Read Tzotzil Romanos 11 Bible Online

Romanos 11 - Tzotzil bible

Romanos 11

¹Li'e, ta jac' ca'i xtoc: ¿Mi j'ech'el laj sjip laj sten o steclumal ti Diose? ¡Bu xata ti jeche! Ti vu'un eque, israelun, snitilulun ti Abrahame, li'ayan talel ta jun ta xlajchebal xnich'on ti Israele, ja' ti Benjamine.

²Ti israeletique, ta sliquebal no'ox, biseic talel yu'un Dios ta steclumal. Mu'yuc sjipoj stenoj avi tanae. ¿Mi mu xana'ic ya'yel ti xi laj stic'be smul israeletic ti j'alc'op Elías c'alal c'opoj ti'in ta stojol ti Diose?

³“Cajval, Jch'ul tot, laj xa smilic ti avaj'alc'optaque. Laj xa slilinic ti altaretic avu'une. C'ajomal xa no'ox jtuc cuxul licom. Ja' jech xtoc ta xismilicun ya'iic ec.”

⁴Ja'uc ti Diose xi laj staq'ue: “Laj xa jch'ac talel ta jtojol vucmil (7,000) ta vo' israeletic ti mu'yuc squejanoj sbaic ta stojol ti meltsanbil dios Baale.”

⁵Ja' no'ox jech avi tana li'e, ta sventa yutsil yo'nton ti Diose, oy to jayibuc scomelal ti israeletic ti t'ujbilique.

⁶Ta slequilal xa no'ox yo'nton Dios ti jech t'ujbilique, ma'uc xa ta sventa ti oy c'usitic lec ta spasic ti stuquique. Ti yu'unuc ta sventa yabtel stuquic ti jech t'ujbilique, ma'uc xa yutsil slequil yo'nton ti Dios unbi.

⁷¿C'uxi un cha'e? Ti c'usi juteb ta yo'nton ta sa'ic ya'iic ti israeletique, mu'yuc laj staic. Yu'un ja' no'ox laj staic ti buch'utic t'ujbilic yu'un ti Diose. Ti yane ja' no'ox yijubtasbat yo'ntonic.

⁸Yu'un xi ta xal ti ch'ul c'ope: “Ch'ayesbat snopbenic yu'un ti Diose. Jech to staoj yav ta spasic avi tana li'e. Ac'bil satic ta sq'uelel, mu xilic. Ac'bil xchiquinic ta ya'yiel, mu xa'iic.”

⁹Xi laj yal xtoc ti Davide: “Joybijuc ta spets'alic ta syacobilic ti q'uin ta spasique yo' jech sbosi yacanic xchi'uquic, yo' jech ta xich'ic tsitsel.

¹⁰Ac'o joybijuc ta ma'sat yo' mu xilic. Vujq'uijuc ta j'ech'el ti spatique.”

¹¹Ta jac' ca'i xtoc tana li' une: ¿Mi j'ech'el bajic o ta lum ti israeletic ti c'alal laj sbosi ti yacanique? ¡Bu xata ti jech bajic o ta lume! C'alal jech laj sbajic lequilal ti israeletique, ja' laj staic coltael yu'un Dios ti jyanlumetique yo' jech licuc yit'ixal yo'ntonic ti c'alal ta xilic ta staic scolelic ti jyanlumetique.

¹²Mi ja' laj sta sc'ulejalic ti jyanlumetic ti oy ta sjoylej banomil ta scoj stoyobbailic ti israeletique, jech o xal unbi, ja' jun to yutsil ta xc'ot ta jtojol jcotoltic ti c'alal ti israeletic ta xlic xcha'ac' sbaic ta ventainel ta stojol ti Diose.

¹³Ja'uc le'e, oy c'usi ta jc'an ta xcalboxuc ava'iic ti vo'oxuc jyanlumoxuque. Ta sventa ti jech tacbilun yu'un Dios ta atojolique, tsots sc'oplal ta xca'i ti cabtel ac'bilune.

¹⁴Ta jc'an ti licuc yit'ixal yo'ntonic ti jchi'iltac ta sventa ti vo'oxuque yo' jech ta staic scolelic jech c'u cha'al ataojique.

¹⁵Yu'un c'alal jipbil tenbil comic yu'un Dios ti jchi'iltaque, scotol banomil ta staic ti lec xil sbaic xchi'uc ti Diose. C'alal mi ta xic' talel yan velta ta stojol Dios yo' ich'bilic ta venta ta xc'otic yu'une, toj ech'em lec ti c'usi ta xc'ot ta pasele, yu'un ta x'ac'bat xcuxlejalic ti buch'utic chamemic to oxe.

¹⁶Mi c'otem ta sventa Dios ti jbej pan ti c'u yepal laj yich' vots'el ti jarinae, scotol ti c'u yepal vots'bile c'otem ta sventa. Mi c'otem ta sventa Dios yibel ti jpets te'e, c'otem ta sventa ti sc'obtac xtoque.

¹⁷Ti olivo te'e, ja' sc'oplal ti israeletique. Laj yich' setel loq'uel jlom ti sc'obtaque. Ti bu laj yich' ti setele, laj yich' ts'aquel ta te'tical olivo te' ti ja' ac'oplalic ti vo'oxuc jyanlumoxuque. Laj atsaquic lum yu'un ti bats'i olivo te'e xchi'uc lacuxiic ta sventa.

