Read Tzotzil Hechos 16 Bible Online

Hechos 16 - Tzotzil bible

Hechos 16

¹Ti Pabloe c'ot ta jteclum Derbe xchi'uc ta Listra, ti bu laj staic jun jch'unolajel ti sbiinoj Timoteoe, ti ja' griego ti stote, squerem ol jun me' israelal jch'unolajel.

²Ti jch'unolajeletic nacalic ta Listrae, ta Iconio jteclume, lec sc'oplal yu'unic ti Timoteoe.

³Ti Pabloe oy ta yo'nton ta xchi'in ta xanobal ti Timoteoe. Va'i un, ba'yel laj yac'be yich' circuncisión yo' jech mu soc yo'ntonic ti israeletic nacalic ti bu taje, ti sna'ojic lec ja' griego ti stote.

⁴Ti buyuc no'ox ta x'ech' ta scotol ti jteclumetic taje, ta xalbeic ya'i ti jch'unolajeletic ti c'u s'elan laj scomonopic ti jcholc'opetique xchi'uc ti viniquetic ti sbainojic ti jch'unolajeletic ti oyic ta Jerusalene.

⁵Ja' yu'un un, ti jch'unolajeletique oy no'ox yip yo'ntonic ta ch'unel ti sc'op Diose xchi'uc yacalic ta epajel jujun c'ac'al.

⁶Ti Ch'ul Espiritue mu'yuc xac' ochuc batel ti Pablo ti Silase ta yalel ti lequil ach' c'op ta Asia banomile. Jech o xal jelavel ijelavic ta Frigia, ta Galacia banomil.

⁷C'ot c'alal to sts'ac Misia banomil. Laj snop ti ta x'ochic ta Bitinia banomile. Ja'uc ti Espíritu yu'un ti Jesuse mu'yuc bu laj yac' ochicuc batel.

⁸Jelavel jelav ta Misia banomil, yalic batel ta Troas jteclum ta ti' nab ti bu ta xloc' x'och ti barcoe.

⁹Ti bu taje, xi s'elan ac'bat yil ti Pablo ta ac'ubaltic co'ol s'elan jun macedonia vinic va'al ta sc'anel vocol: “Ba coltauncutic ta Macedonia.”

¹⁰C'alal jech laj yil ti Pabloe, laj jmeltsan jbacutic yo' jech ta xibatcutic ta Macedonia banomil, yu'un laj jna'cutic ja' stuc ti Dios ta xiyic'uncutic batel ta yalel ti lequil ach' c'ope.

¹¹Li'ochcutic ta barco ta Troas un. Tuc' libatcutic ta Samotracia banomil ti joyobtabil ta nabe. Ta yoc'lomal un, lic'otcutic ta Neápolis jteclum.

¹²Taj une, libatcutic c'alal to Filipos ti ja' jun colonia yu'un ti romanoetique, jun jteclum ti cajal c'otem sc'oplal ti oy ta muc' ta lum Macedonia banomile. Licomcutic jayib c'ac'al ti bu taje.

¹³Ta sc'ac'alil ti cuxob o'ntonale, liloc'cutic batel ta sti'il jteclum ta nopol ti' uc'um, yu'un laj jnopcutic ti oy bu xu' ta xc'opoj xti'in ti israeletique. Ti bu taje, chot xichicutic c'otel ti laj calbecutic ya'i lequil ach' c'op ti antsetic ti c'u yepal tsobolique.

¹⁴Oy jun ta scotolic ti sbiinoj Lidiae, liquem talel ta jteclum Tiatira, ja' jun jchon lequil poc' ic'-ic' losantic sba stsajale. Ti jech ta xich' ta muc' Dios ti ants taje, ti ts'etel xchiquin ta ya'yiel ti lequil ach' c'ope, tijbat yo'nton yu'un Dios ta sts'etanel xchiquin ta ya'yiel ti c'u s'elan ta xal ti Pabloe.

¹⁵Laj yich' vo' xchi'uc ti yalab xnich'nabe. C'un to un xi laj sc'anbuncutic vocole: —Mi ta xavil jch'unolajelun ta melel yu'un ti Cajvaltique, la'ic, comanic ta jna. Laj sujuncutic yo' jech ta xicomcutic ta sna.

¹⁶Oy bu c'ot ta pasel un, c'alal ta xibatcutic bu ta stsob sbaic ta c'opojel ti'inele, laj jtacutic ta be jun jmosovil tseb ti ventainbil yu'un pucuj ti sna' xt'unvane. Ti jech sna' xt'unvan ti tsebe, yepal no'ox ta spas canal taq'uin yu'un ti yajvaltaque.

¹⁷Ti tseb taje xi x'avet ta xal ti sts'aclioj batel ti Pabloe xchi'uc ti vu'uncutique: —Ti viniquetic le'e, ja' yajtuneltac ti cuxul Dios ti oy ta vinajele, ti ta xalboxuc ava'iic sc'oplal ti pojel colele.

¹⁸Ep c'ac'al jech ta spasilan ti tsebe. Mu xa ts'icbajuc laj ya'i ti Pabloe. Sq'uel xcha' sutel spat ti xi laj yalbe ti pucuj ti yu'ninoj ti tsebe: —Ta sventa ti Jesucristoe, ta xcalbot ava'i, loc'an batel ta stojol ti tsebe. Ta jech yepal ti tsebe, ictae comel yu'un ti pucuje.

