Read Tzotzil Romanos 12 Bible Online

Romanos 12 - Tzotzil bible

Romanos 12

¹Ja' yu'un un, Jchi'iltac, ta sventa syail xc'uxul yo'nton ti Dios ta jtojoltique, ta jc'anboxuc vocol, cuxul ac'o abaic ta tunel jech c'u cha'al ti matanal ti c'otem ta sventa ti Diose, ti jun yutsil slequil ta xich' aq'uel ta stojole. Taje, ja' jech ta ich'el ta muc' ti Diose.

²Mu xa jechuc xanopic jech c'u cha'al ta spasic ti jnaclejetic ta banomil ti yan sjol yo'ntonique. Jeluc ti snopbenal avu'unique yo' jech ta x'ach'ub ti acuxlejalique. Jech ta xlic ava'ibeic yo'nton ti Diose, ja' ti c'usi lec ta pasele, ti c'usi xmuyubaj yo'nton yu'une, ti c'usi lec tuc' ta xile.

³Ti jech ac'bil cabtel ta sventa slequil yo'nton ti Diose, ta xcalboxuc ava'iic acotolic ti mu'yucuc me buch'u cajal xa'i sba ti c'u s'elan ta snope. Ti jujunoxuque lequil nopic c'u yepal laj scoltaoxuc ti Dios ta sventa ti c'ot ta avo'ntonic ta xch'unele.

⁴Jech c'u cha'al ti ep ta tos ti c'usi oy yu'un ti jbec'taltique, mu xco'olaj yabtelic ti jujutose.

⁵Jech ti vo'otique, ac'o mi yepal oyotic, jun no'ox c'otemotic ta stojol ti Cristoe. Junotic ta jcotoltic jech c'u cha'al ti jbec'taltic ti oy c'usi ep ta tos oy yu'une.

⁶Ti Diose yantic o laj yac'botic jbijiltic ta jujun tal, ja' ti c'u s'elan loc' ayan ta yo'nton ta yac'belotique. Jech un, mi ja' laj yac'botic jbijiltic ta scaj'alel ti c'usitic ta xc'ot ta pasele, caltic jech c'u cha'al c'otem ta o'ntonal ta xch'unele.

⁷Mi ja' laj yac'botic jbijiltic yo' ta xijtun yu'un ti yane, lecuc tuncutic ta stojolic. Mi ja' sbijil ac'bat ti ta chanubtasvaneje, ac'o yabtelan o ti chanubtasvaneje.

⁸Mi ja' sbijil ac'bat ti ta stsatsubtasbe yo'nton ti yane, ac'o yabtelan o ta yaq'uel yip ti o'ntonale. Mi ja' sbijil i'ac'bat ti oy c'usi ta xaq'ue, nijet chimetuc no'ox. Mi ac'bat sbijil ta yalel ti c'usi sc'an pasele, bijuc ti c'u s'elan ta xal mantale. Mi ac'bil sbijil ta scoltael ti buch'u abol sbaique, muyubajuc no'ox ta spasel.

⁹J'ech'eluc c'ux xava'i abaic ta jujun tal. Jipic tenic xtoc ti c'usi chopole. Ac'beic yipal ta spasel ti leque.

¹⁰Lecuc xavil abaic ta jujun tal ta sventa ti co'ol achi'il abaique. Co'oluc xavil abaic. Ich'o abaic ta muc' ta jujun tal.

¹¹Ac'beic yipal, mu xach'ajubic. Ta sjunuluc avo'ntonic, tunanic yu'un ti Cajvaltique.

¹²Muyubajanic ta sventa ti oy c'usi apatoj avo'ntonic ta smalaele. Oyuc yip stsatsal avo'ntonic c'alal ta xavich' avocolique. Mu me xavicta abaic ta c'opojel ti'inel.

¹³Coltaic me ti yu'untac Dios ti oy c'usi ta xtun yu'unique. Ich'biluc ta muc' c'otuc avu'un ti buch'u ta xasvu'lanique.

¹⁴C'anbeic slequilal Dios ta stojol ti buch'u ta xayilbajinique. Mu xa xabisic ta cotol chaval.

¹⁵Muyubajanic xchi'uc ti buch'u xmuyubajique. Jmoj oc'anic xchi'uc ti buch'u ta x'oc' x'avanique.

¹⁶Junuc avo'ntonic cuxianic acotolic. Ma'ucuc ti toyobba xava'i abaique. Co'ol xavac' abaic xchi'uc ti buch'u biq'uit yac'oj sbaique. Ma'ucuc ti toj ech'em bij xava'i abaique.

¹⁷Mu xapacbe abaic sutel ta spasbel ti c'usi chopole. Ac'beic yipal ta spasel ti c'usi lec ta stojol scotolique.

¹⁸Ti bu xa c'alal xu'e, ac'beic yipal yo' jun avo'ntonic ta xacuxi acotolic.

¹⁹Jchi'iltac, ma'uc aventaic ta spaquel sutel ti buch'u oy c'usi chopol ta spasboxuque. Ac'beic sventain ti Diose, yu'un ja' sbainoj ta stsitsel. Yu'un xi ta xal ti ch'ul c'ope: “Oy ta coc ta jc'ob ti chapanele, vu'un ta xcac'be stojol.”

²⁰Xi ta xal xtoque: “Mi ta xvi'naj ti acontrae, ac'bo sve'el. Mi ta xa'i taqui ti'ile, ac'bo vo' yuch'. Ta stsajub sat avu'un ta xq'uexlal mi jech ta xapasic taje.”

²¹Mu xavac' abaic ta tsalel yu'un ti c'usi chopole. Ja' lec tsalic ti c'usi chopol ta sventa ti c'usi lec ta xapasique.