¹⁸Ja'uc le'e, mu xatoy aba ta sbajel ta stenel ti bats'i sc'obtac ti laj yich' setele. Mi jech ta xapase, vuleso ta ajol ti ma'uc liquem talel xch'iel ti yibel ta aventae, naca avich'ojbe xcuxlej ta sventa ti yibele.

¹⁹Xu' nan xi ta xavale: “Ti laj quich' ts'aquel ta olivo te'e, yu'un laj yich' setel loq'uel ti sc'obtaque.”

²⁰Jech xaval ava'uc ti laj yich' setel loq'uele ta scoj ti mu xc'ot ta yo'nton ta xch'unele. Ti jech ts'acbilot xchi'uque, c'ajomal ta sventa ti c'otem lec ta avo'nton ta xch'unele. Xi'an, mu xatoy aba.

²¹Yu'un ti Diose mu lecuc laj yil ti sbats'i c'obtaque. Laj to c'op ma' ti lec ta xayilic mi ta xatoy abaique.

²²A'yio ava'iic, ti Diose lec yo'nton ta j'ech'el, ac'o mi jbel xc'opoj xtoc. Jbel xc'opoj ta stojol ti buch'utic laj sbajic ti slequilalique. Oy slequil yutsil yo'nton ta atojolic mi chacuxiic ta stamel ech'el ti c'u s'elan oy ta yo'ntone. Mi mu jechuque, ta xavich'ic setel loq'uel.

²³Mi ta xlic xch'unic Dios ti israeletique, ta xlic yich'ic ts'aquel ta ach' xtoc unbi. Yu'un ti Diose oy smuc'ul stsatsal, xu' yu'un xcha'ts'aquel.

²⁴Ti vo'oxuc jyanlumoxuque, co'ol a'elanic te'tical olivo te' ti laj avich'ic setel talele, ti laj avich'ic ts'aquel ochel ta bats'i olivo te'e. Mi jech laj avich'ic pasbel ti vo'oxuque, ja'uc xa van ti israeletique ta ora no'ox ta sts'acatic ochel ta ach' yu'un ti Dios ti bu laj yich' setel loq'uel ti sc'obtaque. Ta jliquel no'ox ta stsac lum.

²⁵Ti jech jchi'il jbatique, ta jc'an ta jvinajesboxuc ava'iic ti c'usi snopoj ta spas ti Dios ti mucul to oxe, yo' mu xabis abaic ti bij xava'i abaique: Mi c'ot ta ts'aquiel ti c'u yepal ta sta scolelic ti jyanlumetique, mu jechuc ta xcom o ti yijubtasbat yo'ntonic ti israeletique.

²⁶C'alal jech ta xc'ot ta pasel taje, scotol israeletic ta staic ti scolelic jech c'u cha'al ti xi ta xal ti ch'ul c'ope: “Ti Jpojvaneje ta xlic talel ta Sión, ta xch'aybe smul ti israeletique.

²⁷Taje, ja' jtrate xchi'uquic c'alal ta jch'aybe ti smulique.”

²⁸Ti c'alal laj sbajic lequil ach' c'op ti israeletique, contrainbil c'otic yu'un ti Diose yo' ti vo'oxuc jyanlumoxuque ta xataic ti acolelique. Ja'uc ti stuquic une staoj yav c'uxubinbilic yu'un ti Diose, yu'un t'ujbilic ti smolmuc'totic ta vo'nee.

²⁹Ti c'u s'elan loc' ayan ta yo'nton ti Dios ta xaq'ue, mu spoj sutel, mi ja'uc laj xa xcha'na' ti buch'utic laj yic' talele.

³⁰Ta vo'ne ti vo'oxuc jyanlumoxuque, toyobbaoxuc ta stojol ti Diose. Ja'uc avi tana li' une, laj ataic c'uxubinel yu'un ti Dios ta scoj ti israeletic laj sbajic ti c'uxubinele.

³¹Ti jech laj sbajic c'uxubinel ti israeletique, oy bu ta sta sc'ac'alil ta staic c'uxubinel yu'un Dios jech c'u cha'al laj ataic ti vo'oxuque.

³²Yu'un ti Diose, jcotoltic laj yilotic ti co'ol jtoyobbaotique yo' jech jcotoltic co'ol ta jtatic c'uxubinel.

³³Bats'i mu albajuc yutsil yo'nton ti Diose. Mu stac' alel bu to c'alal spajeb ti sbijile xchi'uc ti c'usi ta snope. Mu'yuc buch'u xu' ta xal ti c'u s'elan snopoje. Mu jna'tic bu c'alal ti c'usi snopoj spase.

³⁴¿Mi yu'un oy la buch'u junucal xa'ibe snopben ti Diose? ¿Mi oy la buch'u xu' yu'un ta sbijubtasel?

³⁵¿Mi yu'un oy la buch'u oy c'usi laj yac'be ba'yuc yo' jech ta xquextabat sutel?

³⁶Yu'un scotol ti c'usitic oye, ta xlic talel ta stojol ti Diose, ja' pasbil yu'un yo' ta xtun yu'un. ¡Vinajuc slequilal sbatel osil ti Diose! Jechuc.