuncisión jech c'u cha'al ta xal smantal ti Moisese.

²Taje, tsots laj stsac sbaic ta c'op xchi'uc ti Pabloe, ti Bernabee. Ta jech yepal un, va'anatic ti Pabloe, ti Bernabee xchi'uc jayibuc xchi'ilic yo' ta xbatic ta Jerusalén ta xchapanel c'op ti jcholc'opetique xchi'uc ancianoetic yu'un ti jch'unolajeletic ta jteclum taje.

³Ti jech tacbilic batel ti jchapanej-c'opetic yu'un ti jch'unolajeletic ta Antioquiae, ech'ic ta Fenicia, ta Samaria banomil. Laj yalbeic sc'oplal ti jyanlumetic ti laj xa yictaic comel c'u s'elan xch'unojic to ox ta ba'yel yo' ta sts'acliic ti Diose. Xmuyubajic scotol ti jch'unolajeletic ti c'alal jech laj ya'iique.

⁴C'alal c'otic ta Jerusalén ti Pabloe, ti Bernabee, ich'bilic ta muc' c'ot yu'un ti jch'unolajeletique, ti jcholc'opetique xchi'uc ti ancianoetique, ti c'ot yalic c'u s'elan abtej ti Dios ta stojolique.

⁵Ja'uc le' une, oy jun chib fariseoetic ti jch'unolajeletic xae, laj sva'an sbaic ti xi laj yalique: —Ti jyanlum jch'unolajeletique, tsots sc'oplal ac'o yich'ic ti circuncisione, xchi'uc yich'uc albel ya'iic ti ac'o spasic ti oy c'usi tsots albil sc'oplal yu'un ti Moisese.

⁶Va'i un, laj svol sbaic ti jcholc'opetique xchi'uc ti viniquetic sbainoj ti jch'unolajeletique, ta scomon chapel ti c'op taje.

⁷C'alal jal xvulajetic ta scomon nopele, va'i ti Pedro ti xi laj yale: —Jchi'iltac, ana'ojic lec ti vo'oxuque, vo'ne xa laj st'ujun loq'uel ti Dios li' ta atojolic yo' ta xcal ti lequil ach' c'op ta stojol ti jyanlumetic yo' ta xc'ot ta yo'ntonic ta xch'unele.

⁸Ti xojtiquin lec o'ntonal ti Diose, laj yac' ta ilel ti lec ta xil ti jyanlumetique, yu'un laj yac'be yich' ti Ch'ul Espíritu jech c'u cha'al laj yac'botique.

⁹Ti Diose mu jeltosuc yo'nton ta jtojoltic xchi'uc ti jyanlumetique, yu'un pocbil mesbil yo'ntonic c'ot ta sventa ti c'ot ta yo'ntonic ta xch'unele.

¹⁰Va'i un cha'e, ¿c'u cha'al ta xatoy abaic ta stojol ti Diose, ta yac'bel alal icatsil ti jyanlum jch'unolajeletic li'e? Yu'un ti vo'otique mu'yuc xc'ot ta ch'unel cu'untic, mi ja'uc ti jmolmuc'totique.

¹¹Bu ono'ox la xata ti jech une. Yu'un ti stuquique xchi'uc ti vo'otique, c'otem ta co'ntontic ti ta matanal laj jtatic ti jpojel jcoleltic ta sventa yutsil slequil yo'nton ti Cajvaltic Jesuse.

¹²Scotol ts'ijil comic. Lic sts'etan xchiquinic ta ya'yiel c'alal yacal ta yalel ti Bernabee xchi'uc ti Pabloe, ti c'u s'elan laj yac' iluc ti Dios ti oy c'usi ch'ayal ta xc'ot o'ntonal yu'unic c'alal oyic ta stojol ti jyanlumetique.

¹³C'alal laj yo'ntonic ta c'opojele, xi laj yal ti Santiagoe: —A'yio ava'iic ti xi s'elan ta xcale, jchi'iltac:

¹⁴Laj xa yalbotic ca'itic ti Simón Pedroe, ti jyanlumetique, ta sliquebal no'ox, t'ujeic yu'un ti Dios yo' ta xc'ot ta steclumal, sventa yich'el ta muc'.

¹⁵Taj une, co'ol xchi'uc jech c'u cha'al laj yalic ti j'alc'opetic ti xi s'elan laj sts'ibaic comel ta ch'ul c'ope:

¹⁶‘Mi laj taj une, ta xicha'sut talel. Ta jcha'meltsanbe slilijemal sna ti ajvalil Davide. Ta jmeltsan ta ach' ti jinen xae, yu'un ta jcha'va'an ta ach'

¹⁷yo' jech scotol ti yane ta xlic sa'ic ti Diose, jmoj xchi'uc ti muc'tiquil lumetique, ti buch'utic laj staic ti jech c'otemic xa ta jventae.

¹⁸Vo'ne xa laj yac' iluc talel Dios ti vi s'elan ta xc'ot ta pasel tana le'e, c'ot ta pasel yu'un ti sc'op une.’

¹⁹“Ti ta xca'ie, ch'ancutic ti jyanlumetic ti laj xa yictaic comel ti c'u s'elan xch'unojic to ox talel ta vo'nee yo' ta sts'acliic ti Diose.

²⁰Ja' no'ox, jtacbetic batel jlicuc vun ta yalbel ya'iic ti mu soques sbaic xchi'uc ta smoton ti c'usi meltsanbil ta c'abale, ti mu slo'labe sba sjolic ti vinic antse, ti mu sti'beic sbec'tal ti chon bolometic ti mich'bil snuc' ta xchamique, ti mu stun slajesic ti ch'ich'e.