¹⁹Ja'uc ti c'alal laj yilic ti yajvaltac ti tseb ti mu'yuc xa ta x'och ti taq'uin ta sc'obique, laj stsaquic ti Pabloe, ti Silase. Bat yaq'uic ta stojol j'opisialetic ti bu ta xchapanvanique.

²⁰Bat sva'anic ta stojol jchapanvanejetic ti xi lic yalique: —Ti israelal viniquetic li'e ta syanijesbe yo'nton ti jteclume.

²¹Mi ja'uc stac' xcac' quetic ti c'u s'elan ta xchanubtasvanique, mi ja'uc ta spasel ti c'usi ta xalique, yu'un romanootic.

²²Voch xiic liquel ti jnaclejetic ta scontrainel ti Pabloe, ti Silase. Ti jchapanvanejetique laj yalic mantal ti ac'o yich' loq'uesbel ti sc'u'ique yo' ta xich'ic tsitsel ta vach'.

²³C'alal ep xa laj stsitsique, laj sjipic ochel ta chuquinab. Laj yalbe mantal ti jchabiej chuquinab ti ac'o xchabi leque.

²⁴C'alal jech laj yich' mantal ti jchabiej chuquinabe, laj stic' ochel ta yut to chuquinab ta j'ech'el, ti laj slats'beic comel ta ch'ojbil te' ti yacanique.

²⁵Ta o'lol ac'ubal un, ti Pabloe, ti Silase c'opoj ti'inic, xchi'uc ta xq'uejinic ta sq'uejimol Dios, ti ts'etel xchiquinic ta xa'iic ti yan jchuqueletique.

²⁶Ta jech to yepal un, tal tsots niquel ti laj sc'uyilanbe yibeltac spac'obaltac ti chuquinabe. Ta yorail no'ox jam scotol sti' ti chuquinabe, ti laj coluc scotol ti jchuqueletic ti chucajtic ta carinae.

²⁷C'alal julav ti jchabiej chuquinabe, laj yil ti jamajtic xa sti' ti chuquinabe. Laj snit loq'uel ti yespadae yo' jech ta smil sba, yu'un laj snop ti jatavic xa batel scotol ti jchuqueletique.

²⁸Ti Pabloe xi lic yavtae: —Mu xamil aba, li' oyuncutic jcotolcutique.

²⁹Va'i un, ti jchabiej chuquinabe laj stac ta c'anel c'oc', ti xnicnun xa ta xi'el och batel ta anil. Ba quejluc ta yoc ti Pabloe, ti Silase.

³⁰Ta jech yepal un, laj sloq'ues batel ti jcholc'opetique, ti xi laj sjac'bee: —Yojtot, ¿c'usi stac' ta jpas yo' ta xicol?

³¹Xi tac'avique: —C'otuc ta avo'nton ta xch'unel ti Cajvaltic Jesucristoe, ta xata apojel acolel xchi'uc ti avalab anich'nabe.

³²Laj yalbeic ya'iic ti sc'op Diose, xchi'uc ti c'u yepal oy ta snae.

³³Ta yorail ti ac'ubal taje, ti jchabiej chuquinabe lic spocbe syayijemal ti jcholc'opetique. Ta jech yepal ti stuque xchi'uc ti yalab xnich'nabe, ac'bat yich'ic vo'.

³⁴Ta ts'acal to un, laj yic' ech'el ta sna ti Pablo ti Silase, tey laj yac' ve'uc ti xmuyubaj xa xchi'uc ti yalab xnich'nab ti c'ot ta yo'ntonic ta xch'unel ti Diose.

³⁵Ti sob ta yoc'lomal une, ti jchapanvanejetique laj staquic batel mayoletic ta stojol ti jchabiej chuquinab ti ac'o sloq'ues batel ti Pabloe, ti Silase.

³⁶Ti jchabiej chuquinabe xi laj yalbe ya'i ti Pabloe: —Laj quich' mantal yu'un ti jchapanvanejetic ti ta xajcoltaoxuc loq'uele. Junuc xa avo'ntonic, batanic.

³⁷Ja'uc ti Pabloe xi laj yalbe ya'i ti mayoletique: —Romano vinicuncutic, ta jech yepal laj quich'cutic tsitsel ta sba ta satic ti jnaclejetic ti c'alal mu'yuc to chapanbil c'usi ti jmulcutique, ti ja' no'ox jip xi xi'utecutic ochel ta chuquinabe. Tana une, ¿mi yu'un ta mucul ta xisloq'uesuncutic ta chuquel? Laj to c'op unbi. Ac'o tal sloq'uesuncutic stuquic.

³⁸Ti mayoletique bat ya'ibeic sna' ti jchapanvanejetic ti va'i s'elan taje. Ti c'alal laj ya'iic ti ja' romano viniquetique, xi'ic ta j'ech'el.

³⁹Ti jchapanvanejetique bat slequil c'oponic ti Pabloe, ti Silase ti ch'aybaticuc ti smulique. Laj sloq'uesic ta chuquinab. Laj sc'anbeic vocol ti ac'o loq'uicuc batel ta muc' ta lume.

⁴⁰C'alal loq'uic ta chuquel ti Pabloe, ti Silase batic ta sna ti Lidiae. C'alal laj yo'ntonic ta svu'lanel ti jch'unolajeletique xchi'uc ta stsatsubtasbel ti yo'ntonique, loq'uic batel ti bu taje.