²¹Yu'un vo'ne xa talel, oy buch'utic ta xalic ta jujun jteclum ti oy c'usi tsots albil sc'oplal yu'un ti Moisés ti ta xavtaic ta sq'uel ta ch'ul na ta jujun sc'ac'alil ti cuxob o'ntonale.”

²²Ti jcholc'opetique, ti viniquetic sbainoj ti jch'unolajeletique, xchi'uc ti jch'unolajeletique, lic st'ujic jayibuc jch'unolajeletic ti oy ta stojolique yo' jech ta staquic batel ta jteclum Antioquía xchi'uc ti Pabloe, ti Bernabee. Laj sva'anic ti Judase, Barsabas ti yan sbi xtoque, ti Silase, viniquetic ti ich'bilic ta muc' yu'un ti jch'unolajeletique.

²³Xi s'elan ts'ibabil ti jlic vun ti laj yich'ic batele: “Ti vu'un jcholc'opuncutique xchi'uc ti viniquetic buch'u sbainoj ti jch'unolajeletique, ti jech junotic xae, chabanucoxuc xacalboxuc ava'iic ti jyanlum jch'unolajel nacaloxuc ta Antioquiae, ta Siriae xchi'uc ta Cilicia banomile.

²⁴Laj ca'icutic ti oy buch'u c'ot ta atojolic ti ma'uc tacbil batel cu'uncutique. Laj syanijes avo'ntonic xchi'uc ti sc'opique. La'ochic ta vul o'nton yu'un ti laj yalic tsots sc'oplal ta xavich'ic ti circuncisione, xchi'uc ta spasel ti oy c'usi tsots albil sc'oplale.

²⁵Jech un, laj jcomon-nop jcotolcutic ta sva'anel jayibuc viniquetic ti li' oy ta jtojolcutic yo' jech jmoj xtal sq'ueloxuc xchi'uc ti jchi'iltic Pabloe, ti Bernabee, ti lec xquil jbatic xchi'uque,

²⁶ja' ti buch'utic stenoj sjipoj xcuxlejic ta sventa ti Cajvaltic Jesucristoe.

²⁷Yu'un xi s'elan ta jtaccutic talel ta atojolic ti Judase, ti Silase: Scotol taje, ja' ta xalboxuc ava'iic c'u s'elan ti smelole.

²⁸Scotol lec laj ya'i ti Ch'ul Espiritue, xchi'uc ti vu'uncutic ti mu xa xcac'cutic yan avicatsique. Ja' xa no'ox xi s'elan ti sc'an xapasique:

²⁹Mu xati'ic sbec'tal ti chon bolometic ac'bil ta smoton ti c'usitic meltsanbil ta c'abale. Mu xatun xalajesic ti ch'ich'e. Mu xati'ic sbec'tal ti chon bolometic ti jic'avemic ta xchame. Mu slo'labe sba sjolic ti vinic antse. Jun yutsil ta j'ech'el mi jech ta xapasic taje. Ja' no'ox jech yepal ta xcalboxuc ava'iic. Ac'o xchi'inoxuc ti Diose.”

³⁰C'alal jech tacatic batele, batic ta Antioquía ti c'ot stsobic ti jch'unolajeletique. Laj yac'beic c'otel ti vune.

³¹C'alal laj yavtaic ta sq'uelic vun ti jch'unolajeletique, xmuyubajic xa yu'un patbat ti yo'ntonique.

³²Ti Judase xchi'uc ti Silase, ti ja' j'alc'opetique, laj stsatsubtasbe yo'nton ti jch'unolajeletic ta sventa ti sc'opique.

³³C'alal laj yo'ntonic ti c'u sjalil joc'tsajique, albatic yu'un ti jch'unolajeletic ti junuc yo'ntonic suticuc batel ta stojol ti buch'utic tacvanic talele.

³⁴Ti Pabloe, ti Bernabee comic ta Antioquía xchi'uc yan jch'unolajeletic ti laj yac'beic yipal ta chanubtasvanej ta yalel ti lequil ach' c'op yu'un ti Diose.

³⁶Ech' c'uc sjaliluc un, ti Pabloe xi laj yalbe ti Bernabee: —Batic xtoc ta sq'uelel ti jch'unolajeletic ta jteclumetic ti bu ech' caltic ti sc'op Diose yo' ta jna'tic c'u s'elan oyic.

³⁷Ti Bernabee oy ta yo'nton ta xic' batel ya'i ti Juane, ti sbiinoj Marcos xtoque.

³⁸Ja'uc ti Pabloe mu lecuc laj ya'i ti ta xbat xchi'invanuc ti Marcose, yu'un ictavan comel ta Panfilia banomil, mu'yuc xchi'invan ta stsutsesel ti yabtele.

³⁹Tsots laj svul sbaic, ti xi s'elan c'ot ta pasel ti laj xch'ac sbaique: Ti Bernabee laj yic' batel ti Juan Marcose, ti ochic batel ta barco batic c'alal to Chipre.

⁴⁰Ja'uc ti Pabloe laj st'uj ta yajcoltaobba ti Silase. C'alal laj yich'ic c'ubanel ta sventa syail xc'uxul yo'nton Dios yu'un ti jch'unolajeletique, loq'uic batel ti bu taje.

⁴¹Ech' stsatsubtasbe yo'ntonic ti jch'unolajeletic ti oyic ta Siriae, ta Cilicia banomile.